منذ يوم
  • مرحلة الولادة
بحكيلكم تجربتي من البداية بلكي بتستفيدو الألم عندي من الأسبوع ٣٧ من اكتر من اسبوعين كنت حاسة انه مو طلق كاذب وكمان ماحقيقي بس رحت على المشفى بعد يومين من الألم لأن وقتها خفت حركة الجنين والحمد لله لما وصلت على المشفى خجلني وصار يتحرك بقوة 😅 وكان عندي توسع ٢ سم وكنت حس بكتير اعراض تقدم كثرة تبول بحس ان بدي ادخل الحمام بس مافي شيء اسهال الله يكرمكم ضغط وألم تحت وألم أسفل البطن والظهر او احيانا كل وحدة لحالها أرق مااقدر نام للصبح عظام الحوض كانت تطقطق عندي لما اتحرك أثناء النوم مع ألم فظيع شهيتي عن الأكل خفت وصارت تجيني حرقة وبطني فاضي من فوق وصار عندي غثيان خفيف كمان كنت حس ان صبري قليل وكتير عصبية وصرت كتير موسوسة بالنظافة وصرت نظف واشتغل مع الألم امسك مكان الألم بأيد واشتغل بالتانية😂 واخيرا آخر الأعراض قبل ٣ ايام طلع حبوب صغيرة بوجهي بتحك شكيت فيها وبحثت عن هالشيء اعطوني احتمال انه مظبوط بسبب تغير الهرمونان وامبارح حسيت الألم اتطور صار أقوى بس ماكان منتظم قلت خليني سوي كل المحفذات يلي بعرفها بدأت من التمر اكلت ٣ تمرات وغليت كأس حليب مع القرفة وحليتهم بالعسل الألم خف مساء امبارح رحت مع الأولاد ونيمتهم لان زوجي تعب وطبخ وجلى واشتغل وبعدها نام اول واحد 😅 فقت الساعة ١٢باليل كان في ألم خفيف بعد صلاة العشاء قررت صار جما...ع 🤐 ومن بعدها حسيت الألم رجع أقوى من قبل ماخبرت زوجي لما يحس بالذنب او يبهدلني لان قلتله راح الوجع اذا ماقلت هيك مابيقبل اضطريت 🥲 بقيت سهرانة وقلت بما اني ماعبقدر نام بروح بتحمم تحممت بماء ساخن شوي يعني يتحمله الجسم شي نصف ساعة وبعدها قلت بسوي شوية تمارين لبين ماينشف شعري ويروح الألم واقد نام بعدها قلت بكمل وبجرب ماني خسرانة شي سوين تمارين قرفصاء وتمشيت بالبيت وعملت حركة الفراشة وطالعت حركات جديده على اليوتيوب وطبقتها فاق زوجي ٣وربع بده يروح على شغله شافتي عبتوجع قلي اجت الولادة قلتله مابعرف لبين ماجهز حاله ولبس غراض الشغل بلشت احسب الوقت بين التقلصات لمدة ساعة تقريبا وكانت التقلصات منتظمة كل ٥ او ٦ دقائق وبعد مشاورة طويلة بيني وبين زوجي قلتله اتصل بالمشفى بس كنت خايفة اني عطله عن شغله على الفاضي لان قبل عطل اسبوع منشاني وماصارت الولادة المهم وصلت على المشفى ٤ ونصف الفجر راقبو نبض الجنين لمدة ٢٠ دقيقة وحطولي جهاز الطلق طلع عندي طلق منتظم بالمدة بس مو منتظم بالشدة كان يطلع لل ١٢٧ وينزل بنفس الوقت لل ٣٠ او ١٠ او ٤٠ وسوولي فحص طلع التوسع زايد صاير ٣ سم امبسطت قلت الحمد لله اجا الفرج بس كان عبقولو انو الطلق يلي عندي مابساعد وخيروني ارجع على البيت أو ابقى قلتلهم بدي ابقى لان بعرف حالي بس رحت على البيت أولادي رح يوتروني ويروح كل شيئ الحمد لله الله بعتلي قابلة عربية وساعدتني كتير من متل السويديين دمهم بارد لو على ايدهم كنت بقيت لبكرا كان عندي الرحم راجع لورا كانت تقدمه وتسويلي مساج وتوسع عنق الرحم وحطيت ابرة ظهر عرف ان الطلق رح يقوى كتير بالأخير جربت جهاز التنس لمدة دقيقة ما عجبني بكهرب شالولي هو وطقولي كيس الجنين على الساعة ٩ الصبح وتمرنت على كرة الحوامل وكنت اشرب ماء كتير وكل شوي ادخل الحمام لينزل الجنين بالحوض اكتر كنت حاول أن ماابقى متسطحة حتى مع الألم اتمشى واتدرب والحمد لله كان يصير تقدم الساعة وحدة الظهر وصلت ل ٧ سم ومن وقتها صرت حس بدفع وألم قوي كتير و الساعة ١ وربع بلشت ولادة لحد الساعة ١و ٤١ كنت خالصة كمان القابلة سوتلي مساج بالزيت أثناء الولادة والحمد لله ماصار تمزق نزيف بسيط وعن طريق التكبيس على بطني رجعو الدم طبيعي حسيت بدوخة وتعب بعد الولادة وهلق معاناتي هي الألم الفظيع أثناء الرضاعة وكمان بيجيني بدون الرضاعة مثل الطلق بالبطن اكتر شي وفي كمان ألم بالظهر شربت حبوب مسكنة من ساعة ان شاء الله بخففو شو وبكرا ان شاء الله بخرجوني من المشفى بعد فحص الدكتور للطفل بتمنالكم ولادة قريبة سهلة وميسرة يارب والله يرزق كل ام بدها مولد ذكر الله يرزقها طفل ذكر صالح يارب برجع بقلكم اهم شي حاولو تسترخو وبعدو عن التوتر ضروري تقعدو كم ساعة لحالكم برواق

53 تعليقات

العضوة: 1425626 , منذ 21 ساعة

@user-1799594 الله يسلمك يارب العفو هاد واجبي الله يسهل عليكم ويقومكم بالسلامة يارب 🩷🌹

العضوة: 1957216 , منذ 21 ساعة

ربي يفرحك ويسعدك انشاء الله ويتربا ف عزك مولود جديد يارب

العضوة: 1425626 , منذ 21 ساعة

@user-1926563 الله يسلمك يارب ويبارك فيكي على قبالك 🌹

العضوة: 1425626 , منذ 21 ساعة

@user-1883197 الله يسلمك يارب ويسهل عليك ويقومك بالسلامة 🩷🌹 رحتي فحصتي كم التوسع ممكن يكون عندك توسع ولادة 🙂

العضوة: 1425626 , منذ 21 ساعة

@user-1957216 الله يسلمك يارب ويسهل عليكي ويقومك بالسلامة 🌹

العضوة: 1883197 , منذ 21 ساعة

امين يارب حبيبتي فحصت من اسبوع او اكثر قالولي 1 سانتي

العضوة: 742935 , منذ 21 ساعة

سبحان الله اتغلبتي اه الوجع بزيد مع الرضاعة لانها بتحفز ااطلق سبحان الله وطبيعي توجعك ابرة الظهر اولها مع الوقت بخف الوجع

العضوة: 857833 , منذ 21 ساعة

الحمدلله عسلامتك يارب شو جبتي صبي ول بنت يربى بعزك ودلالك ان شاءلله

العضوة: 1425626 , منذ 21 ساعة

@user-1883197 ان شاء الله بتولدي ولادة سهلة وميسرة يارب بالقريب العاجل

العضوة: 1425626 , منذ 21 ساعة

@user-742935 ايوا انا سمعت ان الألم بزيد مع الرضاعة بسبب تقلص حجم الرحم لان بيرجع لحجمه الأصلي فعلا لما بيجيني الألم بحط ايدي على بطني بكون متل كرة قاسية متل الحجر والرضاعة الطبيعي بتساعد اكتر ان الرحم يرجع لطبيعته بشكل اسرع

العضوة: 1425626 , منذ 21 ساعة

@user-857833 الله يسلمك يارب صبي

العضوة: 1957216 , منذ 20 ساعة

امين امين حبيبتي 😘

العضوة: 2049118 , منذ 20 ساعة

@user-1425626 ماشالله تبارك الله الله يهنيكِ مبارك عليكم الذريه الحمدلله عسلامتك حبيبتي وسلامه جنينك 💕💕💕💕

العضوة: 1934413 , منذ 20 ساعة

حبيبتي لاني الي 10سنين ما حملت من عمر بنتي كانت قيصري وابني البكر طبيعي بس شفطو شفط لهيك بخاف اولد طبيعي ما بقدر لهيك خفت لما قرإت المراحل الي ولدتي فيها مع انها سهلة وميسرة ولادتك ربي يخليلك ولادك يا رب ويقومني بالسلامة

العضوة: 742297 , منذ 20 ساعة

الف حمد الله عسلامتك يتربى بعزكم ودلالكم ويكون من صالحين يارب