المربى غالي..... قصتي يمكن بتشبه قصص كتير من الزوجات..بس بطلب من كل وحدة بتقرا.. تحط حالها مكاني.. ................. اسمي هدى..عمري ٤٠شكلي عادي وملامح وجهي مقبولة.. عندي خمس شباب ولاد ما عندي بنات.. متزوجة من ٢٥ سنة.. اتزوجت صغيرة..كان عمري١٧ سنة وقت اتزوجت.. عيلتي. عيلة مستورة وعلى البركة..في غيري اربع بنات واربع شباب.. ابي كان موظف على قد حالو..راتبه يا دوب يطعمينا خبز ناشف.. امي كانت خياطة.. كنا بس نوصل للصف العاشر نطلع من مدرستنا..لضيق الظروف المادية انا ما كتير فرقت معي لاني اصلا ما بحب المدرسة. خواني الشباب كمان طلعو من المدرسة ..ليساعدو ابي بمصروف البيت. بيوم كنت رايحة اشتري لامي قماش عندها تفصيلة لزبونة طلعت على السوق بلبسي المتواضع وشحاطة رجلي المهرية.. واشتريت قماش ووقفت انطر المكرو. اجت وقفت جنبي ست بعمر امي تقريبا ومقدرة..سالتني.. -هون بوقف المكرو يا بنتي؟ -ايه خالة هون بوقف..هاتي لساعدك بغراضك. -تسلمي يا بنتي كلك زوء.. اجى المكرو وطلعنا.. وبعد شوي نزلت الست ومعها غراضها اللي كانو بايدي.. وبس نزلت ومشى المكرو وبعد عنها انتبهت لكيس واقع على ارضية المكرو.. نزلت فورا مع انو بيتنا كان بعيد لسه.. دورت عليها كتير وما لقيتها فتلت الحارة لحتى لقيت سمان باخر الشارع سالته عنها وعن مواصفاتها قلي انو هي ساكنة هون جديد ومعها عيلة كبيرة ولادها اربع شباب اتنين منهن كبار واتنين صغار واربع بنات اعمارهم متفاوتة. دلني على البيت ورحت رنيت الجرس. فتحتلي بنت صغيرة وكانت عم تبكي.. قلتلها.. -له له يا حلوة..في حدن عندو هالعيون الحلوة وببكي؟؟ -امي ما جابتلي شطي مطي وانا مشتهيتها قلتلها بدي ١٥ ليرة روح اشتري من عند ابو عبدو السمان وصرخت علي..وما قبلت.. شفقت عليها كتير واتطلعت على المصاري اللي كانو بقيانين معي.. وكانو اخر ١٥ ليرة بجيبتي.. اعطيتها اياهن وصارت تنط وتضحك من الفرحة.. وراحت طيران تشتري.. نسيت حالي اني عند باب بيتن للجماعة.. شوي وطلعتلي الست وحكتلي.. -خير يا بنتي فيه شي؟ -خالة بعد ما نزلتي. انتبهت على هالكيس واقع منك..لحقتك لاعطيكي اياه.. -يااا حبيبة قلبي الله يعطيكي العافية والله هدول تياب المدرسة لبنتي..لك وينها مقصوفة هالرقبة هلا كانت هون.. --ليكها هلا بتيجي خالة راحت تشتري شطي مطي.. -لك من وين جابت المصاري انا ما عطيتها؟؟ -خالة بعد ازنك انا عطيتها خليها تروح تشتري وتنبسط حرام.. -يا سواد وشي منك يا بنتي.. تعي اتفضلي اتغدي معنا.. -لا خالة هلا امي بتقلق علي.. -لا والله ما بقبل الا تدخلي وتتغدي معنا.. ........ دخلت بيتهم كان مرتب وكبير بس ما في عفش غالي.. عفشهن عادي بس كان كتير نضيف.. كانو البنات عم يضحكو ويمزحو مع بعضن.. على عكس لمتنا نحنا الي كلها مناقرات ومشاكل على اتفه الامور.. اتطلعو فيي مستغربين ومنهن مين رحب فيي ومنهن مين اتطلع فيني من فوق لتحت وضحك ضحكة صفرا.. خجلت بحالي وبشحاطتي المهرية وحاولت خبي رجليي.. اتغديت معهن وكان للاكل كتير كتير طيب. وروحت. مشي لانو ما كان معي ولا ليرة وطبعا اول ما فتت اتبهدلت من امي وضربتني.. تاني يوم فقت على صراخ اخواتي على بنطلون لوحدة فيهن لابسته اختي التانية وموسختو ومو غاسلتو.. اتطلعت فيهن وما بعرف ليش خطرو ببالي هدلاك البنات..وكيف كانو متجمعين..متل كانهن رفقات مو اخوات.. ندهتلي امي وقالتلي قومي ولي قومي جيبي فطور لاخواتك وبعدى ارجعي لتروحي على سوق الخضرة ناقصني مليون غرض للطبخة.. قمت عم اشحط حالي شحط.. رحت جبت الفطور وطلعت بعدى على سوق الخضرة.. اشتريت اللي امي طلبتو.. ووقفت انطر المكرو.. بس طلعت بالمكرو بعد شوي وقف وطلعت الست اللي كنت عندهن امبارح..سلمت علي مباوسة وبالاحضان متل كأنها كانت عم بدور علي والها سنين بتعرفني وطلبت مني طلب غريب كتير انها تروح معي على بيتنا وتتعرف على امي.. انصدمت من طلبها وما عرفت شو قلها.. يا فضيحتي ويا خجلتي ما بكفي منظري المبهدل وكمان هلا رح تروح تشوف بيتنا.. وصل المكرو مع اني كنت بتمنى هالطريق ما يخلص.. رنيت الجرس وفتحت الباب وندهت لامي.. -امي..يااا امي معي ضيوف.. -اهلا وسهلا مين؟؟ -هلا اتركي كل شي من ايدك وتعي.. ........ طلعت امي وسلمت وقعدت..عرفتا على خالة ))ام محمد(( وخبرتها كيف اتعرفنا على بعض.. استازنت لروح اعمل قهوة.. ورجعت لقيت امي مبسووووووطة وضحكتا من الدان للدان.. بالبداية ما فهمت بعدين لما روحت الخالة ام محمد ندهتلي امي وقالتلي -لك دخيل الله..الحمدالله يا ربي الحمدالله انك رح تتزوجي وتنفك عالعقدة..بلكي بعد ما تتزوجي بنفتح نصيب اخواتك -الله يسامحك يا امي هلا هيك انا صرت موقفة نصيب اخواتي بعدين مين هاد اللي بدو اياني؟؟؟ -اي اسكتي اسكتي.. موقفة نصيب اخواتك ونص صار عمرك ١٧ سنة ولهلا ما حدن دق بابنا منشانك. -ايه امي وشو يعني ١٧ سنة والله ما ختيرت لسه..اللي متلي لساتهن بيلعبو بالحارات.. -عيريني سكوتك هلا وفوتي اختاري شي مرتب تلبسيه الجماعة جايين اليوم المسا.. -شي مرتب..هههههه ضحكتيني يا امي على اساس خزانتي مليانة ومكدسة.. ............. اجو الجماعة المسا ولبست بنطلون وكنزة ماشي حالن وطلعت لضيفهن.. العريس ابنها لخالة ام محمد الكبير فيهن..شب عمرو ٢٥ سنة..حليوة وبشتغل مع ابوه.. طبعا اهلي ما صدقو ييجي عريس لوحدة مننا..لك حتى سؤال عنهن ما سألو.. كتبنا الكتاب وكانو كتير مستعجلين الجماعة..بعد عشر ايام اتزوجنا..طبعا حفلة خطبة ما عملنا لانو العرس قريب كتير وخلال العشر ايام هدول ما شفته الا مرتين وبس اجو يوم كتب الكتاب وقت سال الشيخ عن المهر قلهن ابي انو ليرة غير مقبوضة.. لك انا والله ما فهمت وقتها..بس لما قعدنا مع بعض اول كلمة قلي اياها.. -حقك ليرة..هههههههههه انا ادايقت من كلمتو وزعلت.. انو عنجد هيك بتنحسب؟؟ قلت ازا من اولها هيك بيحكي كيف بعدين.. روح بعد ما قهرني بتعليقاته عن شكلي ولبسي وكلامي.. وبكيت وحكيت لامي ما عاد بدي ما عاد بدي اتجوز..ليكي كيف عم يتمسخر علي وعلي لبسي وعلى بيتنا... صرخت بوشي امي وقالتلي بدك ترضي ورجلك فوق رقبتك لك ما صدقنا ييجي واحد يخلصنا من لقمتك..بقى حطي لسانك بحلقك احسن ما اقصلك اياه...قال ما عاد بدى قال.. ............ طبعا من استعجال اهلي حتى ما سالوه وين بدنا نسكن..بس الي حكته حماتي انو النا بيت لسه مو مجهز بدو عفش واني رح اعيش معهم بغرفة.. حتى غرفة نومي ما اخترتها وكانت مستعملة..كل شي فيها مستعمل.. حتى الفرشة.. حماتي وقتها اشترت غرفة جديدة الها وانا العروس حطولي فضلتهن.. عملنا عرس بشبه كل شي الا العرس.. اخواتو الكبار ادخلو بالصالون والفستان والمكياج وكل شي.. طلعت متل المهرجين من كتر ما تقلولي مكياج وانا مالي متعودة على المكياج الكتير لك حتى مالي متعودة على المكياج من اساسه.. خلصت هالحفلة وروحنا.. دخلت غرفتي لحتى اشلح فستاني والبس شي اريح...فتحت الخزانة وانصدمت انو فيه بس بيجامة وقميص نوم ابيض وكنزة وبنطلون وكندرة.. وقنينة عطر ومشط بس.. وكم علبة مكياج صغار.. ندهت عليه.. -محمد...ممكن تيجي شوي.. -ايه يلا.. دخل وسكر الباب وضحكلي وقلي.. -شوووو يا عروس مانك قدرانة تستني لك لبعد العشا.. اتطلعت فيه باستغراب وقلتلو.. -لا مو هيك بس بدي اسالك..مو مرت عمي قالت انكن رح تجهزوني هلا فتحت الخزانة ما لقيت غير هدول.. -ايه هدول هني جهازك يعني شو بتحتاجي اكتر من قميص نوم وبيحامة ولبسة تطلعي فيها؟؟؟ -محمد بس انا ما بدي هيك..بدي تياب اكتر يعني كل عروس بتطلع معها جهاز كامل.. -هههههههه...ايه بيطلعلك يا بنت الخياطة.طيب كان قلتي لامك اتفرجينا شطارتها وتفصلك جهاز يليق بمقامك يا بنت موظف البلدية!! -محمد انا ما بسمحلك لا تجيب سيرة اهلي على لسانك.. ما شفتو الا وجهو صار احمر..ومسك وجهي وشد عليه واتطلع فيني و عيونو عم تقدح شرار.. -ليكي ولي بدك تفهمي اني انا بحكي اللي بدي اياه وما الك حق تفتحي تمك بكلمة واحمدي ربك اصلا اني وافقت عليكي جاي هلا تعترضي على التياب بيطلعلك والله مزبوط ما انتي كنتي مدللة عند اهلك لدرجة انهم ما صدقو ويخلصو منك... كلامه نزل علي متل النار وعرفت انها حياتي اللي جاية معه حجيم.. طلع من الغرفة ورجع بعد شي ساعة وانا طوال هالساعة كنت سامعة مسخرته وضحكو علي بعد ساعة دخل الغرفة ولا كانو حاكي شي ابدا.. وصارت هديك القصة مع اني كنت ببكي وما بدي وامي ما فهمتني شي صرخ فيي واجبرني جبر اتزلط قدامه من تيابي وانا والله عمري ما غيرت تيابي قدام حدى.. حسيت حالي جارية عندو مو مرتو ........