منذ 5 سنوات
  • مرحلة مابعد الولادة
السلام عليكم خواتي 💗 الحمدلله الذي بنعمته تتم الصالحات رزقني الله بمولودة اسأل الله ان يحفظها من كل شر و يبارك فيها وأن يرزقني برها ويجعلها من عباده الصالحين 🤲🏼💗 حبيت اكتب لكم قصة ولادتي 😁 قبل يوم ولادتي بيومين كنت وايد تعبانه و فيني الآم الطلق بس كان ينتظم فتره و عقب يروح الألم و سرت اسوي تخطيط في المستشفى و قالولي لازم تنامين عشان نراقب حالتج و نعطيج طلق صناعي طبعا رفضت و طلعت على مسؤوليتي بس قالولي لازم ارجع بعد يومين .. رجعت البيت و تميت امشي وايد و اشرب ماي زمزم و حطيت فيه زعفران و ادعي انه اييني الم الطلق الطبيعي و انه ربي يسهل علي و على كل الحوامل و كليت اناناس و كان صدق يزيد علي الالم بس ما اشوف اي دم او ماي ينزل مني و تميت صابره و ادعي وايد و طبعا كانت حركة البيبي شبه منعدمه و هالشي وايد كان مخوفني.. و بعد هاليومين سرت المستشفى و الدكتوره سألتني عن حركة البيبي قلتلها وايد قليله فخافت الدكتوره و سوتلي سونار و قالت وزن البيبي نقص عن آخر مره و شي تكلسات في المشيمه و شفت اشيا بيضا حولين المشيمه.. قالت الدكتوره لا تخاطرين و تردين البيت و يروح تعب هالشهور كلها و انتي اصلا مخلصه التاسع هني انا وايد خفت سرت اصلي استخاره و طلعت من المستشفى عشان اخذ اغراضي و ارجع .. قبل ما نرجع زوجي قالي ليش ما نسير عند دكتوره ثانيه عشان نشوف اذا صدق خطر علي اني اطول اكثر ..

53 تعليقات

العضوة: 216434 , منذ 5 سنوات

رحت مستشفى ثانيه و الدكتوره فحصتني و قالت نفس كلام دكتورتي انه اذا ما احس بحركة البيبي هذا وايد خطر و قالت بسويلج توسع و مادري كيف دخلت ايدها بحركه دائريه آلمتني وااااايد و صرخت صرخه من فحصها قالت خلاص عقب 5 ساعات ان شاء الله بتولدين قلتلها انا اسمع اني بولد من اول ما دخلت التاسع و بعدني ما ولدت قالت لا صدقيني هالمره غير و بسرعه عقب ما طلعت من عندها عزكم الله رحت الحمام و اشوف ماده مخاطيه مع دم و احس اني ماقدر اتحرك من الألم و بسرعه رديت البيت اخذ اغراضي

العضوة: 216434 , منذ 5 سنوات

كان فيني الم فظيييييع و رجعت المستشفى اللي كنت اراجع فيها و بعدني كنت انزف فحصوني مره ثانيه و قالو خلاص ولاده و بنحطيلج طلق صناعي في الوريد قلتلهم بمشي شوي عشان اييني طلق طبيعي قالو لا ما يستوي خطر عليج .. طبعا هم عشان ما يخوفوني قالو اول شي بنحطيلج دوا يخفف عليج شوي و كله جذب في جذب 😂😂 حطولي دوا الطلق و بدا الألم يزيد و يزيد و عطوني اكسجين و كل ما اييني الالم اتم اتنفس من هالاكسجين و ادوخ على طول و بعدين افتح عيني و شوي و يرد الالم و اخذ هالاكسجين بسرعه و اتنفس و ارد ادوخ و على هالحال... 😂 و القابله كل نص ساعه اتي تفحصني .. و فجاه قالت خلاص بفتح الماي عشان ينزل البيبي في الحوض قلتلها اوكي وانا طبعا ماعرف انه يعور و يوم فتحته صرخت صرخه من كل قلبي و تميت اصيح لانه الصراحه وايد مؤلم بس الحمدلله انه الاكسجين موجود وااايد يخفف الألم وانا كل ما تفحصني اسألها ها كم فتح الحين تقولي خلاص قربتي وانا مصدقتنها بس كان بعده مفتوح 6 بس .. طبعا اللي ولدو من قبل يعرفون انه كل ما ينفتح الرحم اكثر يزيد الألم و يوم يزيد علي الالم اعصب عليهم و اقولهم خلاص خلو الدكتوره اتي ابا تسويلي عمليه والله وايد كنت معصبه و اصيح و زين ما كفخت الممرضه 😶 مسكينه صبرت علي وايد.. و بعدين يوم فتح الرحم كامل الدكتوره يت و تقولي كل ما اييج الألم ادفعي وانا كنت خلاص منتهيه ما فيني طاقه وايد ادفع شوي و بسرعه اوقف لانه احس بدوخه بس الحمدلله فجأه شفت الدكتوره رافعه شي أخضر و اصفر و سمعت صياح البيبي و دخت 😂😂 كان لونها جي لانه مسكينه عزكم الله تبرزت في بطني و بسرعه خذوها عشان يكشفون عليها و ينظفونها رجعوها شوي عشان اشوفها و بسرعه خذوها مني 😢 قلتلهم ليش ما خليتوها في حضني ابغي بنتي رجعوها 🤣 قالو ما يستوي لازم يسوون لها فحوصات عقب بيردونها ان شاء الله... و بس هاي قصة ولادتي اقول الحمدلله اني ولدت بطلق صناعي مب عمليه لانه الم كم ساعه اهون بمليون مره من الم العمليه اللي يستمر بالشهور و الله يكتب لنا الاجر و يسهل على جميع الحوامل و يقر عيونهم بشوفت عيالهم و هم بصحه و عافيه يارب الله يحفظكم من كل شر 🤲🏼💗

العضوة: 315947 , منذ 5 سنوات

عشت معك جو بالقصه فعلاً تعبتي كثير الله يكتب اجرررك .. الف الحمدلله ع سلامتك والف الف مبروك حبيبتي وعقبالي يارررررب تتيسر ولادتي واولد واشوف بنتي بين حضني وانبسط فيها يارب 😭♥️♥️♥️ اجل انا مقررين لي طلق صناعي ٦ تحاميل كل يوم تحميلتين لين اولد تقول يمكن من ثاني تحميله تولدين وانا عندي امل ومتفائله كثير بربي ان ولادتي راح تكون سهله وميسره 🙏🏻🙏🏻♥️

العضوة: 200289 , منذ 5 سنوات

الحمدلله على سلامتك و الله يقر عينك فيها يارب و ينبتها نباتاً حسناً💕🌸

العضوة: 291160 , منذ 5 سنوات

الحمد لله علا سلامتك ومبروك البنوته

العضوة: 249499 , منذ 5 سنوات

الحمدالله ع سلامتك حبيبتي تعب مأجور أن شاء الله وربي يخلي البنوتة العسل وتشوفيها عروس يارب هي البكرية تتلبك شوي وقت الولادة بس بالمرات يلي بعدها بيصير عندها خبرة 😁😁😁

العضوة: 216434 , منذ 5 سنوات

@user-315947 هيه والله وايد تعبت بس الحمدلله كل شي يهون عشان البيبي الله يسلمج من الشر حبيبتي و ربي يقومج بالسلامه و تكون ولادتج سهله و سريعه يارب لا تخافين ان شاء الله بتتيسر ولادتج و ما بتحتاجين لكل هالتحاميل

العضوة: 216434 , منذ 5 سنوات

@user-200289 الله يسلمج من الشر و اميين وياج يارب حبيبتي الله يرزقج بر ابراهيم و يجعله من الذرية الصالحة يارب

العضوة: 216434 , منذ 5 سنوات

@user-291160 الله يسلمج و يبارك فيج حبيبتي

العضوة: 216434 , منذ 5 سنوات

@user-249499 الله يسلمج حبيبتي و اميين يارب يزاج الله الف خير 💗💗💗 صح وايد تعلمت اشيا من الحمل و بتفادى الاخطاء اللي سويتها في الحمل الثاني ان شاء الله

العضوة: 28097 , منذ 5 سنوات

ي عمرري كانت فترة صعبه شوي عليك والحمدلله اللي عدت بالسلامة كل التعب والوجع والآلام تهون بمجرد تشوفي البيبي الف الحمدلله ع سلامتك انتي وبنوتتك 😻 والله يحفظها لكم ي رب حبيييت اسمها ماشاءالله الجازي 💜🕊

العضوة: 249499 , منذ 5 سنوات

ان شاء الله حبيبتي تفرحي فيها وبأخواتها يارب 😍😍

العضوة: 216434 , منذ 5 سنوات

@user-28097 هيه والله الف حمد و شكر لك يارب 🤲🏼 الله يسلمج من الشر حبيبتي 💗 اليازيه بالاماراتي و الجازي بالسعودي 😅

العضوة: 216434 , منذ 5 سنوات

@user-249499 ان شاء الله يارب 💗 طمنيني عنج اخبار الحمل وياج؟

العضوة: 249499 , منذ 5 سنوات

@user-216434 الحمدالله نشكر الله بلشت بالتاسع الحمدالله 😍وبحس بطني اليوم نازلة عن قبل بكرا ان شاء الله مراجعتي مع دكتورتي عندي شد وكبس للاسفل من نص الثامن