العضوة: 694206 , منذ 3 سنوات

وبلشت امي تمسيح جوخ من انو خليكن ولسه ما شبعنا منكم .. ومشان الله خلونا نشوفكم ع طول انا تركتن وانا بفرحة عارمة لانو مارح اتسما بوجه صهيب ع القليلة بس هالليلة .. رحت بسرعة عغرفتي وتركت الشقا لمين بقا يعني تنضيف البيت .. بدلت تيابي ولبست بجامة وغتصت بفرشتي وتغطيت منيح .. لانو عنجد عقلي حسيتو تعب قد مافكرت وتخيلت حياتي البائسة يلي ناطرتني وقررت نام مشان وقف شوي عن التفكر ... غمضت عيوني ودغري نمت وبلشت شوف منام حلو انو رايحين رحلة بالمدرسة وانا عم ضب غراضي يلي بدي اخدن ع الرحلة .. وانا عم اركب بالباص حسيت حدا عم يفيقني .. وكانت اختي فاطمة مروة : لك شوبدك فيقتني من منام كتير حلو فاطمة : شو هالسرعة بالنوم .. بعدنا مع الجماعة ع الباب مروة : نعسانة كتير ... فاطمة : اي قومي قومي لاحقة ع النوم ..قومي وصلي القهوة ع غرفة الضيوف مروة : لمين القهوة فاطمة : لخطيبك واخوكي .. عملتلك القهوة مشان ماتنقي بس فوتيها مروة : ما عأساس راحو فاطمة : ورجعو .. قومي خلصينا مروة : حبابة فوتيها انتي انا كتير نعسانة .. ورجعت نمت محلي وغطيت حالي فاطمة : لك قومي بلا جدبة ... كيف خطيبك قاعد وانا بدي ضيفن القهوة .. لك قووومي .. ياربي عجان وعم ينخطبو رفعت الغطا عن راسي وقلتا : قولي لاهلك هالحكي ورجعت غطيتو فاطمة : شو انا بدي لبح قلبي معك انا رايحة قول للبابا نطيت من تختي وقلتلا خلص لاتقولي للبابا هاتي القهوة فاطمة : هيك بدك تفوتي لعندن مؤوة : اي هيك ليكي ما احلاها بجامتي مرسوم عليها لولو كاتي فاطمة : ما دخلني تصطفلي .. حطيت شالي على راسي واخدت القهوة ورحت عغرفة الضيوف دقيت الباب وفتت اتفاجئت انو صهيب قاعد لحالو وبصراحة كتير خجلت وتلبكت مروة : مسالخير صهيب : مسالنور مروة : وينو خضر صهيب : راح ع الحمام .. قربت ضيفتو وانا ادي عم يرجفو ... وحطيت الفنجان التاني على الطاولة وجيت بدي اطلع .. وقف بسرعة ومسكلي ايدي مروة ؛ شبك صهيب : اقعدي معي شوي انا ماني غريب مروة : اااه .. لا ... مابقدر هلأ اهلي بحسو علينا صهيب : ويحسو .. شو يعني ما انتي صرتي مرتي .. يا الله هالكلمة شو قرفتا وشو رعبتني مروة : طيب اترك ايدي تركلي ايدي ورحت قعدت ع الكنبة يلي جنبو وهو قعد مقبالي حطيت راسي بالارض وصر هز برجلي والعب بأدي هو ماحكي .. مبين من طبعو مغرور .. اخد فنجان القهوة وصار يشرب .. صهيب : مطولة وانت عهالحالة

العضوة: 694206 , منذ 3 سنوات

مروة : اي حالة ؟ صهيب : عم تطلعي ع الارض وتهزي برجلك .. اذا كتير مشتاقة للأرض قومي شوفيها من غرفتك وبالفعل وقفت على رجلي مشان اطلع صهيب : ع وين مروة : اعمل متل ماقلتلي صهيب ؛ انتي كلشي بتسمعيه بتعمليه . مروة : والله بعيد عنك بعدني صغيرة وجاهلة صهيب : صغيرة اي بس جاهلة ما بظن قعدت واخدت نفس عميق واستجمعت قواي وقلت : ليش انا صهيب : شبك انتي مروة : ليش انا .. يعني ليش انا من بين كل البنات يلي حاوليك ...وبظن بتعرف منيح انو انا مغصوبة ع الزواج صهيب : طيب انتي فكري فيها بتعرفي ليش اخترتك انتي مروة : واضحة متل عين الشمس .. انت كشب عمرك٣٠ سنة مارق عليك كتير بنات ومارق بكتير تجارب ومانك مخلي بنت من شرك ... ووقت صرت بد تتزوج اخترتني لانو انا صغيرة ولسه مالحقت شوف الدنيا قلت هي صغيرة ومابايس تما غير اما وبربيها ع ايدي وبتصير متل مابدي صهيب : بس نسيتي انك كتير حلوة .. وكمان جريئة .. وذكية وبتلقطيها ع الطاير مروة :يعني يلي حكيتو صح صهيب : اي صح ... وهلأ شيلنا من سوالفك المعتة وخلينا نحكي متل تنين مخطوبين تازة مروة : والله ماعندي فكرة عن شو بيحكو المخطوبين او تنين مع بعض بظن انت عندك خبرة اكتر صهيب : عنجد مانك قليلة .. وكل مالك عم تعجبيني اكتر مارديت صهيب : يعني مثلا شلحي هالحجاب .. مابحقلي شوفك بلا حجاب مروة : انا هلأ ماني جاهزة لهي الخطوة ولحد الان ماني معتبرتك خطيبي قام قعد حدي وقال : معك حق تخجلي بس ما وقتو مد ايدو ليشيل الحجاب عن راسي .. انا قمت بسرعة .. بس هو كان اسرع مني ومسكني من ايدي وقعدني حدو ولزقني فيه مروة : لك انت حيوان .. بعد عني هلأ حدا بشوفك من اهلي ماشفت غير هالكف واجا ع حلقتي صهيب : مين الحيوان وليه انا انصدمت من الكف ... وبنفس الوقت نزلو دموعي .. تركتو وقمت عغرفتي وانا عم ابكي .. بس مافي ثواني قمت ورجعت لعندو كان هو عم يحط تلفونو بجيبتو وقايم يروح .. قربت لعندو وقلتلو اسفة صهيب : ع شو مروة : لاني قلت حيوان .. بس انت حط حالك محلي حدا عم يحاول يقرب عليك بصراحة انا هادالشي كتير جديد علي حتى لو خطيبي ومكتوب كتابنا بس مافيني بهل السهولة سلمك حالي قرب مني وطبطبلي على خدي بكفو وقلي : مرقتا هالمرة بس لا تعيدها مروة : مارح تخبر اهلي

العضوة: 694206 , منذ 3 سنوات

صهيب : هههه لا رجعت ع غرفتي وانا عم ابكي وادعي عليه انو الله يخلصني منو ... طبعا انا رجعت عتذرت مشان مايخبر ابي او اخواتي لانو رح تصير مصيبة .. نمت وغضيت حالي وصرت خبي دموعي وشهقاتي تحت المخدة .. فاتت فاطمة مشان تنام حست علي عم ابكي ... قربت لعندي ورفعت الغطا فاطمة : شبك حبيبتي ليش عم تبكي مروة : مابدي اياه ... مابدي اياه بكرهو .. بكرهو فاطمة : ياعمري انتي .. والله حاسة فيكي .. والله قلتلن لاهلي انك صغيرة ومحدا يرد علي .. مروة : مشان الله قوليلي شو اعمل .. بترجاكي يافاطمة ساعديني فاطمة : والله مافيني ساعدك بشي خلص انكتب كتابك عليه ومعد فيه تراجع مروة : بتعرفي انو هلأ حاول يضمني .. وانا قلتلو بعد عني ياحيوان فاطمة : يااخ .. هيك قلتيلو .. وشو عمل مروة : ضربني كف متل فراق الوالدين .. بس انا رجعت اعتذرت منو خفت يقول لابي واخواتي فاطمة : منيح انك اعتذرتي ... ليكي حبيبتي بدي قلك شغلة وهية انك حاولي تنبسطي فكري بحفلة الخطبة وفكري بالفستان وفكري بصهيب وحبيه .. وشوفي اديش هو حلو .. واكيد هو بحبك .. حاولي تتدلي عليه واطلبي منو شو مابدك واكيد مارح يرفضلك طلب .. ولا تفكري تعاندي حدا خلص حاولي تخلقي السعادة لحالك مروة : ان شاء الله رح امشي ع نصيحتك .. وينن اهلي يعني نايمين فاطمة: لا سهرانين ع السطح ... مروة : امممم _______________ الصبح كنا مخلصين شغل البيت .. وعم نجهز الفطور .. ونحنا بالمطبخ فاتت امي لعنا وقالت مروة تركي نحنا بنكمل وررحي جهزي حالك لانو صهيب اجا وبدو يفطر معنا اتطلعت فيني فاطمة وغمزتني .. انا ابتسمتلا ابتسامةباردة ورحت لبست بنطلون جينز ديق ولبست فوقو قميص .. ورفعت ادين القميص لفوق الكوع ورفعت شعري بملقط ونزلتو من فوق الملقط ونزلت غرة على خدي طلعت ع المطبخ مروة : امي هيك منيح امي : يا قلبي ما احلاكي .. اي طالعة بتجنني . حطينا الفطور ع الطاولة بالصالون وابي واخواتي وصهيب طلعو ليفطرو ... انا رحت جيب الشاي .. ولما رجعت لقيتن تاركين كرسي فاضي حد صهيب

العضوة: 694206 , منذ 3 سنوات

حبيباتي ولله ابني ماعم يسكت منكمل بكرة لان لقصة طويلة كتير لهيك لاحقين 😊😊😊بوعدكون بقصة كمان حلوة بس مو هلق ابني طوش راسي من لبكي😣😣😣

العضوة: 627942 , منذ 3 سنوات

@user-694206 اي ناطرينك بكرة يا قلبي وكل عام وانتي بالف خير

العضوة: 489022 , منذ 3 سنوات

حلوة يسلم ايديكي

العضوة: 694206 , منذ 3 سنوات

الله يسلمك يارب هلق لحتا ابني نام😥😥

العضوة: 489022 , منذ 3 سنوات

@user-645570 هي حلوة تعي

العضوة: 489022 , منذ 3 سنوات

ههههه الله يحميه يارب

العضوة: 489022 , منذ 3 سنوات

تكمليها اليوم يعني

العضوة: 694206 , منذ 3 سنوات

شكرااا😍

العضوة: 694206 , منذ 3 سنوات

بدك نكمل؟؟؟

العضوة: 703280 , منذ 3 سنوات

أكملي الله يسعدك

العضوة: 489022 , منذ 3 سنوات

ياريت😊

العضوة: 694206 , منذ 3 سنوات

مروة : مرحبا صهيب وبدون ما يتطلع بوجهي : اهلين وصرنا ناكل .. وحسيتو عم يتجاهلني .. ابي : اهلين بالصهر والله .. نورت صهيب : تسلم عمي هاد نورك انا اكلت لقمتين وقمت .. ورحت ع المطبخ وانا مقهورة .. مابكفي ماني طايقتو ولا عم يتجاهلني كمان ع شو شايف حالو ... بس مايكون زعلان من مبارح ... لا ما انا اعتذرت منو ... بس شكلو مانو طايقني .. ليش لحتى يخطبني سمعت ابي عم يندهلي .. رحت لعندن بس مالقيت صهيب ابي : بنتي خطيبك بغرفة الضيوف فوتي اقعدي معو شوي مروة : اي يلا .. دقيت الباب وفتت .. قعدت مقبالو وماحكيت .. صهيب : عفكرة انتي كتير حلوة مروة : اي بعرف ... بس انت هلأ برا ماكنت عم تحكيني ولا تطلع فيني وهلأ عم تتغزل فيني صهيب : مابحب بين قدام اهلك انو مهتم فيكي . مروة : وليش بقا صهيب : هيك مروة : اممم ... بتحب تشرب شي صهيب : لا ..بدي قوم روح اليوم فايق بكير مروة : ليش اي ساعة فايق صهيب : ٨ مروة : ٨ وبكير صهيب : اي بكير لانو نايم الساعة خمسة مروة : طيب ليش فايق بكير صهيب : مشان اجي اتصبح بهالوجه الحلو بصراحة خجلت كتير من حكيو ومارديت صهيب : انا قايم بدك شي مروة : لا سلامتك قام ومشي وانا مشيت وراه .. وصل ع الباب وقبل ما يفتحو مسكني من ايدي وقربني منو .. وباسني بوسة على تمي .. انا هون حسيت كل شعر جسمي وقف ... بعد عني وانا ملخبطة كتير بين خجل وتوتر .. لمسني ع خدي وقلي رح اشتقلك ... فتح الباب وطلع ودع اهلي وراح .. انا بعدني واقفة مكاني .. وبلشت حس بتأنيب الضمير وكأنو عملت شي حرام لانو باسني ... مابعرف شو هاد الشعور بس كتير تدايقت ... طلعت لعند اهلي امي : شو حكيتو ..