العضوة: 275918 , 6 years ago

فهد ما تكلم ولا منعها .. ظل واقف مكانه ومنزل عينه من غير حتى لا يتابعها بنظراته ... وقفت شوق بنص الدرج والتفتت له .. وداخلها كلمة تبي تطلع .. شوق : فهد ..؟ رفع عينه لها .. بصمت من غير لا يبتسم ... شوق بابتسامة جانبية خفيفة شبه حزينة : اليوم ... شفت فهد غير فهد اللي اعرفه .. وان شالله ما اكون احلم ... تصبح على خير .. واختفى صوت خطواتها لما وصلت فوق .. وفهد فعلا كأنه فهد ثاني ... ما يبي يتحرك حتى ما تختفي الاحاسيس اللي داخله الحين .. ملامحه اعتراها الجمود وهو يفكر بكل اللي قاله.. أصعب حرب خاضها بحياته ولا يعتقد انه بيخوض مثلها ... اضطر بالنهاية انه يتنازل عن عليائه وينهزم ... رفع اصبعه ومسح به الدمعة الوحيدة المتغطرسة .. المتعلقة بعناد على خده .. ابتسم وهو يشوف طرف اصبعه المبلل .. قدرت حتى تذرف مني دمعه .. وانا اللي كنت اظن نفسي مو أي احد يبكيني .. تجي هي وتسويها فيني .. رفع عيونه للدرج وين ماكان خيالها بارح ... وعض على شفايفه يمنع ضحكة ساخرة انها تطلع .. ضحكة ساخرة على نفسه ..! تحرك ناحية الدرج اخيرا وهو يحس بثقل كبر الجبال يطيح من قلبه .. أخيرا قدر يتكلم وهو اللي كان يظن نفسه يقدر يتحمل .. وقف عند باب غرفته قبل لا يدخل .. والتفت لباب غرفة شوق المغلق يناظره .. ابتسم بنعومة وتمتم بهمس .. " وانتي من اهل الخير ... ياوجه الخير ... يالغلا " شوق من الطرف الثاني كانت متسنده عالباب وحاضنه الكتاب بين يديها .. ومبتسمة بتعب .. والدموع هالمرة دموع فرح ... فهد كان يحبها .. يحبها من زمان !!... بس توها تفهم الحين .. حرام عليك يا فهد خليتني اعيش الويل معك وانت مخبي هالشي عني ... ( ضحكت بسعادة وهي تصيح وحطت يدها على فمها ) ... صدق مغرور !!... بس محلاك !... احبك .. احبك بكل عيوبك بكل مافيك ... اكيد تنتظر مني اني اقولها .. وأبيك تعرف اني احبك ... احبك من زمان .. وكنت انتظر بس اشارة منك ... حطت الكتاب مكانه .. ونست بهاللحظات كل همومها وخطبتها وخالتها ... صارت تشوف فهد بس .. هو اللي كان السبب بعذابها وهو السبب بفرحتها الحين ... قدرت عالأقل تنام مرتاحة وتنسى خالتها بهالساعات .. وما انسى اقولكم ان فهد زارها بأحلامها بعد .. ليلة غريبة عجيبة !!.. ابتدت بحقد وانتهت بحب ..! =====================

العضوة: 275918 , 6 years ago

الصبح صحت شوق وروحها منتعشه حيييييييييل .. قامت جالسه وتلفتت حولها بسرعه وهي مقطبه حواجبها .. ذكرى الاحداث الاخيرة من الليلة الفايتة مرت عليها مباشرة بخاطرها .. وتمت جالسه تفكر انه ما كان حلم ... ابتسمت بنعومة وقامت واقفه .. شافت وجهها بالمراية لاحظت ان يشع فرح وراحة .. حطت يدها على فمها وضحكت ضحكة قصيرة .. بس رجعت تمسك نفسها وبسرعه راحت تلم اغراضها .. جاها إلهام وقررت بشكل مفاجئ انها اليوم لازم تتصل على خالتها وتكلمها ... ماتدري شلون جتها الشجاعة وهالعزيمة المفاجئة ! .. بس حب فهد لها واعترافه عطاها قوة غريبة ... وشلون وهذا الشي كانت تتمناه من زمان ..!! خلصت لبس ونزلت تحت تفطر وتنتظر ندى .. لما جلست عالكرسي حول طاولة الطعام .. جتها رغبة جامحة ولهفة انها تشوف فهد ... بس ماشافته وعرفت من الخدامة وهي ترتب صحون الفطور عندها .. انه طلع من بدري ..! نزلت ندى وهي تتثاوب .. جلست بكسل وشوق ساكته ماتدري وش تقول .. كل شي فيها مغمور .. ندى تحك عيونها من النوم : يارب متى نعطل !!.. شوق تشرب كوب الشاهي بصمت .. ندى وهي تدهن المربى عالتوست : اقول شوق شرايك بس نسحب عالجامعة باللي فيها .. ونكمل نوم .. شوق قامت واقفة وخذت الكوب معها : خلصي بس .. انا بنتظرك ندى : طيب يالدافوره حشى !!.. وهم يلبسون عباياتهم دق تلفون ندى .. ولما شافت الرقم استغربت ندى : غريبة ! شوق : شفيه ؟

العضوة: 275918 , 6 years ago

ندى تشوفها وترجع تناظر الشاشة : هذي مها متصله .. شتبي على هالصبح ؟ شوق ماعلقت وراحت عند المراية تصلح الطرحه وندى ردت ندى : هلا .. مها : صباح الخير .. ندى : اهلين صباح النور .. هلا مها اخبارك مها : بخير .. وانتي ؟ ندى : انا بخير .. مها : اقوول ندى طلعتي للجامعه ولا لسا ..؟ ندى : لا الحين احنا طالعين .. ليش؟ مها : طيب اذا ما اثقل عليكم .. اقدر اجي معكم .. ندى ما سألتها عن السبب بس ماعارضت : أكيد الله يحييك ... تبين نمرك؟؟ مها : ياليت والله ندى : خلاص من عيوني .. دقايق ونكون عندك مها : يعطيك العافية ندى : يا هلا والله .. مع السلامة .. سكرت وتغطت ولحقتها شوق للسيارة .. شوق : كني سمعتك تقولين بنمرها .. ندى : ايه ما ادري وش عندها .. بس تقول مروني .. يمكن ماعندها احد ياخذها .. تحركت السيارة لبيت ابو فواز القريب .. ووقفت عند الباب .. ومباشرة طلعت مها وركبت جنب شوق .. وصارت شوق بالنص ... مها : السلام عليكم شوق وندى : عليكم السلام .. سلمت عليهم وصافحتهم .. مها : مشكورين ندى ما تقصرون .. ندى : حياك الله .. العفو مها بحرج : معليه بثقل عليكم اليوم .. بس بعد اذا تقدرون ترجعوني معكم .. لأن السواق مع امي اليوم ومارح ترجع الا العصر .. يعني بتتأخر كثير .. ندى : اوكي مو مشكلة .. ربي يحييك .. مها : مشكورة ..

العضوة: 275918 , 6 years ago

شوق كانت منتشيه عالاخر ماهمها وجود مها بهاللحظة ...بالعكس .. رغم انها ما تستلطفها بس بهاليوم بالذات كل الدنيا بعينها حلوة .. بناسها كلهم بطيبهم بشرهم .. بعينها حلوين ... عشان كذا طول الطريق كانت ساكته ما تكلمت .. مو لأنها ماتبي تكلم مها لا .. بس لأنها تبي تستمتع باحساسها وتسترجع كلمات فهد اللي قالها لها .. مها ماعلقت على صمتها رغم انها فهمته على انه تعالي من شوق وغرور .. انها ماتبي تكلمها .. وصلوا للجامعة وانفصلت مها عنهم ، وتوجهت مباشرة لشلة الخراب اللي تعرفت عليهم .. اما شوق وندى انفصلوا عن بعض بنص الطريق وكل وحدة راحت بطريقها ... بالمستشفى .. خيمت أجواء الصدمة قدام مكتب الدكتور .. طاح ابو بدر عالكرسي بالممر وهو يمسك راسه مفجوع !!... وسلمان دمعته بعينه وواقف بصمت .. وبعجز !! ابو احمد جلس جنب اخوه يهديه : اذكر الله ياخالد .. حكمة ربك ! ابو بدر يعصر دموعه بقوة : صدق اللي سمعته ..؟...بدر ... معقولة !! ابو احمد : اذكر ربك ... ماهقيت انك ضعيف .. قو نفسك .. احمد ربك واشكره ان بدر حي يرزق مامات ..

العضوة: 275918 , 6 years ago

ابو بدر بصوت مكتوووم بالعبرات : شلون اسمع اللي قاله الدكتور واسكت ... هذا ولدي يا سعد .. ولدي الوحيد كذا يصير حاله !! ابو احمد وهو نفسه كاتم العبرة : استغفر ربك .. قضاء وقدر ... اللهم لا اعتراض .. ابو بدر نزل راسه للأرض وهو يكتم شهقة .. وابو احمد يربت على كتفه وماقدر هو الثاني يمنع دمعة .. ابو بدر : انا لله وانا اليه راجعون .. سلمان عض على شفايفه وصد بوجهه بعيد .. وكلام الدكتور ينعاد مثل الشريط بسمعه .. " للأسف مضطر انقل لكم مثل هالخبر ... وصدقوني انا اول من تضايق .. احتمالاتنا وتوقعاتنا صدقت .. الصور تقول ان بدر مصاب بتمزق بمقلة العين ... فقد على إثره البصر ! " ... مسك سلمان راسه بألم وعذاب ... وراح بعيد عنهم وهو يفكر بهالكلام ... اه ياربي ارحمه برحمتك يارب .. ابتعد عن غرفة الدكتور قد ما يقدر والصدمة اللي عندها .. ودق على احمد

العضوة: 275918 , 6 years ago

اللي رد بلهفه : هلا سلمان .. ها بشر تكفى !! سلمان غمض عيونه واسند راسه عالجدار اللي وراه وكل عرق براسه ينبض بألم : ... وش اقولك !... الله قلته لك صار صدق .. ارتجف صوت احمد بصدمة : لا ... لا تقوووول تكفى ! سلمان تنفس ومعد صار قادر يتكلم : بسكر يا احمد مو قادر اكلمك .. احمد : خلاص انا الحين عند المستشفى .. دخل احمد بسرعة لداخل ولقى سلمان قاعد لحاله على وحدة من المقاعد ومنكس راسه على يدينه .. راح وجلس عنده .. وكان متماسك قد مايقدر ولو ان الصدمة ملتمعه بعيونه .. احمد : بدر عرف ؟؟؟ سلمان هز راسه : لا .... رح يعلمونه بعد شوي .. احمد : وعمي وينه .. سلمان بصوت هامس : هناك عند مكتب الدكتور مع ابوك

العضوة: 275918 , 6 years ago

قام احمد وراح لهم .. لقا كل حالة واحد أردى من الثانية .. ماقدر يجلس عندهم لأنه هو اصلا متأثر .. وحب يتطمن على بدر .. فراح له الغرفة دق الباب ودخل : بدر ..؟ مارد بدر مباشرة .. قابله صمت في البداية .. احمد : بدر صاحي ؟؟ بدر بصوت هادي : ادخل .. احمد .. دخل ووقف عند مؤخرة السرير يراقب بدر يلعب بالرباط الماسك يده .. مره يرخيه ومره يشده .. حاول احمد يتكلم ويقول شي .. بس ماقدر وهو يراقب سكون بدر .. شلون بيتلقى الخبر .. احمد : شخبارك اليوم؟؟؟ بدر : زفت .. خلاص ابي ارجع البيت .. احمد ابتسم بألم : قريب ان شالله .. بدر بدون سابق انذار : شقال الدكتور عن النتيجة ؟ حس احمد بغصة .. ولا رد .. ترك بدر اللي كان يلهيه ورفع راسه لأحمد رغم انه مايشوفه : وش قال الدكتور ؟؟؟؟ احمد : .............

العضوة: 275918 , 6 years ago

بدر : شفيك ؟.. سألتك وش قال ... احمد عشان يتهرب : توني جاي الحين مالحقت أمره وأسأله .. قلت أمر عليك واشوف اخبارك بعدين اروح له .. بدر هز راسه بس واضح عليه انه كلللش ما اقتنع : اها !!... اجل رح اسأله وتعال علمني ..

العضوة: 275918 , 6 years ago

احمد : ماعليك بروح له .. بس انت اهم شي بشرني تحس بحالك أحسن اليوم .. بدر : الحمدلله .. ولو يفكون هاللي مربطني بكل مكان يكون افضل .. احمد : ان شالله اليوم بهاللحظة انفتح باب الغرفة ودخلوا ابو بدر وابو احمد .. وبعدهم بثواني سلمان .. بدر سمع حس ابوه يتنحنح : هلا يبه .. حياك .. ابو بدر يبتسم بمرارة له : هلا ابوي .. شخبارك اليوم ؟؟ بدر : الحمدلله .. انفتح الباب مرة ثانية ودخل الدكتور .. الدكتور : صباح الخير بدر .. بدر : صباح النور .. قرب الدكتور منه يفحصه وبدر حس بشي غريب من تجمعهم كلهم حوله .. ماتكلم ولا سأل بالعكس التزم الصمت .. متوقع انهم بيتكلمون عن حالته .. ولا استعجل حتى يعرف .. بالعكس وكأن الأمر ولا هامه ... هو حاس بالنتيجة اللي بيقولونها .. بس ما سأل ..

العضوة: 275918 , 6 years ago

بعد دقايق خلص الدكتور من الفحص ودخل يديه بجيوبه.. يستعد للكلام .. الدكتور : بدر .. حاب اقولك شي .... بس أبيك تقوي نفسك وتتماسك وم........ بدر قاطعه : ماله داعي هالمقدمات يادكتور قل اللي عندك .. ولو اني متوقعها .. التفت الدكتور على ابو بدر شوي ... ورجع لبدر .. الدكتور : وش اللي متوقعه يابدر ؟ بدر : من وعيت وانا عيوني ما احس فيهم .. فمتوقع وش بتقول .. وانا عارف من قلتوا فحص واشعه انكم تبون توصلون لهالنتيجة .. ابو بدر ماتحمل ونكس راسه وهو يشهق شهقات مكتومة .. وبدر التفت عليه .. بدر : يبه هد نفسك ماله داعي اللي تسويه .. ابو بدر ماقدر .. قام لولده وحضنه بقوووة .. لدرجة تأثروا البقية .. وبدر كانت هيئته الهدوووء والبرود بكل معانيه .. وكأن الموضوع مايعنيه فعلا .. بدر وراسه بحضن ابوه : يبه !... لا تزعلني ... الدكتور يشجعه : برافوو عليك يابدر .. ماتوقعتك بهالقوة .. هالقوة رح تفيدك صدقني .. بعد بدر ابوه بهدوء عنه والتفت على الدكتور .. وبنبرة مبطنة بحزن عمييييق : غلطان بكلامك .. عمري ماعرفت القوة ! الدكتور ابتسم وربت على كتفه : ابد هذا كلام غلط .. ردة فعلك وكلامك الحين دليل انك تتمتع بقوة تحسد عليها ... برافو عليك .. بدر سكت وصد عنه .. عن أي قوة تتكلم .. خلني كاتم اللي بقلبي أفضل .. طلب بدر انهم يطلعون عنه .. ابوه رفض يتركه بالبداية بس بدر أصر .. خلاص هو انتهى وحياته انتهت ابتداء من هاليوم ..!... بدر صار ماهو بدر .. بدر القديم انتهى .. بدر الحين جسد بلا روح .. بدر مات من زمان ... خلاص ... سكنه انسان جديد .. الجزء 75

العضوة: 275918 , 6 years ago

  حب من نوع اخر   الجزء 76 i تحدد موعد خروج بدر أخيرا .. بكرة الصبح !.. ومجبور يتم يوم ثاني بالمستشفى يستعيد فيها كامل قدرته عالخروج .. بالجامعة .. شوق لازالت تعيش لحظات هي أجمل اللحظات اللي مرت عليها بحياتها .. تناظر الناس بعيون مشعة !!.. وتبتسم لأي بنت تمر فيها تعرفها .. عكس الايام اللي مضت ... طبعا حكت كل شي لصديقتها المقربة نوال .. بينما نوف وجميلة منفصلين عنهم .. وما التقوا فيهم من بداية اليوم .. نوال : تصيح قصتكم بصراحة !.. شوفي دمعت عيوني .. ( وتفتح عيونها بأصابعها ) .. شوفي شوفي كلها دموع دموع .. شوق انقهرت : الشرهه على اللي تقولك .. نوال : اهم شي خلاص قررتي تتصلين بخالتك وتتفاهمين معها ..؟ شوق هزت راسها : ايه اكيد لازم اكلمها .. ولو اني كنت اتمنى هي اللي تتصل .. بس بعد لازم ابادر انا اذا هي ما بادرت .. نوال بنظرة ماكرة : ويييييييييييين اللي تقول خايفه اكلمها .. الحين تغير كلامك ! .. شوق ابتسمت وتوردت خدودها بحلاوة : صدقيني حتى انا مستغربة كيف جتني هالشجاعة الغريبة .. حاسة داخلي قوة وماني خايفة من شي .. مدري شلون أوصف لك ...

العضوة: 275918 , 6 years ago

نوال تبتسم : اجل نقول مبروك ؟ شوق زادت الحمرة وشعت حرارة البراكين من وجهها : لا لا اصبري شوي مو الحين .. ( ماقدرت ما تضحك من الخجل ) ههههههههههه لا كذا كثير علي .. خليني استوعب اللي صار لي امس قبل .. نوال : أجل نأجل مبروك لبعدين ؟؟ شوق : هههههههههههههه ليش ما تنثبرين .. نوال : ان شالله .. وعلى بعد مسافة مو بعيدة .. شلة الخراب ملتفة مثل كل يوم .. والسوالف البطالية والغيبة والحش بخلق الله مواضيعهم .. شذى : ها مها شسويتي ؟؟ مها : ابد .. ماصار شي .. جيت معهم الصبح .. وبيرجعوني معهم .. شذى بلهفه : يعني ما شفتي فهد ؟؟ مها : لا ما شفته ... مدري وينه لي فترة طويلة ما شفته .. وشكلي مارح اشوفه اليووم .. شذى : لا لا لازم يا مها لازم تشوفينه .. أبي أخباره مشتاقه لأخباره والله .. مها : انا اتفقت معهم اليوم ياخذوني .. بس ما أضمن لك اني بشوفه .. شذى برجا : حاولي يا مها تكفين حاولي .. مها هزت كتوفها : اوكي .. بحاول عشانك .. شذى ابتسمت لها : مشكوووورة .. اذا عرفتي عنه شي قولي لي .. أريج بنفاذ صبر : شذى ما قلت لك من قبل شيلي هالادمي من بالك .. صاحية انتي ولا صاحية .. كم مرة قلت لك مارح تقدرين توصلين له .. فلا تتعبين نفسك شذى طالعت بأريج وهي شوي وتصيح : طيب .. انا بس أبي اعرف اخباره .. عندي فرصة اني اعرف اخباره وماتبيني أستغلها ...( بدت تنفعل بقهر ) ليش تبين تحرميني منه ليش ؟؟؟ اريج تعجبت : انا بحرمك منه ؟؟؟.. شذى : اجل كلامك هذا شمعناه ؟؟ اريج : بالعكس يا شذى .. صدقيني انا اكثر وحدة محروق قلبي عليك .. ولو فهد قدامي كان قطعته تقطيع .. انا عارفه اتك تعانين بسبته .. بس المفروض تكونين اقوى وتبينين للعالم انك تقدرين تنسينه .. مو تقعدين تلاحقينه كأن مالك كرامه .. غلطتك انك تعلقتي فيه اكثر من اللازم وكان لازم من الأول تسمعين لنصيحتي وتبتعدين عن هالطريق .. بس ماسمعتيني وأجبرتيني اجاريك .. وهو بعد غلط يوم انه يلعب بقلوب الناس .. وصدقيني انا اكثر وحدة كارهته .. وكارهه علاقتك فيه من الأول .. شذى ماتبي تقتنع : بس ولو .. انا ابي افوز ومابي أخسر ..

العضوة: 275918 , 6 years ago

اريج : شذى انت خسرانه من زمان والكل متوقع هالنهاية .. لا تلعبين على نفسك .. شذى زاد اصرارها والتفتت بسرعة لمها وعيونها تدمع : مها .... أبي أخبار فهد اول بأول ... تسمعين ... ماعلي من أحد .. اريج هزت راسها وتلفتت على بقية البنات وحدة وحدة .. وبقسوة واضحة : وانتوا بعد .. يكفي لعب ... صدقوني ان تماديتوا اكثر ان تطيحون بالهواية ومعد تقدرون تطلعون منها ... ياما ضايقني استهتاركم وحاولت اجاريكم واقول يمكن بيوم يعقلون .. بس كل مالكم وتتمادون .. يكفي عندنا ضحية وحدة .. ( وهي تناظر شذى ) .. مانبي ضحايا ثانية ... والحمدلله ان شذى طلعت منها سالمة .. بس مو بكل مرة تسلم الجرة ... والشباب مو واحد .. يمكن الحسنة الوحيدة اللي بفهد انه انسحب من هالعلاقة من غير لا يطالب بأكثر .. واضح عليه من الأول انه كان يبي مكالمات فقط لا غير .. حتى طلعات ومواعيد ما كان يطالب .. ( وترجع تناظر شذى ) .. لولا ان شذى هي اللي طالبت بهالشي .. لا تنسون ترا مو كل الشباب مثل فهد .. ترا فيه الدنيء والأحقر منه .. انتبهوا يابنات ... وقامت واقفة : انا تعبت منكم والله تعبت وكل مرة يزيد خوفي .. ( تلتفت لرانيا ) .. رانيا ترا انت اكثر وحدة متماديه فيهم .. وطلبات ماجد كثرت .. انتبهي .. رانيا شافتها بنظرات لا مبالية : وش عرفك انتي .. انا اعرفه اكثر منك .. وفاهمه وش اللي يدور حولي .. تأففت اريج وهزت راسها : ما اقدر اقول .. غير الله يستر ! كانت بتروح عنهم لأنها خلاص حامت كبدها من تصرفاتهم .. بس مروى مسكت يدها وجلستها وهي تبتسم تلطف الجو .. مروى : وش دعوى .. كلش ولا زعلك .. اريج خذت نفس وسكتت .. اما شذى كلام اريج ازعجها والاقتناع مو راضي يدخل قلبها .. ماتبي تقتنع .. ومصصصرة على موقفها .. ومو راضيه تنهزم بسهولة ..

العضوة: 275918 , 6 years ago

بعد ساعتين بوقت الخروج .. ندى وشوق عند الباب ينتظرون مها .. على حسب اتفاقهم .. وهم بصالة الانتظار !... دخلت مها .. ووراها شذى ! شوق واقفة بعيد شافتهم .. وضيقت عيونها وهي تشوف شذى توقف مع مها شوي وتتكلم معها ... شافتها من قبل !.. بس تقدم مها ناحيتهم ماعطاها الفرصة انها تتذكر ونستها بسرعة .. مها : اسفة تأخرت عليكم !؟ ندى : شوي .. مها : معليش اعذروني .. ندى : السيارة تنتظر .. خل نطلع .. طلعوا وركبوا السيارة وتحركوا .. وشوق طول الطريق .. تفكر اذا دخلت البيت بتشوف فهد او لا ..؟ .. من عقب اللي صار امس .. وهي ميتة وتتخيل بس كيف بيكون حاله لو شافها .. وش هالشوووق الغريب .. ماكنت كذا من قبل ... بس وش اللي صار .. وصلوا للحي ومرت السيارة من بيت ابو فهد رايحة للشارع الثاني اللي فيه بيت اهل مها .. مها شافت سيارة فهد واقفة عالباب وعرفت انه موجود .. وكان ودها لو يدعونها لداخل .. بس محد فاضي لها ولا افتكروا لها .. نزلت لبيتهم وضاعت فرصتها ، بس اصرت انها تغتنم أي فرصة ثانية تسنح لها .. ودعتها ندى .. اما شوق ناسيه ان مها معهم .. وتفكيرها شطح لأبعد شي .. مها محترقه : شوق مارح تقولين مع السلامة ..

العضوة: 275918 , 6 years ago

ضربتها ندى : ردي فشلتينا وين الذوق ! شوق انتبهت وابتسمت .. وبصوت فيه الضحكة : اسفة مها بس كنت سرحانه اعذريني .. مع السلامة نشوفك على خير .. انتهبت مها على السعادة والفرحة تطفح بصوتها .. والضحكة بعد .. وزاد فضولها عن السبب .. اول مرة تسمع صوتها فرحان بهالشكل ... سكرت الباب ودخلت .. وهم رجعوا لبيتهم .. ويوم دخلوا شافوا منظر جنان خلاهم واقفين متفاجئين .. فهد كان واقف يغسل سيارة ابوه ويضحك مع عمر ، وماسك خرطوم الموية ويرش عالسيارة مرة .. وعلى عمر مرة .. عمر كان لابس شورت قصير بس وميت من الوناسة كل ما انهمرت عليه الموية .. وكل واحد فيهم يقطر من قمة راسه لأسفل رجلينه .. شوق واقفه جنب ندى تسمرت عينها على فهد .. شكله وهو مبهذل كان جنان .. ولا عمر ماسك الخرطوم الثاني وينثر الموية بكل مكان .. ندى صرخت متفاجئة : وش قاعدين تسوووووووووووووووووون يا مهابيل !! فهد رفع عينه لهم وابتسم ابتسامة حلوة : هلا جيتوا .. شوق كانت تحس ان هالترحيب موجه لها .. بس كتمت فرحتها لما شافت بعيون فهد المحبة من غير أي حاجز او غشاوة .. واضحة الحين بكل معانيها .. رفع فهد يده ومررها بشعره يبعده عن جبينه لورا .. ويدور حول السيارة وهو يرشها .. بينما عمر ينطط والخرطوم معه ، ويوجهه بكل مكان وبكل اتجاه .. سيح المكان كلللللللللله موية وصارت انهار تجري.. ندى : حرام عليك يا فهد .. برد بيمرض علينا الولد ..