#شهرزاد #الجزء_الاول شهرزاد عمرا ٦ سنوات شهرزاد : ماما احكيلي قصة قبل مانام اميرة: عن شو احكيلي ياحبيبتي شهرزاد : احكيلي قصة شهرزاد هههه اميرة : كل يوم بدك اياني احكيلك اياها شهرزاد : مين قلكن تسموني على اسمها يلا احكيلي احكيلي اميرة : امري لا الله .. كان يامكان بقديم الزمان .. كان في وحدة اسمها شهرزاد كتير زكية وحلوة متلك..وكان عندن حاكم كتير ظالم وكان كل يوم يتزوج وحدة الصبح يقوم يقتلا ويموتا لحتى اجا الدور لعند شهرزاد تكون مرتو لهل الحاكم شهرزاد : بس ماهيك القصة في كتير شغلات ماعم تحكيها اميرة: حبيبتي والله تعبانة عم احكيليك اياها رؤوس اقلام ...وكمان انتي بتعرفيها للقصة وحافظتيها بصم ليش كل يوم بتعزيبني احكيلك اياها شهرزاد : طيب بس سؤال اميرة : تفضلي شهرزاد : معقول انا يصير فيني متل شهرزاد ويطلعلي شهريار ... وانا كون زكية وماخليه يقتلني بعدين بنصير نحب بعض اميرة : ههههههه لا ماما هاي قصة خيالية وكمان مابنعرف شو الله كاتبلنا مع الايام ..يلا هلق نامي تصبحي على خير شهرزاد : وانتي بخير طلعت اميرة وراحت غطت باقي ولادها ورجعت على غرفتها مازن ابو شهرزاد: شو ليش طولتي اميرة : كنت عند شهرزاد عم احكيلا قصة شهرزاد مازن : هههههه هالبنت غريبة اميرة : ماكل الحق عليك يعني مالقيت غير هالاسم تسميها اياه .. والله فقعتني وهية كل انهار تقلي شو معنى اسمي واحكيلي قصة شهرزاد مازن : هههههه ليش في احلا من اسم شهرزاد اميرة : لا تصبح على خير مازن : وانتي من اهلو ............................................... مرت الايام والسنين وصار عمر شرزاد ١٥ سنة .. وهلق الوضع بسوريا وضع حرب .. كانت المنطقة يلي عايشين فيها امنة ... بس مافي منطقة بسوريا والا مالحقها ضرر .. وبلشت المشاكل تنتقل لمنطقتون .. كانت شهرزاد عم تدرس صف عاشر بس اجت قذائف ع المدرسة واتهدمت نصها ..وقعدو ببيتون تحت القصف .. وبلشو يعيشو معاناتون .. وكانت اكتر اوقاتون وهنن قاعدين يسمعو صوت القذيفة وهية طالعة ويسمعوها وقت تنزل ..وضلو ماسكين قلبون بأيدهن ... وبلش الجيش يسحب الشباب على الاحتياط .. شهرزاد عندا ٣ اخوات شباب .. وقررو اهلا يسفروهن ع اللبنان ... صارو بوقت يخافو على الشب ومايخافو ع البنت .. وطلعو اخوتها تهريب ع اللبنان ... وضلو هنن قاعدين طول انهار تحت القصف وكل مالو الضرب يقرب منون .. وعطول اشتباكات بين الطرفين .. اميرة : لايمت هالحالة والله ملينا .. مافي غير صوت الضرب والرصاص .. مازن : الله يفرجها على هالبلد احسن الشي .. اميرة : آمين .. بس والله مو عيشي وكمان هالبنات عم يخافو كتير (شهرزاد عندا اخت تاني اسمها ريم) مازن : شو طالع بأيدنا نعمل يعني اميرة : نطلع ع اللبنان لعند هالولاد وحتى الله يفرجها بنرجع .. مازن : عم فكر فيها بس والله صعبة علي اترك ارضي وبيتي وبلدي اميرة : ليش انا يلي مبسوطة .. بس ليك نص المنطقة طلعت من بيوتا مازن : طيب شو رأيك نروح على شي منطقة امنة بسوريا بلا ما نطلع برات البلد اميرة : غير بدو يلحقنا البلا وين ما رحنا خلص سوريا ماضل فيها مكان امن .. مازن: طيب انا رح فكر واحكي مع الولاد يدبرولنا بيت وبنطلع .. اميرة : ان شاء الله خير ( اخوات شرزاد طلعو ع اللبنان هنن وولاد عمون ) تاني يوم مازن اتصل بأبنو الكبير يحيى وحكي معووقلو يدبرلون بيت مشان يطلعو لعندن .. يحيى : اي بابا انا رح دور على بيت وببعتلكن ... انا اصلا كنت رح احكي معك مشان تتطلعو لانو ابن عمي محمد قال بدو شرزاد وانا قلت بتصل فيكن وبتجو لهون وبنزوجا شو رأيك مازن : محمد بدو شهرزاد وهون شهرزاد كانت قاعدة حد ابوها وانحطف لونا وصارت افكار تاخدا وافكار تيجيبا .. وتقول : اناا لمحمد بس هاد اكبر مني ب١٠ سنين .. بس والله محمد شب حلو اي ليش لأ خلص ابوها حكي ع التلفون واستلمتو اميرة اميرة : شو كان عم يقلك يحيى على محمد شبو محمد مازن : قال حكيان مع يحيى وقايلو بدو شهرزاد اميرة : اي وليش لأ .. محمد مافي متلو .. مازن : شو يا شهرزاد عندك مانع من انو يكون محمد زوجك شهرزاد : متل مابدك يا بابا .. انتو ادرى بمصلحتي مازن : اذا على بركة الله .. وهون بلشت شهرزاد ترسم احلاما مع محمد ابن عما .. وكيف رح تكون زوجة مطيعة وكيف تصير تحترمو وكيف هو رح يحبا ... ومرق كام يوم ويحيى اتصل بأهلو مشان يطلعو ..وبالفعل ضبو غراضون وطلعو ... استأجرو سيارة مشان توصلون ع الحدود .. ركبو انطلقو .. شهرزاد كانت طول الطريق عم تتخيل لما بدا تشوف محمد كيف رح تستقبلو وكيف رح يكون تصرفا معو .. وبلشت تنسج من مخيلتا افكار واحلام ... بس ياحرام ما كانت عرفاني انو قصة شهرزاد وشهريار رح تنطبق عليها .. وهنن ع الطريق شوي يمشو بمنطقة فيها نظام وشوي يمشو بمناطق معارضة .. وقبل مايوصلو ع الحدود وصلو لضعية بتجي بنص بين هدول وهدول وكان علقانة فيها الضرب الشوفير : انا معد اقدر كمل اكتر من هيك .. انزلو وكملو مشي