اغلب النساء الحوامل يروحو لطبيبة ديرلهم ايكو بصح بلاك متهما وش كاين و تخليلهم علامات استفهام ياسر 😏 على هذا راح نفكلكم كل الرموز لي تحتاجوهم و لازم نتعرفوهم الايكو echographie : مش راح نحكي على الآلة و المعدات لي تخصها 😅راح نحكي على الوثيقة لتمدهالكم الطبيبة : اهم ورقة في compte rendu لتهمدهالك الطبيبة مش الصورة تع الراديو ترجعو درك ل compte rendu : راح نلقاو فيه كل الاجابات على الاسئلة تعكم ركزوا مليح : ✅تاريخ اخر دورة :DDR : لهنا لازم تنتبهو مليح لان اذا لقيتي تاريخ مبدل متحيريش هذاك الطبيب فقط صلح تاريخ اخر دورة على حساب عمر الحمل بالايكو و هذيك هي لتعودي تمشي بيه ✅تاريخ الولادة محتمل :DPA: تعني طبيا هو تاريخ لتكملي فيه 40 اسبوع يعني تاريخ لتكملي فيه شهرك و تدخلي في dépassement , يعني قادرة تولدي قبل و قادرة تولدي بعد هذاك التاريخ ✅الوضعية : position لهنا نقصدو باها وضعية الجنين و كاين 3 وضعيات : ✴البيبي هابط براسو :céphalique ✴البيبي بالعرض :transversale ✴البيبي هابط برجله :siège و لا تقدرو تلقاوها podalique ✅عمر الحمل :AG ✅محيط الرأس:BIP ✅عرض الكتفين :DAT ✅طول عظم الفخذ:LF ✅محيط البطن :CA ✅نبض القلب:AC ✅حركة الجنين :MAF ✅جنس الجنين :sexe : ✴انثى:XX ✴الذكر :XY ✅وزن الجنين :PFE و لا بالانجليزية :EFW ✅المشيمة :placenta : و عندها وضعيات :لازمهم شرح كبير :نشرحهم في منشور خلاف ان شاء الله ✅السائل الامنيوسي:LA ✅التشوهات :malformations ✅الخاتمة :هي conclusion :تلقاو فيها عمر الحمل عادة و ملاحظة حول نمو الجنين كاين ملاحظة صغيرة 😅: ساعات في صور تع الايكو تلقو وين القياسات مثلا : Bip :88 AG:35sa+1j و تحت منو تلقو : LF:70 AG:36sa+1j و انت الحمل تاعك عمر تاعو 36 اسبوع، راح تحيري و تقولي وعلاه الفرق ادا و قداه عمر الحمل عمر هذاك هو عمر الاعضاء على حساب الايكو مش عمر الحمل و هذي هي كيفاه تعرفو اذا النمو تع الجنين مليح و لا لا كيكون كاين فرق تع اسبوع و لا اسبوعين بين عمر الحمل و عمر الاعضاء بالزيادة و لا نقصان متخافوش قصدي ان النمو جيد و مش حاجة تخوف نشاء الله نكون فدتكم 😍😍😍