العضوة: 378864 , 6 years ago

سحر:يا سلام ____سلوى_____ فتت على المطبخ انا و عم اطبخ و فكر؛لايمت بدو يضل ناطرني مراد و انا حاسة حالي اني ما بحبو و عم اتحجج باخواتي ،خايفة كون عم اظلمو عم اظلم حالي ،شو يلي مخليني مترددة لهلأ و ما قادرة اخد قرار ،اجت سحر من جوا و جابتلي موبايلي ،كان مراد المتصل مراد:ايه و شو طابخة؟ سلوى:ملوخية مراد: ولله ما في داعي تغلبي حالك بس خلص ما رح خجلك خلص جاي سلوى:انت عم تحكي معي؟ مراد:ايه ،ما عزمتيني على الغدا و انا قبلت سلوى:مين عزمك؟ مراد:يلا جاي ما رح طول مسافة الطريق ،حمضيا ايه حطيت الموبايل على الرف انا و عم اضحك سلوى:مجنون هالزلمة بعد ربع ساعة اندق الباب ،فتحتلو الباب و فات هو و عم يسحب نفس مراد:الله على هاالريحة ،لو حماتي بعدا عايشة كنت قلت اكيد بتحبني فات غسل ايديه و انا فتت حطيت الاكل و نحن عم نتغدا سألني شو صار بوظيفة سحر سلوى:قالتلي مشي الحال مراد:ايه منيح ،هاالشاب كتير مذوق ،تعرفت عليه بالصدفة و ما الو شي راجع من السفر سلوى:اممممم قلتلي سحر ____سحر_____ بلشت داوم بالشغل الجديد و ما كنت شوف وائل الا بالنوادر،يطل كل فترة على الشركة و يتفقد الشغل ،يقعد مع ايمان ساعة بالمكتب ليطمن منا الشغل كيف ماشي و بعدين يطلع بسيارتو و يروح و انا حاطة عيوني باللابتوب كانو ما مر جنبي و لا كانو عرفتو بيوم و انا كنت مرتاحة كتير على هالوضع ،بس بعد فترة صف سيارتو قبال الشركة و نزل و معو شاب تاني ،كان مراد؛فاتو الاتنين انا و عم اطلع على مراد و احكي مع حالي هيدا شو جابو لهون ،قرب مراد و سلم علي مراد:اهلين ببنت العم،كيف شايفة الشغل؟ سحر:لحمدلله

العضوة: 378864 , 6 years ago

سحر:لحمدلله وائل:مدللينا اخر دلال انت ما تاكل هم مراد:ما في شك ،اذا في شي ما عاجبك احكي فورا الشركة كلها على حسابنا هههههه وائل:على حسابكن اي ولله سحر:بس شو جابك لعنا؟. مراد:ولله التقيت بوائل عند خالو و الا بدو يجيبني لهون و يشربني فنجان قهوة ،يعني جاين نباركلو وائل:لحقينا سحر نشرب قهوة سحر:انا عندي.. وائل:ناطرينك ..يلا مراد طلعو لفوق و انا عديت للمية و بعدين لحقتن ،دقيت الباب دقتين و فتت شفت مراد و وائل قاعدين على الكنباية قبال بعض و عم يتسايرو وائل:يلا شربينا القهوة من تحت ايديك؛القهوة و الفناجين جوا فتت على المطبخ الصغير التابع للمكتب و انا عم اعمل قهوة ،لحقني وائل ،كان المطبخ صغير و يا دوب بيسع شخص واحد ،اول ما خطى خطوة جوا المطبخ ،انا رجعت و لزقت بالحيط؛انتبه علي اني اتلبكت منو وائل:بس كنت بدي اسالك اذا لقيتي القهوة؟ سحر:لقيتا ..ليكا بايدي اطلع فيني و ابتسم وائل:طيب ،عملين كلن سادة اذا بعدك بتشربيا سادة طلع و انا لحقتو بعد شوي انا و حاملة صنية،صيفتن و قعدت جنب مراد ،اطلع فيني وائل وائل:انا صح عرفتو لمراد من مدة قصيرة بس يلي بشوفنا اديش صحبة و اخدين وجه على بعض بفكرنا النا سنين منعرف بعض مراد:بس ت انا شفتك عند خالك قبل ما تسافر كذا مرة بس ما هضمتك يا زلمة ،كنت حسك ازعر و صايع وائل:ولله و انا كنت هيك ههههه بس منقول انشالله عقلنا هلأ مراد: اييه الدنيا بتتغير و النفوس بتتغير وائل:ايه ايمت بدنا نفرح فيك،هلا مو انت الكبير باخواتك مراد:ايه وائل:لكن ليش عبودة اخوك متزوج و عندو ولد و انت هيك قاعد عانس بوجه اهلك مراد:هههههه ولله ما حدا دق بابي يا صاحبي لهلأ وائل:هههههه لا بربك ليش؟ مراد:لانو ناطر و ناطر و لنشوف اخرة هالنطرة اطلغ فيني مراد و ابتسم ،نقل نظرو وائل بيني و بين مراد ،فكرو انو قاصد علي ،جلس قعدتو و بعد تردد حكى وائل: ليش منطرتيه هالقد يا سحر؟ سحر:انا ؟ مراد:ما سحر ،اختا وائل:ايوا ،الله يفرحنا فيك و فيا عن قريب و بدي احضر عرسكن ها ،الاسبوع الجاي عرس اختي بيان و اعملو حسابكن معزومين انتو ،ووهالحكي الك كمان سحر و لاختك

العضوة: 378864 , 6 years ago

ووهالحكي الك كمان سحر و لاختك سحر:انشالله ،يلا انا رح انزل كمل شغلي بقيت طول النهار عم فكر بيلي صار،ما صدقت ايمت رجعت على البيت حتى احكيلا لسلوى يلي كانت متفاجئة من صحبة مراد و وائل ،بعد.اسبوع اعطاني وائل كرت الدعوة لعرس اختو بيان وائل:مراد جاي هو و امو و اختو بتجو معن ايه سحر:انشالله وائل:على الاكيد ناطركن كنت مترددة كتير انو روح بس مراد كان حاسم الموضوع انو رح نروح كلنا سوا ،وصل امو و اختو و بعدين رجع اخدنا انا و سحر و سندس ،و قعدنا كلنا على طاولة وحدة ،كان العرس فخم كتير طاولات بمفارش بيضا و ورود نازلة من للسقف ،كنا قاعدين انا و اخواتي و مبهورين بالديكور حتى اجا وائل سلم علينا ،ما كان فيني اتجاهل كمية الوسامة و الاناقة يلي كان فيا هديك الليلة ،وقف مع مراد شوي و اهل فينا و راح ،نحن و قاعدين على الطاولة و امو لمراد كانت قاعدة عم تلطش بالحكي لاختي سلوى ام مراد:يا حسرتي عليك يا مراد يلي قبلك و يلي بعدك تزوجو و صار عندن اولاد و انت بعدك ناطر اطلع مراد بسلوى هو و بالع ضحكتو و غمزا حتى ما ادقق على حكي امو و تزعل ،و سندس و روئ حاطين راسن ببعض و عم يحكو عن العرس و المعازيم حتى قربت سندس علينا سندس:سلوى،ما هداك اياد يلي كنت تشتغلي عندو؟ سلوى:اياد! حسيت بدقات قلبا لسلوى وصلو لعندي بس سمعت باسم اياد حتى ملامح وجها تكركبت و هي عم تطلع بين وجوه المعازيم لدور عليه حتى شفناه ،كان عم يطلع على طاو لتنا و بالتحديد على سلوى ،ما بعرف شو صار مع سلوى حتى ما قدرت اضل قاعدة على الطاولة و استأذنت و راحت على الحمامات ،توقعت انو راحت تبكي و خاصة انو شافت مرتو لاياد قاعدة جنبو ______سلوى_____

العضوة: 378864 , 6 years ago

______سلوى_____ بتمر سنين و بتفكر حالك نسيت اول حب بحياتك ،اول شعور حلو حسيتو اتجاه اول شخص فتحتلو قلبك و بس تشوفو بالصدفة،بتحس حالك كانو بعدك علقان بالمكان يلي تركك وحيد فيه ، بتحس المشاعر هي نفسا ما تغيرت و بعدا موجودة بس كانت مكبوتة و فجاة بتنفجر بقوة متل البركان و بتصير عيونك تلمع و وجهك يحمر و كل شعرة بجسمك ترجف من الفوضى و الدمار يلي صار بقلبك ….ما قدرت اتحمل ابقى قاعدة بمحلي و خفت ملامح وجهي تفضحني و الكل يعرف شوعم يصير جواتي،قمت على الحمام و انزويت بالزاوية ابكي ،ما كنت عم ابكي ليش شفتو قاعد جنب مرتو و مكمل حياتو بالوقت يلي انا فيه عاجزة عن اني اخد قرار و امشي لقدام و حط ايدي بايد الشخص يلي حبني عن جد و ناطرني ، كنت عم ابكي لاني لسا عندي مشاعر اتجاه هالشخص بعد الصفعة يلي تلقيتا منو ، عم ابكي لاني حسيت حالي فقدت القدرة على اني حب من جديد ،بعد ما قدرت سيطر على حالي و ارجع ادفن وجعي ،طلعت من الحمام و غسلت وجهي ،و ضربت عيني عليه بالمراية واقف وراي ،رجعت غسلت وجهي مرة تانية كانو ما مو موجود و كأنو ما بحياتي عرفتو لهل الشخص ،نشفت وجهي و زبطت مكياجي و سرحت شعري و هو بعدو واقف وراي و عم يتفرج علي ،يمكن كان عم يشوف بقايا انسانة عم تحاول تجمع حالا لتبين قدامو انو قوية و ما فرق معا شي بس هي كانت ضعيفة كتير اضعف من انو تحط عينا بعينو و تقلو انت كنت جبان . اياد:اشتقتلك

العضوة: 378864 , 6 years ago

اياد:اشتقتلك سلوى:توقعتك بس تشوفني تتخبى تحت الطاولة حتى ما شوفك اياد:يمكن معك حق بس انا حبيتك من قلبي و كنت باقي على كلمتي و عم حاول بكل جهدي انو فشكل خطبتي بس ابن عمك تهجم علي و ضربني بالشارع و هددني بالقتل لابعد عنك و انا فضلت اني ابعد عن المشاكل كرمالك و كرمالي ،الظروف كانت اقوى مننا قرب لعندي و وقف وراي هو و عم يطلع فيني بالمرية ،ضبيت المكياج بالشنتا و سرحت شعري بايدي و درت وجهي و اطلعت فيه سلوى:هيدا ما عذر ،كان على الاقل خبرتني و شرحتلي الموقف و ما رحت اختفيت فجاة بدون اي تبرير و تركتني اتخبط بحالي و اسال عليك و انت تتجاهلني ،انت جبان يا اياد ما بس كنت جبان قدام ابن عمي و جبان مع حالك و لو بدك تفسخ خطبتك كنت فسختا بدقيقة ،بس انا نطرتك و اعطيتك وقت طويل و بالاخير جرحتني جرح كبير بس انا قوية ،ما وقفت حياتي عليك و انت كنت بحياتي متل الغيمة السودا يلي مخبية وراها شمس دافية و الشاب يلي برا هو يلي بيحبني عن جد ما انت ،فرصة تعيسة انو شفتك بحياتي اياد:سلوى.. سلوى:بعد اذا بتريد من طريقي اياد:سلوى..

العضوة: 378864 , 6 years ago

اياد:سلوى.. تركتو و مشيت و رجعت على الطاولة ،اطلع فيني مراد و ابتسم و اول ماقعدت على الكرسي،لمح اياد جاي ورايي و رجع قعد على طاولتو قبالنا ،اطلع فيني مراد نظرة قهر ،حسيتو فهم الموقف غلط ،طلب مني غير محلي و اعطي ضهري لطاولة اياد و عيلتو و بقي طول العرس مزاجو معكر و عابس ،حتى خلص العرس و راح وصل اهلو و نطرناه ليرجع ياخدنا بس اجا وائل وائل:يلا انا بوصلكن سلوى:لا هلأ بيجي مراد وائل:هلأ بحكيه و بقلو انو وصلتكن حتى ما يرجع مشوار تاني لهون طلعت نحن التلاتة من ورا و قبل ما يشغل السيارة وائل:سحر تعي قعدي من قدام ،حاسس حالي مدري كيف نزلت سحر و قعدت من قدام و وصلنا على باب بيتنا هو و عم يسايرنا و يسألنا اذا انبسطنا بالعرس ،بعد ما فتنا على البيت و عم غير تيابي ،رن جرس بيتنا،كانت الساعة 1 بالليل،رحت فتحت الباب و طلع مراد بوجهي ،كان وجهو ما بيتفسر و عيونو حمر سلوى:تفضل مع انو الوقت متأخر فات قعد ؛اخد وقت قبل ما يحكي اي كلمة وكانو كان يصيغو مراد:انت بدك اياني الا لا ،بتحبيني الا لا؟ سلوى:مراد.. مراد:بدي اعرف هلأ هلأ قولي يا ايه يا لا ،اذا قلتي لا رح اطلع من هون و ما بقا رح ارجع فرجيكي وجهي بحياتي و اذا ايه خلينا ننزل نكتب كتابنا بكرا و نتزوج و خلص سلوى:انت ليش متهجم على اياد و ضاربو .. مراد:اي طبعا رح اعمل هيك و مستعد اعمل اكتر لسا ،لانو عم يتسلى عليكي ،خاطب بنت خالتو و عم يجهز لعرسو و عم يطلع و يفوت معك على اي اساس و انت متل الغبية ناطرتيه سلوى:على اساس كان بدو وقت ليفسخ خطبتو و .. مراد:صدقتيه!صدقتيه من كل عقلك ،لو بدو يتركا ما كان نزل كتب كتابو عليا بالمحكمة و حجز الصالة يلي بدو يتزوج فيا و هو عم يطلع معك ،قليلي بقا كيف بدو يفسخ خطبتو ،اياد واحد ندل و ….بدو يتزوج خطيبتو و بدو يتسلى معك و انا شو ،بدك اياني ابقى واقف عم اتفرج عليه ،انت عرضي و لازم حافظ عليكي من هيك اشكال استغلالية سلوى:امممم مراد:بدي جواب منك هلأ .. سلوى:……

العضوة: 378864 , 6 years ago

سلوى:…… مراد:شو؟الموضوع بدو صفنة و تفكير لسا ،كل هالسنين يلي مرو ما حسيتي شي اتجاهي،ما حبيتيني و بس شفتيه لهداك بثانية تخربطي … سلوى:لا … مراد:ما تقولي لا ،انا حسيت انا ما غبي انا بس مشكلتي اني حبيتك و حبيت بصدق ،هلأ سلوى بدنا نحط النقط على الحروف و بدي اعرف شو نهاية هالقصة… سلوى:انت بتعرف انا كرمال… مراد:ما بقا بدي اسمع حجج منك ،بدي رد ايه او لا و هلأ ،انا تعبت و بدي ارتاح ،ريحيني بقا سلوى:…… مراد:ما عندك شي تقوليه قام و قلب التلفزيون على الارض و صار يكسر و يقلب الغرفة و انا قاعدة ساكتة و عم اطلع فيه،طلعو سندس و سحر وقفو على الباب يتفرجو عليه هو و عم يكسر و يصرخ مراد؛خليكي ساكتة …ما تحكي …ما تقولي لا ايه و لا لا و انا خليني انطر بسماكي سنة و ااتنين و تلاتة و انت خليكي ساكتة ،انا عم احترق من جوا و عم قول يلا اصبر عليا يا زلمة اصبر هالاسبوع و هالشهر و هالسنة و انت يمكن اصلا ما عم تفكر بالموضوع كلو ،بعدك عايشة على اطلال واحد تركك و ما تزوجك لانك ما من مستواه لانو بيخجل فيكي و اتركي الانسان يلي بدو اياكي و بحبك عم ينطر و يتعذب ،انا لستين عمري انا ،مين انا اصلا بحياتك مين …ها…ولا حدا سحر:مراد طول بال.. مراد:ما بقا حدا يقلي طول بالك وقف و هو عم يلقط نفسو مراد:خلص متل ما بدك ،انا ما بقا ضيع ولا ثانية معك من يوم و رايح طلع من بيتنا هو و عم يرجف ،فاتو سحر و سندس و هن عم يدعسو فوق الخراب يلي عملو مراد سحر:انت غبية و ما بتنطاقي و انا لو بمحلو من تاني يوم لروح اخطب و اتزوج قمت وقفت و فتت على غرفتي ،حطيت راسي على المخدة انا و مخنوقة من جوا ،ما كان حدا عم يفهم علي حتى انا ما كنت عم افهم على حالي و اعرف شو بدي؛ما عاد رجعت شفت وجهو لمراد ،حسيت حالي خسرتو و انا بدي اياه بس خايفة ،اتصلت فيه ما رد علي ابدا ،بالاخير لبست و رحت لعندو على المحل،كان واقف مع زبون عم يحكي ،نطرتو لخلص و طلع من عندو الزبون و رجع قعد على كرسي ورا المكتب و بلش بحسابات،فتت لعندو ز سلمت عليه ،اطلع فيني نظرة سريعة ورجع تابع شغلو و لا كانو موجودة قبالو سلوى:هلأ هيك بتستقبلني؟

العضوة: 378864 , 6 years ago

سلوى:هلأ هيك بتستقبلني؟ مراد:شو بدك ؟عندي شغل كتير و ما فاضي للاخد و العطى سلوى:اوووف هالحكي الي مراد:الك و لغيرك و لاي حدا سلوى:اممم يعني ما بتشربني قهوة ؟ مراد:قلتلك مافاضي سلوى:مراد بعرف انك زعلان مني.. مراد:انا ما زعلان …يا ريت لو انا زعلان .،كنت رضيت بسرعة …..بس انا مجروح ..مجروووح كتير سلوى:طيب انا بعتذر مراد:ما تعتذري ،انا يلي لازم اعتذر من حالي لاني ظلمتا كتيرر و عذبتا كتير سلوى:مراد الله يخليك ،انا جيت اليوم ما بس لاعتذر منك ،جيت لقلك انا جاهزة لنتزوج مراد:بس انا ما جاهز سلوى:بنطرك لتصير جاهز مراد:ما بعرف اديش بدي وقت و ما بقدر اوعدك بالاخير انو كون جاهز ،بجوز تنطري عالفاضي سلوى:ما في مشكلة انت بتستاهل النطرة ،رح خليك تكمل شغلك ،و انا راجعة على البيت ،مر المسا تعشى عنا مراد:انشالله اطلعت من المحل و هو بعدو قاعد بمحلو ،انزعجت من تصرفو بس لمت حالي كتير لانو انا يلي وصلتو لهون و انا طالعة التقيت بوائل فايت لعندو وائل:شبو هيدا الو يومين ما طايق حدا سلوى:ما بعرف وائل:ولله انتو النسوان بتقتلو القتيل و بتمشي بجنازتو ابتسمت انا و طالعة ،رجعت على البيت و نطرتو لمراد ليجي على العشا و عملتلو الاكلة يلي بحبا بس ما اجا و اتصلت فيه و ما رد علي ،وقت كنت اشكيلا لسحر منو كانت تقلي بتستاهلي الله لا يردك و انا كنت انهم اكتر و خاف انو مراد ما يرجع معي متل اول _____سحر____ كنت قاعدة عم اشتغل وقت فات وائل و قلي سحر الحقيني على المكتب ،لحقتو و انا عم خمن ليش بدو اياني لانو ما بالعادة ،فتت لعندو سحر:ايه ؟ وائل:اعمليلنا قهوة سحر:بس انا ما شغلتي اعملك قهوة وائل:قهوة الي و الك كرمال بدي احكي معك بموضوع سحر:ايوا فتت عملت قهوة و طلعت حطتلو فنجانو على الطاولة ،كان عم يشتغل بشوية اوراق،خلصن و قام قعد معي سحر:شو الموضوع؟

العضوة: 378864 , 6 years ago

سحر:شو الموضوع؟ وائل:شبك روقي بس لاشرب اول شفة من الفنجان شرب شفة و رجع حط الفنجان على الطاولة وائل:الموضوع كرمال مراد ،ما هاين علي وضعو هيك،اختك زودتا كتير سحر:ايه صح زودتا بس حست بغلطا و راحت اعتذرتلو و قلتلو خلينا نتزوج و هو فجاة مدري شو صرلو ،يمكن اشتغل العرق ااشرقي عندو وائل:العرق الشرقي ! سحر:يعني وقت صارت بدا اياه و عم تلحقو و تتصل فيه صار ما بدو اياها،انا قلتلا خلص اتركيه على راحتو و اذا بدو اياكي بيرجع بيحكي معك ،المهم الكرامة وائل:الله لا يعطيكي شطارة على هالنصيحة ،ليش وقت كان عم ينطرا و هي عم تتكبر و تتقل ليش ما قال كرامة ،ولله انتو بحقلكن يكون عنكن كرامة و نحن لا سحر:اختي ما قلتلو ينطرا هو نطرا لانو بحبا و انا لو بمحلا بوافق انا و مغمضة عيوني لانو مراد الله خلقو و ما خلق متلو على وجه الارض ،من بعدو ما في رجال وائل:ولله و نحن الباقي شو تصنيفنا؟ سحر:في ذكور و في رجال وائل:دخلك انا من اي فصيلة؟ سحر:بعتقد طلعنا عن موضوعنا الاساسي وائل:طيب ،هلأ شو لازم تعملي انت؟ سحر:شو لازم اعمل انا؟ وائل:لازم تريحي لسانك شوي عن النصائح الضارة يلي عم تعطيا لاختك و قليلا تحاول باي طريقة تراضيه سحر:شو بتعملو يعني اكتر من هيك؟ وائل:لك هي ما عملت شي لهلأ سحر:عندك افكار يعني؛يعني لو ماسكة شي عليه متل صور مثلا كانت ابتزتو فين و غصبتو يتزوجا ،شو رايك بهيك فكرة ؟ وائل:سحر سحر:نعم وائل:خلص.. ،ماضي و راح ،ليش عم ترجعي تنبشي باوراق محروقة ،قلتلك ما انا يلي نشرت الصور سحر:و انا صدقتك بس انت استغليتني كتير وائل:استغليتك صح و انت كنت ما بتحبيني ،انا كنت حاسس بهالشي و متاكد كنت مرافقتيني كرماال مصرياتي بس و انا حسيت حالي عم عاقبك بهالطريقة لانو انا كنت متفاجئ فيكي لانو كنت سهلة و بتحب المصاري سحر:صح انا هيك كنت بالاول بس بعدين حبيتك و رجعت كرهتك وائل:هلأ انت بتكرهيني؟

العضوة: 378864 , 6 years ago

وائل:هلأ انت بتكرهيني؟ سحر:…لا …لا بحبك و لا بكرهك لانك ما بتعنيلي بشي ،انت صاحب الشركة يلي انا بشتغل فيا و بس وائل:اي منيح لهون هلأ،بجوز ترجعي تحبيني … سحر:لا مستحيل وائل:طيب ..قليلا لسلوى متل ما فهمتك ،يعني تتصل فيه تبعتلو ورد لمحلو يعني انتو بنات و بتعرفو بهيك قصص اكتر مننا سحر:طيب ماشي بقلا ،غيرو ؟ وائل:ولاشي سلامتك قمت و مريت من جنبو و رجعت التفتت عليه بدي قلو انو الشبكة صاير ضعيفة ؛شفتو عم يلوي لسانو و يقلدني بالحكي على الساكت،انتبه علي اني بعدني واقفة ،حط ايدو على دقنو وائل:حنكي عم يجعني من مبارح سحر:الشبكة ضعفانة هاليومين وائل: ليش ما عم طعموا منيح ههههه نزلت من عندو انا و عم اضحك منو،وقت رجعت على االبيت خبرتا لسلوى شو اقترح وائل سلوى:انا بدي اعمل هيك حركات ،ما كتير شاطرة بهيك شي سحر:انا بساعدك نحن و عم نحكي ،رجعت سندس من الجامعة،فاتت على غرفتا بدون ما تسلم علينا ،لحقتا و سلوى و فتنا شفناها عم تبكي سلوى:سندس شوفي؟ سحر:ليش عم تبكي شو صاير معك بالجامعة سندس:اتركوني و اطلعو لبرا ،ما بدي احكي مع حدا ،انتو ما اخواتي و انا ما اختكن سلوى :شو هالحكي ؟ سندس:بنت عمي قالتلي كل شي سلوى:شو قالتلك؟ سندس:علقت انا و اياها باللجامعة و بلشت تحكي حكي اول مرة بسمعو ،فكرتا عم تكذب و تالف حكي لتجاكرني و تكسرني قدام رفقاتي بس وقت تذكرت كل شي ليش رفضتي علاقتي مع راجي و ليش راجي تركني و قلي بحبني متل اختو ،عرفت انو كلاما صح و انتو كلكن خبيتو علي …..ليش انا جيت على الدنيا ليش كنت كتير خايفة دائما من انو تجي هيك لحظة و تعرف سندس ،وقفنا انا و سحر ساكتين ما عرفنا شو نحكي و حتى وقت جينا لنواسيا و نحاول نكذب روئ صارت تصرخ اكتر و تبكي و تدفشنا حتى قلعتنا من الغرفة و قفلت الباب على حالا ،خفت تعمل بحالا شي ،اتصلت بمراد بس ما رد علي كالعادة ؛بعتلو رسالة سلوى:مراد تعال فورا لعنا اختك روئ حاكية لسندس كل شي و سندس مقفلة على حالا الباب و خايفة تعمل بحالا شي .. بعد نص ساعة اجا مراد،ركضنا انا و سحر و فتحنالو الباب مراد:ما فتحتلكن

العضوة: 378864 , 6 years ago

مراد:ما فتحتلكن سلوى:لسا ،النا ساعة عم نحاول معا دق مراد على الباب مراد:سندس افتحيلي الباب بدي احكي معك سندس:ما رح افتحو لحدا ،كلكن كنتو بتعرفو و خبيتو علي مراد:طيب افتحيلي الباب لنحكي و اذا ما رح تفتحيه رح كسرو سندس:ما رح افتحو مراد:رح عد ل 3 ما فتحتيه رح كسرو …1 ….2 …. فتحت سندس الباب فات مراد و جينا لنفوت وراه؛اطلع فينا و ابتسم وسكر الباب بوجهنا ،رجعنا قعدنا نتصفن ببعض ،بعد ربع ساعة فتح الباب و طلع هو و سندس سحر:لوين رايحين؟ سلوى:مراد ما اتفقنا هيك ،سندس بتبقى اختي و رح تبقى معنا مراد:رايحين نتغدى بشي محل و راجعين طلعو الاتنين و نحن بقينا انا و سحر نتحذر شو قلا مراد لسندس حتى قدر يقلبلا مزاجا ،رجعو الساعة 7 ،سمعت صوت تسكيرة باب السيارة و بعدين فاتت سندس على البيت تابعت على غرفتا من غير ما تحكي معنا كلمة وحدة ،اطلعنا انا و سحر ببعض و ضحكنا ،اتصلت بمراد المسا .سلوى:فيني اعرف شو حكيتا لسندس؟ مراد:بعتقد شي ما بخصك ،ريحيلي حالك سلوى:اووه هيك لكن مراد:ايه هيك سلوى:طيب تصبح على خير مراد:و انت من اهلو سكر الخط بسرعة ،فاتت سحر تسالني شو فهمتي من مراد سلوى:ما قلي شي و بالناقص على راحتو خليه هيك ما بقا رح اركض وراه تاني يوم كان عطلة ،فقنا شفنا سندس لابسة تيابا و مجهزة شنتا صغيرة و حاطة كاسكيت على راسا و لابسة بنطلون جينز و تيشرت ابيض و خفافة سحر:و لوين اليوم رايحة ؟ما في جامعة سندس:ما دخلك سحر:اهي اهي هههههه سمعتي سلوى سلوى:سمعت يا رب جيبك يا طولة البال سمعنا صوت زمور سيارة ،ركضنا انا و سحر و بعدنا البرادي عن الشباك و شفنا سيارة مراد و قاعدة مرة عمي من قدام و روئ من ورا و سيارة عبودة ورا و معو مرتو و قاعد راجي من ورا سحر:شكلن طالعين سيران و نحن قاعدين هون سندس:يلا تشاااو يا اخواتي

العضوة: 378864 , 6 years ago

سندس:يلا تشاااو يا اخواتي طلعت سندس جنب روئ هي و عم تضحك و تجاكرنا سحر:يالله ،سلوى ما كانو لازم ياخدونا معن ولا نحن ما من العيلة سلوى:هن اخوات بين بعض اما نحن اولاد عمن و بالناقص اصلا بقينا ناطرين الست سندس لترجع من مشوار لتحكيلنا وين كانو ،وصلا مراد على الساعة 10 بالليل على البيت ،ركضنا استقبلناها من الباب ،كانت بشرتا مسمرة كتير سحر:كنتي بالبحر؟ سندس:ايه سحر:تسبحتي؟ سندس:طبعا سحر:و شو عملتو كمان؟ سندس:قصدك شو ما عملنا ،اخ يا ريت من زمان قلتلي روئ ،اديش راح علي شغلات حلوة ما احسن من القعدة المعتة و الكئيبة معكن سلوى:هلأ صارت قعدتنا معتة ست سندس سندس:ايه و كتير كمان سحر:لسا الناقص تقولي ما بقا رح عيش معكن و نفيق شي نهار ما نشوفك ه… سندس:هههههه شو عرفك ،ما مطولة الشغلة عن قريب انشالله فتت على غرفتي انا و معصبة ،اتصلت بمراد و انا ناوية صب كل غضبي عليه سلوى:انت شو عم تحاول تعمل ،عم تغري سندس بالمشاوير و الاجواء العائلية حتى تتركنا و تروح تعيش عنكن ،هاي اختنا كمان مراد:ايه سلوى:اوعى تفكر انك بتقدر تعمل هيك و تجيبا لطرفكن و تخلو تنسى اخواتا ،فهمان ،انا فيني ب لحظة طلعكن من حياتنا انت و اخواتك …شو سكتت مراد:خلصتي؟ سلوى:لا لسا ،سندس متغيرة معنا كتير و كانو نحن الذنب بهااشي ،صايرة عم تتجاهلنا كتيرر و طبعا انت السبب مراد:ايه سلوى:عم حذرك يا مراد انت ما بتعرفني انا شو بقدر اعمل لسا ؛يا بتحكيا لترجع متل ما كانت يا اما ..يا اما .ما بعرف شو رح اعمل بس رح ازعجك كتيرر مراد:انت نسيانة انو انا اخوا الكبير ،شكلك نسيانة ،يعني انا متل ابوا و ولي امرا ،يعني انا بقرر كل شيى بخصا و اذا بدا تروح محل بتاخد رايي انا و اذا بدا تعمل اي شي بخص حياتا بتاخد موافقتي انا .. سلوى:ولله و انا ؟ مراد:لا انت ما دخلني فيكي ،انت بنت عمي ما اختي

العضوة: 378864 , 6 years ago

مراد:لا انت ما دخلني فيكي ،انت بنت عمي ما اختي سلوى:قصدي انا كمان اختا الكبيرة و كل ما بدا تطلع من البيت بدا تاخد موافقتيى،ما نفيق نلاقيا لابسة و مجهزة امورا و تطلع من غير ما تحكي معنا كلمة غير تشاو مراد:هالحكي تفاهمي انت و اياها ،انا ما دخلني بهيك قصص؛ما عندي وقت اوجع راسي بهيك شي لانو صدقا ما فاضي هالفترة و مشغول كتير بقصص تانية سلوى:و بشو مشغول؟ مراد:و انت شو دخلك ؟ سلوى:طيب طيب انا عم حكيك لقلك انو ما تقويا علينا و وقت بدك تاخدا لمحل يا ريت تخبرني حتى ما حس حالي رجل كرسي بالبيت مراد:انشالله خير سكرت مع مراد انا و جسمي عم ينفض من العصبية و عم هز رجلي؛مراد تغير معي كتير و صاير لئيم و ما بفوت اي فرصة ليضربني بالحكي و عم يشد سندس لجهتو و عم يبعدنا عنا ______سحر_____

العضوة: 378864 , 6 years ago

______سحر_____ صار توتر كتير عنا بالبيت ،تغير سندس و علاقة سلوى و مراد يلي تحولت لعلاقة مشاحنة و خناق و مين بدو يفرض كلمتو على سندس و مين بدو يجيبا لصفو ،حتى اجا اليوم يلي شفنا فيه سندس عم اضب تيابا و بدا تتركنا و تروح تعيش عند بيت عما ،ما قدرت سلوى تبقى واقفة و تتفرج عليا كيف عم تلم كل اغراضا من البيت ،فاتت على غرفتا تبكي و تعلق مع مراد على الموبايل و انا حاولت احكي معا لاقنعا بانو مكانا المناسب هو بيناتنا سحر:نحن عشنا عمر كامل مع بعض ،كيف هاين عليكي تتركينا و تروحي تعيشي مع مرة عمك سندس:انا رايحة عيش ببيت ابي و مع اخواتي سحر:و نحن اخواتك سندس:سحر انا قررت ما تعبي حالك بالحكي ،هيك اريح الي و الكن ،طول عمركن عم تنظرولي انو انا ما متلكن و انقص منكن و تشفقو علي بس مراد ما حسسني ابدا بالشفقة ،مكاني المناسب هنيك ما هون تركت البيت سندس بدون حتى ما تودع سلوى يلي بقيت بغرفتا و قافلة على حالا و ما بدا تشوف سندس هي و عم تطلع من البيت ،كنت بفهما منيح لسلوى سبب زعلا و بكاها و انو حست كل شي قدمتو على حساب حالا راح هباءا منثورا مع سندس ،و يلي زاد الطين بلة بعد طلعة سندس من البيت باسبوع ،زارنا مراد سلوى: شو سبب زيارتك ،ما خلص سندس صارت عنكن؟ مراد:انا جاي كرمال سحر سحر:انا ؟ مراد:وائل حكا معي و بدو يجيب اهلو الاحد لعنا و يحكي فيكي سحر:وائل!بس ما خبرني و ما جبلي سيرة ابدا مراد: ليش يعني المفروض يجبلك سيرة ،الشاب ماشي حسب الاصول سلوى:ايه و الاصول يروح عند بيت عما ليطلبا ،ليش ما يطلبا من بيت ابوا و حضرتك انت تشرف لهون مراد:ما فارقة بيت عما و بيت ابوا واحد ،و الشاب قال بدو يجيب اهلو لعنا ما لهون سلوى:شكلو بيخجل يجيب اهلو لهون

العضوة: 378864 , 6 years ago

سلوى:شكلو بيخجل يجيب اهلو لهون مراد:ممكن ،المهم سحر جيت خبرك حتى تجهزي حالك و تكوني عنا الاحد سلوى:ولله و انا شو وضعي بالاعراب مراد:بتحبي تجي اهلا و سهلا بس اكييد هالموضوع بيعملوه الرجال ما النسوان سلوى:شو رايك سحر بهالحكي؟ سحر:ما بعرف ولله ما بعرف انا متفاجئة طلع من عنا مراد و مسكت الباب و خبطتو وراه بعصبية و فتت لاحكي انا و سحر سلوى:انا ما رح روح و ما رح مشي كلامو علي ،اجا اخر الشي و اخد الاولوية و الصدارة بكل شي سحر:عم حسك غيرانة منو لمراد ……………………..…… التممة سلوى:انا ها ليش لغار بس صايرة عم اكرهو و اكره شوفتو سحر:المهم اذا انت ما رح تروحي انا ما رايحة و اصلا انت بتعرفي شو وائل بالنسبة الي ،صفحة سودا بحياتي و اذا قبلت فيه بكون لاني مضطرة سلوى:معلش روحي الله يتمملك على خير،انا ما حابة روح ما بدي التقي بسندس و ما بدي شوف وجهو لمراد رجعت سلوى دور على شغل و انا كنت ملهية بالسوق و عم اشتري تياب لاستقباال وائل و اهلو ،يوم الاحد الساعة 4 العصر ،اجا مراد لياخدني بالسيارة على بيتن ،طلعت لحالي بعد ما فقدت الامل انو سلوى تقبل تروح معي مراد:وينا ليش ما اجت معك؟ سحر:ما بدا