من قبل شوي كنا قاعدين أنا وجوزي عالبرندة محلانا وبنشوف الرايح والجاي و نشرب شاي وبنقصقص بزر ، وآخر صبابة 😊 فجأة فتحت جوالي لقيت مسج من اختي صفاء المغتربة (( نيالا 😆)) بتقلي بالله ياوفاء دقي لأختك هناء عالأرضي تفتح نت وهيك ؟! المهم رحت غبت شوي وأجيت لعندو قلي : خلصتي حكي مع اخواتك وبعدها ضحك ضحكة نسة صفراوية شريرة وقلي والله يا مرتي متزوجين من بداية 2020 من لما اجتمعت فيكي يا وفاء وبأخواتك صفاء وهناء ما شفت غير الوباء والبلاء والغلاء 😂😂 و قلب ع ضهرو وصار يضحك ويقول آاااااخ يا خواصري يا آااخ بطني متتتتتت انتي وعيلتك عالقافية عالوزن 😂😂😂😂 عملت هالحركة😒 وقلتلو : ريتا ضحكة حية بالصحراء الشرقية 😒 عالقافية قلتلي ؟! ح فرجيك ملكة القوافي هلق 🙃 _أصلا بتعرف يا عمار ؟؟! من وقت تزوجتك ارتفعت الأسعار وصار ينط الدولار 😏 _وبعد شوفة حماتي فريدة صفينا عالحديدة 😏 _ولا أبوك أبو ضياء انعدمت الكهرباء و ستك هنية يلي على وجها النحس حطوا البطاقة الذكية _أمّا أخوك فواز على شوفته ماعاد مشي دورنا بجرة الغاز اختك يلي قد الدلفين من وراها وصل كيلو السكر للألفين _وخالك أبو نمر ما شفت على خلقته غير كورونا و الحجر _وصهرك أبو رؤوف يلي من وقت عرفته لبست كمامة وكفوف _ ولا احكي عن عمك عجاج وإرتفاع المكياج _وعمتك لطيفة يلي من وراها نزلت المونة من عالسقيفة _ولا خالتك عفاف يلي ارتفع السعر ع وجها الزفت ٣ اضعاف😏 وهاد لسا ما حكيت على بنات اختك رهام وسميرة وسعاد ورهف وابن خالتك قنوع يلي على بعد معرفتهم الدهب طالع بطلوع 😒 بكفي يا أبو قافية ولا شووو ؟! فجأة كب كمشة البزر من أيدو وتفتف من تمو البزرات المعلقات من اول ما بلشت ردح وحرك حجر عينه يلي كان ثابت لا يتزحزح من مكانه وهجم عليي سكرلي تمي قلي وك اسكتي اسكتي الله يخربيتك ما عاد سكتي متل البلوعة على بق بق بق بق وحمل حاله ورااح 🙂 معقول يكون زعل ؟! ؟!!! هلق بالله بالله عليكم كلامي بزعل شي ؟! #بقلمي_الردّيح #أم_اللول #تابعوني_بصفحتي سردات أم اللول #سردة_بلافائدة_ومكيودة #ولكن_تعلمك_اصول_الردح_سيدتي #بس_يجيب_سيرة_اهلك_انكتيله_السلالة_كلها_سيدتي #ولاتخشي_شيئ