منذ 4 سنوات
  • ما قبل الحمل
خانها الزمن عندما وُلدت معها مشكلتها الأبدية… وقعت بين خيارين أمرهما صعب… كان يجب عليها أن تختار بأن تكون أميرة أو أسيرة في ليلة واحدة… أويعقل أن تفكر في الأمر مرارا… فما ستختاره معروفا… ولكن بالتأكيد هناك أمر مخفي جعلها تنتفض وتختار الثاني… -إيلين: واللي بيسمع كلمة إمو شو منقلو… -الأولاد (عم يزقفو): شاطر شاطر… كنت عم لعّب الولاد… عم نغنّي ونزقف… بس عقلي مش معي… عم راقب هيداك الطفل المنزوي… كرم… الوحيد… العدواني… اللي عمرو ما بيتعدّى الخمس سنين… كيف قاعد وعابس… مقعّد إختو تينا اللي بتصغرو بسنة ونص بحضنو وغامرها… إلو من أول ما اجى عالروضة شاغل تفكيري… أفكار تاخدني وتجيبني… ألف سؤال وسؤال… قطع حبل افكاري ياسمين أكتر بنت بحبها بالروضة… عمرا حوالي الأربع سنين… وقفت بوج كرم وحجبتلي الرؤية عنو… كانت عم ترقص… وتمشي يمين شمال… شردت فيها… بعيونا… بجمالها… بأهلها والنعمة اللي الله واهبن ياها…... خلص النهار… وكل ولد راح ع بيتو… كنت طالعة من البوابة الرئيسية وعم دور ع مفتاح سيارتي بجزداني… -إيلين: هه لقيتوو… رفعت راسي… وشفتو… اي شفتو… هوي… كان رِضا… إلي أكتر من سنة مش شايفيتو… لميت كل شي في قوة بالدنيا… لحتى ما أضعف قدامو… او ابكي… او حتى عيوني تفضحني أدي اشتقتلو… قرّب مني وبدون مقدمات ولا سلام ولا شي… -رضا: اشتقتلك……… اشتقتلك إيلين…….. (هون خانتني اللحظة… خانتني القوة وتخلت عني… حتى عيوني خانتني)….. -إيلين:………… (ضاعوا الكلمات…. ضاع الحكي… صوتي اختفى… كل شي اتدربت عليه من حوار عالمراية اذا التقيت في شي يوم… ما قدرت انطق منو حرف)….. -رضا: ما رح تحكي شي…. طيب… ما سألتك اذا منيحة لإني بعرف انك ما ح تكوني منيحة بغيابي…. انا متأكد… -إيلين: يييي علينا…. خففلي ثقة بحالك…. انا نسيتك من زماااان…. زماان كتيير…. -رضا: كزابة……… برمت ظهري بسرعة وركبت بسيارتي ومشيت… دموعي ما استأذنو وبلشو ينزلو بغزارة…. هربت لإني عرفت انو هالدموع ح تخوني قدامو…. كنت عم سوق بطريقة جنونية…. عم اضرب الدركسيون وصرخ….. -اي…. اي….. كزااابة…. كزاابة… معك حق…. وصلت عالبيت… مسحت دموعي… ونزلت من السيارة…… فتت لقيت امي وابي وخيي جعفر واختي ملاك قاعدين عالغدا ناطريني….. -ابي: ليه تأخرتي بنتي…. يلا تعي عالأكل…. -ايلين: مش جوعانة…. رايحة ع غرفتي…. -امي: بنتي عم تبكي كنتي ما هيك…. -ايلين: لا لا امي بس فات بعيوني غبرة انا وطالعة عالدرج…. -جعفر: اختي شو بكي…. عيونك مورمين كتيير… اكيد غبرة ما بتعمل كل هالشي…. قرب لعندي وغمرني…. وملاك ما حكت حرف…. كانت عارفة اني ح احكيلها لما نكون لوحدنا…. وضل كل واحد يسألني… حاصروني بالزاوية بالحكي… لنطقت… -إيلين: شفت رضا…… كلن شهقوا سوا…. ولبعد دقايق لحتى شالو ايديهن عن تمن من الصدمة…. مش الصدمة انو رضا رجع… الصدمة شو رح عاني بعد هاللقاء… ادي اخدو وقت لنسوني ياه…. -امي: اهدي حبيبتي….. بس نحن عطول كنا نقللك انو ما ح تلاقي متلو…. واحد عارف بمشكلتك وراضي… ليه لترفضي… فخلص اهدي وانسيه…. بعصبية رفعت ايدي لإمنع اي حدا يحكي وقلت: امي ارجوك خلص……… حتى انتي مش قادرة تلفظي مشكلتي….. لسانك ما بطاوعك تقوليها…… بتكتفي بقول مشكلتك….. اذا انتي هيك كيف هوي امي…… حملت حالي وفتت ع غرفتي… غيرت تيابي… وقفت بوج المراية… حكيت شوي… وبكيت… وبعدا دفنت حالي تحت الحرام…. سمعت امي عم تقلها لملاك تجي تطل عليي…. بس ملاك كانت الوحيدة بتفهمني… انو بهاللحظات ما بحب احكي مع حدا…. او يقرب مني حدا…. ردت عليها ملاك بلأ وقالتلا… -ملاك: هلأ الشي اللي بحاجتو هوي مرايتها… تختها… وحرامها… اتركيها امي… لتروق بس… إي معا حق… مرايتي اهم شي بحياتي… اول وحدة بحكيلا اللي بحسو او بعيشو… اذا كان فرح او حزن… وبعدا بنام مبسوطة او زعلانة بتختي تحت حرامي… ولما بفيق ملاك بتكون تاني حدا بخبرو بالشي الحلو او البشع… (فيني قول انو عيلتي مثالية… لأبعد حد… ووضعنا المادي متوسط… مش محتاجين حدا… كلنا حناين ع بعض… قليل ما يصير مشاكل… خيي أحن واحد عليي… بيكبرني بسنتين… متخرج من الهندسة… وملاك بتصغرني ب تلات سنين… اخر سنة جامعة الها… عم تدرس ادب انكليزي… اما انا عمري 24 سنة…. تخرجت من 3 سنين… درست تربية حضانية… بسبب هوسي وغرامي بشي اسمو طفل……. طفل….. طفل….. طفل… ما اجمل هالكلمة…. وبسبب تعلقي بالولاد فتحت روضة للولاد اللي تحت عمر الست سنين… الروضة بيتي التاني…. ع اد ما بيت اهلي حلو وهادي… وع اد ما مبسوطة فيه… وع اد ما عيلتي منيحة… بس اكيد مش بحلاوة الحياة بين هالاطفال…) وعيت بعد شي 3 ساعات ع اصوات بالصالون… قمت واتسمعت… ركزت بالصوت… عرفتو كتير منيح… كنت عارفة انو ح يجي…. يتبع…

56 تعليقات

العضوة: 275918 , منذ 4 سنوات

الجزء الثاني: غسلت وجي وضبيت شعري وفتت… -ايلين: شو جابك رضا…. ما تعبتتتت… -رضا: ولا رح اتعب… بحبك… افهمي… ليه ما عم تفهمي اني ما عندي مشكلة بشي… رح عيشك اميرة… انسي مشكلتك وفكري بمستقبلنااااا…. -عصبت كتير وقلت: خلصنا… خلصناااااا… حتى لفظ ما عم تقدر تلفظااا.... قولااااا قولااااا لييه خااايف… عاااااااقر…… عااااقررررر…….. اياااا مستقبل قلللي… مستقبل بلا ولااااد…. ادي رح تتحمل… سنة سنتين تلاتة…. اخر شي ح تمل وتقللي بدي حركة وصوت ولد بالبيت…. انا اللي بعرف اديش معلق بالولاد انت…. ع اد ما انا معلقة فيهن واكتر….. بدك تتحمل؟؟…… طيب واتحملت…. امك؟؟؟؟ ما ح تقول بدها حفيييييد لإبنا الوحيييد…. رجااااءااااا ولا حرف…. قوم فِل من هون… ما حدا حكا حرف منن….. يمكن لإنو أول مرة بشوفوني هالقد معصبة…. معصبة وعيوني عم يهرّو دموع بنفس اللحظة….. ما بعرف كيف طلع معي كل هالحكي…. بس كان في شي جواتي لازم فجرو بأي طريقة…. قام رضا من محلو وما حكا حرف… وصل عالباب…. فتل ظهرو… شفت عيونو كانت عم تقاوم الدمعة… اول مرة بشوفو بهالمنظر…. بس حاولت ما اضعف…… -رضا: ما بلفظا عشان ما اجرح مشاعرك….. بخاطرك…. وو….. بحبك…………

العضوة: 275918 , منذ 4 سنوات

ضعفت……. اي اي…. ضعفت…. ركضت وغمرتوووو…. وكنت عم اشهق…. وهوي شادد عليي…. قلبي عم ينده خليك…. بس عقلي عم يقول فِل من هون……. ما بعرف ادي الوقت اللي ضليت في بحضنو عالباب…. بس هوي بوقتا كسرني لما بكي…. وشهق معي…… اول مرة بيبكي…. قمت ايديي عن ظهرو…. شد عليي اكتر…… رجعت شلتن مرة تانية حطيتن ع صدرو وحاولت بعدو عني…. قلتلو روح روح روح من هون… كان في صراع جواتي… قلبي عم يقول ضل ضل ضل… ما استرجيت اطلع بعيونو….. ضغطت ع صدرو وبعدتو عني بثانية مع كلمة قلتها حسيت انها غرزت بقلبو متل السكين….. (((الوداع)))……. قلتا وسكرت الباب…… لزقت ضهري بالباب…. وشوي شوي صرت انزل ع ركبي….. وقعدت بالأرض……. وبكييييت كتيير…. وأهلي عم يواسوني…. عم يحاولو يخففو عني….... بتذكر هيدا الموقف نفسو صار من قبل…. لما حددنا موعد عرسنا انا ورضا…. ورحنا لنعمل فحوصات شاملة لكل شي… وفحص الزواج كمان…. وقت طلعت النتائج وقلي الدكتور مستحيل تحملي بحياتك…….. اي اي…… رجعت ووقفني رضا ع نفس عتبة هالباب ليقلي شو بكي وشو قللك الحكيم…… كيف غمرتو وبكيت بحرقة… وقلتلو يروح يشوف نصيبو…. ما سمحتلو يحكي وسكرت بوجو الباب….. وانهرت وقعدت بالأرض…. واهلي حواليي….

العضوة: 275918 , منذ 4 سنوات

بعد يومين……. كنت بالروضة ولمحتو عم يراقبني من بعيد…. بس ما اهتميت….. كنت بالجنينية عم ببرم عطاولات الصغار لشوف شو رسمو…….. لفت نظري رسمة كرم…. الطفل العدواني….. كان راسم أب وام واربع اطفال بس كلن باللون الاسود…. ومشخبط عليهن كتيرر…. لدرجة ح يخزق الورقة من قوة ضربة القلم………. وقررت اسأل اهلو عن وضعو…… لما خلص الدوام….. اجت الست ثمينة لتاخد حفايدها كرم وتينا…. وقفتا وحكيت معا…. -ايلين: لو سمحتي مدام فيني احكي معك كلمتين… -ثمينة: اكيد يا بنتي…. قليلي….. -وين اهل هالاطفال…. ليه عطول بتجي انتي وراهن…. -هني اربع ولاد…. امن ماتت هيي وعم تولد تينا… الكبير هادي 10 سنين…. واللي بعدو سام 8 سنين… وكرم وتينا…. وبيهن بعد ما توفت مرتو تزوج وحدة كرمال هالولاد…. بس بعد شي سنة طلقها لانو ما كانت تعامل الولاد منيح…. ورجع تجوز سماح…. صرلو سنة ونص معا…. عندو ولد منها عمرو اشهر….. فكرمال هيك سماح ما فيها تجي…. وابني عطول مشغول لازم يجيب لقمة العيش لهالايتام….. بس ليه عم تسألي….. -(بقلبي كنت عم قول هاي هيي عدواني لانو ربيان بلا ام…. والقصة كلها مرت اب…. والاب مش فاضيلن)…… اه… لا ولا شي…. بس سؤال… لانو كتير معلق بإختوو… بحبها كتيير…… رحت عالبيت وكرم شاغلي تفكيري…. تغديت وفتت ع غرفتي….. -ملاك: شو شاغل تفكيرك اختي…. -ايلين: كرم……… -ملاك: يييي بعدك بهالقصة….. كيف صار… اتحسن عن قبل؟؟ -ايلين: صار عدواني اكتر….. تخايلي من كم يوم اجا ولد عمرو 5 سنين واعطاها وردة لـ تينا اختو لكرم…. واذ بيجي كرم بيشلقو فيها وبطعميه قتلة…. وبقللو اوعك تقرب ع اختي… علقت مع اهلو للصبي بس اشتكو ع كرم…. بس اتداركت الموضوع وحليتو….. وبس اسأل كرم شو صار بقللي بدو يإذي اختي…. واليوم حكيت مع ستو للصبي… ام متوفية… واب غير مبالي… ومرت اب قاسية بظن… -ملاك: ييي حرام…. حرقلي قلبي هالصبي…….. كيف عرفتي انها قاسية… -ايلين: توقعت….

العضوة: 275918 , منذ 4 سنوات

فقت تاني يوم الصبح من بكير…. كان نهار عطلة… بس كنت مقررة روح ع بيت كرم واحكي مع بيو…. وكنت عم اتمنى يكون انسان مُسالم…. جهزت حالي وركبت سيارتي ومشيت…. كنت اخدة العنوان من سجلات الروضة… وصلت ع حارة مرتبة… وحلوة…. وقفت قدام البناية…. وطلعت عالطابق الرابع…. قربت بدي دق باب الشقة….. واذ بسمع صراخ وعياط…… [جوعاااانة….. انقبري خرسي بدي ضل طعميكن….. انت يا ولد قوووم من خلقتي ع غرفتك…… ولك يا حيوااااان انت التااني قوم جبلي كاسة ماي…..] وسمعت ضربة كف…. قلبي قبضني…. وجيت بدي دق الباب…. بس سمعت حدا طالع عالدرج عم بغني بصووت بشععع…. وريحة المشروب واصلي قبلووو…. طلعت دغري عالطابق اللي فوقو… وطلعت لتحت…. بشوف شخص شكلو مشمئز وأصلع وكرشو قدامو…. وعم يتنحنح يمين شمال من المشروب…… ضل ساعة يدور عالمفتاح بجيبتو…. وبس لقاه ضل دوبل الوقت يحاول يفوتو بالباب…. واخيرا مشي الحال…. وفات عالشقة…..... نزلت دغري لروح ع بيتي…. وقول شو خصني انا…. خفت كتير…… والله ومنا اب مُسالم طلع….. بس وقفت فجأة لما لقيتو ناسي وتارك الباب مفتوح…. قربت راسي وحاولت شوف منيح جوااا…. صدمني الشي اللي شفتووو….. شقة بهيك حي راقي بهالوساخة……... وفجأة بسمع اصوات وعياط وتكسير وضرب…. بقرّب راسي اكتر…. وبتفاجأ…. يتبع…

العضوة: 275918 , منذ 4 سنوات

#أميرة_أم_أسيرة_بقلم_نسمات_الليل الجزء الثالث: بلاقي الرجل السكران ماسك شعرات مرتو وعم يمشي فيها ويضربا….. لزقا بالحيط….. وحط ايديه ع رقبتا…. وهيي تصرخ وتسبّوو بأبشع الألفاظ….. لحد ما فقد السيطرة ع اعصابو وقت قالتلو (انت مش رجّال)…… العملة اللي عملها… والشوفة اللي شفتا بس قالتلو هييييك صدمتني…. كنت رح اوقع من طولي…. رجلي ما عاد حملوني….. واذ بيطلع كرم ركض لبرا من الخوف آثار الضرب عليه وعيونو مورمين من البكي…. بيجمد بأرضو لما بشوفني…… وانا بهاللحظة بركض بكل قوتي….. بركب سيارتي وبهرب…….. والمشهد اللي شفتو ما عم يروح من بالي…… كيف قتلها بوحشية….. ضل يضرب راسا بالحيط لحتى ترش الدم بوجو…… وصلت عالبيت عرقانة وخيفانة….. طلعت دغري عالبيت… قعدت عم اكل اظافيري وفكر باللي شفتو……. لحد ما حملت تلفوني ودقيت للإسعاف وللشرطة….. وقلتلن عن الجريمة والعنوان…….. فتت اخدت حمام سريع وظهرت…. تسطحت عالتخت انا وعم فكر باللي صار…… بيجيني اتصال من المخفر اجي وقدم افادتي….. رحت وانا مرددة….. ولما فتت لقيت بيو لكرم واقف معصب… اطلع فيني من تحت لفووق…. وزورني…… حكا شي مع الشرطي وقرب مني….. وهمس يإدني….

العضوة: 275918 , منذ 4 سنوات

-ابو كرم: اسمعي يا حلوة….. البناية فيها كاميرات برا…. وهالكميرات سجلت ركوضك من البناية بخوف ورعبة…. وبالاضافة لهيك ابني كرم شافك… والولد ما بيوقف الا مع بيو… انطقي بحرف واحد عني وشوفي كيف رح اقلب القصة عليكي….. المخلوقة ماتت لانها وقعت عن السلم هيي وعم تنظف اللمبات…. راسي ما تحمل اسلوبو بالحكي…. ولا شو ممكن يعمل….. قرب مني ولمس خدي وهوي عم يقول (شو فهمتي؟)… قلبت نفسي واشمئزيت من ريحتو…. ركضت عالحمام وراجعت…….. ورجعت ضهرت وفوتوني لقدّم افادتي… -الشرطي: اي خبرينا كيف عرفتي بالحادث… -ايلين: اي… اي… شفتها واقفة عالسلم… عم تنظف…. زحطت اجرها ووقعت… -الشرطي: كيف شفتيها؟؟… بلشت افرك ايديي…. وقلبي عم يخفق خفق من الخوف…… وكملت… -ايلين: كان الباب مشقوق…. -الشرطي: شو كنتي عم تعملي بالبناي…. -ايلين: ا… اي… ايي…. بصراحة انا كنت جاي لعندن كرمال كرم….. هوي طالب عندي بالروضة….. وبعطيه اوقات دروس خصوصي بالبيت…. -الشرطي: يعني السيد رائد ما دخلو….. -ايلين (بهمس): رائد… مين رائد….. (عليت صوتي) اه اه…. اي لااا ما دخلووو….. هيي وقعت لحالها….. طلعت من المخفر ايدي ع قلبي… مقهورة كيف كذبت…. فهمت ليه كرم هالقد عدواني…. وقفت حد الشجرة وسندت حالي عليها….. كيف بين ساعات صرت هون…. رفعت راسي ع صوت ضربة كف…. اطلعت حوالي…. لقيت رائد اللي مبين عمرو حوالي ال 40 سنة… واقف بعيد…. وضرب كرم كف… لا اراديا ركضت لعندن…… -رائد: للتتعلم تاني مرة كيف ما تخبي الحقيقة….. -ايلين: شوو بك…. اكفيهن شرك هالولاد…… هلأ بفوت عالمخفر وبعير افادتي ها…. بعملا… -رائد: هههههههههههه…. لو بدك تعمليها كنتي عملتيها من الأول…… هول ولادي وحر فيهن…….. برمت ظهري لفل….. كنت معصبة كتير….. وقفت فجأة لما حكا… -رائد: ع فوقا ست ايلين…. اذا ما بدك تنحبسي….. بتتزوجيني……....... (اطلع بابنو كرم وضربو ع رقبتو وكمل)… انت يا ولد كيف ما بتقللي عند انسة هالقد حلوة….. -ايلين: شووو شووو….. عم تحلم….. شو جابرني ابدا…. -رائد: حسك بهالولاد اللي جابرك…… اذا بتتزوجيني بغير تعاملي معن…. واذا ما قبلتي… بعدنا قراب عالمخفر… بفوت وبحكي اللي عندي….. صفنت فترة طويلة…. رجعت اطلعت بكرم…. ابتسمت وقلتلو…. -ايلين: بفكر…. -رائد: بس ما طولي عليي….

العضوة: 275918 , منذ 4 سنوات

فليت دغري…… كان لازم اخد شوية وقت ل لاقي حل… كنت بحيرة غير طبيعية… مش عارفة شو اعمل…. كيف رح طلّع حالي من الموضوع بأقل الخسائر واحمي هالايتام من هالاب القاسي…. اللي كنت بعرفو بوقتا هوي بس اني مستحيل اقبل عرضو…. عرضو المفاجئ… شو خطر عبالو ما بعرف… ليه هلا بالذات… مرتو اليوم ماتت… شو هالجنون… شو فيلم هيدا او مسلسل… رجعت عالبيت وحكيت لملاك كل شي….. انصدمت باللي صار…. -ملاك: لك اختي انت كيف علقتي مع هيك انسان…. مجرم….. انا برأيي تحكي لرضا… -ايلين: اووووعك…. اوعك يا ملاك حدا يعرف…… -ملاك: بس اختي….. -ايلين: بلا بسبسة…. الموضوع عندي…. بس تركيني تكتك وفكر ع رواق…. اتسطحت وصفنت بالسقف…… الكل نام وانا بعدني بنفس الوضعية…. ثواني… دقايق… ساعات…. وانا عم فكر… واضرب واطرح بالموضوع…. وقلبها يمين وشمال… حطيت جميع الاحتمالات… فكرت برضا… بأهلي… بالولاد… برائد… وبالروضة… وحطيت انسانيتي بالدرجة الأولى… وكان لازم اختار بين اني كون أميرة مع رضا او كون اسيرة مع رائد…. ونمت وج الصبح ساعتين وفقت……. برمت راسي ع تخت اختي لقيتا عم توعا…. -ايلين: انا قررت……. -ملاك: شو قررتي !!!!!!! يتبع…

العضوة: 430227 , منذ 4 سنوات

وين كمالة القصة ماعم تبين عندي

العضوة: 430227 , منذ 4 سنوات

روعة وين الكمالة

العضوة: 275918 , منذ 4 سنوات

الجزء الرابع: -ايلين: بعدين بتعرفي….. نطيت من التخت…. وعالحمام دغري….. وبعدا فتنا نتروق وانا عم فكر……. سرقت نظرة ع كل واحد من عيلتي……. وصلت لعند بابا…. -ايلين: بابا انا قررت اتزوج….. -امي: ييي واخيرااااااا بنتي….. اتفقتي انتي ورضا….. -جعفر: قرار سليم…. وايمتا جاي رضا…. -ايلين: ومين قلكن انو رضا العريس…… كلن سوا شهقو ومع بعض قالو (شوووووووووو) … -بابا: مين لكن؟ يا بنتي….. -ايلين: واحد اسمو رائد….. -ملاك: عم تمزحي اختي…. و زورتا دغري لتسكت……. سكتت وبابا كمل حكي…. -بابا: بس يا بنتي ليه هوي اي ورضا لا…. -ايلين: لانو عندو 4 ولاد…. 3 صبيان وبنت…. ما رح يهتم اذا بخلف او لا… -جعفر: اختي هيدا ماخدك كرمال تربيلو ولادو يعني…. انتي مش خدامة ولا بيبي ستر….

العضوة: 275918 , منذ 4 سنوات

-ايلين: خيي انا بدي ياه…… واقتنعت فيه…. في طفلين منن عندي بالروضة… تعرفت عليه عن طريقن…. وعجبتو…. قطع حديثنا دق عالباب….. قمت لافتح وبتفاجأ بوجود الست ثمينة وابنها رائد عالباب… ابتسمت وقلتلن تفضلو… -ثمينة: ما بعرف يا بنتي بس اصرّ يجي هلأ… بلا موعد…. وانا قلتلو صبية بتجنن متل ايلين كيف بدها تقبل فيك…… -ايلين: خالة انا ما بجيب ولاد…. عاقر يعني….. ورح حط الولاد بعيوني…… يلا اتفضلو… فات رائد والصدمة بعيونو….. يمكن ما توقع جوابي يكون هيك…. واللي متأكدة منو انو اتوقع اني اشحطو من البيت…… بس انا كان بدي اسحب نفسو شوي شوي…. دايما رح كون سابقتو بخطوة… واعمل عكس اللي متوقعو تماما…. واكيد اهلي استغربو من شكلو ومن وضعو ومن الموضوع كلو….. معقول بنتن تعيش مع هيك شخص….. وحكا رائد مع بابا كتير… وحديثن طوّل… لعرفنا بالاخر انو مرتو الأولى هربت من بيت اهلها لتتزوجو لانن ما كانوا موافقين عليه…… واتبرو منها وجابتلو اربع ولاد وماتت…. ومن وقتا تغير وصار انسان غير مبالي… عصبي… سكران…. عطّال بطّال… تزوج اول وحدة بعد موت مرتو لتهتم بالولاد وعاملتن بقسوة وطفشت منو…. وتزوج اللي بعدا وقتلها…….. شو ح يكون مصيري انا……. ابتسمت مع اخر سؤال بابا سألو ياه…. -بابا: ما الها مرتك الا من مبارح متوفية…. وانت اليوم مقرر تتزوج…. -رائد: بصراحة نحن كنا عم نطلق…. واهلا دائما كانو بدن ياخدوها مني…. ولما توفت اخدوها وقال هني بيتكفلو بدفنا والى ما هنالك…. وانا بقيت ع جنب…. الولاد بحاجة لإلي اشتغل واصرف عليهن…. وانا وحيد امي مع اخت مزوجة ومسافرة وابي متوفي… فامي ما فيها دير بالا عليهن بحكم عمرا…. وانا وايلين كنا شايفين بعض من فترة ومقررين الزواج بعد طلاقي…. وهيك صار…. فطلبت ايدا وقالتلي تاع لعند اهلي…. -بابا: خير انشالله…. منرد عليكن خبر بإذن الله….. قامو وفلو من البيت…. وانا بلشت اسمع ولولات امي… وعياط ابي وجعفر….. -امي: يا ويلييي يا بنتي ع هالنصيب….

العضوة: 275918 , منذ 4 سنوات

-جعفر: من كل عقلك ح تاخدي هيدااااا….. ما تركو كلمة ما حكوها……. فتت ع غرفتي وبكيت قدام مرايتي… ودفنت حالي تحت الحرام…… واجت ملاك كملتها عليي وبلشت اسئلة….. وانو مجرم وكيف ح تعيشي معو…. بس انا طنشت….. وفجأة قمت… وفتت عالصالون…. ضربت ايدي عالطاولة… -ايلين: انا بدي يااااااه….. يعني بدي ياه….. وما في نقاش بالموضوع… -ابي: متل ما بدك…. رح دقلو قللو اننا موافقين……. وهيك راحت ايام واجت ايام… وانا عم جهز للخطبة…. ومن مجميعو…. وقعدنا انا ورائد لحالنا كذا مرة…. وبكل مرة بس يخلص اللقاء فوت راجع…… كنت مضطرة اتحملو……. كرمال هالاربع ولاد….. ما لازم يكونو مُرضا نفسيين…. لازم يكون في مين يطعميهن بس يجوعو… يلبسن… يحممن….. يمكن انتو عم توقفو ضدي… بس انا محرومة من احساس الامومة… الله لا يدوقها لحدا…. احساس صعب… بخليك تحن وتشفق ع كل طفل… هول اربع ولاد بدن مساعدة… وانا رح مد ايدي وساعدهن… وحتى لو ع حساب سعادتي…… هني بحاجة لام… وانا بحاجة لأطفال…… رائد سكرلي الروضة رغما عني… قال ما عندو نسوان تشتغل…. انا للبيت وبس…. وحتى من هلأ اشطرت عليي ممنوع طلعات وفوتات… وانا ما قول غير كلمة (ماشي)….. عرف رضا بخطبتي…. جن جنااانووو… واجا بهدلني وقللي هيدا اللي بددتيه عليي… وانا صديتو وعصبت عليه وقلت هيدا قراري…. حياتي وحرة فيها….. واخيرا اجا نهار كتب الكتاب……. وافقت…. ووقعت على وراق زواجي… ومسحت دمعة هاربة نزلت بسرعة ع خدي…. قربت اختي مني… -ملاك: روقي اختي…… كان ضروري هالعمل الانساني… حتى لو بتحبي الولاد… مش ع حساب سعادتك…. -ايلين (بحرقة): اختي….. 24 سنة من حياتي محيتن بشطبة قلم……

العضوة: 275918 , منذ 4 سنوات

الجزء الخامس: محيت كل عمري لما وقعت ع هالوراق… تخليت عن اهلي وعن شهادتي والروضة ورضا… وحياتي السعيدة…… واخترت كون اسيرة……. يمكن ما كان لازم اختار هيك… بس اخترت ومشي الحال…. هاي الحياة لازم عيشها……. ما تظلموني…. قراري اخدتو بدافع كبير من جواا…. كل شي فيي عم يقللي تزوجيه….. كان عندي اهداف لازم قوم فيها بحق امومتي اللي انحرمت منها وبحق هالايتام وبحق رائد….. الله بياخد من الشخص لحتى يحس بغيرو…. لو ما في شي اسمو عاقر… الولاد الايتام ح يضلو ايتام…… بعد حوالي اسبوعين نقلت ع بيتي عالساكت… بدون حنة وطنة… وبدون فستان عرس… هيدا كان قراري… ورائد كيّف عشان المصاريف بتقل هيك…. وانو كل هالحفلات ما الن اهمية….. كان اصعب احساس كيف رح خليي هالزلمة اللي بقرف منو يقرب عليي…. كبست ح ايدي لما فات عالغرفة وانا قاعدة عالتخت…. والولاد حاطتن عند امو هاليوم…. ولما بلش يقرب حسيت حالي بدي صرخ وادفشو…. بس ما لقيت حالي غير بعدت بهدوء…. -رائد: شو بكي…. -ايلين: اي.. ا… اي معذورة…….. -رائد: يبعتلك مرض….. وليه لننقل هلأ كنا نطرنا بعد…… ادي بعدلك وقت… -ايلين: اربع… قصدي خمس ايام…

العضوة: 275918 , منذ 4 سنوات

-رائد: انا طالع من البيت….. ل 5 ايام… ما بعرف كيف خطرت ع بالي هالكذبة…. بس ما كان فيي خليه يقرب…. بشمئز منو ومن ريحتو… بكرهوووو….. طلع من البيت وما رجع هديك الليلة…. وانا قلت احسن الحمدلله…. نمت…. وفقت تاني نهار…. برمت بهالبيت….. غرفة غرفة…. كان في 3 غرف نوم… وحدة رئيسية… ووحدة فيها 3 تخوت لهادي وسام وكرم… والتالتة ل تينا… وحمام مشترك بين غرف الولاد… وحمام للغرفة الرئيسية… وحمام ضيوف… وفي مطبخ وصالون وغرفة قعدة صغيرة… كان بيت حلو وكبير… وبدل ع انو وضع رائد المادي كان منيح… ما بعرف اذا لهلأ…. بس رغم هيك كان البيت وسخ كتييير…. ومكركب….. بلشت نظف فيه ورتب… وخلال 4 ساعات كان البيت بيضوي ضوي… والطبخة عالنار…. فتت تحممت… وبعدا طفيت تحت الاكل… وضهرت من البيت… مشيت شارعين لوصلت ع بيت مرت عمي…. دقيت عليها وقلتلا بدي الولاد…. فتت لعندا وشفتن قاعدين من تم ساكت…. ما في فرح بحياتن… الولاد لازم تلعب… بكير عليهن عالصمت…. واكيد تعذبت لحتى اخدتن معي بعد ما قالتلن مرت عمي انو هاي مرت بيكن الجديدة…. نقزو كلن… ودب الرعب بعيونهن…. وما تحركو… بس صوت واحد من مرت عمي خلاهن يصفو وراي متل العسكر ويلحقوني…. فهمت وقتا انو هني مش بس صامتين هني كمان مطيعين من الخوف……. وصلنا عالبيت…. ووقفو دقايق عالباب مصدومين بترتيبو…. وخصوصي هادي… اكبر واحد بعمر ال 10 سنين…. اطلع كذا مرة لبرا ليتأكد انو هيدا بيتن….. يمكن من زمان ما تنظف وترتب هالبيت…. -ايلين: يلا يا ولاد… هادي فوت ع حمامكن اتحمم ونظف حالك منيح… جهزتلك تيابك ع تختك… ما بعرف اذا هيدا تختك بس قدرت لحالي لانو بوجو في مكتبة عليها كتبك…… وانت سام فوت ع حمام الضيوف واتحمم تيابك ع تختك كمان… توقعت التخت اللي بالنص الك…. وانا رح فوت حمم كرم وتينا بحمام غرفة بيكن….. وبس تخلصو بتاكلو…. -هادي: بس بابا بعصب اذا اجا وما لقا ماي سخنة… وكمان ما بخلينا نفوت ع غرفتو… رح يعصب ع كرم وتينا اذا حممتيهن هونيك….