رحت قبل اتنوم ب5 ايام المستشفى كان معاي دم احمر مثل دم الدوره فحصتني الدكتوره قالت لي الرحم مسكر وبعيد عنق الرحم " يعني اصلا ولادتك مو قريبه😢" قالت لي دامك عديتي التاسع تجي الخميس الصباح تنويم طلق صناعي رحت الخميس الصبح دخلت على اساس تنويم الا الدكتوره تفحصني وتقول لي رحمك فاتح 3 سانتي ! بسم الله ماشاءالله، حطو لي تخطيط لقو مافي طلق ، قالت لي الدكتوره خلاص حبيبتي بتدخلي تنويم دام الرحم فاتح 3 سانتي ماراح تدخلي على اساس طلق صناعي والحمدلله رب العالمين.. وفعلا ركبت الغرفه وبعد كم ساعه من الفحص نزلت لي سدادة الرحم قلت بس خلاص اكيد بالليل بيجيني الطلق او على فجر الجمعة، مر النهار ومر الليل ومر الفجر الجمعه وابد مافي طلق 😭 بديت اتوتر وتتعب نفسيتي بس كان أملي بربي كبير وكنت اقول يارب وكلتك امري وانا متاكده بتختار الي هو خير لي ولصغيري وطول الوقت استودع الله نفسي وجنيني واقرأ سورة مريم والزلزله والانشقاق واحط يدي على بطني واقول اللهم يا خالق النفس من النفس ويا مخرج النفس من النفس ويا مخلص النفس من النفس🥹.. جا يوم جديد "الا هو يوم الجمعه " وابد ماحس بطلق واذكر كنت اقول بيني وبين نفسي معقوله رجع تسكر الرحم 😢 وكنت افكر ومتوتره بس مع ذلك كنت اقول يارب خير لي ولطفلي ، صرت امشي بـ السيب للمستشفى وطول ما انا امشي اذكر ربي .. جات العصر وجات الدكتوره فحصتني لقت الرحم لسه فاتح 3 بيني وبين نفسي حمدت ربي قلت الحمدلله على الاقل لو اخدت طلق صناعي ماراح اتعب كثير لانه فاتح وقالت لي لكن للان ماتحسي بشي ولا طلق فـ اكيد بكرا او الليله بس تفضى غرفه راح تنزلي تولدي بطلق صناعي قلت تمام خير ان شاءالله مشت الدكتوره من غرفتي شوي الا احس بألم خفيف واقول لزوجي فيني ألم بس مدري مو طلق الألم خفيف شكله من الفحص .. أصر عليّ اني انادي الممرضه تسوي لي تخطيط وانا رفضت لانهم كل كم ساعه يسو لي تخطيط ومايطلع معاي شي .. بس لما اصر ناديتها وجات وقالت لي دام في ألم امشي مع زوجك يمكن الليل في ولاده ربك كريم .. قمت ومشيت وبعدها رجعت الغرفه والألم كان يروح ويجي ناديت الممرضه قلت لها فيني ألم سوي لي تخطيط جات وسوت لي جلست اراقب التخطيط تجي كل كم طلقه خفيفه توصل 40، 45 يعني حسبت الطلقات ممكن تجي 4 او 5 بس قلت خلاص 🥹 مافي طلق ولا هو مستمر بس الحمدلله ربي كريم .. وهذا كان عالمغرب الساعه 7 , زوجي مشى بس شالت التخطيط أقل من ربع ساعه اناديها فيني ألم مو قادره ، ماصدقتني 😂 قالت لي قومي امشي وصراحه ما الومها توها شايله التخطيط ولا في طلق متواصل والطلق بارد اكيد مابيجي ببالها .. قالت لي قومي امشي قمت احاول امشي ماقدرت الألم بدا يشتد فجأه واحس بدفع ! كانت الدكتوره موجوده وناديتها وانا بالسيب امشي قلت لها خلاص ما اقدر احسني بولد قالت وين غرفتك قلت هذي قالت ادخلي بجي افحصك وفحصتني ولقت فتح 4 قالت لي خلاص بتنزلي غرفة الولاده .. نزلوني حطو لي الطلق بدا يشتد واشوف الرقم وصل 154 او 140 بهالحدود قمت اصرخ تقول لي الدكتوره تحسي بدفع ؟؟ قلت اي قالت خلاص هذا راسه كلهم تجمعو عليّ يقولوا لي ادفعي كل ماحسيتي بالدفع خلاص هذا راسه " للأمانه تعبت بالدفع وتعبتهم معاي " مع اني مو بكريه بس مدري ايش فيني ماعرفت ادفع 😂 جلست الممرضه عند راسي كل ما اصرخ تسكر فمي وتقول لاتصرخي بس ادفعي كانه تتبرزي وتشجعني وكل ماحاولت اوقف قالت اكتميهااا وادفعيي ادفعيي ايووا ادفعيي وكلهم يقولوا لي ترا راسه صغير ادفعي لاتخافي خلاص مابقى شي ساعدينا ، وفعلا الكلام والتشجيع وقت الولاده يفرق 😢❤️ الحمدلله ربي سخرهم لي .. والحمدلله ولدت وطلع من نور دنيتنا وزاد بيتنا حلاوة ياربي لك الحمد والشكر على جميل عطاياك صار عندي تمزق واحتجت خياطه بس الحمدلله كل شي يهون ❤️ بعد ماركبت كل الممرضات مبسوطين ويذكرو ربي ويضحكوا لي يقولوا ماشاءالله تبارك الله🥹❤️ الكل مستغرب لكن ماعلى الله بشيء عسير ، من فرحتي وفرحتنا بمولودي يوم ثاني جبت لهم شوكلت وشكرتهم 😭 ماقصرو معاي طول الوقت كانو يهّونو الشي عليّ خلاصة كلامي ابي أوصل لكم ان مهما صار لاتخافوا بس توكلو على الله وقولوا يارب الخيره فيما اخترته لي يعني انا كنت خلاص من افكار الشيطان اقول لا ماراح اولد طبيعي لا ماراح يجيني طلق لا ماراح كيت كيت وهذا كله من افكار الشيطان بس كنت استغفر ربي واقول لا ربي كريم لا ربي بيختار الشي الصح لي وله وهذا الكلام طبعا مو بس عالولاده في كل امور حياتنا بس احيانا الانسان يلعب براسه الشيطان او الافكار 😣 هذي قصة ولادتي وشكرا لكل شخص فرح من فرحي ودعىّ لي ❤️❤️ يارب يجزاكم كل خير واسأل الله ان يرزقنا واياكم خير الدنيا والأخره .. دعيت لكم كلكم مانسيت احد كل من وصاني ادعيّ له وكل من كتب لي دعوه دعيت له بالمثل ويارب الله يطعم كل مشتهي الذريه 🤲🏻 احبكم فيّ الله استودعتكم ربي ولو يوم بذر مني غلط او زل لساني على احد فـ التمسو لي العذر واستسمحوني اخواتيّ🤍