#تلك_البصارة #بقلم_جمايكا_احمد الجزء الاول.. انك تعيش حياة روتينية..وتتقبل أبسط الحقوق..وترضى بأقل شي..وتعيش ع امل تشوف يوم حلو..شي مو متعب..شي كنت عم فيق ونام وانا بإنتظاروا.. شي بحلم كل يوم فيه ..كنت بدي شي يوم يصير مثل شي مفاجأة..بدق جرس المنبه..بقوم من جنبي ع الحمام بفيق دغري من بعدو لاحسن جهزلوا فنجان القهوة..بنطر كلمة صباح الخير..بحسو تأخر ..بجي بقلو حبيبي صباحك راحة بالي..برد ببرود وهو كامش منشفتو وعم يمسح وجهو..صباح الخير واوقات مايقولا..حسب مزاجو..مباشرة بسألني جهزتي قهوتي..تيابي مكويين..بكون كامشتن ..فنجان القهوة بإيدي اليمين..والتياب بإيدي اليسار..بياخد مني التياب وبنشغل بلبسن..وبجمع مفتاح سيارتو ..وموبايلو..وبياخد القهوة من ايدي..وبروح...بروح بدون مايلتف لالي..بدون ما يبوسني..بدون ما يقلي بدك شي محتاجة شي ..طيب بدون مايقلي سلام..بغادر هيك ..بفتح الشباك لاسمع صوت السيارة انها راحت..برجع برتب سريري..وبجهز لالي كاسة حليب ساخن..مع تمرة..وبشغل اغاني فيروز..بصفن بالورد يلي جابتلي اياهن جارتي ام علي..وصوت فيروز وهو بقول انا لحبيبي وحبيبي إلي..بس انا حبيبي مو لالي..حبيبي لشغلو ..لحياتو الخاصة..حبيبي ..مابيوم صار لالي..حبيبي انا لالو بس بساعة نسيان فوق هالسرير الممل..بدون احساس بدون اهتمام ..وبدون حنان..مشاعروا تجاهي ماتت..او بالاحرى مافي وماكانت لتموت.. واذا شي يوم ناقشتو..بردني..ماحد قلك تقبلي فيني...انا قبلت فيك لاني بحبك من الصغر لاني بنت عمك..لاني كنت شوفك سندي وحلمي..مابعرف ليش يمكن كان الكل عم يحسد يلي رح تكون من نصيبك..شاب اهتمامو الاول والاخير اناقتو ..احدث الساعات..والنضارات الشمسية..اغلا ماركات التياب..وغير هيك..دقنو ..وعيونو السودا الواسعة وشعروا الاسود الناعم..وجهو الحاد وملامح وجهو الرجولية..كل هالشي كان مثل شي جائزة ونيالا يلي بتحصل عليه فينا..كنت راقب كل صغيرة وكبيرة بتخصك..راقبك لاعرف شو بتحب وشو بتكره..كان عندي يقين يلي بهيك شخصية رح يعيش حبيبتو او مرتوا المستقبلية عيشة اميرات الزمان..بس يوم يلي قلتن موافقة ع ياسين ..اتغيرت ملامحك..كنت عبوس..وماعم تقبل تحط ايدي بإيدك..تركتني البس دبلة الخطوبة من حالي..احرجتني قدام المعازيم وقت اخدتن من امك..وماتركتلي مجال لبسك اياه..وليكا من اول يوم لالنا متروكة بقائمة شغلاتك المهملة ..ماعم تعني لالك.شي..كنت قول حسد..وعلاقتنا صارت هيك بسبب شي سحر ..لانو الكل كان بتمناك..صح انا متوسطة الجمال..بس فيني شغلات كثير حلوة..تركتني بهاد البيت لحالي اشهر ..ابكي وافرح ..ونام وافطر واتغدى لوحدي..واذا صار شي يوم واتغديت معك..بكون شي حد ضيف عنا..ليكني هون عم انطر مثل العادة عقرب الساعة ينتهي لتصير 7 بالمسا..وليكا بقيان شي اكثر من 13 ساعة..شو بدي اعمل فيهن ..طبعا ولا شي..لانو مافي شي اعملو ..لا غدا لنتغدى سوا..ولا تياب اغسلن لانك ع طول بتحب تغلسن بداري كلين..كرمال ما انزعهن..حياة مملة من التلفزيون ..للكتب..مافي شي جديد.. غفران :- شلون شغلك اليوم اعطيني علق لالك تيابك.. ياسين :- مافي شي جديد مامليتي من نفس السؤال تبع كل يوم.. اعطيني طقمي الاسود.. غفران :- طقمك الاسود عندك سهرة شي.. ياسين :- اي معزوم مع رفقاتي.. غفران :- عائلية ياسين :- هيك شي.. غفران :- طيب خدني معك.. ياسين :- مامليتي من هالطلب كمان .. اعطيني كندرتي السودا التمبرلاند.. غفران :- حاضر.. (( كنت بعرف الجواب ضميت شفافي ..وبلشت نفذ طلباتو .. ريحة البرفان عبقت البيت..ومثل العادة غادر..غيرت تيابي يلي كنت لابسها كرمالو وهو متعود ما يعبرني بشي ..البست بجامتي..وحطيت حالي بسريري لاحلم شي يوم يكون شي طفل نايم جنبي ..كنت حط مخدتو واتخيلا طفل ..واحيانا من حسرتي قوم جيب تياب والحشا ببطني واتفرج ع حالي بالمراي..واوقات صور حالي .كنت اجسد هالشي ع حالي..كنت احط المخدة و غنيلا ..واغفى معا..وافيق ع ايدين عم يشدو المخدة مني.. غفران :- ممم ها ياسين انت جيت.. ياسين :- اي اعطيني مخدتي غفران :- اها اسفة ماحسيت.. ياسين :- مو مشكلة.. غفران :- شلون سهرتك ياسين :- منيحة انا شلحت تيابي وتركتن بشنتاية ..بكرة رح يجي تبع الغسيل اعطيهن لالو..تصبحي ع خير.. غفران :- وانت من اهل الخير..