تجربتي مع التكيس من البداية للحمل 🤍 أنا كانت تجربتي مع التكيس إنه الدورة كانت تتأخر عندي، وأنا طبعًا كنت مخلفة قبل، وما كنت متوقعة أبدًا إنه يصير عندي مشكلة بالتبويض بعد طفلين. بصراحة بالبداية وقفت وقلت: أنا ما باخد أمانة، والإشي ما بصير معي! 😂 لكن لما رحت كشفت، اكتشفت إنه عندي تكيس مبايض. أول إشي حكتلي إياه الدكتورة كان إني لازم أهتم بوزني، وأقطع السكر قدر الإمكان، وأغير نظام حياتي. وأعطتني مساعد للسكر. وبديت فعلًا أنزل وزني، وعملت كل الفحوصات المطلوبة، من مقاومة الإنسولين والفيتامينات وغيرها، وبلشت أهتم بأكلي وأسلوب حياتي. وكمان خلال هالفترة جربت البردقوش والقرفة والميرمية، وحسيت إنه البردقوش ساعدني كثير بتنظيم الدورة، لكن طبعًا هاي تجربتي الشخصية، ومش شرط نفس الشي يصير مع كل بنت. وضليت تقريبًا 5–6 شهور على تنظيم أكلي، تنزيل وزني، مساعد السكر، والاهتمام بنمط حياة صحي. بعدها بشهر بلشت آخذ فوليك أسيد، وأخذت في هذا الشهر كلوميد لتنشيط التبويض تحت متابعة الدكتورة. وباليوم 15 من الدورة رحت راجعت عند الدكتورة عشان أتابع التبويض، وحكتلي: "ما شاء الله، أمورك تمام." 🥹❤️ بعدها إجتني الدورة وما صار حمل بهذا الشهر، لكن الشهر اللي بعده حملت لحالي الحمدلله رب العالمين. 🤍 حبيت أشارك تجربتي مع كل بنت عندها تكيس، يمكن كلمتي تعطيها أمل وتخليها تعرف إنه التكيس مش معناته إن الحمل مستحيل. 🌷 وطبعًا أنا بحكي عن تجربتي الشخصية، وأي علاج أو منشط لازم يكون تحت إشراف دكتورة، وكل جسم إله حالته. وأخيرًا، بدي منكم دعوة من القلب ❤️ ادعولي الله يتمملي حملي على خير، ويقومني بالسلامة، وأشوف جنيني سليم معافى بين إيدي يا رب. 🤲🏻🤍