حبيباتي بتكلم عن موضوع يصير عندنا بأغلب المستشفيات ! سواء كانت اللي بتولد بكريه او لا !!! وهو قص العجان بدون مبرر طبي !! (يعني التوسعه اللي بعدها يخيطونها لك) اكيد كثير منكم جربها وشاف وش كثر الالم وقت النفاس!! ولو ما سويتوها بتلاحظون مافيه اي الم وعلى طول ثاني يوم تقومون وتقعدون براحه !!! امهاتنا قبل ما كانو يسوون هالشي والحمد لله مافيهم الا العافيه !! ما اشتكو من توسع ولا شي بالعكس التوسع يصير بعد شق العجان !! لأنه يضعف عضلات المهبل وبالتالي تترهل !! نجي الحين للمبررات الطبيه اللي المفروض يسوون لهم شق عجان ! ١ كبر وزن الجنين جداً << وهذا نادر ٢ انخفاظ الاوكسجين او نبضات القلب عند الام او الجنين ٣ الاضطرار لإستخدام ملقط او شفاط اثناء الولاده ،. تدرون ان قص العجان بدون مبرر طبي جريمه يعاقب عليها القانون بالدول اللي برى ؟ وعندنا يستخدمونها بدون الحاجه لها وفوق ذا يقصون المنطقه بشكل خاطيء للأسف !! واضرارها كثيييير كثييير غير الالم الجسدي والنفسي تضعف عضلات المهبل ويتوسع وبعض الحالات يصير عندهم تبول لا ارادي !! وحرقه وحكه وعدم التئام الجرح والخياطه واشياء كثير حنا في غنا عنها !! بعض الاطباء صاروا يستغلون جهلنا بهالموضوع ويسوون قص على طول اريح لهم !! وعلى فكره عادي البكريه تولد بدون قص عجان وعادي اللي قد ولدت قبل وعادي اللي قد سوت قص عجان في ولادات سابقه ! كلهم بإمكانهم الولاده الطبيعيه بدون قص!! واللي تقول الولاده بدون قص توسع غلطااانه !! بالعكس الولاده اللي بقص وخياطه هي اللي توسع !! بالعكس الطبيعيه ماكنك ولدتي ابداً لان العضله سليمه وترجع تلتئم !! ولأن وقتها الدكتور يسوي لك مسانده اذا طلبتي هالشي !! يحفز خروج راس الجنين بيده ويسوي كمادات دافيه للمنطقه عشان ماتتمزق ! وحتى لو تمزقت تمزقها بسيييط وسطحي وغالبا ماتحتاج خياطه لان جرحها مو عميق زي شق العجان !! غالباً تلتئم من نفسها ولو احتاجت خياطه بتحتاج غرزه غرزتين لا اكثر يعني مو خياطه خياطه!! واغلب الحالات مايصير لهم تمزق اصلا يعني ٨٠٪‏ بدون تمزق ولو صار تمزق ارحم بكثيير من شق العجان ! واكيد لو لكم قريبه ولدت برى اكيد قالت لكم ولدت بدون توسعه ولا شق ولا خياطه ! لأن الاطباء هناك يفكرون بصحة المريضه اكثر من راحتهم !! عندنا العكس الا من رحم ربي ، وتقدرون ترفضون هالشي بالمستشفى ومحد يقدر يجبركم عليه الا بمبرر طبي !! حبيت افيدكم زي ما استفدت ودعواتكم ربي يتمم حملي ويرزقني شوفة ضناي تام الخلقه وحسن المضهر بدون زياده ولا نقصان 💕