كل أم بتفكر وبتستنى اليوم اللي البيبي بيصير ينام كل الليل وما يصحى عشان يرضع أو يشرب حليب!! 🌙🍼
بأكدلكم أنه أنا أول وأكتر واحدة كنت بفكر بالموضوع😄 بعد ليالي السهر وقلة النوم وصرت أدور على أساليب حتى أدرب ابني على النوم لساعات أطول وما يصحى للرضاعة (الفطام الليلي) وبنفس الوقت ما يتأثر حالته الصحية ونموه ويستفيد من العناصر الغذائية والمناعة وغيرها الموجودة بحليب الأم. 🤱
قبل ما نحكي عن أساليب الفطام الليلي ... لازم نعرف انه القدرة على النوم المتواصل عند الطفل مرحلة تطورية بوصللها الطفل مثل المشي، التدريب على استخدام الحمام وغيرها وبيختلف من طفل لطفل ايمتا رح يوصل لهاي المرحلة ... وحتى لو ما عملتي اشي رح يوصلها لحاله ما تقلقي 🥰👶
لهيك أنا بشكل عام بفضل ما نستعجل الموضوع ❌ونستنى الطفل يوصللها لحاله واستغلي هاي اللحظات بإنك تتأملي بالمعجزة اللي قدامك😍 أو ممكن تغيري وضعية الرضاعة لتكوني انتي مرتاحة خلال فترة الرضاعة (مثل الرضاعة أثناء الاستلقاء والبيبي يكون جنبك) ✅
طرق وأساليب لزيادة ساعات نوم الطفل أو الفطام الليلي:
1- تأكدي أنه الطفل عم ياخد كفايته من الحليب والرضاعة.
⭐️زيدي عدد الرضعات خلال النهار واتأكدي انه الطفل عم يشبع بشكل منيح بالرضعة ..تجنبي أي الهاءات أثناء فترة الرضاعة (صوت التلفزيون/ حركة حوليه عشان ما يتشتت) لأنه الاطفال بيصيروا يلتهوا باشياء تانية وبيعوضوا النقص برضعات الليل.
⭐️ قبل ما ينام تأكدي أنه الرضعة تكون كاملة ويشبع منيح منيح فيها.
⭐️ بالليل لما يصحى حاولي ترضعيه كامل وصيري العبي بخده، ايديه، اجريه، أذنه ليصحى عشان ما يضل يصحى كل شوي.
2- عدلي طريقة وبيئة النوم
⭐️ ممكن تصحي طفلك قبل ما انتي تنامي عشان يرضع (حتى لو نايم) ممكن يرضع وينام هو وانتي لفترة أطول بعدها.
⭐️ ما تستني ليوصل الطفل حالة الارهاق والتعب العالي قبل ما ينام لأنه ممكن يواجه صعوبة في النوم!
⭐️ شوفي أنسب وضعية للنوم الك ولطفلك بعض الأطفال بيناموا أحسن ولفترة أطول ازا كانوا جنب امهم وبعض الأطفال بتتطول فترة نومهم ازا كانوا بسرير منفصل سواء بنفس الغرفة أو بغرفة تانية
3- لما تتأكدي أنه عمره والوقت مناسب ممكن تبدي معه بتقليل عدد الرضعات بشكل تدريجي (ممكن بدل الرضعة تشربيه مي أو بالطبطبه على ضهره وكتفه أو تمسكي ايده ....)
🤩استنونا ببوست تاني رح نحكي فيه عن طرق وأساليب لزيادة ساعات نوم الطفل أو الفطام الليلي و نصائح لتساعدك على الفطام الليلي للأطفال بالعمر الأكبر🤱✅🌙
