العضوة: 275918 , 6 years ago

فرح عصرت عينها بصمت وساكته .. ودلال تصرخ وتهذي بكلمات حزينه ممزوجه بالغضب .. دخلت حنان دامعه وحاولت تهدي اختها الصغيرة : دلال صراخك بهالشكل مارح يرجع بدر .. ادعي له بدل هالصراخ .. حرام عليك مايجوز تسوين هالشي بنفسك وفينا .. دلال قامت : لولاها هالنذله كان ماصار اللي صار ... كل شي صار لبدر هي السبب فيه .. فرح عارفه انها تقصد نوف .. ومازالت تحاول تهدي اختها : هذا مكتوووب ومقدر له محد السبب فيه .. دلال صرخت بوجهها بعصبية : مافي شي من غير سبب ... كل شي حاصل لبدر هالفترة بسببها هي انا اكتشفت كل شي ..!!.. بس ان صار لبدر شي رح تندم ندم عمرها ما ندمته .. فرح قامت وهي ساكته .. هي عارفه بنفسها بحب بدر لنوف بس طول الوقت كانت صامته وما قالت حتى لبدر انها تدري .. فضلت ان هالشي محد يعرفه .. فرح مسكت حنان وسحبتها معها برا : دلال بنتركك الحين تنومين ولا بتطيحين علينا انتي بعد من الارهاق .. نامي وارتاحي وان شالله بدر بيرجع لنا ..

العضوة: 275918 , 6 years ago

سكرت الباب وهي لازالت تسمع بكاء اختها .. حنان طالعتها بحيره : شفيها دلال انجنت !.. فرح خذتها لغرفتها : معذووره ماتعرفين يعني غلاة بدر عندها ! حنان دخلت وراها وسكرت الباب : تدرين صرت اشك ان في شي بين نوف وبدر .. ؟!.. فرح فسخت عبايتها وعلقتها ولفت لها بارتباك : وليش تقولين كذا ؟!.. حنان : بالله عليك يا فرح .. ليش بدر امس كان يناديها ويطلبها .. حتى امي وابوي صاروا يشكون بس وقتها والظروف الحين ما تساعد انهم يسألون نوف او يسألون بدر ... وش اللي يخلي بدر يطلب نوف بالذات ابي افهم ؟!.. اكيد في شي ونوف لها علاقة بشي ...

العضوة: 275918 , 6 years ago

قاطعتها فرح : مهما كان هالشي محد رح يقوله غير بدر... اما نوف لا تحاولين مارح تقول شي .. انا اعرفها زين ... حتى انا متأكدة انها تفاجأت بطلب بدر لها .. والمسكينه للحين بحالة صدمة .. دقت علي سهى اليوم الصبح وعلمتني عنها .. حنان وهي تلف بحزن بتطلع : انا بروح اصلي وانام مع اني اتوقع ماقدر .. فرح : حاولي ... وبدر محتاج لدعانا هزت حنان راسها وطلعت ..

العضوة: 275918 , 6 years ago

نوف بهالوقت كانت بغرفتها في حاله يرثى لها .. جالسه بوسط السرير وعينها ثابته بالفراغ قدامها وكل علامات الجمود على وجهها .. مافي شي منها يتحرك حتى رمش عينها جامد ماغير دمعه يتيمة متعلقه بوسط خدها رافضه تستسلم وتطيح ... كثير من الاشياء كانت ببالها .. مازالت كلمات بدر الأخيرة بذهنها رافضه انها تروح .. وقلبها لازال يعورها عاللي شافته وسبب لها جرح مستمر بالنزف .. وماعطت نفسها فرصة تسأل عمرها ليش كل هالتأثر سوى انها اكتشفت ان بدر يعني لها .. هالانسان اللي كانت تعتبره عدوها .. صار الحين يهمها ! كان يدور بخيالها ذكريات قديمه جدا عنها وعن بدر .. صحيح كانت ذكريات مؤلمة بالنسبة لها لكنها كفيله انها تذكرها بابتسامة بدر اللي ماتغيرت للحين ..

العضوة: 275918 , 6 years ago

بهذيك الذكرى .. كانت نوف ( 6 سنين ) تركض بخوف ورعب هاربه من بدر ( 13 سنة ) اللي كان يركض وراها .. دخلت بيت عمها وهي تصيح وتصرخ وتنادي امها .. ماحصلت امها بس لقت مرة عمها بوجهها فتخبت وراها وهي تشهق من الصياح والفزع ماخذ مأخذه منها .. ام بدر : شفيك حبيبتي نوف ليش تصيحين ؟!! نوف بعيون بريئة مرعوبه : بدر !!... دخل بدر الصاله وهي يضحك ونظراته على نوف .. اللي تطل من ورا مرة عمها .. كانت بيده حية ونوف تخاف من الثعابين ..! ام بدر معصبه : بدوور انا كم مرة قلت لك هالحيوانات لا تدخلها البيت ..

العضوة: 275918 , 6 years ago

بدر وهو يقرب والحية بين يديه : لا بس دخلتها عشان نوف تشوفها .. نوف يزيد صياحها وتترجاه : بدر الله يخليك لا تجيبها وخرها .. انا ما أحبها ما أحبها .. بدر تزيد ابتسامته : لازم تحبينها غصب تحبينها مو بكيفك .. نوف ترفع عيونها لمرة عمها : خالتي شوفيه خليه يوخرها انا اخاف ! ام بدر تطالع بدر بتهديد : بدوور الحين كم مرة قلت لك خل بنت عمك بحالها .. وهالثعبان اذا ماطلعته الحين ذبحته .. بدر يضحك ويقرب من امه لأنه عارفها تخاف منها : صادقه يمه .. يالله خذيه واذبحيه اذا تقدرين ..

العضوة: 275918 , 6 years ago

ام بدر تراجعت وهي تحضن نوف : بدوور ترا انت بتنذبح بالأول قلت لك طلعه .. بدر يضحك بصوت عالي ويطلع من الصاله برا .. ونوف طول عمرها حفظت هذيك الضحكه العذبه .. بس كرهها له بذاك الوقت خلاها تكره كل شي فيه حتى ضحكته المميزة .. تركتها ام بدر بعد ماطمنتها وجلست نوف تتفرج على التلفزيون .. وبعد دقايق معدوده حست فجأة بحركه خلفها والتفتت مفزوعة لقت بدر وراها مباشرة والثعبان يزحف تحت رجله .. والبسمة ما اختفت من وجهه .. رجعت نوف تصيح وهي تتراجع لما

العضوة: 275918 , 6 years ago

اصطدمت بالجدار .. ماقدرت توقف وظلت على حالها جالسه ومتشنجه من الخوف .. بدر : المسيه ترا ما يخوف .. صرخت نوف وبدت تصيح وهي تترجاه : بدر انا اخاف والله انا اخاف .. وخره انا اخاف .. تبدل وجه بدر للعطف ونزل واخذ الثعبان وبكل وحشية وجرأة قذفه عالجدار بقوووة وطاح الثعبان عالأرض ميت فاقد الروح .. وكل هذا صار قدام عيون نوف ..! نوف حطت يدها على فمها وهي ترتجف وطالعت بدر وبعينها تقول " انت شسويت " ... بدر فهم سؤالها ورد .. بدر : مو انتي ماتحبينه .. عشانك ماتحبينه ما يستاهل يعيش يا حبيبتي .. محد يستاهل يعيش بهالدنيا اذا نوف ما تحبه وما تبيه .. وراح اخذ مناديل وجلس جنبها وصار يمسح دموعها بحنية .. ونوف ماصدقته صارت متجمدة مكانها ما تسوي أي شي ولا تصدر ردة فعل .. ماكانت مصدقته وتحس انه بيسوي أي حركه لئيمه جديده .. لكنه لما خلص طبع بوسه على خدها وطلع اخذ الثعبان الميت معه والابتسامة شاقه وجهه .. غمضت عينها بدون ماتحس ان الدموع زادت انهمار على وجهها .. هالجملة " محد يستاهل يعيش بهالدنيا اذا نوف ما تحبه وما تبيه " .. ثبتت بذهنها من ذاك اليوم .. وصار اللي صار لبدر .. كلمته اللي قالها بيوم من الأيام تطبقت عليه .. دخلت عليها سهى بوجه شاحب لأنها نالت بعد حصتها من الحزن والدموع والصدمة .. وبيدها صينية فطور حطتها على الكومدينه : نوف هذا الفطور صلحته لك امي تقول كليه من امس ماكلتي .. نوف : ................ راحت لها وهزتها : نووف .. نوف رمشت عينها بانتباه وطالعت بسهى .. وبصوت مبحوح : نعم ! سهى تأشر بيدها عالصينيه : كلي .. نوف : مابي ..... مابي شي .. سهى : لازم يا نوف مو حاله هذي .. عشان كل اللي صارلبدر تحرمين نفسك .. نوف باستسلام ما تبي تجادل لأنها تعبانه ومنهد حيلها : طيب ان شالله باكل ... ابتسمت سهى وهي تربت على كتفها ولفت بتطلع وقبل لا تسكر الباب لفت لها نوف بلهفه : سهى ! سهى رجعت تفتح الباب : هلا .. نوف بنظرة حزن بعيونها : ماصار شي جديد ؟! سهى فهمتها : ...... عن بدر ؟! هزت نوف راسها بالايجاب .. وسهى تغيرت نظرتها للأسى : لا .. للحين على حاله .. نوف هزت راسها باستسلام ورجعت لأفكارها .. وعقب ما طلعت سهى قامت للصينية .. الشي الوحيد اللي كلته هو التوست وكاس الحليب

العضوة: 275918 , 6 years ago

  حب من نوع اخر   الجزء 62 i في بيت ابو فهد .. انقشع الحزن بسرعه وعم الفرح لحظة وصول نجلاء لعند باب البيت .. والكل ماعدا فهد واقف عن مدخل الصالة .. ندى مو مصدقه اللي قدامها : نجلاء ؟!!! نجلاء ابتسمت وانقضت عليها تحضنها : ايه نجلاء .... شخبار اختي الغاليه ؟!! ندى بعدت عنها وسلمت : بخيييير اخبارك انتي يا دوبا ( وهي تطالع بطنها ) نجلاء فهمت عليها وضحكت : هههههههههههه للحين ماصار شي .. فكتها وراحت لشوق تسلم وندى تكلمها بامتعاض : الى متى يعني .. مليت يا اختي من اسمي حاف مشتاقه اسمع كلمة " خالتي " .. نجلاء : هههههههههههههه شسوي فيك انتظري ... ( وبغرور وهي تكذب ) انا وسعود للان نفكر .. طبعا كانت ام فهد اول وحدة سلمت على بنتها وبعدها ابوها وبعدين البقية .. لما خلصت منهم كلهم صارت تتلفت بينهم باستغراب .. نجلاء : وينه المغرور ؟!! شوق ضحكت : من تقصدين ..؟!... فهد ؟!! نجلاء طالعتها مبرطمه بقهر : ايه هو فيه غيره مغرور ... وينه انا بذبحه هالولد بيوم من الايام .. دايم يبي الناس يجونه ولا مرة جيت من جدة لقيته واقف يستقبلني .. ندى : اكيد نايم للحين .. نجلاء من القهر نزلت شنطتها وسحبت شوق وندى معها : تعالوا انا أوريكم فيه ! مشوا معها وهم يضحكون وامها تناديها : نجلاء افصخي عباتك بالأول .. نجلاء بنص الدرج : لا انا بوريه هاللوح ! وصلوا لغرفة فهد واقتحمت نجلاء الغرفة بعصبية بدون احم ولا دستور .. اما ندى لأنها خايفه من ردة فعل اخوها تمت برا عند الباب مع شوق .. شوق بخوف : الله يستر اخاف يعصب ويسوي بنجلاء شي .. ندى ضحكت بسخرية : لا تخافين نجلاء الوحيدة اللي تعرف له .. بتوريه شغله انتي انتظري فهد ما يقدر عليها .. دخلت نجلاء الغرفة وتخوصرت وهي تفتح النور .. شافت اخوها يتحرك بضيق ويغطي عينه وهو متضايق : من هالتبن ؟!.. راحت نجلاء وسكرت المكيف وقربت وسحبت الغطا عنه ورمته بالأرض .. نجلاء : قوم ياللوح لأوريك ؟!! فهد تأفف : ندى اقسم بربي ان ماطلعتي لأفرشك هنا بالغرفة .. ندى فتحت عينها وهي تتحسر وطالعت شوق الماسكه ضحكتها : شفتي .. انا مظلومه .. ..

العضوة: 275918 , 6 years ago

قربت منه نجلاء ومدت يدها لكتفه وصارت تهزه بخشونه : هيييييي هيييييي قوووم .. وربي العظيم انك قليل خاتمه اعنبوك نفسي مرة اشوفك قبالي لما ارجع بس الظاهر عمرك مارح تحس ... فهيييييد وعمى قوم .. فهد فتح عينه وطالع بالوجه الجميل فوقه وتفاجأ : اوه !! نجلاء تطالعه بسخرية .. فهد تغير مزاجه فجأة وحب يلطف الجو : من انتي ؟!... نجلاء بكل برود مدت يدها لكاس المويه جنبها ورفعته فوق وبكل ثقة فرغت محتوياته كامل بوجهه .. فهد شهق وانقلب عالجهة الثانية بس مصيره انه طاح بالأرض .. نجلاء ماسكه ضحكتها ويدها على خصرها : عمرك مارح تحس ياللوح .. قام فهد جالس عالأرض وحط يدينه على طرف السرير وهو يهز راسه ينفض قطرات المويه : حرام شسويتي فيني ؟!.. نجلاء : بدل ماتقوم تسلم على اختك .. بس انا عرفت غلاتي عندك .. غلاتي عندك ولا شي !! قام وهو يضحك : افا والله افا .. انتي تقولين كذا .. تقدم بيسلم عليها بس لأنه كان عاري الصدر رفعت نجلاء اصبعها تهدده : روح البس زين وغسل وجهك وبعدين تعال سلم علي بشكل لايق .. ولفت بتطلع وشاف فهد عند الباب قبل لا يتسكر شوق وندى يطلون وهم يضحكون .. ونجلاء سكرت الباب وهي تبتسم بفخر لنفسها .. ندى وشوق لحقوا نجلاء للصاله الفوقيه وهم ميتين ضحك ..

العضوة: 275918 , 6 years ago

ندى : هههههههههه ياليتك كل يوم عندنا والله تبردين خاطري فيه .. شوق بلا شعور : ايه والله قاهرني ! طالعتها نجلاء مستغربه : ليش ؟!.. مسوي لك هاللوح شي ؟!.. شوق انتبهت لنفسها : ها ... لالا بس تعرفين انا ارحم ندى وانا دايما بصفها .. نجلاء تغيرت نظرتها وهي تتأمل وجه شوق : متأكدة ما سوالك شي ؟! شوق وهي تضحك : هههههههههههه وش بيسوي يعني لالا مافي شي .. طلع فهد هاللحظة من غرفته وقرب منهم وهو يبتسم : حيا الله نجوووول .. ماصدق عيوني ..! طالعته نجلاء من فوق لتحت وهي متكتفه : يعني تبي تفهمني انك ماتدري اني برجع ؟!.. فهد وهو يمد يده لها : بصراحه لا .. نجلاء بعصبية نزلت يديها ومسكته بياقة ملابسه وصارت تهزه وهو يضحك : لا تكذب .. الكل يدري شمعني انت ؟! فهد نزل عينه ليديها الماسكته ورجع يطالع بعيونها الغضبانه .. وضحك : ههههههههههه شفيك والله مدري عن شي .. محد قالي ! نجلاء لفت براسها لندى ومافكته : ماقلتوا له ؟!... ندى وهي مبتسمة بوناسه : انا ماقلت له ... هو اصلا يقر بالبيت عشان يدري عن شي ؟!... طول وقته برا شلون بيعرف ؟!.. فهد وهي يضحك باس راس اخته يستسمح منه : انا اسف يالغلا بس صدقيني ما ادري ولا كان لقيتيني عند الباب اول واحد ينتظرك .. نجلاء فكته وضمته .. ماتقدر على هالولد لو وش ماسوى يقدر يبري نفسه بلسانه العسل .. فهد حضنها وهو يضحك وطولوا على هالحال .. ندى منقهره وهي تشوفهم : خفوا خلاص .. مسوين لنا روميو وجولييت ..! فهد عناد فيها مافكها : شدخلك انتي اختي حبيبتي مشتاق لها يا ناس !!.. نجلاء تقرصه بذراعه : فكني خلاص حلا هو !!... ( وتركها وهو مبتسم ويطالع ندى المقهوره ) ... المهم شخبارك ؟!.. جلسوا عالكنب الموجود : بخيررر .. دام اني شفتك فانا بخير .. اخبار ابو عبدالعزيز ؟!! نجلاء : تمام ويسلم عليك .. هو راح لأهله

العضوة: 275918 , 6 years ago

الحين وبيجي بوقت ثاني .. فهد : الله يسلمه والله مشتاق له .. شخباره بالشغل ؟!.. نجلاء وهي تتنهد : الشغل الله يعينه تعرف الظروف الحين ، ومحتاج الشغل منه جهد اكبر الله يعينه .. فهد : ان شالله .. فجأة دق جوال شوق جنبها .. ولما شافت الرقم ابتسمت بوناسه : اهلين هلا والله ..!! انتبهوا لها كلهم .. ولأن مافي شي يتكلمون عنه سكتوا يسمعون لها .. وخاصة فهد صار يركز بكل كلمه .. شوق : تمام اخبارك انتي وخالتي ومشعل ؟!!.. سكتت تسمع للطرف الثاني وفهد دمه يفوووور !.. شوق : هههههههههههههه الله يسلمك ويسلمه !!.. هنا فهد ماتحمل وقام متضايق ونظراته متسلطه على شوق بشكل غريب .. شوق كانت منزله عيونها ولما قام فهد طالعته بانتباه وانقطع كلامها : اوكي رح اخب........... قطعت كلماتها لما لاحظت نظرات فهد الناريةاللي تحس فيها بتحرقها .. نظرات خلتها تبلع الكلام اللي بتقوله بسبب شكله !!.. تركهم ورجع لغرفته بعد ماعطاها نظرات تسم .. نجلاء كانت مدهوشه من اللي شافته من فهد .. فيه شي غريب حصل !.. ولفت تطالع شوق ، وشوق ارتبكت من نظرات نجلاء الغريبة والمتفحصه لها ... ورجعت للجوال : خلاص هديل بكلمك بوقت ثاني الحين انا مشغوله اوكي ؟!.. وسكرت وراحت لغرفتها وهي تحبس غضبها ودمعتها ... ماتدري ليش بس نظرة فهد فيها شي خلا العبرة تخنقها .. كل ماله يزداد قسوة .. لما غابوا شوق وفهد ، لفت نجلاء لندى مستغربه : شفيهم ؟!...

العضوة: 275918 , 6 years ago

ندى هزت كتفها : مدري ... بس لهم كم يوم وهم على هالحال !؟ نجلاء وهي مقطبه : شلون يعني ؟!.. ندى : مدري بس كل مالها تزداد المشاكل بينهم ... حتى انا مو فاهمتهم ..!!؟؟ نجلاء وهي تحاول تستوعب : ليه وش اللي صار ؟!!... ندى : من رجعت شوق من الشرقيه وحالهم مع بعض مو اوكي !... دايم تصير بينهم مشاكل .. وانا للحين مو عارفه ليش ؟!.. اول كانوا مثل السمن على العسل بس من رجعت شوق من الشرقيه وكل واحد فيهم مو طايق الثاني .. نجلاء تذكرت لما كلمتها ندى مرة وخبرتها عن اللي صار لشوق : وشوق شخبارها عقب ما تعبت ؟!! ندى ابتسمت : لا الحين طيبه .. نجلاء بدون تفكير راحت واتجهت لغرفة فهد ودقت الباب .. ووصلها صوته غاضب : نعم ؟!.. نجلاء بهدوء : افتح ابي اكلمك !.. فهد : ماني فاتح بنوم الحين ومابي ازعاج .. لا فهد انقلب حاله !!...استسلمت نجلاء ورجعت مكانها عند ندى لأنها عرفت ان فهد بهالوقت وبهالضيق مارح يفتح ..!! فتحوا التلفزيون وجلسوا يتفرجون ونجلاء تفكر .. من أول مرة جت وشافت شوق في بيتهم حست ان فهد متغير .. متغير بشي لكن للحين مو فاهمه .. نجلاء : ندى روحي نادي شوق !.. ندى : ليه ؟!! نجلاء : روحي ناديها ولا تسألين ! راحت ندى ودقت الباب ودخلت .. وتفاجأت ان شوق كانت منسدحه تصيح : ليه كل هذا ؟!.. شوق شفيك ؟!! شوق ماحبست الكلام اكثر : ندى انا مو قادره اتحمل اخوك ينغزني بالكلام والنظرات .. أبيه مرة يتكلم ويقول وش فيه عشان افهم .. لكن نظراته وتصرفاته تعذبني أكثر من كلامه .. ابي افهم والله ماني فاهمه ليه يسوي كل هذا !.. دخلت نجلاء الغرفه بعد ما سمعت هالكلام ... وشوق لما شافتها صارت تمسح دموعها وهي مرتبكه .. نجلاء وهي تطالعها بثبات : شفيه فهد ؟!.. وش مسوي لك يا شوق ؟!.. شوق : م.... ماسوى شي .. نجلاء : توني اسمعك تقولين عنه ينغزك ومدري ايش .. علميني وش مسوي وانا اوريك فيه !

العضوة: 275918 , 6 years ago

شوق هزت راسها نفي وهي تجفف دموعها : ما أدري يا نجلاء .. انا مدري عن السبب صدقيني ... اخوك فجأة انقلب عدواني ضدي وانا مو عارفه ليه .. من رجعت من الشرقيه وهو كذا ... واذا جيت ابي افهم ماعرف .. مدري ليه يسوي كل هذا !!! هزت نجلاء راسها بصمت .. وابتسمت فجأة بعذوبه : ماعليه فهد مزاجي تحمليه شوي .. وصدقيني بيرجع مثل ماكان .. شوق حست انها زودتها والمفروض ماقالت كل هذا : انسي اللي قلته يا نجلاء بليز .. نجلاء تجاهلتها : المهم خلونا نطلع .. قررت يكون غدانا بالحديقة لأن الجو اليوم مرة روعه .. نزلوا كلهم بعد ما رجعت نجلاء البسمه لشوق بسوالفها .. جا وقت الغدا وجلسوا الكل عالطاولة بالحديقة وما يحتاج اقولكم الجو روعة بوجود النافوره جنبهم ترشهم برذاذ منعش ... انتبهت ام فهد لعدم وجود فهد فلفت لمنى : حبيبتي منى روحي نادي اخوك .. قامت منى ورقت تناديه ودقت عليه الباب : فهد امي تقول تعال الغدا .. فتح فهد الباب والضيق بوجهه .. كان يحاول يرجع ينوم بس ماقدر : وشوق هناك ؟!! منى طالعته باستغراب .. وببراءة : ايه معنا .. كلنا جالسين ماعدا انت ! فهد طلع واتجه للصاله الفوقية وطل من الشباك الكبير عالحديقه وشافها جالسه تضحك مع نجلاء .. ابتسم بازدراء ولف لمنى وهو راجع لغرفته : قوليلهم مايبي ..!! منى بتلقائية : ليه ؟!.. امي ونجلاء يبونك .. فهد بضيق وهو يدخل الغرفة : ماني نازل .. وطالما بنت عمك موجودة هناك ماني نازل .. وسكر الباب .. اما منى نزلت تحت مستغربه من هالكلام ومو فاهمه شي .. رجعت مكانها وهم يطالعونها .. نجلاء : وينه فهد ؟!!.. منى ببراءة : يقول مارح ينزل يتغدا طالما بنت عمك موجودة .. منى مادرت انها قالت شي غلط الا لما لاحظت تغير وجيهم كلهم وخاصة شوق ... ابو فهد عصب من جد : انجن هالولد ؟!.. اشوفه متغير هالأيام ؟!!.. شوق مسكت قهرها ودموعها وقامت واقفه : معليش انا مابي شي .. وراحت عنهم وهي تجر بقايا كبريائها ...

العضوة: 275918 , 6 years ago

دخلت غرفتها وقفلت على نفسها .. اما ابو فهد عصب : ابي افهم هالولد مجنون شلون يقول هالكلام .. مايبي يتغدا بالطقاق عمره ما تغدا بس ما يتكلم كذا .. نجلاء وهي متضايقه : ماعليه يبه هد نفسك .. وانا بتفاهم معه .. شوق واقفه عند باب البلكون ودمعة وحيدة بوسط عيونها .. هالمرة كانت اهانته قوية ماتحملتها وخاصة انها قدام الكل .. ليش كل هذا يا فهد ؟!.. نفسي افهم منك شي واحد ؟!.. ليش النغزات والتجريح !.. وش سويت انا .. ابي افهم والله ليش بس انت مو راضي تتكلم .. رفعت راسها ونظرتها كله تصميم .. هرولت للباب وفتحته بقوة وركضت لباب غرفة فهد وهي تمسح الدموع بيدها .. دقت الباب وهي ترتجف .. ما سمعت صوت فهد بس الباب انفتح بعصبية وملامح فهد لا تقل عصبية .. لما شافها واقفه قباله تغيرت ملامحه للحيره والارتباك ... شي خلاه يرتبك يمكن وجهها المتغير .. بس ظلت نبرته جامده مافيها أي ذرة من الندم : نعم ! شوق والعبره مستقره بحلقها : ليه ؟!.. سؤال واحد بس جاوبني عليه ؟!.. فهد : نعم ؟!.. شتبين ؟!.. شوق : انت زعلان من شي ؟!... زعلان مني قولي ؟!.. فهد : ................. شوق : انا مو فاهمتك .. انت ليه كله معصب مني وزعلان ؟!! فهد وهو يصد بوجهه عنها : مالك شغل .. شوق : شلون مالي شغل وانت تتصرف معي بأسلوب ينرفزني .. فهد رجع يطالعها بنظرة قاسية : انا قلت لك قبل كذا اسألي نفسك .. شوق ودها تصيح وتصرخ : سألت نفسي والله سألت نفسي مليون مرة بس ما فهمت .. انتا قولي انتا جاوبني .. فهد وهو يسكر الباب بوجهها : ماعندي رد ! حست بإحباط فضيع .. مو راضي يقولها عن شي .. لكن ماتدري ليش ثارت اعصابها ورجعت تضرب باب غرفته بقوووة .. داخلها غضب تبي تنفسه .. كلام تبي تفجره بوجهه .. انفتح الباب ثاني مرة وفهد يطالعها وعيونه يتطاير منها الغضب .. ماعطته فرصة انه يتكلم وانفجرت واصبعها في وجهه : تدري اني معد صرت اطيقك انت ... انت وتصرفاتك ... كل ماشفتك صررررت اتنرفففففففففففز ... خلك واضح وفهمني اذا انا غلطت بشي ولا مالك حق تغللللط .. خلصت كلامها وهي تتنفس بقهر .. وفهد ماقدر يقول شي لكن غضبه زاد وكلماتها