اللهم لك الحمد حتى ترضى ولك الحمد اذا رضيت ولك الحمد بعد الرضا 😭♥️♥️ تعرفوني وطفشتكم بمشاكلي ف الحمل وسبحان الله اللي كاتبه ربي بيصير محد يقول ماحتكملي للشهر الفلاني او كويس لو وصلتي للشهر الكذا المهم 😅 فكيت الربط يوم الاثنين وكان الرحم فاتح ٢ سانتي وخرجت وكنت امشي واتحرك قد ما اقدر جا يوم الخميس من الليل الساعه ٩ بديت احس بالام منتظمه خفيفه تحجر بالبطن بس واستمرت للساعة ٣ الفجر وقلت لزوجي بروح المستشفى طواريء ونشوف ايش الهرجه رحت ولقو الرحم فاتح ٣ والطلق خفيف لكنه منتظم تركوني ساعه ورجعوا عادو الفحص لقوه ٣ونص ودخلوني ولادة سبحان الله بس دخلت غرفه الولادة نزلت مويه الجنين والرحم وقتها كان ٤ الطلق زاد وصار ف مستوى واحد وجات دكتوره دخلتني غرفه ولادة اللي حولد فيها وجلست تراقب التخطيط وقالت مو عاجبني نبض الجنين لانه على مستوى واحد ولو استمر كذا حولدك عمليه طبعا ماكنت ابغا عمليه وفتح الرحم ٦ سانتي وراس الجنين على طرف عنق الرحم اخذت محفز للطلق لان طلقي بارد شويا واخذت ابره ظهر وفجاه نزل نبض الجنين ووقفو الطلق واخذوني عمليات الحمدلله ولدت قيصري صح الطبيعي احسن بس سبحان الله محد يعرف فين الخير ، والدكتورة قالت ولدك طالع مره شقي الحبل السري ملفوف ع رقبته ٣ مرات وع يده مرتين ورجله مرتين 🤕 تقول ايش كان يسوي جمباز ولا ايش 😂😂😂 الحمدلله انا مره يخوفني التفاف الحبل السري . شوفه الجنين بخير وصحة عندي بالدنيا ولمن شفته ماقدر اوصف شعوري كنت ببكي لاني مره انفجعت عليه بس الحمدلله ربي سلمه من كل شر ومافيه الا العافيه وماحتاج حضانه بس اكسجين ساعتين عشان تنفسه كان سريع بعد الولادة الله يعظم اجور امهاتنا وامهات المسلمين يارب 🙏🏻♥️ جربت الطلق وكمان صناعي وكنت مو قادرة اتحمل من الساعه ٣ بالليل للساعه ١٢ الظهر ونا اطلق وبعد العمليه الم مو طبيعي وتعب وبس على مسكنات بس كله يهون واهم شي ان ولدي بخير الحمدلله دايما اكثرو من الدعاء وفي القومه والقعده قولو يارب هونها 🥺 ودايما لاتسمعو لاحد عانيت من نزيف ونا حامل وكان الدكتور يقول ماحتكملي للسابع والحمدلله كملت لنص التاسع طولت عليكم 😂🥺