منذ 4 سنوات
  • مرحلة مابعد الولادة
البوست دا فيه كل الاسئلة ال ممكن كل ام تفكر فيها. حديثى_الولادة من الرأس حتى القدمين ❤️❤️❤️ الشعر_والرأس: -مفيش اي مشكله من شكل الراس في اول حياة الطفل بتاخد الشكل الطبيعي مع الوقت فيها فتحتين خلفيه ودي بتقفل من الولاده وحتي ٣ شهور والاماميه ودي بتقفل من ٩ شهور ل ١٨ شهر. -نمو الشعر للطفل يبدا من سن سنتين يعني الواد مفيش شعر..البنت هيبقي شعرها خفيف مفيش الكلام ده كله بعد سنتين... -افضل انواع زيوت العنايه موستيلا- سانوسان - سيباميد وكل طفل بيستجيب علي واحد فيهم اكتر من التاني (تغيرات فردية)☝️ -لو لقيت في راس الطفل جزء زي المية تحت فروة الراس ..متقلقش ..دا بسبب استخدام اداه فيها نوع من الضغط مع الولاده ووارد جدا وهتروح مع الوقت #العين: -الصفرا ...لون بياض العين بيتغير للون الاصفر بداية من اليوم الثالث (فسيولوجية)...وبيكون علاجها الرضاعه فقط مع المتابعة...قرار العلاج بالضوء phototherapy بيكون من خلال الطبيب المعالج طبقاً لزيادة الصفرا وعمر الطفل وحالته الصحيه ...موضوع اللمبة ومنشطات الكبد كلام فاضي وملوش اي قاعده علمية ..آه والله -بعض الاطفال بينزلوا وفيه حته كده لونها احمر في الجزء الأبيض من العين... ودا بيكون في حالة الولادة الطبيعي لو الطفل (اتزنق) او استخدموا شفاط ..وفي حالة القيصري ..لو استخدموا حاجة فيها نوع من الضغط وهم بيشيلوا الطفل ..عموما هتروح لوحدها متقلقيش -يفضل مسح العين للطفل بمياه دافيه في نفس اتجاه الرموش -انسداد القناه الدمعيه وارد في الاطفال بنسبه كبيره ودا بيسبب دموع كتير وعلاجه المساج للقناع الدمعيه يوميا ..ولو حصل افرازات قطرة (توبرين) واخواتها...ممكن نلجيء لطبيب رمد لعمل عملية بسيطه لفتح القناه الدمعيه لو استمرت لبعد سن سنه ولكن بنسبة ٩٠٪ بتختفي قبل السنه -إرتكاز حركة العين بتبدأ من ٣-٦ شهور...فلما تلاقيه ضاربين مقصات بعينيه متقلقيش..الواد مش احول ياستو ☝️ #الانف blocked nose الخنفره ...ودا اشهر شيء في الاطفال حديثي الولاده ودا بسبب ان التجويف الانفي لسه صغير وبيتقفل بسرعه وعلاجه محلول ملح اوتريفين بيبي واخواتها قبل الرضاعه وكترها لا يضر.....بخاخ مياه البحر زي فري نوز او فيزيومير بيبي نتايجه هايله في الموضوع ده وآمن جدا #الفم ☝️-الفطريات ودي من اكتر المشاكل حدوثا وعلاجها نظافة ثدي الام ..ودكتارين چل واخواتة او نقط نيستاتين قطاره كل ٦ ساعات واخواته في فم الطفل وعلي اللسان. ☝-اللسان المربوط....ودا لسان بيكون الجزء الامامي للسان مرتبط بقاع الفم عن طريق شريط نسيجي سميك يعوق حركة اللسان ـاعراضه ...شرقه وصعوبه في الرضاعه وبالتالي الم ف الثدي للام واحتقان نتيجة قلة رضاعة الطفل وتراكم اللبن بالثدي ودا مش بيحصل في كل الحالات -علاجه: اختلفوا عليه ومازالوا مختلفين ....البعض قالوا لو الطفل فيه اعراض من اللي ذكرته بيتعمله عمليه بسيييييطه جدا جدا ومفيش لها اي مضاعفات بيقطع الجزء النسيجي اللي تحت اللسان وياريت لو في اول ايام الطفل ودا الأفضل...والبعض قالوا نسيبه عادي جدا ونشوف لو حصل اي حاجه من اللي ذكرتها تتعمل...وبالاخص انه احسن وقتها من بعذ الولاده حتي سن سنه ☝-التسنين :من سن ٦ شهور لسنه وشهرين مش بنقول اتاخر غير بعد ١٣شهر ومفيش اسنان لسه....اعراضه❗️؛ بتبدأ من ٤ شهور علي شكل حراره طفيفه مع بعض العصبيه وفقدان بسيط للشهيه ..علاجه❗️: قطنه بمياه بارده ونمشيها ع اللثة كمساج وسيتال مسكن #الصدر كِبَر حجم الثدي للرضيع...دا اضطراب هرموني بيحصل بعد انفصال الطفل عن الام في الولاده.. علاجه ...ولا حاجه الاخت اللي بتقول نعصر وكلام فاضي ...حرام عليكي بطلي فتي #البطن الانتفاخ ودا اشهرهم: ـالام عليها عاملان ....☝️اكلها: تبعد عن المسبك والموالح والكافيين والشيكولا والمياة الغازية ☝واسلوبها في الرضاعه : وضعها ٩٠ درجة ووضع الطفل ٤٥ درجه وبلاش رضاعه عمال علي بطال ...اقلها ساعه واقصاها كل ٣ ساعات مش كل طفل بيبكي يبقي جعان بس ياأختااااه ـالطفل: مساج للبطن ..وسايمثيكون واخواته السره - الكحول ٧٠٪ رش باستمرار مع التهويه والطفل ياخد شور عادي والله والميه تيجي عليها عااااادي ...ونخلي بالنا ان البامبرز يكون تحت الحبل السري علشان الطفل لو عمل حمام ميوصلش ليه....ومفيش اي مشكله لو اخدت وقت موقعتش كلام الاكاديميه الامريكيه ٢٠١٥ قالوا معاك ل ٨ اسابيع..ونزول نقط دم من السره مع بعض الاطفال شيء طبيعي جدا في اول شهر اضطراب هرموني وبيروح لحاله. - الفتق السري: ضعف في جزء عضلي في البطن ومفيش منه قلق وبيتحسن تلقائى بدوان حزام سُري ولا لزقه ولا كلام فاضي بل بالعكس استخدام الحاجات دي بتزود المغص عند الطفل وبتساعد في حدوث قيء.. التحسن بيكون من ٦ شهور لسنه....والتدخل الجراحي بعد ٥ سنوات لو كانت لسه موجوده اساسا -ورم السرة الحُبيبي:وده جزء لحمي بيفضل بعد ماالحبل يقع وممكن يكون معاها افرازات صفرا ودي بتحتاج لمضاد حيوي موضعي مع الكحول ولو مفيش تحسن بتحتاج لكيّ بنترات الفضه او ربطها لو ليها عنق. زيادة عدد مرات استول في اول فتره عادي جدا طالما بيرضع وبيزيد في الوزن ...مش اسهال وربنا ياحاجه الترجيع: لو بيرجع وبيزيد في الوزن ..يبقي ارتجاع فسيولوجي او رضاعه زايده..نظمي الرضاعه وكرعي الطفل كويس وتابعي الوزن لو بيزيد يبقي تمام وغيري هدومه كل شويه وانتي ساكته....العلاج هنا ملوش قيمه الامساك : في اول حياة الطفل مفيش قلق ودا بنسميه (امساك وظيفي) ليه علاقه وطيده بأكل الام لو بترضع طبيعي فظبطي اكلك زي ماقولنا فوق في الانتفاخ ...ولو صناعي ممكن نغير نوع اللبن ونجيب الاخف في السكر Bebelac EC.... وعليكي وعلي تمارين الامساك وزيت اللوز ٥ نقط ٣ مرات مع تظبيط اكلك ...وبلاش جليسرين لبوس غير بعد ٣ ايام ع الاقل بدون حمام مع المساج للبطن...استمر الامساك !! لازم نستبعد الاسباب المرضية زي كسل الامعاء أوحساسية الالبان مع الدكتور بتاعنا #منطقة_الحفاض ✔️الفتق الاربي...جراحه وش ✔️الطهاره : احسن وقت ليها اول اسبوع او بعد 40 يوم ، ويفضل بعد الاربعين ✔️الميه علي الخصيه؛ بتروح مع الوقت غالبا، لكن أحيانا بنحتاج نعمل سونار للتأكيد ✔️ الخصيه المطاطيه مبتحتجش عمليه بس لازم تتابع علشان فى نسبه منها بتبقي معلقه مع الوقت ودى بتحتاج تدخل جراحى اما الخصيه المعلقه افضل وقت للجراحه من 6 الى 9 شهور والعلاج الهرمونى مبقاش مفضل استخدامه دالوقت علشان نتايجه وحشه ومشاكله كتير ✔️التسلخات: التهويه والتجفيف ...استخدام نوع بامبرز جيد..تقليل استخدام المناديل المبلله....استخدام كريم يحتوي علي الزنك مع تغيير كل حفاضه #القدمين - العيوب الخِلقيه ....أشهرها((القدم المخلبيه)) ودي اسبابها عدم التوازن بين قوه العضلات و الانسجه المسؤوله عن شد القدم للداخل .. مقابل العضلات المسؤوله عن شد القدم للخارج علاجها: عن طريق دكتور عظام اطفال الجبيره والجراحه ومن اول يوم -الفلات فوت: ولا حاجه وغالبا familial -هتسمعوا صوت (طقطقه) في بعض الاطفال في اليدين والأرجل...متقلقوش دا مش من العظام دا صوت اتساع الاربطه بين المفاصل. #معلومات_ع_الماشي ********************* ☝️المبتسرين ...بيتولدوا قبل ٣٧ اسبوع من الحمل قليلي الوزن....وزنهم بيكون اقل من ٢.٥كجم ـ دول محتاجين معامله خاصه وبالاخص درجة الحراره ...لازم تدفئه ...ورضاعتهم بتكون بأسلوب معين لان مقدرتهم علي المص بتكون ضعيفه وغالبا بنشفط لبن الام وبياخدوا لبن من نوع معين خاص بيهم زي bebelac premature....وبنزود حجم الرضعه تدريجي علشان ميحصلش مشاكل في الامعاء...وبنطمن لما وزنهم بيزيد فوق ٢.٥كجم وبنغير اللبن لانواع تتناسب معاهم ....لازم ياخدوا فيتامينات من اول يوم تحتوي علي فيتامين A,K,E,D وحديد... ☝فيتامينات الرضيع *فيتامين D ٤ نقط حتي سن سنه *الكالسيوم والحديد بيكون تبعاً لحالة الطفل واللي بيحددها الطبيب المعالج ☝بلاااااش اعشاب ولا مياه حتي سن ٦ شهور ☝التوأم غالبا بيحتاجوا لبن صناعي ....لكن فيه امهات super woman قدروا يرضعوا طبيعي وقصصهم ناجحه جدا ☝الوزن الطبيعي للولاده من ٢.٥-٣.٥ كجم وبيزيد في اول ٤ شهور ٣ كجم بمعدل ٧٥٠ جم في الشهر وتاني ٤ شهور ٢ كجم بمعدل ٥٠٠ جم في الشهر وتالت ٤ شهور ١ كجم بمعدل ٢٥٠ جم في الشهر ☝️الطول الولاده حوالي ٥٠ سم وفي اول ٦ شهور بيزيد من ١٢-١٥ سم بمعدل ٢ -٢.٥ سم كل شهر وتاني ٦ شهور حوالي ٩ سم بمعدل ١.٥ سم كل شهر ☝قطر الراس عند الولادة ٣٤-٣٥ سم ٦شهور ٤٤سم سنه ٤٧ سم (نيلسون ٢٠١٥) *** طبعا كل القياسات اللي اتكلمنا عليها تُحدد من خلال منحني النمو اللي من خلاله نقدر نقول فيه مشكله ام لا...الموضوع فيه variations شويه ☝ وبعد البوست العالمي ده لابد من المتابعه الدوريه مع طبيبك

13 تعليقات

العضوة: 441974 , منذ 4 سنوات

اللهم صل وسلم على نبينا محمد وعلى آله وصحبه أجمعين

العضوة: 336649 , منذ 4 سنوات

الله يجزيك الخير كتير مفيد

العضوة: 441974 , منذ 4 سنوات

الله يرفع منزلتك دنيا واخره

العضوة: 428976 , منذ 4 سنوات

الله يجزاك خير ويسعدك

العضوة: 121619 , منذ 4 سنوات

حبيباتي حوامل احلا مدينه ابها بما نكم ان شاء الله قربتم ولاده الله يقومكم بالسلامه هذي انا عندي اخذت كميه بطانيات من ذا النوع بعد لادتي ووالله مره حلوه بدال ما تقمطي وتربطي وحوسه هذي جددددددا عمليه باقي عندي اخر حبه عمولتي ٢٥ واوصل لك يوم الجمعه والسبت ببلاش ترا القطعه موجوده يعني بس تواصلي معي واعطيني الموقع باذن الله تكون عندك اسرع من البرق

العضوة: 121619 , منذ 4 سنوات

وروحي اي مكان ماراح تتضاربي انتي والبطانيه وتدفي شتا الله يبعد عننا الامراض بذات المواليد مررره يتعبو اذا مرضو

العضوة: 373540 , منذ 4 سنوات

راااائع شكرا لك