منذ 3 سنوات
  • المرحلة الثالثة (الأشهر 9,8,7)
السلام عليكم بنات بما اني مو بكريه فأعرف لنفسي وما جلست احاتي الولادة مثل حملاتي السابقه اعرف اني اولد نهاية الشهر ودايما اقول صبرت هالشهور ما بقى الا القليل وفعلاً انا اولد قبل موعدي بيومين تجيني ولاده من الله ولا اشرب شي ولا خرابيط.. طبعاً قبل ولادتي بيوم جاني ألم وضغط من تحت قوووي طبعا يروح ويجي بس محتمل حسيت اني بولد نفس اليوم او الا بعده بس ظليت قلت خليني اشوف شي وبروح المستشفى لانا انا ولاداتي ولله الحمد سريعه ولادتي السابقه فتحت الرحم كامل وانا في البيت ولحقت على مستشفى صغير بالحي ولدت بغرفة الطوارئ صحيح الولاده كانت سهله بس ما حسيت بالشعور حتى بنتي ما شفتها الا بعدين .. المهم ظليت طول اليوم حسيت اني فعلاً بولد بس ابي شي يخليني اروح المستشفى مثل كيس الماي أو دم أو طلق منتظم وهم ما يدخلون اي وحده غرفة الا اذا عندها بوادر مثل هذي.. عالساعه 11 ونص الليل قلت بمشي في البيت عشان تتسهل علي بعد ثلث ساعه ما اشوف الا شي طايح مني بقوه لونه أخضر و صرخت. طبعا انفجر كيس الماي بقوه والماي لونه أخضر هذا يعني ان البيبي متبرز.. وزوجي يجيني قالي يلا بوديك طبعاً انا خفت على البيبي وعلى طول نروح المستشفى دخلوني تنويم لانا الماي انفتح وطلع فاتح 3 هذا على الساعه 1 طلبت منهم ابرة الظهر كان طلقي متوسط وبعدها حطولي طلق صناعي فتح 4 وبعد ساعه فتح خمسه وسبحان الله من قاستني حسيت برغبه في الدفع قلت للممرضه احس اني ابي اتبرز قالت تونا قايسينك ظليت فتره اقول لزوجي ابي ادفع عندي رغبه قويه ناداهم قاستني مره ثاني قالت لي ما شاء الله عشره ولاده ولدت 4 ونص الفجر ولله الحمد ولاده ميسره رايقه حسيت بكل لحظه مع البيبي ولدت وبشرت اهلي على طول والدكتوره تشتغل فيني وانا احوس بالجوال .. حتى الدكتوره رايقه وصراحه ابرة الظهر رحمه بالنسبه لي.. الله يسهل على كل حامل يارب

3 تعليقات

العضوة: 726664 , منذ 3 سنوات

الحمدلله على سلامتك وسلامة النونو بس بسألك هو فعلاً طلع الجنين متبرز والا كيف

العضوة: 700868 , منذ 3 سنوات

@user-146617 الله يبارك فيك ولدت في الأسبوع 39 قبل موعدي بيومين

العضوة: 700868 , منذ 3 سنوات

@user-726664 الله يسلمك ايه كان متبرز الماي الا نزل مني أخضر مو شفاف بس الحمد لله ما بلع شي