العضوة: 275918 , 6 years ago

أثرت عليه .. " معد صرت أطيقك " وشوق لفت راجعه للغرفة وهو سكر الباب بقوة هزت اركان البيت ، ومعها انتفضت شوق بروعه .. وقفت عند باب غرفتها ولفت تطالع باب غرفته لحظة ... ودخلت لغرفتها وغضبها يفووور داخلها .. ماسمحت لدموعها تنزل اكثر لأنها ماتستاهل تطيح عشان واحد مثل فهد .. لكن ظلت الأسئلة تحاول تلاقي جواب ..!! المغرب طلع فهد من البيت مهموم وندمان وتقابل مع اسامة في المقهى .. حس فيه اسامه شارد الذهن وسرحان والهم بوجهه .. وعيونه عالرايح والجاي والسكون الغريب يغلفه ! اسامة : فهوووود شفيك عسى ماشر !؟؟ فهد مارد مباشرة : ............... ولا شي اسامه .. متضايق شوي .. اسامه : شفيك ؟!... قولي ترا انا رفيقك لا تخبي شي .. سكت فهد فترة وبعدها زفر زفره عمييييقه : اسامة .... انا أحب ......... أحب بنت عمي وش اسوي ؟!!.. اسامة طالعه بغير تصديق وبلم .. وفهد طالعه يتمصخر .. فهد : شفيك وش قايل انا ؟!!..

العضوة: 275918 , 6 years ago

اسامة يحك اذنه : عيد تكفى اللي قلته ... انت يا فهد انت ؟!! فهد : ايه انا .. ليش شفيني انا ؟!! اسامه : لالالالا اكيد تمزح ... انت تحب .. من جدك ولا بعد تلعب على بنت عمك .. فهد تنرفز وعصب : اقول انثبر لا اصكك بهالكوب .. استح بنت عمي هذي وش العب عليها انجنيت يالخبل !! اسامه : هد اعصابك بس ماني مصدق ... انت فهد اللعاب تحب بحق وحقيق .. فهد وهو متنرفز حده : ياخي شفيني انا وش ناقصني .. قلنالك نحب بنت عمي ... نحبها تفهم ولا !!؟ اسامه وهو يرفع يده يهديه : طيب اوكي اوكي خلاص فهمنا وصدقنا .... بنت عمك اللي معكم بالبيت ؟!.. فهد بسخريه : ايه هو في غيرها يالغبي ... ماعندي بنت عم غيرها ... اسامه يضحك وهو يحس نفسه اهبل : ههههههههههه خلاص عاد لا تتمصخر درينا بس حبيت اتأكد .. فهد : وش تتأكد ...؟!!!؟!! اسامه : هههههههههههه ياخي لا تعصب حبيت ألطف الجو !!.. فهد وهو يتأفف : اوف اصلا الشرهه علي اللي قلت لك !.. وقتك الحين ولا وقت تنكيتك ..!! اسامة : افا انا رفيييييقك لا تنسى .. فهد : ................ دق جوال فهد ولما طالع الرقم مال بفمه بضيق ومده لأسامة .. وأسامة يطالعه مستغرب : وش تبي ؟!!.. فهد وهو صاد بوجهه للجهه الثانية : رد عليها ..! اسامة باستغراب : مين ؟!!.. فهد : .... شذى ... اسامة وهو يبعد يد فهد عنه : لا وش تبي تبلشني فيها .. رد عليها انت .. فهد وهو يتأفف : قلت لك رد عليها مو رايق اتكلم معها الحين .. اخذ اسامه الجوال بضعف حيله والجوال يرن بإلحاح .. وطالع فهد بحيره : ... وش اقولها ..؟! فهد وهو مو مهتم : قولها أي شي .. أي شي أي شي ... بس لا تقولها فهد فيه... !!.. اسامه استغرب من تصرف فهد أول مرة يسويها .. حط الجوال على اذنه وهو يرد : الو ...

العضوة: 275918 , 6 years ago

وصلها صووت شذى انثوي لأبعد الحدود : أهلييييييين يا حبيب شذى انت اشتقت لك .. كشر اسامه وهو يطالع فهد .. يالله وش هالمياعه !!.. اسامة : نعم من تبين ؟!.. شذى تبدل صوتها باستغراب : وين فهد ؟!.. اسامه : فهد مو موجود !... طالع .. شذى باستغراب : شلون هذا تلفونه .. هو وينه ؟!! اسامه : لا فهد نسى الجوال عندي .. ( وفكر يجرب يقول خل اسوي مثل فهد ) .. بس انا مستعد لك يا روحي اذا تبين تكلميني ... فهد ماقدر يمسك ضحكته وغطى فمه بقبضة يده وصارت كتوفه تهتز من زود الضحك .. ابد هالدور ماينع لأسامة .. شذى بعصبية : لا مابيك .. انا حبيبة فهد بس .. واذا اخذ جواله قوله حبيبتك وعمرك شذى اتصلت فيك ... اسامه وهو ماسك ضحكته .. والله ماتدرين من اللي صارت حبيبته الحين : يصير خير ... قوليله هالكلام بنفسك .. شذى بعصبية : هيي انت لازم تقوله شذى دقت عليك .. اسامه : خلاص قلنا لك يصير خير .. تامرين على شي ثاني .. شذى وهي معصبه : لا شكرا .. وقفلت الخط ... رجع اسامه الجوال لفهد وهو ميت ضحك : هالبنت مجنونه تدري وش تقول ..؟! فهد وهي مبتسم ويرجع الجوال بجيبه : ... وش تقول ؟!... اسامه وهو يتذكر مياعتها : تقول لا مابيك ... انا حبيبة فهد بس .. واذا اخذ جواله قوله حبيبتك وعمرك شذى اتصلت فيك ... قايلك يا فهد من أول ان البنت بتتعلق فيك اكثر اذا استمريت معها بهالشكل .. وشوف شقالت خلتك حبيبها الوحيد .. وعلى ماظن انها ماتبي هالشي بس ...تبي اكبر من كذا .. فهد هز راسه وفاهم عليه : ادري فاهم عليك ... بس تدري خلاص انا مليت .. الحب سرق كل رغبتي على هالأشياء .. ماصرت افكر بغير شوق يا أسامه ... شوق هذي نستني شذى وطوايفها ... انا مابي غير شوق بنت عمي .. اسامه يطالعه مبهوت من كلامه .. وبفرح : من جدك يا فهد بتترك عنك هاللعب اللي بيضيع بنت الناس قبل لا يضيعك .. فهد ابتسم وهز براسه : ايه انا خلاص مليت .. احس شذى ما بتنفعني لأن كل قلبي صار لشوق الحين .. ( وحط يده على قلبه وهو مهموم ) .. بس اللي حارق قلبي انها تحب .. اسامه بدهشه : تحبك انت ؟!! فهد هز راسه نفي بأسى : لا ... ولد خالتها .. اسامه باستغراب : وانت شلون عرفت ؟!!.. فهد : عرفت عن هالشي لما رحت الشرقيه اخر مرة ... الولد بنفسه اعترف .. وقال انه يبيها مثل ماهي تبيه ..

العضوة: 275918 , 6 years ago

اسامه بسخرية وهو مو مقتنع : والولد ذا شلون عرف ان البنت تبيه .. فهد بعدم اهتمام : ما يهمني شلون عرف .. البنت متربيه معه من صغرها واكيد انهم يحبون بعض من الأول قبل لا نعرفها .. وبعدين عنده اخت اكتشفت انها صارت تنقلهم اخبار بعض !.. اسامه تضايق : شلون انت متأكد .. فهد بضيق : ايه متأكد متأكد ... وكل ماكلمت بنت خالتها وتجيب طاري مشعل اتأكد من هالشي .. اسامه سكت يفكر .. وبعد دقايق التفت له بلهفه : تعال طيب كلم بنت عمك وقولها ..؟!! فهد باندهاش : لا وش اقولها انجنيت ... كبريائي ما يسمح لي اقولها اني احبها وهي تحب غيري .. وبعدين اذا هي متعلقه بولد خالتها كلامي لها مارح ينفع .. اسامه : ياخي جرب وش خسران انت .. فهد باصرار وبعصبية : ياخي قلت لك لا .. خلاص ماني قايل لها شي اذا هي تبي ولد خالتها خلها تحبه وتشبع منه ... مابي أجبرها .. في بيت ابو فهد .. كانت نجلاء جالسه مع امها وابوها بالصاله لحالهم ومافي احد من العيال موجود .. فهد طالع وندى بغرفتها وشوق بعد .. والصغار ناموا لأن وراهم دوام .. ابو فهد الى الان متضايق من اللي صار عالغدا من ولده بس ماتكلم .. نجلاء لاحظت هالشي على ابوها .. نجلاء : يبه شفيك كأنك معصب ..؟!! ابو فهد : يعني .. نجلاء وهي فاهمته : ماعليه يبه وسع صدرك .. ابو فهد : وش اوسع صدري .. وهو من كم يوم وهو يتمشكل مع بنت عمه .. تصرفاته صارت تنرفزني .. نجلاء : ماعليه يبه انا بكلمه انت لا تتضايق .. ابو فهد وهو يتنهد : الله يهديه .. احيانا يكون مافي اعقل واثقل منه .. لكن احيانا ينقلب مراهق ... نجلاء بعد لحظة حبت تبين ضيقها من وضعهم : يبه ترا انا مالوم فهد احيانا ..!! ابو فهد طالعها باستغراب : وشو ماتلومينه ؟!.. عقب الكلام اللي قاله اليوم ماتلومينه ... انا لو كان قدامي كان عطيته طراق يعدله ...!

العضوة: 275918 , 6 years ago

نجلاء هزت راسها بقل حيله : لا يبه مو هذا قصدي ... اقصد وضعه هو وشوق بالبيت ..!!.. ما استغرب تكون بينهم مشاكل وهم على هالحاله .. فهمها ابو فهد وسكت .. ونجلاء بعد سكتت ماحبت تلوم ابوها اكثر فغيرت الموضوع وهي تلتفت لأمها وتسولف معها .. ابو فهد كان له مدة يفكر بالموضوع .. انتبهوا لشوق تنزل الصالة وهي تبتسم .. وابو فهد ارتاح لما شافها مبتسمة ومبين انها مو متضايقه .. لأن بنت اخوه صارت تهمه كثييييييييييييير .. ويخاف عليها .. ابو فهد : هلا وغلا وينك من الغدا ما شفناك .. شوق سكتت ماردت وراحت جلست جنبه والبسمة ما راحت ... لاحظتها نجلاء وابتسمت بوجهها : شفيك مستانسه ؟!.. شوق : بس ... حبيت اقولكم ان بيت خالتي بيجون من الشرقيه بكره .. ام فهد وهو تبتسم : حياهم الله ... شوق : توها كلمتني خالتي وقالت لي ... بكره العصر او المغرب بيكونون هنا .. نجلاء : ليش عندهم احد هنا .. عندهم زواج او شي ؟!!.. شوق : ما سألت لكن اللي اعرفه زيارة ... نجلاء وهي تبتسم : زين انا بعد ابي اشوفهم ... ويابختك عندك اهل من الشرقيه دايم اسمع ان اهل الشرقيه قلبهم طيب .. ابتسمت شوق بفرح : ايه اجل انا وش اقول اللي جربت ... خالتي وعيالها مافي أطيب منهم .. دخل بهالوقت فهد عليهم .. وسكر الباب وعينه على شوق وفيها معاني كثيرة .. محد فهم هالنظرة كثر نجلاء ولأن شوق ماكانت تطالعه مادرت عنه .. تقدم لهم ولاحظ ان ابوه معصب .. وفهد بذكائه فاهم السبب لف لشوق : ... شوق ... شوق رفعت عينه له بلوووم .. بس ماتكلمت :............ فهد : ... انا اسف ..

العضوة: 275918 , 6 years ago

شوق مابعدت عينها مستغربه منه .. كان هادي وملامحه هاديه غير اللي شافته اليوم .. ماعرفت وش تقول فظلت ساكته .. نجلاء ابتسمت ولفت لأبوها : شفت يبه .. رضيت الحين .. ابو فهد رفع راسه لولده : الله يرضى عليه لو ينتبه لكلامه .. فهد ابتسم ومشى للدرج وسمع امه تناديه : فهد بكره لا تطلع بيجونا ضيوف .. فهد وقف عند الدرج ولف : مين يمه ؟!.. ام فهد : مشعل واهله من الشرقيه .. تبدلت نظرة فهد للجمود بس ماتكلم ولا صدرت منه ردة فعل غير انه طالع شوق شافها مبتسمة .. مما أكد له ظنونه أكثر وأكثر .. هز راسه وطلع وهو ساكت لكن قلبه من جوا يتمزززق .. اما نجلاء كانت تتابع اخوها بكل حركاته .. وحاسه فيه وبضيقه .. ندى قبل لا تنام كان قلبها ضايق عشان نوف وماراحت عن بالها طول اليوم .. فدقت عليها تتطمن .. بس اللي رد عليه صوت خالي من الحياة .. ندى بمرح : اخبار الحلوين ؟!.. نوف ببرود : اهلين ... ندى : اخبارك مرتاحه الحين .. ان شالله احسن من امس ؟!.. نوف : ............. ندى : نوف كلميني لا تسكتين انا كلمت اونسك .. نوف : وش تبيني اقول ... والله مالي نفس اتكلم .. ندى : طيب اخبار بدر ان شالله احسن .. نوف دمعت لما سمعت اسمه : .................. ندى حست فيها ... وحست بالعطف عليها ، نوف طول عمرها حساسه وما تتحمل بهالمواقف الكبيرة مثل هذي .. ندى : ما صحى ؟!!! نوف : لا .... ندى حست من اجوبتها المقتضبه انها فعلا مالها خلق للكلام .. ندى : طيب انتي ارتحتي ولا من امس ما نمتي ... نوف : يعني ... انوم شوي واصحى ... ما اكمل ساعه على بعضها ... حاسه بقلق وأرق ..! ندى : طيب الحين حطي راسك ونامي ( وبمرح ).. لازم تنامين عشان بدر اذا صحى يشوفك نوف الحلوة ما تتغيرين عليه .. نوف وصوتها تخنقه العبرات : خليه يصحى بالاول ..!!

العضوة: 275918 , 6 years ago

ندى وهي تحاول تطمنها وتطلعها من دائرة القلق : بيصحى ان شالله بيصحى .. خلي ثقتك بالله قوية .. بدر بحفظ ربه ان شالله .. نوف بهمس منكسر : ان شالله ... ندى شافت الكمبيوتر يأشر عرفت ان فيه محادثة .. راحت بسرعه وهي تكلم نوف لقته طلال .. ندى : خلاص نوف بسكر الحين ابيك ترتاحين لا تشيلين الهم فوق طاقتك نوف : احاول وسكرت وعلى طول كلمت طلال : طلال انا وش قلت لك من قبل .. ما قلت خلاص مابي علاقتنا تستمر اكثر من كذا .. طلال : لحظة شفيك هبيتي فيني ... !!!!!!!!!!!! ندى معصبه : انا اصلا الغلطانه المفروض حطيتك بلوك .. طلال : لحظة ندى وش مسوي انا .. ندى : انا قلت لك من قبل علاقتنا غلط بغلط وابيها تنتهي .. ومابي تكون بينا محادثات اكثر من اللي راحت .. طلال : ................. ندى : بليز طلال خلنا ننتهي والقلوب صافيه .. طلال : بس انا مابي أنتهي .. ندى : لحووووول .. طلال اذا تعزني صدق ياليت تنتهي .. والله صرت افكر باللي قاعده اسويه انا .. كنت عارفه انه غلط .. بس كل هذا بسبب احمد .. طلال بقل صبر : إنا لله ... احمد ثاني مرة !!... ترا مليت من اسمه .. ندى : شسوي فيك مو راضي تفهم .. طلال : اوكي .. انا بس دخلت عشان اقولك اني برجع السعوديه بعد اسبوع .. ندى صنمت من الخبر .. تفاجأت وماتدري ليش حست بالخوف .. ندى : خلاص خلصت دراستك ؟!!.. طلال : ايه خلصتها وبعد بكره اخر امتحان عندي ... ليه كأنك مو فرحانه اني خلصت ؟!!! ندى : لالا بالعكس .. ترجع بالسلامه .. طلال : الله يسلمك .. ندى : طيب تصبح على خير انا طالعه .. طلال : لحظة طيب نفسي اعطيك شي .. ندى باستغراب : وشو ؟! طلال : بما انك خلاص تبينا ننتهي ابي اعطيك صورتي ..

العضوة: 275918 , 6 years ago

ندى : وشو ؟!... لالالالالا .. لا تعطيني شي .. لكن طلال ماسمع لها وأرسل لها فايل موجود فيه صورته .. طلال : عالأقل للذكرى .. وتأكدي اني اذا انتهينا بذكرك على طول .. مارح أنساك .. بتظلين بالقلب على طول غناتي .. ماعرفت ندى ترد .. وصار طلال اوف لاين وهي الى الان عيونها عالفايل الموجوده فيه الصورة .. يدها مو راضيه تتحرك وتفتحه .. بلعت ريقها وحركت الماوس بيد مرتجفه .. بدون سبب بدت ترتعش .. وبدا احساس داخلها بنبهها ان طلال مو بالبعد اللي هي متصورته .. تنهدت وهي تستغفر ربها وضغطت عالفايل .. تبي تشوف الصورة وبعدها تمسحها مباشرة عشان تنهي كل شي له علاقة بطلال .. انكشفت لها الصورة أخيرا وظهرت .. ومعها انكشفت الطامة الكبرى .. طلعت لها صوره فيها شابين مو شاب واحد .. واحد منهم عرفته مباشرة وخلا الأرض تتزلزل من تحتها وقشعريرة مريعة تمر بكل جسمها .. مو مصدقه اللي تشوفه .. معقوله !!... معقوله اللي اشوفه !!.... لالالالا مستحيل !!.. صار صوت تنفسها مسموع وقلبها يدق طبول جوا ضلوعها .. كانت تحس فيه بيوقف بأي لحظة من المفاجأة الكبيرة .. كانت صورة طلال .... معه احمد ولد خالتها !!.. يا ويلي هذا احمد !!... كان احمد فيها واقف مبتسم ويضحك للشاب الثاني اللي تبين انه طلال ... عرفته لأن الصورة بالأساس كانت متركزة على طلال واحمد على طرف الصورة .. كل واحد مبتسم ابتسامة أحلى من الثاني .. تبين مدى علاقتهم الحلوة والمشاعر بينهم .. طلال كان شاب حنطاوي وسيم لكن ملامحه العربية الاصيلة تطغى على هيئته ..واقف وشايل على كتفه جاكيته ويضحك لأحمد .. كانت هذي الصورة مصورة بمنطقه باين انها برا المملكه .. حست ندى بالدموع بعيونها .. من غير سبب !!..

العضوة: 275918 , 6 years ago

كان مكتوب تحت الصورة " طلال سنة 2002 بمصر .. مع احمد من أعز ربعي ".. قفلت ندى الصورة والكمبيوتر ومسكت راسها .. ياربي هذا حلم .. شلون الدنيا صغيره لهالدرجة !!... مالقيت الا طلال رفيق احمد .. قامت وانسدحت بالسرير وهي تفكر والرجفه ما خفت .. تحس بالكره لنفسها .. تحس بالقرف .. بالاشمئزاز .. ليش هالاحساس ؟!... ماتدري ... يمكن لانها اعتبرته خيانة ... خيانة لأحمد !!!!!!!.... أو لنفسها ... ماتدري ماتدري .. بس .. أحمد أنا انتهيت منه من زمان .. ليش يهمني الحين ؟!!...

العضوة: 275918 , 6 years ago

رجع في بالها طلال مباشرة .. عمرها ماشكت بهالشي او خطر ببالها ............ الحمدلله اني انتهيت منه ... غمضت عيونها وهي مرتاحه بعد ما اتخذت قرارها بإنهاء علاقتها مع طلال .. ضميرها كان يأنبها الفترة اللي راحت والحين اتخذت الخطوة الصح !.. تذكرت اخر شي صار بينها وبين أحمد ... تذكرت كل كلامه لها وكلامها له ... كانت عارفه ان اللي صار بينه وبينها ذاك اليوم وكل الكلام اللي انقال غلط .. والمفروض ماصار .. بس كان لازم اقول كل ذاك الكلام عشان مايفكرني ندى الأوليه .. العاشقه .. المغرومه ... لازم يفهم اني مو له وينسى كل المكتوب بالدفتر .. كنت اتمنى يا احمد لما تعرف اني احبك تكون تحبني .. مو عشان شفقه .. كانت الغرفة ظلمى وهي مغمضه رجعت تفكر بالصدفة الغريبة هذي ... انفتح باب غرفتها وتسرب النور من برا لداخل الغرفة .. ندى مافتحت عيونها : مين ؟!!.. نجلاء : انا ... بتنومين ؟!..

العضوة: 275918 , 6 years ago

ندى وهي تنقلب وتعطيها ظهرها : ايه وراي جامعه بكره والحين الساعه 12 .. وعساني اقدر اقوم .. نجلاء ابتسمت : طيب تصبحين على خير .. ندى : وانتي من اهله .. سكرت نجلاء الباب وراحت لغرفة شوق ودقت الباب ، ما سمعت جواب وفتحته : شوق ... لقت شوق هي الثانيه منسدحه بالسرير والغرفه غارقه بالظلام ماعدا باب البلكون يكشف المنظر برا وقطرات مطر تنساب عليه .. نجلاء : واو مطر !!.. شوق ما كانت نايمه كانت منسدحه وعينها عالبلكون تتفرج عالمطر .. نجلاء : بتنومين انتي بعد ؟!!.. شوق : ايه انا محاضراتي تبدا بكره من بدري .. نجلاء وعيونها عالبلكون : الجو روعه ودي اطلع ... شوق : وين تطلعين بهالليل ... بتمرضين علينا ؟!.. وسعود ما يستغني عنك .. نجلاء ضحكت : هههههههههههه .. شعرفك انه ما يستغني عني .. شوق وهي تبتسم بالظلام : مبين انك مرتاحه وسعيده بهالزواج .. وهذا يدل انك وسعود ماشين مع بعض .. نجلاء : ايه تصدقين اشتقت له .. ياربي الشوووووووق يذبح .. شوق : هههههههههه .. عندك التلفون يقرب البعيد .. نجلاء ابتسمت ورجعت تطلع : اجل اخليك تنومين تصبحين على خير .. شوق : وانت من اهله .. طلعت وراحت للصاله الفوقيه .. الكل الحين بغرفته نام ماعداها هي .. رفعت عينها لغرفة فهد بنظرة عزيمة ... وراحت هناك ودقت الباب بهدووووء .. ماتوقعته يكون نايم هالوقت هي تعرف اخوها راعي سهر .. سمعت صوت المسجل يشتغل فتحت الباب بهدوء وطلت .. كان النور الوحيد من الابجورة جنب السرير .. شافت فهد واقف عند باب البلكون ومستند بيده عليه ويراقب قطرات المطر اللي تضرب بالباب الزجاجي وتنزل بسلاسه بشكل حلو .. كان صوت راشد مالي الغرفة ..

العضوة: 275918 , 6 years ago

اسكني حب او اسكني فرقا ان صبرت اشقى وان هجرت اشقى العمر يمضي .. العمر يمضي والجروح تبقى اختر الحل الصعب يا تفارق ياتحب لا تحدد لي مراحل لا لا يا تجيني حب .. يا تجيني حب يا تودعني راحل لا تحدد لي مراحل لا لا يا تجيني حب .. يا تجيني حب يا تودعني راحل هذي ورده للهوى .. هذي جروحك عطني روحي سيدي أو خذها ورحك هذي ورده للهوى .. هذي جروحك عطني روحي سيدي أو خذها روحك وش بقى ضاعت سنيني .. سنيني يا بعد قلبي وعيني اختر الحل الص...........

العضوة: 275918 , 6 years ago

كان فهد يغني مع الأغنية وهو يتفرج عالمنظر برا .. لكن انقطعت الأغنية فجأة والتفت شاف اخته واقفه مبتسمة تطالعه ويدها عالمسجل .. نزل يده عن باب البلكون وابتسم : من متى وانتي وراي يالجنيه ؟!! نجلاء : لسا توني داخله .. الوقت مطر بدال ما تستغفر ربك وتدعي مشغل هالأغاني .. ادع ربك احسن لك وقت المطر وقت اجابه .. فهد تنهد ورجع يطالع برا : استغفر الله ... شنسوي غصب علينا .. راحت ووقفت جنبه تطل عالمنظر والمطر اللي غسل كل شي وخلاه يلمع .... فتح فهد الباب شوي وامتلت الغرفة ريحة مطر .. خذت نجلاء نفس عمييييق : الله !!... واخيرا جا الشتاء والمطر مابغى يجي .. فهد كان لابس برمودا جينز وقميص رياضي كت أسود .. طلع برا حافي ورفع راسه فوووق يغسل روحه بالقطرات .. نجلاء وقفت عند الباب ولا طلعت وصار الرذاذ يضرب بوجهها : تعال لا تمرض ..!!.. ادخل انت تعرف مرضك شلون صعب ... فهد وهو يضحك : ههههههههههههه خليني

العضوة: 275918 , 6 years ago

فرصه ما تتفوت .. نجلاء وهي تأشر له بيدها : اقولك ادخل .. تذكر اخر مرة جتك حرارة بغينا نموت من الخوف عليك وانا أولهم .. فهد يمرر يديه الثنتين على شعره بعد ما تبلل بالكامل : هههههههههههه هذا اول .. الحين انا اكبر واقوى .. نجلاء راحت بسرعه وجابت الفوطه الخاصه فيه : فهووود ادخل الحين الجو بارد .. دخل وهو يضحك على اخته اللي عمرها مارح تتغير .. اخذ منها الفوطه وسكر الباب وبدا ينشف شعره .. ما درا الا بنجلاء تاخذ منه الفوطه وتدزه عالكرسي اللي وراه .. نجلاء : اجلس خل انشفك ماتعرف انت .. فهد قام يضحك واستسلم لها وخلاها تنشف راسه مثل ماتبي : ههههههههه وش اللي ماعرف بيبي شايفتني ........... شوي شوي تعورين .. ماردت نجلاء وظلت تنشف راسه وهو سكت وصار يدندن ينتظرها تنتهي .. فجأة نجلاء تكلمت : فهد .... انت تحب بنت عمي ...

العضوة: 275918 , 6 years ago

قالتها بأسلوب الجزم مو بأسلوب السؤال .. فهد سكت متفاجئ ورفع يده يوخر يدها عنه وشال الفوطه من راسه وهو يقوم ويبتعد ... نجلاء سكتت وهي تراقبه يوقف قبال المرايه ويرتب شعره المعفوس عقب البلل ... فهد : من قال ؟!!.. نجلاء : انا اقول ... فهد : ..... غلطانه .... نجلاء تبسمت وهي ترفع حواجبها وتقرب منه : لا انا مو غلطانه ... انت تحب شوق يا فهد .. لف لها يواجهها بعيونه وهو يفور .. عمره ماكان يحب انه يكون واضح للي حوله بس نجلاء كسرت هالقواعد ودومها تكشفه .. صد عنها وابتعد ورجع يستند بيده على باب البلكون الزجاجي يخفي ملامح وجهه المتوتره ..