العضوة: 275918 , 6 years ago

× في بيت أبو أحمد .. نوف خلاص وصلت لأقصى حالات الانتظار... بدر بيتم الثلاث شهور غايب وهو ما اتصل اتصال واحد يطمنها عليه أو حتى يسأل عنها شخبارها وش مسويه .. مو كأنها زوجته ..!! يومين فقدت حلاوة النووم !!.. صابها أرق مزمن ومشاعر مقلقتها ،، بدر اللي يحبها ماعاد صار يحبها .. خلاص تأكدت من هالشي وتصرفاته وتجاهله طول الشهرين اللي راحت يدل على ذا الشي..،، مو راضي يروح عن بالها تفكر فيه وش سوى وين هو ،، بخير ولا مو بخير ..!!... وهي جالسه بالصالة كانوا امها وابوها فيه... سمعتهم يتناقشون بموضوعها هي وبدر.. فزززت ولفت لهم بسرعة وهي تسمع هالطاري... ابو احمد يوم لاحظ انتباهها : ... نوف يبه اشوفك ما تستعدين ولا شي..! نوف بحزن : أستعد لوشو يبه ؟! ابو احمد : .. انتي أكيد راضيه زواجك يكون بدون حفل زواج ؟ نوف وهي تتنهد : ايه يبه راضيه مين قالك مو راضيه... مادام ذي رغبة بدر مابي أحرجه عند الناس.. عادي راضيه ابو احمد : طيب ماشوفك محتشرة وتتجهزين ...اللي اعرفه ان بدر اتفق معي أول ما يرجع بياخذك لبيته ؟ ولا أنا غلطان ؟ نوف : ايه يبه قالي كذا... قالي انه اول ما يرجع بياخذني .. ابو احمد وهو يلتفت لزوجته : وليش ما تشدين معها .. الولد بأي لحظة بيجي ما يصير هي مو جاهزة ام احمد : هذي بنتك دايم احاول فيها واقولها روحي مع سهى وجهزي نفسك لكن هي معاندة..

العضوة: 275918 , 6 years ago

ابو احمد وهو يرجع لبنته : ليش يا نوف ؟... نوف : يبه بدر قالي انه بيطول... ابو احمد : ما تدرين يمكن تتغير ظروفه ... ما يصير كذا الرجال ياخذك وانتي مو مستعدة ، خلك جاهزة ... أول ما يجي بنسلمك اياه نوف بضيق: يبه عارفه... ابو احمد : لا تأجلين أكثر.. أبيك عروووس وأنا عارف ان بدر يستاهلك وانتي تستاهلينه .. اه يا بدر.. ياللي اسمك سبب من اسباب عذاباتي .. وينك تنور دنياي يا ولد عمي ،، توني أحس بالشووووق ذابحني هالأيام ، بحياتي ما اشتقت لك كل هالشوق ،، قامت من مكانها وتركتهم.. ومن ذاك اليوم وهي بدت تستعد ،، بدر ما اتصل لكن بعد لازم اذا رجع يعرف انها مستعدة ومشتاقة لشوفته ،.. مشتاقه تشاركه حياته.. تشاركه كل شي يخصه.. مشتاقه حتى تضحك معه !! فتحت دولابها ودمعة شفافة تنزل على خدها التعبان من قل النوم !!... أضحك معه ؟... قد شفتوا حبيب ماقد ضحك مع حبيبه !!... ودي اضحك واسمع ضحكته .. ودي اذا بكى ابكي معه ..وادي اذا سولف امسك يدينه واسمعه ! ودي اضحك واسمع ضحكته الجنونية .!!!

العضوة: 275918 , 6 years ago

دخلت سهى تساعدها ،، لقت نوف واقفة وضامة وحدة من الفساتين منزلة راسه وتبكي بصمت .. ضاق صدرها،، .تركت الباب مفتوح وراها وقربت منها وحطت يدها على كتف اختها : ... كم مرة قلنا لك بيرجع ..!مارح يقدر يطول عنك أكيد راجع بأقرب فرصة !.. نوف بصوت متعذب : تعذبت بما فيه الكفاية ومو متحمله أكثر..، ليش انا اللي انتظر وهو مهمل ومو معطيني اعتبار.. ليش ما يدق ويقول مشتاقلك عالاقل يحسسني اني متزوجته ،، يحسسني اني اهمه وأحس انه ما تزوجني بس استعباط ! سهى : الله يهديك أي استعباط !... روقي الحين واشغلي وقتك بالاستعداد.. ترا بعد الاستعداد يبي له وقت ..وان شالله ما تكونين مخلصة الا بدر قد رجع !! نوف بحزن : ما أدري ليش أحس انه بيجلس هناك شهوور أكثر من الشهرين اللي طافت... والله يا سهى احسها سنتين... ودي لا سألوني عن خطيبي أسولف لهم عنه ... البنات اللي ينخطبون كلهم لهم سوالف حلوة إلا أنا... وش اقولهم خطيبي مسافر حتى تلفون مارفع عشان يقول شلونك يا نوف ... ما أدري بس أحس انه يستانس بتعذيبي .. عاجبته طريقة هالتعذيب.. وانا وربي تعبت أحس حياتي كلها غلط .. مسحت نوف دموعها وبدت تطلع كل اللي بدولابها ،، تاخذ الجديد وترمي القديم .. وسهى تساعدها ... مادروا الا أحمد واقف عالباب مبتسم ويده تدق الباب احمد : سلام عالحلوين الأمورين ! سهى ردت بابتسامة : هلا بمعرسنا .. احمد طالع نوف يبيها ترد ،، لكنها ما ردت كانت تروح وترجع عالدولاب للسرير وهي تطلع ملابسها الفخمة الجديدة.. غضن حواجبه بابتسامة وهو يشوفها تتحرك من غير لا تعطيه نظرة ، والحزن والدمعة متعلقة بخدها..

العضوة: 275918 , 6 years ago

احمد : شفيهم الحلوين ؟ نوف بعبرة : ...روووح أسأل ولد عمك !.. وبدت ترمي اللي بيدها بقوة وترجع تشتغل بسرعة وقهر .. احمد ابتسم بحنية وقرب منها : .. ولا تزعلين .. تعرفينه بدر ما ينسى أحد يحبه ويعزه.. الا بدر ما تقدرين تقولين عليه انه ينسى نوف بغصة : ايه مبين !!.. واضح مرة !... قولوا لي انا مو زوجته ؟ مو من حقي اعرف هو وين ، ولا عقد الزواج كان لعبة!!! احمد : لا من قال لعبة .. بس صدقيني بدر مشغول يا نوف مشغوووووووووووووووول نوف : انت تكلمه ؟ احمد : اخر مرة كلمته قبل ثلاث اسابيع .. نوف : وما دام تقدر تكلمه ليش ما يقدر يكلمني.. احمد : انا حتى ما اقدر اكلمه خمس دقايق على بعضهم .. واليومين هذي ابد ما قدرت اكلمه !! نوف : وش هالشغل !!!! احمد : قلت لك مليون مرة انه رايح لشغل يمكن يكون أهم شغل في حياته .. نوف : وماتعرف وش هالشغل ؟ احمد : كل اللي اعرفه انه شغل مهم وماقالي غير كذا . نوف ملت .. وبحزن : ياخوفي تجي لحظة .. أندم فيها اني وافقت عليه ..وانا مابي هاللحظة تجي.. مابي اندم .. ياناس مابي اندم بس بدر باهماله بيخليني أندم ،،.. جلست على سريرها وحوسة الملابس وراها وتحتها وحولها... أحمد كاسرة خاطره حالة اخته.. وطول الشهرين ملتزم بالوعد اللي عطاه لبدر انه ما يقولها.. بس نفسية نوف تزيد سوء مع زيادة طول المدة وهو يشوفها تذبل قدامه .. ومو قادر يقولها يبشرها ويفرحها .. عشان ما ينقض الوعد طلع من الغرفة بصمت ،،.. ونوف كملت الشغل من غييير أي حماس تندب حظها ورضاها في بدر اللي رغم كل شي سواه للحين تنتظره وبكل شوق ..!!

العضوة: 275918 , 6 years ago

 i  106حب من نوع اخر   كانت نجلاء جالسة بالصالة ومعها عبدالعزيز اللي ملا البيت فرحة وضحكات خاصة على أمه .. سد الفراغ العاطفي اللي كانت نجلاء فيه وصار ياخذ كل تفكيرها واهتمامها وقل من تذكرها لسعود وهذا كان عامل مساعد مفيد لها.. صارت تشوف فيه سعود،، لكن أحيانا ما يمنع انها تدمع وهي تتأمله يتحرك ويحرك يدينه بكل جهه ... تدمع ان هالولد قطعة منها ومن سعود..! هذا كان حالها ووشوق شايله عبدالعزيز وتسولف له وتضحكه .. كانت نجلاء تراقب بصمت بس دمعتين كانوا بعيونها .. تتخيل سعود وهو شايل عبدالعزيز بحضنه .. تتخيل عبدالعزيز وهو يضحك لأبوه ... تتخيل كل شي ممكن يصير لو سعود موجود جنبها وجنب ولده .. حطت شوق عبدالعزيز على فراشه ورفعت عينها لنجلاء لقتها تطالع في ولدها وتدمع.. رق قلبها لها وهمست برقة : نجول! مسحت نجلاء دموعها بسرعة وابتسمت وهي تقوم : شوق انا بطلع فوق شوي بجيب لعزيز رضعته .. شوق : روحي لو تبين ترتاحين ارتاحي وعزوز خليه عندي .. نجلاء : انتي قلتي لي ان صديقاتك بيجون ؟ شوق : ايه ودهم يشوفونك نجلاء بابتسامة : خلاص اذا جوا وانا ما جيت جيبي عبدالعزيز فوق ! شوق : ان شالله تركتها نجلاء وطلعت فوق.. وبعدها نزل عمر يركض وشاف شوق مقربة وجهها من وجه عزيز وتبوس بيدينه الصغار.. عمر للحين مو مستوعب وجود هالكائن الجديد في بيتهم واللي محصل كل هالاهتمام من شوق .. عمر : .... سووق...

العضوة: 275918 , 6 years ago

رفعت راسها وابتسمت : .. عمر تعال سلم على عبدالعزيز .. انت دايم ما تسلم عليه عمر : لا هذا مب سديقي .. شوق : ههههههههههه أي صديق يا عمر... هذا بعدين بيقولك خالووو عمر قرب عمر وجلس جنبه .. وما درى الا عبدالعزيز متبسم بوجهه .. عمر استانس عمر : هههههههههههه يحبني.. شوق : أكيد ،، انت خالو عمر الحين .. لعب معه شوي لكنه مل وقام ،،.. شافت شوق الساعة عالجدار .. 7 وربع .. نوال شوي وواصله .. من زمان وهي ودها تجي لكنها أجلت هالزيارة .. الفترة اللي راحت،، كل من ندى وشوق اعتذروا هالترم ما كملوا.. بحكم ظروف نجلاء وغير كذا زواجاتهم اللي أكيد بتكون هالفترة هزت شوق راسها وهي تلعب بيد عبدالعزيز ،،.. زواجي ؟؟ تنهدت من أعماقها... أنا كنت جافة هالفترة مع فهد وهو كان يتجاهل اسلوبي هذا أو بالأحرى ما يبين ضيقه .. يوم لاحظت ان نجلاء تأخرت مارجعت ، شالت عبدالعزيز بين يديها برقة وحذر ،.. وتوها بتطلع فوق الا الباب ينفتح من وراها .. احساسها علمها من هو ، لكنها تجاهلته .. بس ما قدرت الا توقف يوم ناداها فهد : شوق ؟ ..

العضوة: 275918 , 6 years ago

صدت له وهي شايله عبدالعزيز .. ابتسم وهو يقرب لهم .. شوق : نعم ؟ وقف قدامها وهو يتأمل بعزيز .. وظل فترة يناظره بصمت وهو مبتسم... شوق سرحت بعيونه القريبة راحت لأبعد عالم ضايعه بعيونه لكن قلبها كان ينطق داخلها وتمنت فهد يسمعه ! ليتنا ننتهي من هالحالة.. بس محتاجة شوية اصرار منك وصدقني بلين .. بلين لك فهد زادت ابتسامته ورفع عينه لها : .. بالله مو يجنن ؟؟؟ إنت اللي بتجنني والله .. ردت : ....ايه مو أمه نجلاء .. فهد يغايض : ومو خاله فهد ؟ وهي تنزل عينها لعيون عبدالعزيز : ايه بس ما يشبه لك ..! تنهد فهد وكأنه خلاص ماهو عاد متحمل حالتهم : .. شوق ؟... ما مليتي من ذي الحالة ؟ شوق باستغباء : اي حالة ؟ فهد : احنا متزوجين يا شوق متزوجين ولا ناسيه ذا الشي.. متزوجين لكن انتي وكأنك نسيتي هالشي مرة!! شوق : الحين بتحط علي اللوم !.. تنهد : أنا ما حط اللوم عليك .. اللوم كله علي... بس شهرين مرت واحنا نعامل بعض مو كأنا حبيبين !! ضرب قلبها وهي تسمعه .. تحب جرأته هذي !!.. تحبها بتجننها شوق : هذاك أول !

العضوة: 275918 , 6 years ago

استغرب : شلون يعني أول .. شوق : يعني ماضيك الأسود ذا هو اللي بنى حاجز بيني وبينك فهد بنبرة وصلت لقلبها : طيب واذا قلت لك .. أبي أبدى الحاضر بياض على بياض.. مابي أتذكر حتى الماضي.. مابي أذكر ولا أبيك تذكريني ... سكت وهي يطالع بعيونها وهي مثله ،،.. قطع عليهم لحظة السكون رنين جوالها بجيبها ..عرفت انها نوال ، ف لفت وهي بتطلع فوق : ... أنا مشغولة الحين... نكمل كلامنا بعدين .. فهد بهم : شوق !... لا تضمنين تشوفيني بعد اليوم... خلينا كل ساعة نتفارق فيها نكون راضين عن بعضنا .. أنا عقب نجلاء وسعود .. صرت حتى اخاف افقدك بأي لحظة واحنا مو متصافين خافت من كلامه ولفت له وهي بنص الدرج : ...ليش تقول هالكلام ؟؟ فهد ابتسم بحزن : .. ترا شهرين واحنا على هالحالة اتعبتني لو ما تدرين ... انا ما اقول هالكلام الا اني اخاف اللي صار مع نجلاء يتكرر معي أو معك ... شوق بخوف : لا تتفاول.. فهد : انا ما اتفاول ..لكن هذي الدنيا.. أبيك بس تفهمين أني شاريك .. شرايك بروحي شوق بألم : ..أنا مصدقتك .. لكن للحين أبي شي يدفعني لك... فهد ما فهم عليها : شي مثل ايش ؟؟ شوق بحزن :.... مدري يا فهد مدري.. أنا بعد تعبت من هالحالة وربي... أبي أرتاح فهد ابتسم بحنية : وش مانعك ؟ شوق بتردد : ..... يمكن.. عشاني أحلم... فهد : احلمي وانا هنا مستعد ..

العضوة: 275918 , 6 years ago

شوق : يمكن لأني... أبي نهاية غير... ودي اتكلم معك بكثير اشياء... ما ودنا نتراضى بهالشكل.. ال..... فهد كمل بابتسامة وكنه عارف وش تبي : ... قصدك البارد ! شوق نزلت عينها تناظر عزيز وحركتها بينت انه هذا قصدها.. فهد فهمها وضحك .. خلت شوق غصب تنحرج ، أول مرة تفصح له عن أمنية من أمنياتها الوردية فهد : هههههههه ياربي انتوا يالبنات أحلامكم تتعب الواحد شوق بحرج وقهر : انت سألتني وانا جاوبتك ... لا تفكر انك انت اللي تعبت حتى انا تعبت شهرين مثل ماهي صعبة عليك صعبة علي،..كل يوم كان ودي نتكلم .. حسيت اني مو متزوجتك ذبحني هالبرود ...ما تبيني عقب كل هذا أحلم ؟ فهد بابتسامة وهو يطلع لها فوق : ... قلت لك احلمي وانا هنا موجود ..مستعد المستحيل اسويه لك.. أحلامك هي أحلامي.. مسك بيديه الدافية وجهها .. ولأن شوق كانت شايله عزيز ما قدرت تمنعه أو تخليه يبعد ،، بس بعد شاف بعيونها دموع ،، وكأنها كانت تنتظر منه دفء هالمشاعر من زمان .. شوق بصوت مبحووح تحاول تخفي فيه مشاعرها :الوقت الحين ما يناسب نتكلم فيه فهد : اذا ما تراضينا الحين.. متى نتراضى؟ جاهم صوت من فوق : ... لو سمحتوا ولدي توه على هالحركات تخربونه من الحين !! التفتوا فوق لنجلاء الواقفة في القمة .. وتناظرهم بنظرات محرجة لثنينهم .. شوق انحرجت طلعت فوق لنجلاء بسرعة وعطتها ولدها.. نجلاء : لو سمحتوا يعني تبون تسوون هالحركات خلوا ولدي بعيد.. شوق منخرسة وفهد ضحك وطلع لها : أخبارك اليوم ؟

العضوة: 275918 , 6 years ago

نجلاء واثار الدموع ما جفت : زينة .. لاحظ فهد وجهها ولاحظ انها بعد متحسنة : تعالي في شي ضروري بعطيك اياه .. نجلاء : ايش ؟؟؟ فهد ابتسم : تعالي معي ،.. شي ضروري أظنه بيريحك .. انا انتظرت عشان تكونين تمام مثل عادتك عشان اعطيك اياه وقبل لا يروح التفت لشوق الواقفة بصممت : ... أوعدك.. هالحلم قريب... وش أبي أكثر من رضاك .. طبخت شوق وخصوصا قدام نجلاء المبتسمة بصمت من غير لا تعلق.. شافتهم يدخلون غرفة فهد ،، وهي مو عارفه هالشعور ايش.. حب ؟.. ايه حب... لكنه فاق الوصف... تفجر أكثر من قبل... هم صحيح ما تراضوا بالشكل اللي هي تبيه .. لكنه وعدها ،،.. بجلسة مصارحة .. هي الأولى بينهم.. تقدروووون تقولون .. بدا الثلج يذووب... والمشاعر تشتعل أكثر من قبل،، بحرارة تغمرها كلها،،

العضوة: 275918 , 6 years ago

وصلت نوال واستقبلتها شوق عند الباب .. واللي فاجأ شوق ان بدوور كانت جاية معها ،، طالعتها شوق مصدومة حتى انها سلمت عليها باستغراب.. من جية هالانسانة عندها بالبيت. بدور بابتسامة : ...أدري مو متوقعه حضوري بس مشتاقه لك ودي أشوف اخبارك التفتت شوق لنوال تطلب تفسير ونوال عطتها ابتسامة ،.. بدور : لو ما تدرين انا ونوال جمعتنا صداقة ،..صرت منكم وفيكم شوق برسمية مو دارية وش السبب اللي يخليها تجيها : تفضلي حياك بعدم ما دخلوا وجلسوا.. نوال : تدرين ماجيت الا عشانها تبي تشوفك .. وخصوصا انك اعتذرتي عن الجامعة قالت الا تبي تشوفك وتكلمك ضروري.. شوق ابتسمت لبدور : حياها الله بأي وقت بدور بحرج : والله مدري شلون اقول.. كلام من زمان كنت ابي اقوله لك واريح ضميري... من كنت عارفه انك بالشرقية وانا انتظر ترجعين عشان أكلمك..بس عقب هالظروف اضطريت أأجلها.. ما تدري وشو هالكلام ،، بس شوق ابتسمت : قولي اللي عندك هذا انا اسمعك بدور بقلق : بس توعديني ما تشيلين بخاطرك.. لأني مارح أرتاح الا لما أسمع منك كلمة وحدة ..

العضوة: 275918 , 6 years ago

شوق : تفضلي بدور .. بدور : ودي نكون لحالنا (التفتت لنوال ) .. نوال ابتسمت : عادي هي قايلة لي انها تبيك على انفراد .. شوق وهي تقوم : اوكي عادي نطلع برا بالحديقة ؟.. أهدى مكان.. بدور : يكون أفضل .. شوق : وانتي يا نوال بنادي ندى تجي عندك .. نزلت ندى عند نوال وشوق طلعت مع بدور برا ..،، طبعا بعد ما ضيفتها كانت تشوف بعيون بدور نظرات هم وقلق... ابتسمت : قلت لك بدور لا تشيلين هم مارح أكلك ليش خايفة ؟ بدور باعتراف : ...بلاك مو داريه انا وش مسويه .. شوق خافت : ليش وش مسويه ؟؟. بدور أنا ولا مرة عرفتك عن قرب معرفتي فيك كانت بالجامعة وبس ..

العضوة: 275918 , 6 years ago

بدور : ... شوق لو اقولك اني كنت سبب من اسباب اللي صار لك مع شذى واريج... وش تقولين؟ تشنجت شوق من طاريهم ،، ما تبي تتذكر حتى وش صار لها معهم : .. شفيهم؟؟ وش صار لك معهم؟ بدور : شوق... انا لما شفتك أول مرة.. ما قدرت أكرهك.. وحتى اني ما حبيتك .. يعني شعور طبيعي مثل اي وحدة ما تكن أي شعور لانسانة ما تعرفها.. بس انجبرت اني أحاول أكن لك الحقد وأجاري الشلة اللي كنت معها واكذب على نفسي.. شوق ما فهمت وش المقصود من ذا كله : .. وكلامك ذا كله وش معناه ؟ بدور : شوق ... انا جاية اليوم أطلب منك تسامحيني.. انا مو عارفه اعيش مو عارفه ارتاح من عقب اللي صار...انا اعرف وش كبر الألم اللي سببوه لك وكنت عارفه كل مخططاتهم بس ما حاولت اوقفهم الا تأخرت مرة ، هذولي ناس يحبون الكذب والنفاق ،.. ماكان لازم تصدقينهم،،.. مثلك كان لازم تواجههم بقوة وتثبت ثقتها بالناس اللي تحبهم . رغم ان بدور ما حددت اسم،، بس ما تدري شوق ليش حست انها تقصد فهد " بالناس اللي تحبهم" بدور : ... شوق انا اعرف كل الكلام اللي قالوه،.. صدقيني كذب،، هم عشان يجرحونك غلفوا السالفة كلها بالكذب شوق بتردد : .. بدور...انت...كنتي عارفه ان شذى تعرف فهد؟؟.. بدور ابتسمت تطمنها : ... المفروض ما تقلقين من هالناحية وتكونين اكثر ثقة.. تدرين ليش شذى سوت كل اللي سوته ؟ شوق : ليش ؟؟ بدور : .... تبي تبعدك عنه بأي طريقة ، وتبي تبعد فهد عنك .. كانت تبي تعذبكم ثنينكم ،، وانتوا كلكم طحتوا ضحية تخطيطها هي وصديقتها اريج شوق بألم : تعذبنا ؟؟؟ بدور : ايه هذا كل اللي كانت تبيه ..،، وانا جيت اليوم أقولك الصدق وأريح نفسي.. ياليت تسامحيني.. نص ساعة مرت ونوال وندى داخل.. ملت ندى وبمكر غمزت لنوال : شرايك نروح ننط عليهم .. فيني فضول ابي اعرف وش هالاجتماع نوال : هههههههههه اكيد خلصوا خلينا نطلع لهم ندى ما انتظرت على طول طلعت للحديقة وأول ما وصلت لقت شوق تضحك مع بدور ،،.. وكل الجدية اللي كانت في البداية اختفت !

العضوة: 275918 , 6 years ago

ندى : ممكن نجلس،.. وممكن نعرف وش سالفتكم شوق ضحكت : .. أبد ولا سالفة ولا شي.. ندى جلست جنب بدور ونوال جنب شوق .. ندى : الا على الطاري.. توني عارفه من امي اليوم ان مها وأهلها بينقلون من الحي.. شوق رفعت حواجبها باستغراب : ليش؟؟؟؟؟؟؟؟؟؟.. وش صاير لهم ؟؟؟؟ ندى : مدري... بس يقولون فيه مشكلة عندهم .. ويبون ينقلون ! نوال وبدور طالعوا بعض بنظرات مبهمة وكأنهم عارفين السبب.. وشوق انتبهت لهالنظرات : شفيكم تناظرون بعضكم كذا ؟؟ نوال بحزن : ما تدرين .. عن.... الفضيحة اللي صارت ؟؟؟ شوق ارتاعت : اعووووذ بالله وش فضايحه يا ساتر ؟؟؟ بدور بأسف وأسى : ... فضيحة منتشرة الحين بالبلوتوث والانترنت... للشلة ؟؟ شوق خافت .. وندى باهتمام وسألت : أي شلة ؟؟؟؟ بدور وهي تناظر وجه شوق تبي تشوف ردة فعلها : فضيحة شلة أريج وشذى .... شوق غصب عليها انصدمت .. ونوال طلعت جوالها وفتحته .. مدته لشوق المبهوتة : شوفي هالفيديو ... وبتعرفين .. حتى مها بنت جيرانكم معهم ...؟..

العضوة: 275918 , 6 years ago

خذت شوق الجوال باضطراب ،،.. وشافت الفيديوو وكل اللي فيه ، وجوههم كانت واضحة والعري منتشر بشكل مو طبيعي .. بسرعة شوق رجعت الجوال وقلبها يعورها : استغفر الله ! ..طيب ليش ؟؟ بدور : ما ندري ليش ؟؟.. وتدرين كل الشلة الحين مختفية عن الجامعة ما شفناهم من اسبوعين !... اللهم لا شماتة .. بس؟؟.. حرام مثل هالنهاية لأي أحد.. بدور : ..... وبسبب هاللي صار.. انتشر ان ابو اريج تخلى عن منصبه بسبب فضيحة بنته ! شوق والخبر غصب اثر عليها :اللهم لا شماتة ياربي... نوال بنبرة مبطنة بالكره : .. يقولون الظالم ما يدوم عزه !.. والله يمهل ولا يهمل... لعبوا واجد وسمعتهم اصلا رايحة فيها فهالفيديو ما يقدم ولا يأخر.. شوق بضيق : بس..... شي يعور القلب مهما كان،،.. ان الصور تنتشر بهالشكل ! نوال : ... خلك منهم .. كل اللي نقدر نقوله اللهم لا شماتة.. والله لا يبلانا.. اللي يحافظ على نفسه ان شالله ماله شر،، بس اللي يلعب يتحمل اللي يجنيه .. بدور بابتسامة لشوق : خلاص شوق أعيش متطمنة ؟ شوق بعذوبة : ... مسامحتك بدور... ما انسى وقفتك معي ذاك اليوم ... تستاهلين كل خير. بعد انتهاء هالزيارة البسيطة ،، طلعت بدور وتركت شوق بعد ما زادتها راحة أكثر من قبل ،،.. شوق كانت محتاجه مثل كلام بدور ،.. كانت محتاجه من يبرئ ساحة فهد عشان يرجع الملاك الساحر بعيونها مثل قبل .. ابتسمت بعد ما تسكر الباب ورا صديقاتها الثنتين .. ابتسمت بسعادة وهي تحس الحين ان حياتها رجعت للطريق الصح.. عرفت الحين هي وين واقفة وأي طريق بتكلمه ،،.. رغم كثرة الدروب الا انها أصرت من جديد تكمل وتختار فهد.. تذكرت عيونه قبل ساعة .. ما تنكر كانت تشوف فيها الصدق بس بدور بجيتها وكلامها ،.. عالجت اللي كان داخلها ، وأرضت رغبتها انها تعرف اللي تعرفه .. الحين ... والحين بس .. ثقتها بفهد رجعت تتعمر ،،.. رغبته انه يبدا معها من جديد خلتها تتعلق فيه أكثر من قبل تعبت معه من قبل.. صح !.. لكن الحين وعقب كل اللي سمعته من جميع الأطراف... صوت قلبها ، صوت فهد ، وأخيرا صوت بدور.. الحين تقدر تبدا مرتاحة ،، تقدر تبدا وهي ما تشوف غير فهد وفهد ما يشوف غيرها