منذ 4 سنوات
  • ما قبل الحمل
طب الجره على تمها البنت بتطلع لامها عرس ابن عمي الاسبوع الجاي… و جوزي راسو و الف سيف ما بدو ياني روح… قال ابن عمي هاد كان خاطبني و هو ما رح يرتاح بروحتي هي ومو حلوة بحقي، ضليت اترجاه جمعتين… و انزل اشتغل لحماتي البيت كلو من وش الفجر ضل ليف و امسح و اجلي و اغسل و اكنس متل السيرلانكية  … صرت لما امشي ريحتي تفوح كلور و هايبكس….و رجعت فاتحتو بالموضوع بس عبث!!! ازا هالحيط تحرك جوزي غير رأيو… مال_الشام بعد ما يئست انو يخليني روح ضبيت هالفستان الاحمر الي اشتريتو بمبلغ محترم  و قلت بقلبي والله ازا ما بردلك ياها ما بكون اسمي شريفة.. تاني نهار ضليت نايمة حتى طلعت ريحتي للساعه وحده الظهر… قمت غسلت لبنتي الي عمرها 55 سنين و عملتلها سندويشة و حطيتها عالتلفيزون تتفرج على توم وجيري…

26 تعليقات

العضوة: 378864 , منذ 4 سنوات

وجيري… رن جرس البيت رحت فتحت طلعت امي عالباب.. فاتت و صارت تقلي لك شبك ليش هيك عاملة بحالك… ليش بيتك مأنشح… ليش مو ممشطة شعرك؟ قلتلها تعي امي لاحكيلك مصطفى ابو كرش شو عمل فيني.. قعدنا بهل صالون و قلتلها و حلفتها انهن يحكولي كل شي بصير بالعرس و يضلو على تواصل معي عالواتس ينقلولو الاخبار لحظة بلحظة متل الجزيرة و العربية كأني في قلب الحدث زعلت امي على حالتي كتر ما بكيت وقطعت حالي و قالتلي حبيبتي ما رح نروح عالعرس الا و انتي معنا… قلتلها كيف يامو؟ قالتلي احفظي شو رح قلك و احكيلك و بتعمليه بالحرف الواحد.. و بلشت امي الله يخليلي ياها تقلي شو رح اعمل لاحضر هالعرس الميمون حطيت كل ثقتي و املي بافكار امي من بعد رب العالمين.. وقمت ودعتا وعملت غدا لمصطفى و استنيتو لرجع عالبيت.. نطرت الوقت المناسب… خلص غداه وقام… و صرخت هداك الصوت و قلتلو شو ياه… مافي يعطيكي العافية… مافي يسلمو ايديكي… مابتعرف تقول شي كلمة؟ استغرب مني و قلي يسلمو ايديكي… قلت بقلبي العمى مو هاد عشمي فيك يا مصطفى رجعت رفعت صوتي: بعد شووووو… لك ااااخ يا اميييي اااخ ما الي حظ بشي بهل حياة… الله ياخدني و يريحني… طول عمرك هيك… طول عمرك هيك بحياتك ما قلتلي شكراً او يسلمو ايديكي… بعمرك ما احترمتني… انا تعبت… تعبت مال_الشام

العضوة: 378864 , منذ 4 سنوات

مال_الشام مصطفى: لك شو صارلك يا مخلوقة هلا كنتي عاقلة شوووو يعني انا مجنووونة… وهون صرت اتزكر الي حفظتني ياه امي (( لااااا لاااا يا مصطفى هالحياة ما عاد ينسكت عليها… ليك لئلك انا رايحة على بيت اهلي و بس تفكر تعتزر عن غلطك و معاملتك الي تعال خدني و بنتك خليها عندك … كسرت بخاطري الله يسامحك)) و ركضت على غرفتي طلعت شنتت الحردة الي كنت محضرتها و حاطه فيها الفستان الاحمر ضبيت اغراضي و طلعت وهو مفلوج فلج ركضت على بيت اهلي و انا قلبي عم يرفرف من الفرحة ضليت عندهن يومين و تالت يوم رحنا حضرنا العرس و انبسطت انا و اخواتي و سهرنا للصبح وخلينا العروس تندم عاليوم الي تجوزت فيه كتر ما نقينا و تمسخرنا عليها تاني نهار من وش الصبح حملت شنتي و رجعت على بيتي… مريت على بيت عمي اخدت بنتي من عندهن و طلعت عالبيت لقيتو مقلوب قلب بس قلت يلا معليش يا بنت المهم حضرتي العرس شمرت عن ايدي و بلشت شغل صار البيت يوج وج… و عملت لجوزي ملوخية الاكلة الي بحبا بؤبر البي.. و لبست و تعطرت و نطرتو.. فات بارم بوزو و زعلان مني… صرت اتحركشو و قلو انت زودتها علي و انت تغيرت عن اول زواجنا لوقت ما اقتنع اني كنت مجروحة ومشغلة اغنية دايماً دموع و محطمة ببيت اهلي قولو مشي الحال مال_الشام

العضوة: 378864 , منذ 4 سنوات

مال_الشام تغدا و فات نام و عالمغرب حطيت تسالي و تحلاية و انصمدت جنبو.. مصطفى: زعلانه مني لاني ما خليتك تروحي على عرس ابن عمك؟ انا: له حبيبي.. صحيح بالاول انزعجت شوي بس اهم شي رضاك يا حبيبي و نحنا قاعدين اجت بنتي حلا.. و شدت ابوها من تيابو و تطلعت عليه ببراءة دخيل عيونها و قالتلو بابا بدي روح لعند ستي… قلها لا بابا الك تلت ايام عندها ما في روحة… يعني انا كنت عم اكول بزر و ما ركزت معهن.. يا جماعة ما شفت البنت الا قامت و جابت شنتت الحردة تبعي و فتحتا و كبت كل غراضي منها و رمت الحيوانة فستاني الاحمر بخلقتي و صارت تضب العابها شال مصطفى الفستان من على وشي وقلي شو هاد؟ شريفة: بئ بئ بئ بئ.. هاد؟ هاد؟ … هههههه يييي لك انا ما قلتلك؟ لسه عم نحكي و لا بنتي بتجر الشنته وراها و فتحت باب البيت و تطلعت بابوها وقالتلو (( لااااا لاااا يا مثطفى هالحياة ما عاد ينثكت عليها… ليك لئلك انا رايحة على بيت اهلي و بث تفكر تعتزر عن غلطك و معاملتك الي تعال خدني و مرتك خليها عندك … كثرت بخاطري الله يثامحك))… مسكها جوزي و رفعها بالهوا متل السحلية و قلها شو تفضلتي حلا خانوم!! بنتي الجدبة فوراً خريطت من الرعبه ينعن امها طلعت جبانة مو متلي  و صارت تبكي و تقلو ( والله ستي هيك قالت لماما تقلك ما دخلني ما دخلني) و نطت من ايدو و ركضت على غرفتها انا عم اتفرج لبزر صار يطلع من انفي و دموعي تشر شر.. والله لو فيلم رعب مو هيك

العضوة: 378864 , منذ 4 سنوات

والله لو فيلم رعب مو هيك تطلع فيني جوزي…و شلح الشحاطة من رجلو انتو اكبر قدر قلتلو حبيبي طول بالك انت فهمان غلط… خليني اشرحلك طول بالك…. لا تتهور… لا تتهور اخر شي بتزكرو انو انا كنت قاعدة فوق الكنباية… كيف الكنباية صارت قاعدة فوقي مابعرف و الفستان الاحمر كان مدحوش بتمي فعسني فعس يفعس عدوينو يا حق اول مرة بحس بشعور الصرصور قررت افتح جمعية للرفق بالصراصير انا بس موت و افهم بنتي كانت عم تتفرج على توم و جيري و لا على ريا و سكينة . سدئ الي ئال طب الجرة على تمها البنت بتطلع لامها إنتهت.... يارب يرزقني بنوته😂متلها

العضوة: 378864 , منذ 4 سنوات

أتمنى تعجبكم اكتبولي في كومنت أحبكم 💜 بسمة أمل 💜

العضوة: 346090 , منذ 4 سنوات

😂😂😂 حلوة يسسلمووو

العضوة: 353845 , منذ 4 سنوات

مت ضحك ع هالبنت والكنبايه صارت فوقها هههههه

العضوة: 284000 , منذ 4 سنوات

حلوووة😂😂😂😂😂 مت ضحك وانا كنت أبكي 💔😂

العضوة: 354542 , منذ 4 سنوات

😂😂😂حلوه يسلمو حبيبتي

العضوة: 304218 , منذ 4 سنوات

ههههههههههه والله جد الكلام صحيح

العضوة: 191941 , منذ 4 سنوات

اخخخخ متت صحك😂🤣بتجنن