السلام عليكم ترددت انزل قصتي اللي بدت قبل اكثر من اسبوع لما اخذت شنطتي على اساس قالو بيولدوني وسبحان الله للحين ماولدت .. والخيره فيما اختاره الله 💗 انا من حوامل 18 نوفمبر ، ثاني حمل لي ، بولادتي الاولى اخذت العاشر وتعديت الاسبوع 42 واكثر ولا جاني طلق ابداً ابداً ..! فولدت بطلق صناعي والحمدلله تسهلت .. بحملي هذا عندي سكر حمل كنت اسيطر عليه تقريباً بس الانخفاض لا ماقدر لانه يجي حتى احيان بعد الاكل وماكنت اخذ انسولين والحمدلله .. وعندي نزول جزئي بالمشيمه لكن الحمدلله مو تحت بعنق الرحم لا صايره على جنب بس بالاسفل مو فوق .. بالاسبوع 38 وكم يوم .. رحت للطواريء عشان كان معي اوجاع ومغص دوره متكرر ومستمر بس مو منتظم ولان دكتوره خوفتني من وزن الجنين ( اللي بالاخر طلع وزنه طبيعي وبعد لو يزود يكون احسن ) في الطواريء كشفت علي بالسونار وقالت انه نازل شوي بالحوض وكشفت من تحت وقالت مفتوح رحمك 1 سم وعنق الرحم لين ، سويت تحليل سكر عشوائي ثم تخطيط طلق وماكان فيه طلق نهائياً .. قالتلي راح نكتبلك تنويم ومن بكرى طلق صناعي لان سالت الاستشاري قال دام فيها سكر حمل لازم تولد والامور تمام فبعطيك طلق صناعي وماينفع التأخير لان سكر الحمل يأثر على جنينك .. وانا كنت مخططه اولد بمستشفى خاص لان الحكومي لاعنايه ولانظافه ولاخصوصيه وكل شوي دكتور او دكتوره بالتنويم يسالونك عن حالتك وتعيدين لهم نفس السيناريو وكل واحد له راي ، بس احب دايماً اطابق بين كلام الحكومي والخاص عشان اتطمن .. المهم كلمت زوجي وقلت شرايك انام الليله عندهم بيشوفون عن وضع الجنين بالسونار الكبير الصباح وبعدين اشوف قرارهم بعدين نطلع ع مسؤوليتنا ونتوكل على الله اذا توليد رحت للاهلي قال لي تمام .. تنومت عندهم وتعبت من الوجع الفجر جاني مغص قوي مايروح مهما غيرت الوضعيه وقالت الممرضه هذا مو طلق لان بالتخطيط ماطلع طلق ولما جاء الصبح اخذت السونار وقالت ان وزنه 3 كيلو والمويه كويسه الحمدلله وبس ، والسكر جتني اخصائية تغذيه وتكلمت معاي وقالت حلو انك حريصه ع الحميه ووو .. بعدين جاني دكتور قرا ملفي عالسريع وقال كل شي طبيعي (يعني زي اللي يقول ليش تولدي صناعي ) طيب مو انا اللي قلت كذا ، بعدين اخر شي قال : بكرى نسويلك طلق .. قلت دكتور لحظه هالشي له داعي او اصبر ؟ ماحسيته عرف يجاوب قلتله بطلع يادكتور واجي بعدين اذا حسيت بشي ، قال اطلعي ع مسؤوليتك ووقعت ع مسؤوليتي واجراءات طويله وطلعنا عالمستشفى الخاص . قلت لزوجي بشوف كلامهم ونقرر ولان الحكومي مافحصوني اليوم عشان يشوفون عنق الرحم لسه او توسع شوي وكمان كلام الدكتور محير وماعنده قرار صح ، المستشفى الخاص كان قريب من الحكومي ورحتلهم وفيه دكتورتين وقرو التقرير اللي سووه لي المستشفى وحطولي جهاز تخطيط طلق وماكان فيه طلق ابداً وكشفت الدكتوره بالسونار قالت مين قال لك انه داخل بالحوض ؟ لسه مو داخل بس نازل كثير لتحت .. بعدين كشفت من تحت قالت عنق الرحم للحين 1 سم وسمممميك وطويل .. سألتني اوسع لك باصابعي ؟ قلتلها اي وسعي .. طلعت الدكتورات وخلوني شوي وراحو يكلمو استشارية عشان يتفقو ع قرار واحد وانا حبيت هالنقطه فيهم عشان الانسان يرتاح مايتخبط بآراء كثيره . نادوني وقالو شوفي يارنا الوضع محير بصراحه ، انتي عشان وضع سكر الحمل وبنفس الوقت مسيطره عليه ووضع الجنين الحمدلله فاحترنا ، لكن عندك خيارين : 1- اما تجلسي عندنا ونولدك بطلق صناعي بس مو اكيد بتولدي صناعي بسبب ان رحمك مو متهيأ كثير للولاده وعنق الرحم سميك وو واحتمال تولدي بقيصريه اذا تعسرت عليك الولاده . 2- او انك تنتظري كم يوم ممكن يكون فتح شوي عنق الرحم وصار لين او ممكن يجيك طلق طبيعي . فكرت وكلمت اختي الكبيره وقررت اطلع وانتظر بالبيت كم يوم .. طلعت وانا كان معاي بالسياره شنطة الولاده واشوفها وانا متحطمه بس قلت الخيره فيما اختاره ربي لي ، رجعت البيت وكانت قالتلي اذا نزل معك دم بسيط مع الافرازات هذا بسبب اني وسعتلك لاتخافي .. المهم نزل معي شوي افرازات دمويه ومغص وعرفت انه من التحريض عاادي .. جلست بعدها كم يوم وكانت انتهت الافرازات بنفس ذاك اليوم ، قررت اروح لدكتوره اتابع معها بالعياده وتشوفلي الوضع ، شافت بالسونار انه لسه الراس مادخل بالحوض ومدور يعني ماستعد للولاده وكشفت من تحت قالت لسه 1 سم والعنق طووويل بعيد .. وبعدين قالت ترى 1 سم عشانك مو بكريه فطبيعي ينفتح 1 بعدين قالتلي اشربي اشياء محفزه ولاتفكري بالولاده خلاص انتي بالاسبوع 39 ممكن بالاسبوع 40 تولدين ان شاء الله طلعت من عندها واقتنعت بكلامها وحاولت اتناسى الولاده بس المغص المتكرر والتقلصات تخليني اقول ولاده ؟ او لا ؟ وكل مره تصير معاي لحد ماتعودت .. بعدها نزلت معي السداده كاامله وبعدين افرازات مخاطيه زي المطاط عرفتها كلها علامات قرب ولاده من غير الاسهال وانتو بكرامه .. ومع ذلك الى يومكم سبحان الله ماصار شي المهم جلست باقي الاسبوع اللي راح اشرب اشياء محفزه زي الزنجبيل والحليب مع الفلفل الاسود والتمر والعسل واسوي قرفصاء واطلع درج وامشي خفيف ( لان المشي اذا تعدى 20 دقيقه خطر يقلل اكسجين الجنين ) وادهن بطني زيت زيتون بحبه سوداء واتحمم بمويه دافيه .. والتقلصات تجي بالليل واذا جلست هدت وماكأنو صار شي ! المهم قبل امس تحجر بطني بقوه وماقدرت انام منه ومغص وحركة الجنين هدت بقوووه فقط تحجييير وثقل تحت رحت لدكتورتي وقالت لما شافتني : هاا مافيه ولاده ؟ قلتلها لا قالت تعالي اكشف بالسونار كشفت لقينا سبحان الله راس الجنين يتحرك يحاول يدخل نفسه بالحوض ومو قادر 😭 تخيلو اشوفه بالسونار يحاول .. وقالت هذا سبب اوجاعك بعدين قالت وزنه ممتاز مو كبير ومافيه خوف ان شاء الله بس مشيمتك سوتله عائق شرحتلي بالرسم قالت رحمك مافيه طاقه يساعد الجنين ع التقلصات وينزله ! ومشيمتك صحيح الحمدلله مو تحت الراس بس بجنبه بجهة اليسار ومنعت الجنين انه يحرك الراس يمين ويسار عشان يتوسع الحوض ، فيتحرك يسار بس وهذا مايكفي ! يعني هو يبذل مجهود لحاله .. قلتلها والحل يادكتوره ؟ قالت / عطي رحمك طاقه اشربي قرفه عسل وان شاء الله يتقلص ولو ماصار هالشي عادي يعطوك تحميلة طلق تفتح عنق الرحم وان شاء الله تتيسر بعدين قالت لو تولدك دكتوره شاطره وتفك موية الراس كان يقدر ان شاء الله الجنين يطلع راسه لانه ينزلق ويكمل خروجه قبل المشيمه بعدين قالت انتي انتظري كم يوم خاصه معك اسهال وثقل والجنين راسه تحت ان شاء الله تتسهل وتولدي طبيعي طلعت من عندها وانا افكر كيف اقوي رحمي .. قريت عن الاناس انه يقوي الرحم وعضلات الرحم وسمعت لرولا قطامي وشريت اناناس واكلتها امس طازجه وحسيت بانقباضات واسهال اقوى لحد الان بس الانقباضات تطوووول ماتجي ولا كأنو فيه شي والبطن احسه صغر وتلملم على بعض والتحجير متكرر معاي وحركة البيبي هاااديه جدا جداً .. صحيح ان الايام ثقيله والتعب زاد ومو قادره اتحمل بس كل ماتذكرت خروجي من المستشفى وصبري بالبيت احمد ربي واشكره على هالشي لاني اخترت الاحسن لنفسي وللجنين .. الآن انا بالاسبوع الاربعين باقي 3ايام على موعد ولادتي .. و سؤالي : هل الطلق البارد اللي مايطلع بالتخطيط ولا يوسع الرحم موجود عند بعض الناس فعلاً يعني مايجيهم طلق ؟ وهل ممكن يتكرر ؟ زوجة اخوي مايجيها طلق ابداً سبحان الله عشان كذا بتولد عمليات وانا ببنتي ولدوني بطلق صناعي بالعاشر اخر الاسبوع 42 لان مايجيني طلق رغم كل شي سويته حتى القرفه كنت اشربها وماسوت ولا ربع طلقه ! سبحان الله هل الطلق الصناعي بحالتي افضل من الانتظار ؟ لاني بخلص التاسع بعد يومين ان شاء الله .. هل اروح اليوم للحكومي واشوف اخر قرارتهم بعد اسبوعين من الانتظار وبدون ماعطيهم خبر عن السكر واخليهم يشوفو ويقررو ؟ اللهم دبرني فإني لا أحسن التدبير واكتب لي الخير في كل امر وارضني فيه 💜