العضوة: 694206 , منذ 3 سنوات

مروة : تعيش اسامة : وشو ناوي تعملي مروة : ولا شي بدي ربي ابني وكبرو وافرح فيه اسامة : بس انتي بعدك صغيرة ليش لحتى توفقي حياتك هون مروة : لا تقلي تزوجي ههه اسامة : اكيد لا .. بس انو كملي دراستك مروة : وين هوون بلبنان .. لا مو ظابطة وكمان ما الي نفس لشي اسامة : انتي لاي صف واصلة مروة : كنت عم قدم عاشر اسامة : طيب ماشي .. شو رأيك تدخلي دورة تمريض مروة : تمريض اسامة : اي بتدرسي سنتين بمعهد وبتصيري ممرضة مروة : ممرضة ؟؟ اسامة : اي ليش لأ .. بكرا ستنين زمان ابنك بيكبر وبيدخل روضة وبعدا مدرسة .. وانتي شو بدك تعملي لحالك .. انا عم احكي مشانك والله ... مروة : بفكر اسامة : اي فكري .. بس لاتطولي لانو هلأ فتحو الدورات للتسجيل . وانا من المدربين مروة : ان شاء الله خير .. يلا بالاذن خدو راحتكن تركتن وفتت ع غرفتي وانا ع فكر .. تاني يوم اقترحت ع اهلي الاقتراح ما عترضو .. كمان اخدت رأي بيت عمي .. كمان ماعترضو .. بس شرطت علي حماتي انو صهيب بضل عندن طول ما انا بالدورة __________________ ومرق اربع سنين .. اخدت شهادة تمريض من المعهد وتطوعت بمستوصف للسورين .. وبعد التطوع تثبتت وصرت موظفة وصرت اخد راتب وراتبي كان ٤٠٠ دلر .. كنت كتير مبسوطة بحياتي الجديدة ومبسوطة بشغلي كنت اتسلى كتير ..كنت اشتغل مع دكتورة نسائية .. كان يجيني خطابة كتير بس انا كنت ارفض لانو بصراحة قلبي كان ميت وماكنت مستعدة لا حب حدا ولا ارتبط بحدا .. كبرت وحليت 😅 وكنت قد حالي وماخلي اي مجال لحدا يقرب مني .. كنت بشغلي مع الدكتورة النسائية شوف كتير بنات صغار بأعمار ١٤ و١٥ و١٦ . جاين وحوامل ... كنت اتذكر حالي وكيف اهلي ظلموني وزوجوني صغيرة بس الحمد لله عندي ولد بالدنيا كلا .. وبالاخير كلو بأيد رب العالمين ..

العضوة: 694206 , منذ 3 سنوات

مروة : دكتورة خلصو ماضل حدا الدكتورة : اوك .. يلا سلام لاهرب لكن ههههه مروة : اي الله معك ههههه ضبيت العيادة وقفلت الباب وطلعت قعدت مع الممرضة يلي بتسجل اسماء نسرين : شو خلصو مرضاكن مروة : اي .. بس كأنو اليوم عاجقة بالمستوصف شو القصة نسرين : اي ع دكتور السنان مروة : اممم .. انا قايمة روح بدك شي مني نسرين : لك قعدي سليني شوي مروة : لا بدي روح لحق حماتي شوف شو طابخة ههههه نسرين : ااخ منك مروة : يلا سلام طلعت من المستوصف ورحت ع بيت عمي دقيت الباب وفتحتلي ليلى مروة : شو هون ام الول ليلى : لك هلا بمروة فوتي فوتي همست بأدنا وقلتلا سو طابخين اليوم ليلى : ههههه فوتي داعمينها اليوم .. مروة : عنجد .. شو المناسبة ليلى : عازمين خطيبة معاذ ع الغدا مروة : اممممم ليلى : امممممممم هههه مروة : وين ابني .. يا سوسو وينك ماما انا جيت طلع ابني يلي متل القمر من المطبخ واجا لعندي وفاتح اديه .. نزلت لعندو وحملتو صهيب : ماما انتي جيتي مروة : شو شايف .. ليلى هلأ شوفي شو بيسألني صهيب : ماما كنتي عند الدكتور مروة :اي ههههههه ... كل يوم نفس السؤال ليلى : لك دخيل قلبوو انا مروة : حبيبي شو طابخة التيتي صهيب : لز ( رز) مروة : بس لز صهيب : اي بس .. مروة : تعال لنشوف فتنا ع المطبخ وكانت حماتي وميس عم يجهزو الغدا وكانو عاملين كبسة وكبة وصفيحة حماتي : هلا مروة .. منيح جيتي مشان تتغدي معنا مروة : حماتي بتحبني ههههه حماتي : اي والله بحبك .. مروة : عذبكن صهيب حماتي : يقبر قلبي .. لك اذا بكسر البيت على راسنا مارح نحكي .. صهيب : ماما عطيني تلفونك اتفرج ع التيوب ( يوتيوب) مروة : بس شوي اوك .. مشان عيونك صهيب : اوك عطيتو تلفوني وراح يتفرج هو ولاد عمو ميس : مروة بكرا خديلي موعد عند الدكتورة مروة : لا تقولي حامل ميس بقهر : يمكن مروة : هههه لك شو صايرلك ماخدة مقطوع .. ميس : بالغلط مروة : ههههههه قلتيلي بالغلط حماتي : دخيل الله مافي احلا من الولاد خليها تجيب وتملي البيت كلو ولاد مروة : يلا ميس خلفي مزال في مين عم يربي ميس : هيك قولتك

العضوة: 694206 , منذ 3 سنوات

مروة : اي هههههه ... خلص بكرا انا ببعتلك ع الواتس اي ساعة تروحي مشان ماتنطري فات معاذ ع المطبخ معاذ : ماما كلو جاهز مروة: هههه اي كلو جاهز اطمن .. معاذ : لانو رح يوصلو مروة : ياعيب الشوم عليك عم تشك يقدرات امك .. سامعة يامرت عمي معاذ : مروة لا تحرينا مروة : والله انا اذا ماحريت مابتهنا ههههه حماتي : حبيبي كلو جاهز .. يلا رح ننقل الاكل على السفرة نقلنا الاكل على السفره واجو المعازيم .. وتغدينا معن واخدت ابني ورحت ع بيت اهلي امي : ليش اتأخرتي مروة : كنت عم اتغدا عند بيت عمي مروة: لا صحة .. امي : لكن نيمي صعيب وتعي لنشرب متة مروة : اوكيي نيمت صهيب وطلعت اقعد مع امي مروة : وين بابا ما اجا ع الغدا امي : اي اجا وراح قبل ماتجي مروة : وخضر وفاطمة ماعم يجو امي : لا .. مروة : هدول من يوم ماتزوجو معد شفنا حدا منن امي : كل واحد عندو هم كافيه مروة : ليش صاير معن شي امي : لا بس مافي حدا ماعندو هموم وكمان لاتنسي كل واحد عندو عيلة ولاد صفت وقلتلا : اي والله محدا مرتاح امي : اليوم اجوكي خطابة مروة : ايي امي : لا تعصبي قلتلن البنت مابدا تتزوج مروة : منيح امي : لايمت يابنتي بدك تضلي هيك .. بكرا ابنك بيكبر وبيتركك وانتي رح تضلي لحالك مروة : هي الدباجة صرعتو سماي فيها انا مااابدي اتزوج ..واصلا كرهاني كلشي اسمو زواج امي : والله مابعرف بس والله مشان مصلحتك مروة : انا هيك مرتاحة .. امي : ان شاء الله عطول ________________

العضوة: 694206 , منذ 3 سنوات

م : وانت من اهلو حفظت رقمو عندي ورميت التلفون ع جنب امي من برا : مروة .. تعالي هون اختك فاطمة وجوزا مروة : جاي .. جاي طلعت وسهرت معن فتحت التلفون وصرت اتفرج على الستوري بالواتساب .. طلع قدامي الستوري ليوسف كان حاطط مقطع حلو رومنسي .. تفرجتلو وسكرت .. قلت بقلبي : الكل عم يعيش قصص حب ههههه تاني يوم .. اتصلت فيني الدكتورة انو ماسجلا مواعيد لانو مانها جاي .. رحت لعند نسرين مروة : نسرين اليوم الدكتورة مانها جاي .. مشان ماتسجلي لحدا نسرين : عندا شي ولادة ؟؟ مروة: اكيد نسرين : لكن تعالي لحدي لنشرب فنجان قهوة مروة : اي والله جبتيها فتت قعدت حدا .. وكانت العيادة عم تضج بالولاد مروة : شو قصة هالجعقة ع الاطفال نسرين ؛ اي لانو الدكتور يوسف كتير شاطر صاير عليه زحمة مروة :اي طلعت الممرضة يلي بتساعد دكتور الاطفال واجت لعند نسرين ملك : نسرين كم في مريض اليوم نسرين :صايرة مسجلة لمية ملك : شوووو نسرين : اي والله ملك : لكن اذا لسه عم يجي بس سجلي للمية خمسين .. نسرين : طيب ماشي ملك : شو مروة قاعدة ما تقومي تشتغلي مروة : الدكتورة مانا جاي اليوم ملك : نيالك مروة : قوم ساعدك ملك : لا مشان مايصير عجقة عند الدكتور .. بس اذا تعبت بخليكي تجي محلي مروة : اوك .. انا هون بالارجاء طلع الدكتور من غرفتو وقال : ملك وين صرتي ملك : اي دكتور جاي .. جاي .. بس كنت عم شوف كم مريض يوسف : مروة قاعدة هون مروة : ههه اي والله اليوم استراحة الدكتورة مانها جاي يوسف : اصبح قومي ساعدينا مشان نخلص بكير مروة : انا عرضت خدماتي بس ملك قال مشان مابصير عجقة يوسف : لا يلا تعالي .. مروة : يلا بس لاشرب فنجان القهوة يوسف : تعالي بعدين بتشربيه مروة : ههههه جيت قمت وفتت معن .. قعدت ورا الطاولة وصرت سجل اسماء الولاد والدوا يلي عم يكتبو الدكتور على اللابتوب .. وملك تساعد الدكتور بالفحص .. وخلصنا بكير مروة : خالص ؟ ملك : اي يوسف : لكن ملك عمليلنا فنجان قهوة نطلع نشربو مع الصبايا ملك : تكرم دكتور خلصت انا شغل ع اللابتوب مروة ؛ دكتور كلشي جاهز هون .. يوسف : شكرا كتير الك يامروة ... عنجد لولاكي مدري شو كان صار فينا مروة ؛ مامشكلة ما هاد شغلي يوسف : اي كيفو ابنك مروة : الحمد لله بخير يوسف : اي الحمد لله

العضوة: 694206 , منذ 3 سنوات

مروة : يلا بالاذن ..طالعة انطرك برا يوسف : اي طلعنا قعدنا بقاعة الانتظار .. واجتمعو الاطباء والممرضين والممرضات وقعدنا نشرب قهوة .. اتطلعت بالساعة مروة : يلا انا صار لازم روح .. يوسف : مروة انا رايح انطري انا بوصلك مروة : لا شكرا .. بروح لحالي يوسف : لك مزال رايح مروة : اسفة دكتور .. بس انا عنجد مابركب مع حدا ..هلأ باخد تاكسي يوسف : اوك .. واسف ع الازعاج مروة : لا لاتعتزر .. بس لاتفهني غلط انت بتعرف وضعي وحكي العالم مابيرحم يوسف : اي فهمت .. حقك علي طلعت ورحت جبت ابني من بيت حماي ورحت ع بيت اهلي ... فتحت التلفون بالبيت وليقيتو باعتلي رسالة ي: بصراحة كتير عجبتيني وعجبتني اخلاقك العالية .. واسف لانو طلبت وصلك ونسيت وضعك م: شكرا ع تفهمك.. وشكرا على مدحك الي وهي شهادة بعتز فيها المسا صار يبعتلي ي:مسالخير م: هلا مسالنور ي: شفتك اون لاين قلت بمسي عليكي م: اي ي : كيفك م: تمام الحمد لله ي: مروة ممكن سؤال م: تفضل دكتور ي: شقد عمرك م: ٢٢ ي: العمر كلو م: يسلم عمرك ي: شقد صرلو ميت زوجك م: اربع سنين ونص ي، الله يرحمو م، تسلم ي: ليش لهلأ ما تزوجتي م: انا بحبو كتير لزوجي الله يرحمو ومستحيل حب غيرو او اتزوج بعدو .. وكمان مشان ابني .. لانو مافي حدا رح يستحمل ابني .. وغير هيك بيت عمي اذا تزوجت مستحيل يتركوه معي ي : بس حرام يلي عم تعمليه بحالك.. بعدك صبية بأول عمرك م : لا ما حرام بالعكس انا كتير مبسوطة بوضعي هاد والحمد لله ماناقصني شي.. يعني مابتكمل سعادتي الا اذا كان في شخص بحياتي ي : مابعرف هي وجهة نظرك م : اي ي : يلا انا مابدي ازعجك اكتر من هيك .. تصبحي ع خير م : وانت من اهلو مروة : الله يرحمك ياحبيبي .. اشتقتلك كتيير .. يارب تصبرني قعدت وصرت ابكي فاق صهيب : ماما بدي فوت ع الحمام مروة : يلا قوم ياعمري اخدتو ع الحمام ورجعنا لحتى انام .. حطيتو بحضني اتطلع فيني وقام مسحلي دموعي بأديه الصغار صهيب : ماما ليش عم تبكي ... انا بزعل عليكي مروة :ياعمري انت .. كل شي الا زعلك .. خلص معد ابكي صهيب :ماما انا بحبك مروة : وانا بمووت فيك ياروح الماما

العضوة: 694206 , منذ 3 سنوات

صارت تمرالايام .. ويوسف كنت حسو يعطيني اهتمام اكتر من غيري .. وانا بلشت افهم نواياه واتجنبو .. لانو مابدي حدا ..وخايفة تتطور علاقتنا واتعلق فيه وانا مابدي ابدا هالشي .. المسا صار يحيكني ي: كيفك مروة م: اهلا دكتور ي: ماقلنا بلاه دكتور برات الدوام م: احترام الك ي : مروة انتي ليش متغيرة صاير معك شي م : انا .. لا ابدا ي : بس انا حاسك عم تتهربي مني م ؛ انا قلتلك انو انا مابحب خالط رجال كتير ي : طيب مروة بدي قلك شي م : تفضل دكتور ي: مروة انا معجب فيكي وحبيتك .. وحابب ابعت اهلي يطلبوكي بس خايف انك ترفضي م : بصراحة انت فاجئتني .. بس اسفة مابقدر كون الك زوجة ي : ليش .. مروة انتي صغيرة وحرام يلي عم تعمليه بحالك م : رجاءً دكتور انا بعرف مصلحتي كتير منيح .. ي : طيب خلينا نحاول م : بشو بدنا نحاول ي : خلينا نعطي فرصة لمشاعرنا .. مروة انا متأكد انك تعبانة وبحاجة حنان وحب ... بس انتي عاملة حاجز حواليكي وماعم تسمحي لحدا يتخطى هالحاجز .. بس هالشي يلي عم تعمليه رح يدمرك انا ماكنت حابة رد عليه رد قاسي لانو دكتور ومعي بنفس الشغل .. وانا مامن طبعي خجل حدا او اجرح حدا مروة : دكتور انا عنجد ماعم فكر حاليا بهل الشي ي : ايمت ناوي تفكري ... لما تصيري ع العكازة م : مابعرف ... ي : طيب ع راحتك م : دكتور لاتزعل ..واذا بتحب رح نضل اصدقاء ي : ما زعلت ولايهمك ... اكيد رح نكون اصدقاء ................. تاني يوم ..بالمستوصف كانت غايبة ملك اجا لعنا ع العيادة ودق ع الباب يوسف : كيفك دكتورة الدكتورة : اهلا دكتور يوسف يوسف : بدي اخد منك الممرضة يلي عندك اذا ماعندك مانع انا : ليش وين ملك دكتور يوسف : ملك معطلة وبصراحة انا عندي ضغط وماعم لحق لحالي وكل الممرضات مشغولين .. قلت اذا مروة ماعندا شي ... تساعدني شي ساعة الدكتورة : اكيد .. مروة روحي مع الدكتور .. مروة : : طيب دكتورة بالاذن رحت معو وانا كتير مقهورة من تصرفو .. بس ماحكيت فتنا ع عيادتو

العضوة: 694206 , منذ 3 سنوات

مروة : من وين بلش دكتور يوسف : تقعدي ورا اللابتوب وتسجلي مروة : اوكي بلشو يفوتو المرضى وانا سجل ورا الدكتور ... وكنت حاسة عليه انو ما عم يشيل عيونو عني .. انا بعرف لوين بدو يوصل .. بدو يحاول يعلقني فيه وحبو .. وبصراحة انا خايفة كتير لانو انا عنجد بحاجة لهيك شخص لما خلصو المرضى يوسف : بس ماتكوني تدايقتي لانو جبتك تشتغلي معي مروة : لا ابدا .. عادي يوسف : اي منيح .. شو رأيك نشرب قهوة مروة : بسس يوسف : مافي بس.. ما عأساس اصدقاء مروة : طيب ماشي .. طلبنا قهوة لعندو ع العيادة وقعدنا نشربا يوسف : انتي بتطلعي ع حالك بالمراي فكرت فيني شي مروة : اي بتطلع في شي وصرت لمس ع وجهي يوسف : لا لا مافي شي ... بس انو لما بتطلعي ع حالك مابتقولي ماحرام هالجمال يضل وحداني .. بدون محدا يحرسو ويحميه مروة : دكتور بليز يوسف : انتي ليش انانية مروة : كيف يعني يوسف : انانية على حالك ... انا بعرف انك عم تتقربي مني بس عم تكابري ع حالك مروة : ما صح نهائيا يوسف : صح ونص .. مروة : بالاذن .. تركتو وطلعت ..ورحت ع الحمام غسلت وجهي ووقفت قدام المراي وصرت حكي حالي : مروة لا تضعفي .. مروة لاتنسي ابنك .. ولاتنسي حبك لصهيب ... ما عأساس وعدتي حالك تضلي تحبيه لاخر يوم بعمرك ... مروة انتي قوية .. بس فجأة حسيت حالي رح انهار .. صرت ابكي ... وقول : تعبتتت ... تعبتتت ... ااااه يا قلبي ... والله معد اتحمل .. غسلت وجهي من الدموع .. وطلعت بدلت تيابي ورحت ع البيت .. امي : مروة . شبك .. وينو صهيب ليش ماجبتيه معك يا الله كيف نسيتو مروة : كنت مطوشة من كتر الشغل ..يلا رايحة جيبو .. امي : شو صاير معك يا بنتي طلعت وقلتلا ولاوشي ... وانا ماشية صرت ابكي .. وحكي حالي يخرب بيتك يامروة... نسيتي ابنك .. وصلت معك المواصيل تنسي ابنك ... لا لا كلشي الاصهيب .. اصحك يامروة ... اصحك وصلت ع بيت عمي دقيت الباب وفتحتلي حماتي .. سلمت عليها .. وفتت لقيت صهيب عم يلعب بالالعاب .. حملتو وضميتو لقلبي وصرت ابكي ... حماتي : مروة شبك ... بنتي ليش عم تبكي

العضوة: 694206 , منذ 3 سنوات

مروة : خايفة على صهيب حماتي : خير شوفي كذبت عليها وقلتلا : مات ولد اليوم عنا بالمستوصف .. واهلو صارو يبكو عليه ... يا الله ما اصعب الموت .. خايفة رب العالمين يحرمني من صهيب حماتي دمعو عيونا وقالت : استهدي بالرحمن .. مافي شي .. قمت ضمتا لحماتي وصرت ابكي على كتفا حماتي : شبك مروة .. ليش عم تبكي هيك مروة: اشتقتلو يا مرت عمي ... اشتقتلووو .. صارت تبكي معي وقالتلي كل يوم قلبي عم يحترق عليه بس ماعم احكي ... كل مابشوف ابنوو كيف كان متلو لما كان صغير .. وكيف كل حركاتو متلو قلبي بيتقطع .. بخبي دمعتي عنوو ..وبروح ببكي بالغرفة جوا .... لانو يقبر قلبي بقلي لاتبكي يا تيتا مابحبك وانتي عم تبكي صهيب صار يبكي : ماما ليش عم تبكي انتي والتيتا مسحنا دموعنا مروة : خلص ياعمري .. معد نبكي .. حماتي : ياروح التيتا انت _______________ مرق هاليوم .. وانا تعبانة ... ويوسف يحاول يتصل فيني بس انا ماكنت رد عليه لانو ماكنت طايقتو تاني يوم وانا بالمستوصف .. الدكتورة : مروة بتاخدي المريضة بتركبيلا كيس فيتامين .. مروة : حاضر دكتورة .. تفضلي معي .. اخدتا ع غرفة الادوية قعدتا على الكرسي وربطلا ع ايدا مطيطة مشان يبين العرق .. _بوجع مروة : ان شاء الله لا قعدت مقبالا وركبتلا كيس الدوا مروة : وجعتك _لا يسلم هالادين ... والله يبعتلك ايام حلوة متل هالوجه مروة : تسلمي يارب .. والله يقومك بخير وسلامة ... _ الله يسلمك ... يعني هلأ روح ع البيت مروة : لا ... في تخت جوا فوتي ارتاحي عليه .. لحتى بخلص الكيس اخدتا نيمتا على تخت جوا .. وانا طالعة سمعت حدا عم يعيط برا .. طلعت لشوف مين شفت وحدة عم تعيط وتصرخ ع نسرين _ قلتلك بدي فووت ع الدكتور يووسف هلأ .. انتي مابتفهمي نسرين : لو سمحتي يامدام انطري ع الدور قربت منها وقلتلا خير شوفي _بدي فوت ع الدكتور يوسف مروة ؛ طيب ممكن نعرف مين حضرتك _ انا مرتوو انا ونسرين انصدمنا وقلنا مرتوو _اي مرتو

العضوة: 694206 , منذ 3 سنوات

مابعرف حسيت حالي فرحت .. وانقهرت بنفس الوقت فرحت لانو طلع متزوج وانقهرت لانو كذب علي مروة : اي يامية اهلا وسهلا يا مدام نورتي .. تفضلي معي لحتى دخلك لعند الدكتور يوسف .. بس من الاول لونك قايلة انك مرتو كنا دخلناكي بكل هدوء .. تفضلي معي ... رحنا ع عيادة يوسف .. دقيت الباب وانا الابتسامة على وجهي مروة : كيفك ..دكتور ابتسم وقلي اهلين مروة مروة : جايك ضيوف .. تفضلي مدام واول مافاتت حسيتو تلون وتلبك ومعد يعرف يحكي تركتن وطلعت الجزء_التاسع و الأخير رجعت ع عيادتي وصرت اشتغل .. صار تلفوني يرن . شفتو وكان يوسف .. مارديت وحطيتو صامت .. خلصت الدكتورة شغل وقامت راحت وانا صرت ضبضب العيادة .. ماشفت غير الباب انفتح وفات يوسف وسكرو يوسف : ليش ماعم تردي مروة : اااه ما انتبهت اسفة دكتور كان صامت يوسف : مروة خليني اشرحلك .. مروة : شو بدك تشرحلي يوسف : صح هية مرتي بس والله عم نطلق مروة : مافهمت انا شو دخلني لحتى عم تقلي يوسف: مروة انا والله بحبك مروة : وانا قلتلك مابدي حب حدا .. بس حضرتك ماعم تفهم .. وبعدين يلي بدو يحب من الاول بكون صادق .. بس انا هلأ فهمت كل نواياك اتجاهي والحمد لله انو ماقبلت عرضك يوسف : انا كنت ناوي قلك .. بس كنت ناوي قلك لما خلص من القضية مروة : ومنيح ماقلتلي لانو انا مارح اقبل فيك يوسف : ليش لاني مطلق .. شو نسيانة انك ارملة فجأة سكت وحس عحالو غلط حبست غضبي وقلتلو ... اي انا ارملة ... ولا الارملة صارت عار ... ولا لانو ارملة قلت هي دغري بتقبل فيني .. نحنا مجتمع فاشل .. كلو بينظر للارملة نظرة حقيرة . ومفكرينا لقمة سهلة .. انت لما شفتني ارملة قلت هاي هي ... بنتسلى معا ولما كنت صدك جيتني من باب الزواج ... بس الحمد لله الله فضحك يوسف : انا اسف .. بس والله ماهيك نيتي فيكي مروة : لو سمحت دكتور ياريت تطلع لانو نحنا بمكان عمل .. نزل راسو وطلع وهو خجلان

العضوة: 694206 , منذ 3 سنوات

عنجد انا حسيت هم وانزاح عن قلبي خصلت شغلي ورحت وانا مرتاحة كتير .. رحت عبيت عمي اخدت صهيب ورحنا ع البيت ويوسف يبعتلي رسائل اعتذار ورسائل يحلفلي فيها انو هو بحبني ... وصار يدق ..وانا مارد عليه المسا اجا اخي خضر لعنا .. وبالصدفة صار يدق مروة : اخي رد خضر : مين هاد مروة : خلص رد هلأ وبعدين بقلك اخدك خضر التلفون : الو .. مين بدك .. انا اخوها قلي بدك منها شي ... طيب ماشي سكر وقلي شو بدو مروة : هاد دكتور عنا بالمستوصف وقال بدو يجي يخطبني وانا عم ارفضو خضر : اذا منيح عطيه فرصة مروة : لا مانو منيح وكمان متزوج خضر : اي .. انا لو الامر الي مابخليكي تطلعي برات هالبيت مروة : اي منيح هالامر مانو الك .. خضر : لك يا اختي لاشلك بالشغل اذا مصروفك ومصروف ابنك كل راس شهر عندك .. مروة : انا ماعم اشتغل مشان المصاري .. انا بدي اثبت حالي .. حس انو عم اعمل شي بهل المجتمع خضر : هههههه مروة : ليش عم تضحك خضر : لا سلامتك .. مروة : اي الله يسلمك مرق اسبوع ويوسف بعد محاولاتو الكتيرة وانا صدو شكلو مل ومعد قرب مني هلأ انا اكتر ايامي بضل قاعدة لانو الدكتورة بصير عندا ولادات وبتروح من نص الدوام او مابتجي واليوم اتصلو فيها من المشفى وراحت .. وانا رحت قعدت عند نسرين نسرين : شو رأيك تروحي ع الدكتور عماد .. مروة : ليش وينا اسماء نسرين: مريضة مروة : لكن لقوم .. بتسلا .. رحت ع لعند الدكتور عماد وهو دكتور صحة عامة .. مروة : كيفك دكتور الدكتور : اهلا مروة مروة : جاي ساعدك .. الدكتور : اي والله ياريت .. كروة : من وين بلش الدكتور : دخليلي المريض يلي بعدو مروة: حاضر طلعت وقلت يلي بعدو .. وكان زلمة كبير بالعمر وضعيف كتير .. وعم يمشي غصب .. قربت لحتى ساعدو مروة : عمو انت جاي لحالك _لا والله .. جاي معي ابني بس طلع يدخن برا مروة : تفضل انا بساعدك .. ساعدتو لفات والدكتور صار يفحصو .. الدكتور : عم تاخد الفيتامينات يلي كتبتلك عليهن _اي عم اخدن .. الدكتور : طيب تابعن وبتاخد هاد الدوا معن _شكرا كتير يادكتور مروة : ساعدك عمو _اي والله ياريت .. سندتو وصرت امشي معو شوي شوي _ذكرتيني بشب كان معي بالسجن كان يعطف علي كتير ويضل يساعدني مروة : عمو ليش انت كنت بالسجن _اي والله ياعمي مروة : بسوريا

العضوة: 694206 , منذ 3 سنوات

اي بسوريا ... صرلي شهرين طالع مروة : وشو تهمتك ياعمو .. ضحك وقلي : ارهاب مروة : ارهااب ؟؟ _تهمتي ارهاب بس انا بحياتي ماشلت سكين مروة : كيف اخدوك لكن _بالغلط .. هههه قصة طويلة مابدي وجعلك راسك مروة : المهم طلعت والله فك اسرك _اي والله الحمد لله .. قوليلي يابنتي انتي من وين مروة : من الريف _من ايو ضيعة قلتلو اسم ضيعتي _لك الشب يلي كان معي من نفس ضيعتك .. مروة : كان معك بالحبس _اي بس والله نسيت اسمو .. مع انو اسمو ماعم يروح عن بالي اجا ابنو للزلمة _ابي فتت ع الدكتور ابوه: اي .. ليك ابني هاد الشب يلي قلتلك عنو كان معي بالسجن بتتذكر شو اسمو _ليش عم تسأل ابوه : هي الصبية من نفس الضيعة .. بدي قلا اسمو او اسم عليتو بركي بنوصل لعيلتو ابنو : والله ماني متذكر بس هو اسمو مسجل عندك بالبيت وكمان في رسالة بأسمو ابوه : لك انا صاير انسى كتير .. بعد ما اكلت ضربة ع راسي ابنو : انتي يا انسة هون عطول ماهيك ؟ مروة : اي .. بس اسألو عن مروة ابنو : خلص بكرا بجبلك اسمو .. بركي بتوصلينا لاهلو وبنفرحلن قلبون .... وهو امنو لابي انو يوصل هالرسالة لاهلو مروة : ان شاء الله ... والله يجزيكن الخير ويوصل الخبر لاهلو رجعت لعند الدكتور .. ونسيت القصة تماما .. .............. تاني يوم .. وانا بالعيادة مع الدكتورة .. فاتت لعندي نسرين وقالتلي في شب عم يسأل عنك برا مروة : عني انا؟؟ نسرين : اي .. قال ابوه كان محبوس وفي رسالة مروة : اي .. اي .. جاي طلعت لعندو مروة : اهلا .. اي قلي شو اسمو ومن بيت مين الشب : بصراحة مابعرف اقرا ليكي اسمو مكتوب هون .. اخدت الورقة من ايدو وقريت الاسم حسيت اجتني الجمدة مابعرف شو صابني .. ادي صارو يرجفو .. نسرين : مروة شبك اخدت مني الورقة .. نسرين : شوفي ليش هيك مصدومة مافيها شي الورقة

العضوة: 694206 , منذ 3 سنوات

مكتبو صهيب .. لما قالت اسمو تذكرت نسرين : مروووة ؟؟ هااد زوجك وعيت من الصدمة وانا طايرة من الفرح .. صرت ابكي دموع فرح وقلتلا : ايي ..ايي.اي .. هاد اسم صهيب .. هاد زووجي حسيت الدنيا ما واسعتني ومعد عرفت وين روح او وين اجي .. رحت قعدت ع الكرسي .. وانا لساتني عم اتأمل الاسم وابكي الشب : بكوون زوجك؟ قمت لعندو قلتلو : اي زوجي ... مشان الله قلي هو منيح .. شو اخبارو الشب : انا مابعرف .. بدك تسألي ابي .. بس ليكي هي الرسالة عطاها لابي اخدت الرسالة منو بسرعة ورجعت قعدت لانو عنجد رجلي حسيتون معد حملوني .. وفتحتا بلهفة وكتر ماكنت مستعجلة كنت رح خزقا فتحتا وصرت اقرا بعيون مدمعين وادين عم يرجفو . ونسرين قعدت حدي ( الرسالة .. السلام عليكم ورحمة الله الله وبركاته ... .. انا صهيب ########## من ضيعة #### مواليد ١/٧/١٩٨٣ .. تاريخ كتابة الرسالة ٢٢/٤/٢٠١٦ الرسالة رقم ٣٥ عم اكتب هي الرسالة وان شاء الله توصلكن يا اهلي .. مابعرف شو بتعرفو عني .. بس انا عايش والحمد لله .. هداك اليوم طلعت بوجهنا دورية كبيرة وقوست علينا . وتصاوبنا انا وعمر ابن عمي .. عمر للأسف مات الله يرحمو .. بس انا الحمد لله الله كاتبلي عمر اخدوني عالجوني ... وحطوني بالحبس ... انا بالسجن .. تهمتي تهريب وتهريب اسلحة .. لانو انكمش معي سلاح .. المهم انا بدي طمنكن عني .. وانا مشتقلكن كتيير .. لابي وامي واخي سليمان وليلى ومعاذ .. وطبعا حبيبة قلبي ورروحي مروة ... وابني يلي مابعرف اذا اجا ع هالدنيا او لا ... انا كتير تعبت ع غيابكن ... وبدي منكن اذا وصلتكن هي الرسالة توكلولي محامي وتطالعوني من هون قد ماكلفت الشغلة ادفعو .. وانا كمان تهمتي خفيفة... ناطركن او ناطر منكن رد .. ورح ادعي ليل مع انهار انها توصل .. ابنكن صهيب ) ضميت الرسالة وصرت ابكي وقول ،: وصلت .. وصلت يا روحي .. وصلت ضميت نسرين وقلتلا : طلع عايش ... طلع عااايش ... دخيل اسمك يا رب ما اكرمك ... الف حمد وشكر الك يارب ... الكل يلي بالمستوصف التم علي وانا عم ابكي واصرخ مروة : انا لازم روح .. .. قمت ومن لهفتي كنت رح اطلع بالمريول نسرين : مروووة ... شلحي المريول . تضحكت ع جدبنتي .. واتذكرت ورجعت لعند الشب .. مروة : بترجاك عطيني عنوانكن نسرين : انا باخدو منو .. روحي انتي مروة : اي .. اي .. طلعت متل المجنونة .. وقفت تاكسي ورحت ..

العضوة: 694206 , منذ 3 سنوات

مروى : مشان الله اسرع _والله ماشي بسرعة .. حسيت الوقت وقف ومعد مشي نزلت وعطيت كلشي معي مصاري لابو التاكسي .. وفتت ع البناي .. من كتير ماني مستعجلة تفشكلت ع الدرج مرتين .. وصلت وصرت دق بقوة ورن الجرس .. ميس من جوا : اي .. اي .. جاي .. رح تكسرو الباب كانت الساعة عشرة ولسه محدا راح ع شغلو .. فتحتلي ميس : مروة شبك .. دفشتا وفتت .. لقيت الكل قاعدين عم يفطرو .. حسيت لساني انربط ومعد طلع معي الحكي قامو لعندي ملهوفين لانو كنت عم ابكي .. حماتي : مروة شبك .. عمي : شبك يابنتي . .. سليمان : خلوها تاخد نفس .. جابولي كاسة مي ... بدي احكي ما اقدر حسيت حالي خرست ... بس كنت عم ابكي ... قربت مرت عمي وصارت تسمي علي وتقرالي قرأن معاذ : مروة خلصينا نطقي هالجوهرة مروة : صهيب ... صهيب.. حماتي : صهيب نايم .. فيقلك اياها هزيت راسي انو لا ... ورجعت قلتلن صهيب .. صهيب معاذ : شبك علقتي ع كلمة صهيب مروة : لك صهيب عااايش . الكل : شووووو مروة : والله عااايش .. عاايش مانو ميت ... وهو هلأ بسجن بسوريا .. حماتي صارت تبكي وتقلي عنجد .. عنجد مروة : والله ... والله سليمان : مين خبرك مروة : هي الرسالة منو .. اخد الرسالة مني وقعد يقراها والكل تجمع عندو لحتى يقرو معو .. انا ماشفت حالي غير عم اسجد واحمد الله خلصو الرسالة .. وكانو كتير مبسوطين .. ومرت عمي صارت تزلغط ... اجت ضمتني وانا ضميتا وصرنا نبكي عمي : من وين جبتي هي الرسالة مروة : شخص كان بالسجن معو .. هلأ بتبعتلي نسرين عنوانو .. رن تلفون برسالة هاد العنوان .. اخد سليمان مني التلفون وبعت الرسالة لعندو .. سليمان : تروح ابي عمي : اكيد .. يلا .. راحو ونحنا كنا عم نبكي من الفرح ... حماتي : انا قايمة صلي كم ركعة شكرر لله قامت مرت عمي وفات ابني صهيب كان فايق من نومتو حملتو وصرت دور فيه وصرت قلوو البابا عايش .. البابا عايش ورح يجي لعنا وضلينا هيك قاعدين ع اعصابنا لحتى اجا عمي وسليمان حماتي : شوو بشروو عمي : اي والحمد لله عايش وصحتو منيحة حماتي ،: الف حمد وشكر الك يارب .. الحمد لله يارب مروة : انا قايم بشر اهلي عمي : مروة مروة : اي عمي مروة : شوي شوي .. لانو لاتسي اخوكي عمر مروة : والله ماني ناسيتو اصلا حاسة بغصة مشانو ____________________

العضوة: 694206 , منذ 3 سنوات

ارئكم بتهمنا شو رح يصير رح يلاقو صهيب ويطلع من سجن ...على كل حال انا خلص لبانزين تبعي رح وقف هلق ومنكمل حبيباتي😙

العضوة: 280989 , منذ 3 سنوات

حلوه بتجنن الله يفرجها على اهلنا بسوريا وترجع احسن من اول