العضوة: 275918 , منذ 4 سنوات

نرمين:بعد بكرا ؛بس طبعا من هلأ انت نرمين لتاخدي على البيت و الجو و على الخدامة سيرين:طيب ،لا تنسي انت بتنامي بغرفة النوم مع يزن و جماال بنام بالصالون ،لانو انتو بحكم المطلقين نرمين:اكيد ؛من غير ما تنبهيني هيك رح يصير سيرين: يلا انا خلصت ،المصاري معك مو هيك ؟ نرمين:ايه معي،ما تاكلي هم سيرين:استعجلي بعملية يزن نرمين:بعد بكرا عمليتو سيرين:شو عرفك ؟ نرمين:انا رح حددا بعد بكرا ،منبقى على تواصل سيرين:هاتي موبايلك نرمين:اه صح نسيت خديه و انا رح يكون معي هادا الموبايل الصغير سيرين: شو ما بصير معي رح حكيكي فورا و انت كمان اذا احتجتي شي او انشك بامرك حكيني فورا نرمين:انا ....انا ..بدبر حالي بس انت ديري بالك من فادي ..اذا حس او عرف شي او تلبكتي قدامو بشم هالشي فورا و وقتا كارثة علي و عليكي سيرين:ما اكلة همو ابدا ،المهم يزن و بس وقفت على المرية و دخلت اصابعي بشعري انا و عم افردن ،كان من الصعب اني انا اعرف حالي انو انا سيرين بالشعر المرتب و المصبوغ و التياب الراقية و الانيقة و البشرة النضرة ،طلعت من الصالون و التقيت بابو العز ؛فتحلي باب السيارة و طلعت من ورا ابو العز:مدام على البيت مو هيك ؟ سيرين:ايه ابو العز:ما عرفتك اول ما طلعتي سيرين(بتوتر):ليش؟ فيني شي؟ ابو العز:من شعرك ،غير شكلك كتير سيرين:امممم (بصوت منخفض)و لا انا عرفت حالي

العضوة: 275918 , منذ 4 سنوات

صف بالكراج و انا تابعت لحالي ،وصلت على الطابق التالت ،حطيت المفتاح بالباب و دورتو بس ما فتح ،حاولت مرة تانية حتى انفتح الباب من جوا و طلت مرة كبيرة بالعمر (ام سامي جارتي يلي ساكنة قبال بيتي بالضبط ،مرة بتحكي كتير و حشرية لابعد الحدود ،بتحب تعرف الشاردة و الواردة بكل البناية ؛حاولي تختصري الحكي معا لانو عندا مهارة غريبة بسحب الحكي منك و بتسحب يلي بدا اياه و كلو قابل للنشر بكل البناية،يعني بتصيري حديث الاسبوع على فنجان القهوة بصبحية الجيران لهيك احترسي منا ) ام سامي:مين انت ..ليش عم تفتحي باب بيتي ...نرمين ...هاي انت نرمين سيرين:ايه انا نرمين ام سامي:ما عرفتك ،شو عاملة ..مغيرة شعرك سيرين:ايه ،حلو؟ ام سامي:ايه حلو لابقلك بس شو كأنو لون شعرك مأثر على نظرك كمان حتى عم تفتحي باب بيتي بدل باب بيتك .. سيرين: هههههههه (ضحكة مصطنعة) لا تعبانة شوي ام سامي:تعبانة!لتكوني حامل و مخبية سيرين: لا لا ابدا ام سامي:فوتي لشربك كاسة عيران ،اكيد بكون راسك عم يفتل و نفسك عم تلعي سيرين:لا ابدا ، بس طلعت على الدرج ما طلعت بالاصنصير لهيك وصلت تعبانة ام سامي:ليش يا حبيبتي طلعة الدرج ما بتسوى للحامل و خاصة باول شهورا سيرين:لا ما حامل حطت ايدا على بطني و هي عم تضحك بخبث ام سامي: ههههههه ما تخجلي ، الله يتمملك على خير سيرين:يلا عن اذنك سحبت حالي بصعوبة لباب البيت و فتحتو و فتت و انا عم اخد نفسي ،طلعت بوجهي مرة بعمر ال 40 سنة لون بشرتا الداكنة هو اكتر شي بميزا بالاضافة لملامحا الخشنة و القاسية (شادية بتجي من الصبح للمسا لعندك ،بتشتغل و بتطبخ و بتعمل كل شي من الالف للياء،هيدي ايدك اليمين و اليسار بالبيت ، مرة درويشة كتير ما بينخاف منا ابدا بس ما توثقي كتير فيا بكل الاحوال ) شادية:مدام نرمين ... سيرين:شادية ..جيبيلي كاسة مي ..ولا قلك اعمليلي فنجان قهوة شادية :حاضر بس ما عرفتك مغ...

العضوة: 275918 , منذ 4 سنوات

سيرين:ايه ايه مغيرة لون و تسريحة شعري ؛ما ضل حدا ما قلي هالمعلومة فاتت شادية على المطبخ و انا لحقتا ،سحبت الكرسي و قعدت اخد نفسي و هدي اعصابي ،بعد ما شربت فنجان القهوة ،بقيت شادية بالمطبخ و انا تفتلت بكل البيت؛ كان كل شي حلو ..فخم..مرتب...انيق... كل زاوية بالبيت كانت بالنسبة الي متل المتحف ،فتت على غرفة نوما لنرمين و فتحت الخزانات و تفرجت على تيابا ،تياب كتير مكياجات عطورات كتيرة ،كل شي كان بكميات كبيرة و كل شي كان حلو و مميز و جديد علي ،حتى ملمس الفراش ناعم و مريح ،ما فيني انكر انو حياة نرمين بلشت تعجبني ،فتت على الحمام تحممت بالجاكوزي بعد ما لقيت صعوبة بتشغيل المي بخلاطات اول مرة بحياتي بشوفن ، لبست تياب مرتبة ،و وقفت على المرية انا و عم اطلع شو موجود على الطاولة ، فااتت شادية و شافتني ماسكة علبة كريم و عم حط منو على وجهي شادية:هيدا للشعر مدام نرمين ... اطلعت فيا و بعلبة الكريم و ضحكت سيرين:هههههه نفس الشي ، ما بأثر ،انا اليوم تعبانة شوي فتت غسلت وجهي سيرين:الف نوع كريم ،شو عرفني كل واحد لشو بيستخدموه! اتصلت بنرمين سيرين:الوضع عندي تمام ...لا ماشي الحال يعني ،و انت وين صرتي هلأ؟ نرمين:متل ما قلتيلي، ناطرة جمال،بدنا نروح عالمشفى كرمال نحدد عملية يزن سيرين:طيب خبريني شو بصير معك و خليكي هادية نرمين:ايه هادية ،انا بطبيعة الاحوال هادية سيرين:ايه نيالك على برودة اعصابك _____نرمين _____ كان يزن عم يطلع فيني نظرات غريبة بس ما دققت كتير بالموضوع لانو مريض حتى فات جمال على البيت متوتر حتى بدون ما يطلع فيني و يدقق بملامحي و هالشي ريحني اكتر ،اخد يزن و نزلنا على المشفى و هنيك التقينا بالدكتور يلي كتبلنا على شوية تحاليل ما قبل العملية و حددنا موعد العملية و رجعنا على البيت ، كان كل شي غريب علي ،ريحة البيت و حيطانو سقفو و العالم يلي عايشة معن ،انزويت بغرفة النوم حتى سمعت جمال عم ينادي

العضوة: 275918 , منذ 4 سنوات

جمال:سيرين ...سيرين للوهلة الاولى بقيت قاعدة و كانو الصوت ما الي بعدين وقفت بعجلة بعد ما تذكرت اني انا ما بقا نرمين ،انا سيرين من هاللحظة جمال :وين فتي و ما عاد طلعتي ،حطيلي عشا مع انو ما الي نفس اكل فتت اطلعت بالمطبخ؛ما عرفت من وين ابدأ او شو اعمل ،شفت طنجرة على الغاز ،فتحت الغطا و لقيت فيا برغل بعدس ،سخنتا انا و شاردة بحكي سيرين (جمال حنون كتير و مساير و مسالم و هادي تقريبا ، ما رح تواجهي صعوبة بالتعامل معو ابدا بس مشكلتو الوحيدة فقرو و ما بتقبل ابدا انك تعايريه او تحسسيه بهاالشي لانو بحس حالو عاجز و شغلة تانية انو معظم الليالي بقضيا نايم بالبحر ،بحكم شغلو كصياد او فيكي تقولي اجير عند الصيادين ،بزت شباك و برفعو و عايشين من ورا هالشغل ، انا صبرت كتير معو و اضطريت انو اشتغل بالشك و الصوف كرمال ساعدو بالمصروف ...يعني يا دوب مدبرين حالنا ) شميت ريحة شعيط البرغل ،ركضت و طفيت الغاز فورا جمال:وصلت ريحتا لعندي نرمين:سهيت

العضوة: 275918 , منذ 4 سنوات

حطيت سدر المنيوم و فوقو صحن البرغل بعدس و حطيت جنبن صحن و معلقة و زبدية لبن و حطيتن قدامو ،هفت ريحة عرق بشعة منو ،رجعت خطوتين لورا كردة فعل ،انتبه علي جمال: بعرف ،بس اكل بفوت اتحمم ،ما بدك تاكلي معي ؟ نرمين:لا ،اكلة ...و ما الي نفس كمان جمال :طيب نرمين:انا فايتة نام جمال:من هلأ؟ نرمين:ايه ،تصبح ع خير جمال:سيرين ..انا ما نسيان موضوعنا ؛اول ما اطمن على يزن ،بدي اسعى فيه لانو ما معقول نضل هيك نرمين(بعجلة):طيب ما كنت عارفة عن شو عم يحكي جمال بالضبط بس كانت الساعات و الايام ببيت سيرين عم تمر ببطئ ، اجا اليوم المحدد للعملية و رحنا على المشفى و كان موبايلي ما عم يهدى اتصالات من سيرين لتطمن على ابنا و انا اغلب الاحيان اكتفي بالرد عليا بالرسائل ____سيرين____ سيرين:الو ...وينك ..بدك مية ساعة لتردي .. نرمين:ما قدرت رد ،جمال جنبي سيرين:طلع يزن ؟ نرمين:لسا ،اول ما يطلع بحكيكي و بطمنك عليه فورا ،العملية بتاخد وقت كتير سيرين:طيب قلبي متل النار عليه نرمين:اجا فادي؟ سيرين:مين فادي ؟..اه ..فادي ..لا لسا ...يلا مضطرة سكر شكلو اجا باي سكرت الخط بوجهها لنرمين و وقفت على المرية ،القيت نظرة اخيرة على حالي و انا متوترة ،انفتح باب الغرفة فجأة و طلع بوجهي فادي ببنية ضخمة طويل و عريض بشرتو حنطية و عيون بنية حادة (فادي انسان بدو مسايرة لابعد الحدود ،كل شي بقلك عليه هزي راسك بالموافقة ،يعني لو قلك مية البحر حلوة بتقليلو احلى من العسل،و حتى لو حاول يستفزك بشي،خليكي هادية كتير و ما تردي جواب بوجهو ابدا لانو هالشي بعصبو اكتر ،سخي كتير بس بهتك و بمننك كتير بس كل شي بتشتريه لازم يكون مفوتر حتى يتأكد انك ما عم تخبي ليرة من وراه ،لهيك خدي كل شي بيعطيكي اياه بدون جدال او اخد و عطا ...سيرين ديري بالك منيح ما تعصبيه...ما تعصبيه ، الصمت هو سر نجاح زواجي معو ) سيرين:لحمدلله على السلامةحبيبي

العضوة: 275918 , منذ 4 سنوات

الجزء الرابع: لفيتو و بستو من خدو انا و عم ابتسم ،بعدين رجعت لورا انا و عم اتفادى اني اطلع فيه فادي:هيدا اللوك يلي صرعتي راسي فيه ...اشقر ...ما لابقلك ابدا ...طالعة متل مكنسة القش رمى كلامو متل السم و تابع بخطوات لا مبالية لجوا الغرفة و هو عم يشلح جاكيتو و انا بعدني واقفة مصدومة من كلامو ...اسلوبو ..انتقاء مفرداتو ...ردة فعلو ،رجعت استرخيت و درت وجهي سيرين:جوعان؟ فادي:كنت جوعان بس وقت شفتك بهالمنظر ما عاد الي نفس اكل سييرين:اي منظر ؟ فادي:هالشعر و هالقصة سيرين:حلوين فادي:لا سيرين:بس انا شايفتن حلوين فادي:المهم انا كيف بشوفن ،من بكرا بتروحي و بترجعي لون شعرك متل ما كان حتى ما تصيري اضحوكة و مسخرة بالعيلة ..... سيرين:عفوا ..(بعفوية)طبعا لا ... فادي:شو لا ! سيرين:لا ما رح غيرن فادي:اوووووه ،نغمة جديدة ... نزلت راسي بعد ما انتبهت على حالي ،انسحبت من الغرفة فورا على المطبخ ،حسيت بخطواتو وراي فادي:كأنك نحفانة او ما بعرف ...فيكي شي متغير ... سيرين:ايه نحفانة شوي فادي:يلا احسن ،شادية كيفك ؟ شادية:لحمدلله داعيتلك الله يحميك و يرزقك فادي:شادية ...تعي تعي ...امانة ما ارتعبتي اول ما شفتيا لنرمين بهالشكل شادية:لا ،على سلامتا ،متل القمر فادي:طب حطي العشا ،الحق على يلي سألك ،من بكرا بتروحي بترجعيه متل ما كان سيرين:قلتلك ما رح رجعو ،اذا بتريد هيدا شعري و انا حرة فيه،و يلي ما عاجبو ما يطلع .. فادي:ها ،شو صاير معك ،تركتك هادية و رجعت لقيتك جانة كأنك وحدة تانية

العضوة: 275918 , منذ 4 سنوات

سيرين (متلبكة):انا !انا نرمين ..اناما وحدة تانية...مين بدي كون يعني تركتو و فتت على الغرفة ،رجع لحقني فادي:ما الحق عليكي ،الحق على يلي قبل تروحي لعند هاي الكوفيرة،قلتيلي هبة يلي اخدتك لعندا ،هاي رفيقتك هبة بتقطعيلا كرت و ما بقا بدي شوفا ببيتي ،شكلا عم تبلش تلعب براسك و تقويكي ،بدا تخربلك بيتك سيرين: يلا انا رح نام ،تصبح على خير رفعت الحرام و نزلت بالتخت و طمرت راسي و هو بعدو واقف و مستنفر بكل خلية و عصب بجسمو ،كان بدي اهرب من الصدمة و التوتر و الموقف يلي انحطيت فيه و حسيت للحظة اني فشلت كون نرمين فادي:وين تركتيني و نمتي ،انا ببقى واقف عم احكي مع حالي ،زوجك راجع من السفر و انت بتروحي بتنامي رفعت الحرام و جلست قعدتي سيرين:اخي انت ما بصير تحكي هيك مع مرتك ،يعني عاملتلك شكل جديد و قاعد عم تبهدل فيا بدل ما تقلا كلمة حلوة و راجع من سفرك ،لازم تكون مشتقلا ... فادي:نعم !شو هاللهجة يلي عم تحكي فيا !شو اخي و شو مرتك ! رجعت حطيت راسي تحت الحرام فادي:نرمين ..قومي لشوف ...قليلي شو صاير معك ..تركتك منيحة ،رجعت لقيتك متغيرة ،قلبا و قالبا سيرين: انا منيحة منيحة بس تعبانة شوي و بدي نام ..انت بدك تنام هون ؟ فادي:....استغفر الله تركني و راح على المطبخ و انا طمرت راسي و صرت ابكي ،انا ما قادرة كمل بهالتمثيلية ؛عيش مع رجال غريب اكل و اشرب و نام معو بنفس التخت ، حسيت الموضوع كبير اكبر من طاقتي اني اتحملو ،بعتلا رسالة لنرمين سيرين:اجا زوجك هلأ ،انا ما حاسة حالي قادرة كمل ،من بكرا بترجعي لحياتك و انا برجع لحياتي ما ردت علي بأي شي ،زاد توتري اكتر وقت حسيت على خطوات فادي بالغرفة ،حسيت قلبي رح يوقف ،قمت بسرعة و حملت المخدة و

العضوة: 275918 , منذ 4 سنوات

طلعت من الغرفة و رحت على غرفة تانية كانت مخصصة للضيوف على ما يبدو ،زتيت المخدة بعصبية و تسطحت ،سمعت صوت دعسات حدا جاي لغرفتي؛غمضت عيوني و عملت حالي نايمة ،انفتح الباب بعصبية فادي:شو هالتصرف هلأ؟ ...نرمين ما لحقتي تنامي ...قومي سيرين:تعبانة و نعسانة كتير ،اذا بتريد ممكن نأجل الحكي لبكرا فادي:لا ،هلأ بدنا نحكي،قومي فهميني ليش عم تتصرفي هيك سيرين: اذا بتريد ،عم قلك لبكرا بس ،رح رجع لون شعري متل ما بدك و رح ارجع على غرفتي ،بس اعطيني مهلة لبكرا فادي:....طيب سكر الباب بعصبية و راح ،انا رجعت اتصلت بنرمين و فصلت بوجهي و ردت علي برسالة نرمين:هلأ طلع يزن بس بعد ما فاق ،و طمنا الدكتور عنو انو العملية ناجحة انشالله ،سيرين الرسالة يلي بعتيلي اياها من شوي رح اعتبر حالي ما قرأتا يلي ببينا اتفاق مدتو سنة ما ليلة وحدة ،نامي و ريحي اعصابك ، ابنك بخير اول ليلة الي ببيت نرمين بوجود فادي كانت اصعب ليلة ،اقرب للسجن الكبير ،ما بس سجن مكان و سجن افكار ،كان ضميري طول الليل عم يجلدني كيف رضيت و قبلت بهيك وضع،كيف سمحت لحالي اخد حياة حدا تاني و عيش مع رجال ما زوجي ، نمت على وجه الصبح ساعتين و اول ما فقت اتصلت بنرمين نرمين:نحن بعدنا بالمشفى ،يزن صحي من البنج و حكى و وضعو تمام بس ما بقدر خليكي تحكيه لانو جمال جنبو سيرين:شو عرفني انك صادقة ؛بلكي كنت عم تكذبي نرمين:رح خلي الخط مفتوح و رح فوت لجوا لعندو و احكي معو و انت سمعي صوتو وقتا لتتأكدي سيرين:طيب نرمين:يلا ...يزن ...حبيبي كيف صرت ،حاسس بوجع ؟ يزن:شوي ...هون

العضوة: 275918 , منذ 4 سنوات

نرمين:انت بطل و قوي ،يومين و بترجع متل ما كنت و احسن و بدي اشتريلك هدايا كتير و شوكولا و بوظة جماال:نيالك على الدلال ،يا ريتني محلك يا سيدي سكرت الخط نرمين بوجهي بعد ما سمعتني صوت يزن ،ارتحت كتير من جهتو بس كنت قلقانة كتير من يلي ناطرني برا ،قمت على روس اصابيعي و رحت غسلت وجهي ،ما حسيت على اي حركة بالبيت ،توقعت فادي نايم و انا عم اطلع من الممر و كل نظري مركز لجوا غرفة النوم خبطت بجسمو ،نفض بدني و رجعت لورا سيرين:ييييبي يا ساتر فادي:شبك سيرين:ارتعبت ..ما انتبهت عليك فات على الحمام بعجلة فادي:يلا بلشي لبس سيرين:لبس شو ؟ فادي:شو راسك فاتل ...اليوم الجمعة بقيت واقفة و شاردة لاتذكر شو خبرتني نرمين عن يوم الجمعة (كل يوم جمعة بتطلع العيلة كلا على المزرعة ،امو و اخواتو و مرة اخوه لفادي و بقضو النهار ،بيعملو حفلة باربكيو و بيتغدو و بيلعبو طرنيب و شغلات كتير ،ما بعرف اذا بعجبك هيك جو بس احتياطا و تفاديا لاي مشاكل و خاصة مع سلفتي ريما ،خدي زاوية لحالك و ما تختلطي بحدا و خاصة ريما لانو رح تحاول بكل الطرق تستفزك لطلع اسوأ ما عندك.و على فكرة يعني انا هيك طبيعتي بكل الاحوال صامتة و مسالمة.. ) فادي:شو بعدك واقفة بمحلك ،تحركي يلا ؛منشرب القهوة على الطريق سيرين:يلا يلا فتت على غرفة التياب و قعدت على الكرسي انا و مكتئبة ،كانت طاقتي صفر بالمية ،لبست بنطلون جينز و تي شيرت زهري و خفافة بيضا و حطيت كاسكيت بيضا و حملت جزدان ابيض سبور و تمكيجت مكياج ناعم ،دخل فادي على الغرفة بالبرنص هو و عم ينشف شعرو ،درت وجهي عنو فورا فادي:بهالسرعة خلصتي...لك بالعادة بصير تحت بالسيارة و انت بعدك ما عارفة شو تلبسي .. سيرين(بفظاظة): في شغلات كتير رح تشوفا غير عن العادة لهيك ما في داعي تبدي ملاحظاتك على كل تصرف مني ،انا ناطرتك برا لتخلص لبس فادي:اوووه ،ولله طلعت و تركتو قالب شفايفو تعبيرا عن عدم رضاه بحكيي،بعد ساعة مسافة الطريق كنت معظم الوقت ساكتة و شاردة بوضع يزن و بالوضع الجديد المفروض علي بدون اي اكتراث مني لجاريه بأي حديث عم يحكيه ،صف السيارة قدام بيت من طابقين و حوليه شجر و مسبح ،نزل من السيارة و هو عم يأشر بايدو لمجموعة رجال كانو قاعدين على طاولة بحديقة البيت

العضوة: 275918 , منذ 4 سنوات

فادي:شو ما بدك تنزلي ! سيرين:يلا ...ها فتحت الباب و نزلت سيرين:استعنا عالشقى مشي قدامي و انا لحقتو بخطوات مملة و تقيلة ، اول ما شافني الكل ،حسيت بنظراتن متفاجأة ،كأنو عرفو انو انا ما نرمين ،توترت اكتر حتى حكت سهى سهى:لابقلك الاشقر ابتسمت ابتسامة ناعمة ، قرب فادي و باس ايد امو و راسا ام فادي:الله يرضى عليك تابع ليسلم على اخواتو الشباب ؛قربت و سلمت على امو و بست ايدا وسط ذهول الموجودين و كأنو عملت حركة غلط ام فادي:الله يرضى عليكي تابعت سلامي للكل بحرارة ،شعرت اني بالغت فيا بس كنت حابة غطي على توتري يلي بزيد كلما بقطع بمرحلة جديدة بحياة نيرمين ،اطلع فيني فادي و رفع شفايفو و هز براسو ،اخدت مكاني جنب اختو سهى ،بعد دقايق قصيرة قربت لعندي و حكت بنبرة اقرب للهمس سهى:رحتي عند الدكتور يلي قلتلك عليه ؟ سيرين:دكتور شو ؟ ...اه ...رحت .. سهى:شو قلك؟ سيرين:متل االباقي سهى:امممم ،ما تفقدي الامل سيرين:امممم قاطعت حديثنا ريما بصوت عالي ملفت للسمع ريما:مرة عمي اسمعتي مين حامل هلأ؟ ام فادي:مين؟

العضوة: 275918 , منذ 4 سنوات

ريما:مرة باسم يلي حضرنا عرسا من شي شهرين ام فادي:الله يتمملا على خير اطلعت فيني ريما بنظرة خبيثة ريما:عقبال فادي ام فادي:امين يا رب ريما:شو صار معك نرمين ؟ ما استجد شي بوضعك !كل يلي تزوجو قبلكن و بعدكن صارو اولادن عم يركضو و يحكو و انتو لسا... اطلع فادي فيني و كأنو هو كمان ناطر تبرير مني بعد حكي ريما المحرج ،بلعت ريقي و ركزت قعدتي ،ما حسيت حالي انو الكلام موجه الي لشخصي او لامس شي عندي او زعجني ؛حسيتو موجه لنرمين و حبيت رد عنا سيرين: بعتقد هيك موضوع خاص فيني انا و زوجي لنتناقش فيه تجاهلت ابتسامتو لفادي يلي كان فيها نوع من الدهشة والاعجاب و هاالشي شجعني اكتر

العضوة: 275918 , منذ 4 سنوات

ريما:ايه شو حكينا ،عم نطمن بس سيرين: الله يطمنك ،يا ريت تركزي بعيلتك و باولادك ،ما هداك ابنك يلي واقف على طرف بركة المي و رح يوقع فيا ؟ التفتت بسرعة لورا ريما:اكرم !ماما ارجع لورا .... قامت ركض لعندو ،اطلعت فيني سهى و ضحكت سهى: ما قصرتي فيا ! بعد ساعة بلشت اخد عالجو اكتر ،احكي و ساير بالمواضيع العامة و اتجنب الاحاديث الخاصة و خاصة لما بكون الحديث عن مناسبة اجتماعية صايرة بالعيلة او عن اقارب لللعيلة انا ما بعرفن ، بس الشي يلي لفتلي نظري هي ريما و تصرفاتا الغير طبيعية مع فادي ،مسكت المضارب و راحت وقفت جنب زوجا هاشم ريما(بدلع):يلا بقا اتركو الشدة و قومو نلعب لعبة جماعية ،شو فادي شو رأيك نلعب مضارب فريق رجال و فريق نساء فادي:ما عندي مانع قمت وقف باستعداد لانضم للعبة ،اطلعت ريما فيني باستغراب ريما:انت بدك تلعبي معنا ؟ سيرين:ايه طبعا اطلع فيني فادي و ضحك فادي:هلأ بتخربيلنا اللعبة كلها صارت ريما تضحك بخبث ريما:يلا حبيبي قوم ...يلا فادي ..يلا سحر قولي لزوجك يقوم كمان قامو كلن هن و عم يضحكو و يتسايرو و تجاهلوني ،ما كان الي مزاج باللعب بس كان عندي رغبة كبيرة لجاكر ريما و حطا عند حدا ،مشيت جنب سهى ،التفتت ريما لورا و شافتني ماشية وراهن ريما:انت خليكي الحكم سيرين:انا لعيبة ريما:ها قربت ريما اعطت المضرب التاني لفادي و هي عم تضحك بمياعة و بدون اي سبب ريما:يلا رح نبلش انا و فادي اول ،بلشو عدو كام مرة رح توقع الريشة عندو ،رح اغلبك فادي:عم تحلمي وقفت جنب سهى اتفرج علين و هن عم يلعبو مع بعض و هي عم تنط و تضحك سيرين:يحمك ما اغلظك سهى:شو حكيتي؟ سيرين:ولاشي ،كنت عم قول ريما رح تخسرنا سهى:هيك شكلها ،بتضحك اكتر ما بتلعب سيرين:يلا يلا دوري ،اجا دوري ،هاتي عنك

العضوة: 275918 , منذ 4 سنوات

ريما:لسا ما خلص دوري سيرين:ايه رح تخسرينا ،صارت واقعة الريشة عندك فوق العشر مرات ريما:على اساس انت يلي بدك تربحينا سحبت المضرب منا غصب عنا و كان من المفروض العب مع فادي بس اعطى المضرب لاخوه هاشم هو و عم يبتسم ابتسامة صفراوية،تجاهلت حركتو المتقصدة و لعبت انا و هاشم ،كنت رشيقة و جدية كتير باللعب ،ما بعرف شو الفكرة يلي اخدها الكل عن نرمين بس قدرت استنتج انو الكل بيعتبر نرمين ضعيفة و مستسلمة و ما عندا ثقة بنفسا و كنت حابة غير نظرة الكل ،بعد.دقايق قصيرة و اللعبة لصالحي ، صار هاشم يلهت هاشم:تعبت ...ما بقا قادر اخد نفسي اطلعت بسهى ،كانت عم تضحك على منظر هاشم بس شفت ريما متكتفة و عم تهز برجلا سهى:ولله كبرت و ختيرت يا هاشم سيرين:ههههههه شو النتيجة لهلأ؟ سهى:صارت لصالحنا ،برافو نيرمين ،ما كنت بعرفك شاطرة هالقد قرب زوج سهى لياخد المضرب من هاشم بس سبقو فادي و اخدو منو فادي:بس لخسر مرتي و بعطيك اياه سيرين:واثق من حالك فادي بيك فادي: ثقتي بمحلا ،خدي احمر وجهو لفادي هو و عم يلعب معي لانو كنت عم اتصدى لكل ضربة منو ،كنت عم العب بهمة و سهى واقفة عم تشجعني حتى قطعت هالمشهد ريما ،غميت بالارض هي و عيونا نص مفتحين ،الكل ركض عليا هاشم:شو صرلك ؟ ريما:ما بعرف دخت فجأة الكل صرف نظرو عن اللعبة و بلشو يهتمو بريما و تمثيلية اغمائها المفاجئ و المقصود فادي:بلكي حامل اطلع فيني فادي و ناطر ليشوف ردة فعلي على وجهي من كلامو ،انا بقيت ساكتة بدون ما علق ابدا على كلامو ،حتى رن موبايلو و انسحب بعيد عننا بس انا بقيت عم راقبو ، كان عم يحكي عالموبايل بعصبية و كأنو طرأ شي جديد بشغلو ،بعد دقايق قصيرة رجع فادي:ايه كيف صرتي ريما؟ ريما:لحمدلله احسن بشوي ،شكرا لاهتمامك سيرين: مرة عمي عم تنادينا كرمال نبلش بالغدا بعد ما خلصو الرجال شوي ؛اجتمعنا على طاولة وحدة لنتغدى ،اختارت ريما كرسيها جنب فادي بالتحديد ، و طول فترة الغدى كانت عم تحكي معو بصوت واطي لدرجة انا ما قدرت اسمع شي مع اني كنت قاعدة جنبو على الميلة التانية ،بعد هالموقف انتبهت عليا لريما وقت تكون قاعدة معنا عم تطلع فيه بس هو ما عاطيا اي انتباه ،حتى انتهزت الوقت المناسب و قمت تمشيت بين الشجر و اتصلت بنرمين لاطمن عن وضع يزن نرمين:تمام ما تاكلي همو ،نحن بعدنا بالمشفى و رح نبقى كام يوم ،كيف الوضع عندك ؟انت بالمزرعة؟

العضوة: 434126 , منذ 4 سنوات

كملي حلوه القصه

العضوة: 275918 , منذ 4 سنوات

سيرين:ايه بس بدي قلك عن شي ما بعرف اذا منتبهة ؟ نرمين:احكي سيرين:كانو ريما و فادي.... نرمين:ايه بعرف سيرين:بتعرفي؟شو بتعرفي؟في شي بيناتن يعني؟ نرمين:لا ،بس ريما عم تحاول تلفت نظرو بس ما في شي من جهتو لفادي و حتى لو فيه ،ما بتفرق معي؛انا ما بحبو لفادي؛ما في اي مشاعر اتجاهو ، لو بحبو ما كنت قبلت انك ....فهمتي علي ؟ سيرين:اممم فهمت بس انا يعني ...بحبو لجمال و ما تفكري اذا قبلت انك تكوني ببيت واحد انت و اياه يعني خلص.... نرمين:لا ..اطمني من هالناحية ...جمال متل اخي ،صار شي بيناتكن انت و فادي؟ سيرين:لا لا ابدا نرمين:ليش لهلأ؟استعجلي بالموضوع سيرين:...اممم..طيب...انا رح سكر هلأ حتى ما حدا يحس على غيابي فادي:مع مين عم تحكي! التفتت لورا بتوتر ،وقع الموبايل من ايدي ،قرفص و مسك الموبايل بايدو و اطلع على الشاشة فادي:هاي هبة ما بتتركك حتى بالمشاوير ! سيرين(ابتسامة مصطنعة):.. ايه ...شايف اديش بتحبني هالبنت فادي:شايف ... لف خصلة من شعري على اصبعتو فادي : و شايف شغلات كتير كمان سيرين:شغلات متل شو ؟ فادي: ما بعرف ..وقت جينا بستي ايد امي مع انو بتعرفي نحن ما عنا هيك عادة و هلأ غلبتيني باللعبة نزل اصبعتو على وجهي و بعدين على رقبتي ،مسكني من ايدي بقوة و غمزني فادي:بقا شو عم بصير معك يا مرتي ؟ سافرت و رجعت لقيت مرة كلها نشاط و لسانها ما بفوت حلقا او ليكون ساكنك شي جني ...اخرج ايها اللعين ... سيرين(ضحكة مصطنعة):هههههه شلت ايدو سيرين: شو هالحكي! فادي:على كل حال هالشي ما بيلغي انو بدك ترجعي لون شعرك متل ما كان سيرين:شعري تعب من تغيير اللون؛ما بقدر ارجع غيرو فورا ،على الاقل ليرتاح شهرين ،برجعو متل ما بدك فادي:كنت جايبلك هدايا كتير معي ،بس انت روحتي بهجتن بتصرفك الغريب مبارح سيرين:بس نرجع بشوفن فادي: ايه بتقيسين سيرين:يلا خلينا نرجع لعندن سبقتو بخطوات سريعة لانهي الحديث معو و انضميت لجلسة النسوان ، خلص نهار الجمعة يلي كان من اولو لاخرو اعصابي متوترة خوفا من اني ازلق بشي كلمة او تصرف غلط يكشفني ،وصلنا على البيت و كانت الكارثة فادي:شو رايك ؟ فستان قصير و ديق كتير دانتيل بدون اي بطانة ،رفع الفستان بايدو بالعالي و انا تلبكت سيرين:..حلو …حلو زتو باتجاهي و بفظاظة فادي:لبسيه يلا مسكتو و حطيتو على التخت