😊 #كيوبيد 😊
#الجزء_الاول
اياد:ليش لهلا ما خلص الاكل و ليش ما كابة الزبالة و انت رايحة على شغلك اليوم ....شبك ساكتة ....ردي...حتى بلوزتي الزرقاء ما غسلتيا لهلأ!!!
الاء:خلص لهون وبس ,ما بقا قادرة اتحملك اكتر من هيك , تعبببت
اياد:انت جسمك عم يحكك و صار بدك قتلة
الاء:تعااا يلااا اضربني
اياد:جاااي طولي بالك علي
كنت واقفة بالمطبخ وعم فرم بصل للمجدرة,ركض علي متل التور الهايج و انا حسيت حالي فقدت السيطرة على اعصابي وانفجرت متل البركان ,كبت كل الست السنين طلع ب لحظة وحدة ,مسكت السكينة و شكيتا ببطنو,حسيت بشي سخن على يدي , شفت الدم و خفت ,سحبت السكينة من بطنو فورا و زتيتا بالارض ,رجعت لورا انا و عم اتفرج عليه و عم اطلع على ايدي,حط ايدو على بطنو
اياد:شششششووووو عملتي؟
الاء:اييياااد
وقع على الارض و هو عم ينزف و انا وطيت لعندو
الاء(تبكي):يا ربي ششو عملت !!!!!اياااد اياااد
غاب عن الوعي و انا عم اصفقو على وجهو ليصحى ,رن جرس بيتي,قمت انا و متوترة و مشيت فوق سكربينتي على دمو حتى انتبهت ,شلحتا و زتيتا ,اجت على راسو
الاء: نور ....يا ربي اجت نور من الروضة
سكرت باب المطبخ و ركضت على الباب انا و عم مسح الدم بتيابي و فتحتو انا و متوترة
الاء:اهلين ماما...فوتي ...تعي معي
اخدتا على غرفة النوم و دخلتا و سكرت الباب,رجعت على المطبخ و فتحت الباب,شفت اياد بعدو بمحلو و ما في اي ردة فعل منو لا حركة و لا صوت و لا حتى نفس و يعدو عم ينزف دم,رجعت ركض على غرفة النوم ,غيرت تيابي و نزلت الشنتاية من فوق الخزانة و بلشت ضب تيابي و تياب نور و اخدت كل اوراقي المهمة ودفتر مذكراتي , مسكت ايد بنتي و نزلت من البيت بدون ما ارجع التفت لوراي ابدا ,وقفت تكسي و طلعت انا و عم ارجف و مخطوف لوني
الاء:على كراجات البولمان اذا بتريد
كنت طول الطريق عم اتلفت وراي و كانو حدا عم يلحقني ,نزلت و انا و ماسكة بنتي من ايد و بالايد التاني شنتاية السفر ,فتت على مكتب حجوزات
الاء:اذا بتريد احجزلي مقعد
العامل:على وين ؟
الاء:.....لوين....شو البولمانات يلي طالعة هلا؟
العامل :في بولمان بعد عشر دقايق نازل على اللادقية و في واحد على حلب بعد نص ساعة
الاء:احجزلي على اللادقية
العامل :تكرمي
الاء:يعطيك العافية
طلعت من المكتب و فتت على الحمامات العامة ,غسلت وجهي ,و اطلعت على ايدي كانو بعدن عم يرجفو,غسلتن عشر مرات بالصابونة,كنت عم شم ريحة نتنة منن و كانو كنت ماسكة شي نجس بايدي بس ما استغربت ,دم اشباه الرجال ريحتو بشعة بحكم انو الندالة بتجري بمجرى دمن, طلعت من الحمام انا و بنتي نور يلي كانت عم تتفرج و ساكتة ,طلعت بالبولمان و قعدت بالمقعد و حطيت بنتي على حضني,كنت ما مصدقة ايمت يمشي البولمان حتى حس حالي اني صرت بامان,بلشت الناس تطلع فيه حتى تعبى و مشي ,ارتحت كتير ,طالعت موبايلي من جزداني و اتصلت بالاسعاف ....
العضوة: 275918 , منذ 4 سنوات
ابو توفيق:لله يخليلك اياها , هاي يا معاذ اجتك رفيقة تلعب معا و تحل عني شوي , ما عاد الك حجة لتروح معي على الارض ميرفت : انا لازم روح , الاء ... زين صار مسؤوليتك طلي عليه كل شوي و شوفي شو لازمو , و هدول ادويتو ,و هاي ورقة مكتوب علين مواعيد الدواء, ما بدي وصيكي و ابو وفيق قول انت بتعرف شولازم تعمل ابوفيق : اكيد اكيد الاء: ما تاكلي هم ميرفت:و بالنسبة لنور اذا بتحبي تحطيا بروضة ما في مشكلة الاء: انشالله لتستقر اموري هون ميرفت : يلا سلام طلعت الست ميرفت من البيت و راحو نور و معاذ مع ابو وفيق مشوار على المزرعة و انا طلعت لعند زين , دقيت الباب دقتين و فتت ,كان ماسك قلم و قدامو دفتر,فكرتو عم يرسم , قربت عليه و شفتو عم يكتب , اطلع فيني نظرة عابرة و رجع حط عينو بالدفتر , فتحت باب البرندا ووقفت اتفرج على البحر الاء: بتروح مشوار على البحر؟ زين:..... و انا واقفة , شفت نور و معاذ و ابو وفيق عم يقطعو الشارع و رايحين على البحر , نادتلا صوت لنور و اشرتلا بايدي , ضحكت و ركضت هي و ماسكة ايد ابو وفيق ,رجعت فتت لجوا الاء: اذا بتريد بدي كرسي , وين بلاقي ؟ زين : ليكو قدامك ما شايفتيه الاء : اه عفوا ما انتبهت اخدتو و حطيتو بالبرندا و قعدت بما يقارب الساعة الكاملة انا و شاردة و عم فكر بشغلي الجديد و باياد و باهلي و ردة فعلن على اختفائي لمدة اسبوع ,رجعت التفتت على زين , شفتو صافن بالبحر , انتبه علي ,انا ابتسمت و هو دار وجهو فورا الاء: عم دايقك بقعدتي هون زين: لاالعضوة: 275918 , منذ 4 سنوات
#الجزء_السادس قمت وقفت و قربت لعندو و سحبت الورقة من بين ايديه زين: اذا بتريدي هاتيا لهون الاء: لحظة ...بس اقرأ ..... زين : هاتي الورقة لهون ....هاي خصوصيات , باي حق بتتصرفي هيك قرب بكرسيه علي لياخد الورقة و انا رجعت فيا لورا انا و عم اضحك , وقت حسيتو عصب الاء: طيب رح اعطيك اياها , بس توعدني اقرا يلي عم تكتبو باقرب فرصة لانو انا كمان بكتب اعطيتو الورقة زين : شو بتكتبي ؟ الاء: مذكراتي بس , ما يروح بالك للشعر والخواطر و هيك شي , هدول اكبر من امكانياتي زين : بس تقرأيني مذكراتك , بقرأك كتاباتي الاء: ......... زين : ما عجبك الاقتراح ؟ الاء: عجبني بس غير منصف , اذا قرات مذكراتي يعني صرت متل الكتاب المفتوح قدامك و بتعرف عني كل شي , ماضيي و حاضري و مستقبلي زين : نفس الشي بالنسبة الي , كتاباتي رح تعريني قدامك الاء: .....بفكر شي نهار اطلعنا ببعض نحن و ساكتين , بعدين نزلت راسي و كسرت الصمت الاء: جعت الا لسا ؟ زين : لا رجع بالكرسي لمحل ما كان , و انا وقفت عم اطلع فيه , كان شكلو و بياضو الناصع اشبه بملاك الو جناحين , اشبه بضو الشمس , سمعت صوت بنتي نور الاء : اجت نور طلعت من الغرفة و ناديتلا صوت تطلع لعندي الاء: فوتي هيدا زين , رح تصيري انت و اياه رفقات و رح تصيري تلعبو مع بعض رد على حكيي زين بدون ما يلتفت لعنا زين: ما بصير نكذب على الصغار و نوعدن بشغلات ما رح تصير حتى ما يخيب املن و نفقد ثقتن فينا الاء: ما عم كذب , انا واثقة من يلي عم قولو زين : احيانا الثقة الزايدة بتودي لعالم وردي ما بتشوفيه الا باحلام اليقظة الاء: ماما روحي سلمي عليهالعضوة: 275918 , منذ 4 سنوات
قربت نور لعندو و هي عم تطلع بالكرسي يلي قاعد عليه , فتل لعندا و اطلع فيا شوي , مدت ايدا نور , و سلمت عليه و باستو الاء: في شبه بيني و بينا ؟ زين : ...كل الصغار بشبهو بعضن , البراءة بتوحد ملامحن , وين ابوا ؟ الاء: .... مسافر..... و ما رح يرجع ابدا, يلا خلينا ننزل ناكل ما جعتي نور : ايه ..كتير كتير هالقد الاء: زين شوي و برجع زين : ما ترجعي تجاهلت كلامو و نزلت , اكلو نور و معاذ بالمطبخ و انا حطيت الاكل لزين بصنية و طلعت لعندو االاء : تفضل زين : قلتلك ما جوعان هلا االاء : طيب ,انا باكلو طلعت على البرندا و حطيت الصنية على حضني و بلشت اكل الاء : طيب كتير , ام وفيق طباخة ماهرة اطلع علي و بعدين نزل نظرو على الصنية زين : غيرت رايي , بدي اكل قرب لعندي و اخد الصنية مني و حطا على حضنو , رجعت اخدتا منو الاء : هاي صارت الي , بس خلص اكل بطلعلك وحدة رجع سحبا مني و انا مسكتا , هو يشدا لجهتو و انا شدا لجهتي زين : هاي جاي على اسمي الاء : و انت دللت و انا اخدتا , طيب خلص خدا و انا بنزل باكل بالمطبخ زين : خلص كلي معي , انت خدي معلقة الشوربة و انا معلقة الفريكة الاء: .....طيب , أي ساعة بترجع امك من الشغل؟ زين : ما بطول , المعمل قريب من هون الاء: معمل شو؟ زين: معمل علب عصير فريش , اكيد انتبهتي على شجر البرتقان انت و فايتة لهونالعضوة: 275918 , منذ 4 سنوات
الاء: أي لفتولي نظري بس ليش انت ما بتروح مع امك على المعمل؟ غص بالاكل و صار يسعل , ركضت جبتلو مي , شرب الكاسة و اعطاني اياها بدون ما يطلع فيني و كانو عم يتهرب من الاجابة , انا سكتت و ما رجعت طالبتو باي توضيح ,كملنا اكل نحن و ساكتين , خلص اول نهار الي بالشغل , على الساعة 8 اجا ليث لياخد ابنو معاذ ليث : كيف شفتي الوضع ؟ انشالله مقبول؟ الاء: ايه ,لحمدلله , ماشي الحال لحد الان ليث: اخد و اعطى معك ؟ الاء: أي شوي اخد ليث ابنو و راح و انا فتت على غرفتي نيمت نور و فتت لعند زين لشوف اذا لازمو شي, شفت ابو وفيق عندو ,رحت لزبطلو تختو لينام , كان في سلسلة نازلة من السقف لفوق التخت , خمنت اانو بيستخدما زين ليرفع حالو و يجلس قعدتو الاء: يعطيك العافية ابو وفيق, انا بكمل قربت لعندو الاء : حط ايدك على كتفي كرمال وصلك على التخت زين : وين امي ؟ الاء: عم تعمل شوية حسابات للشغل و بعدين هالشغلات صارت من مهامي و أي شي بدك اياه اطلبو مني , انت بمثابة اخي الصغير , ييلا ...اذا بتريد ....اكلنا من نفس الصحن ما في داعي لترسم حواجز بيناتنا قربت الكرسي على التخت ,بعد تردد , حط ايدو على كتفي و استند علي االاء: اممم منيح فيك تحط تقل على رجليك زين :ايه شوي حسيتو عم يضغط على حالو كتير و اول ما قربنا على التخت , انرمى عليه و هدى فيني و شدني , وقعت فوقو , قمت عنو انا و عم اضحك و هو متلبك , حاولت اخد الموضوع بروح رياضية حتى ما يدايق , حط ايد على التخت و مسك بايدو التانية السلسلة و جلس قعدتو انا و عم ساعدو الاء: ما بدك تنام ؟ زين : لا ما هلا , روحي نامي انت الاء: ماشي , أي شي لزمك دقلي على الحيط المشتركة بيناتنا انا و طالعة من عندو , شفت الست ميرفت ميرفت : ممكن نحكي شوي ؟ الاء: أي تفضلي نزلنا على الصالونالعضوة: 275918 , منذ 4 سنوات
ميرفت:كيف شفتيه لزين؟ الاء:هلا انا ما مختصة نفسيا حتى اقدر قيم و ما بفهم بهيك امور بس زين ما بدو حدا يعاملو على انو مريض ما بدو حدا يتعاطف معو او يشوف الشفقة بعيون الناس ,.ما بدو يحس حالو عالة على حدا او يلبك حدا فيه ميرفت : انا جبت مختصين من قبل و كان يرفض يتعامل معن و يصرخ و يقلعن , و انا حسيت انو انت من اول يوم قدرتي انو تتعاملي معو الاء : أي تقريبا ميرفت :هو نفد من هالحادثة باعجوبة , انا ما رح اطلب منك تنامي معو بنفس الغرفة ما بدي احرجك بس لو بطلي عليه كل ساعتين بالليل اذا لزمو شي و هو لازم يغير نومتو كرمال ما يصير ضغط على جنب واحد , عرفتي لهيك بتمنى ... الاء: ولايهمك, تكرم عيونك , هاي شغلتي ميرفت: ماشي بعد يومين من شغلي , فتت لعند زين بهدوء على الساعة 2 بالليل حتى اتفقدو , شفتو حاطط ايديه تحت راسو و صافن بالسقف الاء:مسالخير زين : مسالنور الاء: توقعتك نايم زين: ما جايني نوم و انت شو مفيأك ؟ الاء: كمان ما اجاني نوم قربت و قعدت على الكرسي الاء: انا ...لمحت عكازات بخزانتك , ليش ما بتستخدمن ؟ زين : ما بحبن و صعب المشي فين الاء: كل شي بكون اولو صعب و بعدين الواحد بيتعود زين : انت من هون ؟ الاء: لا انا من الشام سحبت الكرسي و قعدت قبالو زين : اممم و ليش جاي لهون من شو هربانة ؟العضوة: 275918 , منذ 4 سنوات
#الجزء_السابع الاء(متلبكة):......انا ...ولا من شي زين : ليش تغير وجهك ؟ نزلت نظري على الارض الاء: شو عرفك انو هربانة من شي؟ زين : من عيونك , في خوف بعيونك , كل ما بطلع فيكي بتهربي بنظرك و كانك خايفة اقراك جلس قعدتو و لف ايديه على صدرو الاء:....... بتهيالك زين : طب ركزي بعيوني وما ترمشي ركزت بعيونو و انا عم اضغط على اعصابي , نزلو دموعي و بعدين درت وجهي على باب البرندا و انا عم مسح عيوني بايدي زين :......من شو خايفة؟ الاء: انت يلي خايف , أنت يلي حابس حالك بغرفة و خايف تطلع تواجه العالم يلي برا بكرسي بدولابين , وو انت يلي هربان من انك تواجه حالك و خايف تمشي خطوة بالعلاج ... زين : صح .....صح ...نحن الاتنين منشبه بعض ,نحن الاتنين خايفين الاء:...... زين :... الاء: زين الاعاقة ما بتكون بالجسم بس , في ناس افكارن معاقة و عم يعيقو حياة غيرن, صدقني انا مر بحياتي ناس كتير عندن هالنوع من الاعاقة و هي اخطر نوع لانو بتأذي الغير , صح انا خايفة وهربانة بس هربانة لعيش حياة فيا كرامة , كرامتي يلي فقدتا من سنين و تاخر الوقت كتير لاخدت هالقرار و هربت , ما ندمانة انو انا هون بهالبيت و بهالغرفة و قاعدة على هالكرسي قبالك ,بس ندمانة على الطريقة يلي وصلت فيا لهون اما انت هربان من الحياة وحاطط حالك بحبس , اطلع و شوف الدنيا , شوفا من عيونك متل ما المفروض تشوفا و ما تشوفا من رجليك زين : .....من مين هربانة ؟ الاء: هربانة من الظلم و الاستغلال و الضعف و الصمت , شوف اطلع علي (تقف) ليكني بقدر اوقف و امشي على رجلي بس انا كنت ضعيفة كتير و حركتي مشلولة كنت متل االمقيدة كنت متلك ,ما قادرة امشي خطوة لقدام , كل ما فكر امشي كنت خاف و احسب حساب حكي الناس و نظرتن الي , اكيد رح ينظرولي على اني ناقصة زين :و هلا انت شايفة حالك قوية , الهروب ما قوة , الهروب من المواجهة ضعف الاء: ....يمكن , صح انا ضعيفة , هاي عم اعترف بهالشي و انت اعترف انك ضعيف و اعترف انك مريض و بحاجة لعلاج , اعترف انو يلي صار معك ما بايدك و انو الحادثة قضاء و قدر , و انو ابوك خلص عمرو بيومو ,و انت ما دخلكالعضوة: 275918 , منذ 4 سنوات
بعد نظرو و شرد بالحيط قبالو و دمعو عيونو الاء: اكيد ابوك ما رضيان عن حالتك هيك , لازم تكون قوي و تتعالج و تكمل حياتك و تستلم شغلو و اضل محافظ على اسمو , امك لحالا ما بتقدر تقوم بكل هالمسؤولية لحالا و حتى لو ما مشيت , فيك تكمل حياتك هيك , انا ما عم اضغط عليك و حملك شي فوق طاقتك لانو هالشي انت بتقدر عليه ..... زين :الحكي سهل , انت ما بتعرفي شو يعني تكوني بالمشفى و يخبروكي انو صرتي مقعدة و ابوكي مات , خبرين بنفس اليوم و الحقيقة الابشع انو انا يلي كنت سايق السيارة , هو ما كان بدو اياني سوقا لانو كنت لسا عم اتعلم ....هو ما كان بدو يموت .....انا قتلتو ...(يبكي)..هو مات و انا بقيت عم اتعذب ....االشعور بالذنب و الندم عم ياكلني كل يوم ....عم اشتقلو ...كان رفيقي واخي و ابي ...خسرت كل العالم وقت خسرتو .... ما بدي عيش بلاه ...ما اعطوني وقت ازعل عليه , خنقوني بالادوية و الاجهزة فورا قربت لعندو و قعدت جنبو على التخت و لفيتو و طمر راسو بحضني و انفجر بالبكا زين : هاي اول مرة ببكي عليه من قلبي .... ما عم اقدر اطلع بوجه امي ...حتى ما عم اقدر اطلع بوجهي بالمراية ....ما عم اقدر كمل حياتي و انا هالقد تعبان و حامل كل الهم بقلبي.....انا تعبان تعبااااان و تعبت الناس يلي حولي الاء: ......... زين : راح و تركني على كرسي ...بقدر عيش كل العمر بلا رجلين بس ما بقدر عيش بهالذنب , قطع كل شهيتي للحياة , موتني و انا بعدني عم اتنفس بقي زين عم يحكي و يبكي لساعة و اكتر , حتى تعب و نام , غطيتو بالحرام و انا عم اطلع عليه , كان متل الولد الصغير , سكرت الضو و طلعت, رجعت بعد ساعتين كان نايمالعضوة: 275918 , منذ 4 سنوات
#الجزء_التامن تاني يوم بعد ما افطرنا , خبرتو لزين انو لازم يطلع من غرفتو لانو ام وفيق بدا تعزلا و هي كانت مجرد حيلة حتى طلعو من عزلتو , وقت صار بالطابق الارضي , وقفت وراه و جريت الكرسي باتجاه باب البيت زين : لوين ؟ الاء: مشوار , يلا نور زين: اذا بتريدي رجعيني لجوا الاء: لا مافي طلعنا من البيت و زين معصب و عم يصرخ علي , و انا عم اضحك و ماشية و نور ماسكة بالكرسي , قطعنا الشارع و تابعت على البحر , تعذبت بالكرسي انا و عم جرو بالرمل بس ما وقفت الاء: الطقس حلو كتير اليوم زين : ايه الاء: لف ايدك على كتفي , بدي قعدك على الرمل زين : خلص بضل بمحلي الاء: اذا بتريد ما تكون عنيد متل الاولاد , ما رح تندم زين : اوووف طيب ,انت العنيدة الاء : 1 2 3 يلا هدى تقلو علي و بعدين زت حالو على الارض , مسك بايدو رمل و رماني فيه الاء: ههههههه لاااا هيدا رمل ما تلج , عبتلي تيابي ....شوف شو بدي اعمل فيك رحت على البحر ومسكت مي بين ايدي و ركضت لعندو حتى رشو فيا , وصلت لعندو كان ما ضل مي ... الاء: اووف زين : ههههه ما زبطت معك ....ليكي نور عم تجمع صدف قعدت جنبو و اطلعنا بالبحر , رجع ضهرو وسند ايديه على الرمل الاء: لو جبنا شي ناكلو معنا ... نور هاتي شوف شو جمعتي صدف نور :يلا.....خدي ....كل هدول لزين ... الاء:ولله , زين يلي ما عاجبو شي و قاعد مكشر زين : يسلم ايديكي رجعت نور على الشط و انا قمت لحقتا , شلحت من رجلي و بليت رجلي بالمي , صارت نور ترشني بالمي و انا رشا نحن و عم نضحك , اطلعت بزين شفتو عم يطلع فينا و يبتسم , اشرتلو بايدي و رجعت لعندو الاء : بتعرف تسبح ؟ زين : طبعا الاء: بكرا بس ترجع تمشي بدك تعلمني السباحة زين : بس ارجع امشي انت رح تمشي من عنا , كيف بدي علمك بقا ؟ الاء: ....اممم ....نسيتا لهاي .. زين : وين زوجك مسافر؟ الاء: زوجي ما مسافر زين : بس من يومين قلتيلي مسافر الاء: .....كان قصدي انو هو .... زين : ما تبدلي الكذبة بكذبة , قولي ما بدك تحكي و بس الاء:ما بدي احكي زين : هربانة منو ؟ الاء: قلتلك ما بدي احكي زين : و بنتو ...هو من حقو يشوف بنتو الاء: ما بينقال عنو اب , اصلا ما بينقال عليه رجال زين : ليش ؟ الاء: اسباب كتيرة ما بدي احكيا لانو ما بدي اتذكراالعضوة: 275918 , منذ 4 سنوات
زين : ليش ما طلقتي منو لهلا؟ الاء : خوف منو , هو انسان شرس , و خوف من الناس و خوف من كلمة مطلقة و خوف على بنتي نور و الاهم انو ما لقيت جنبي سند زين : اممم يعني انت متخبية ببيتنا منو؟ الاء:أي , عندك مانع , انت شو فارقة معك , هاي حياتي الشخصية و ما رح تاثر عليك زين : اكيد , هالشي بيرجعلك الك وحدك بس سالت فضول , و بحال عرف محلك عنا شو ممكن يعمل ؟ الاء : ولاشي , رح بيسحبني من ايدي و بيرجعني لسجنو مرة تانية كرمال يضل يستفاد مني , انا جاجة بياضة بالنسبة الو , بس هو ما دخلو, انا يلي خليتو يتمادى بسكوتي عن غلطو و اهاناتو و اهانات اهلو , كنت لازم حط حد الو او اتركو و امشي زين : بتحبيه ؟ الاء : بكرهو و كتير كمان , على قد ما كنت بحبو على قد ما انا بكرهو هلا, انقلب كل حبي الو لكره ,ضيعت سنين عمري معو , انا مشكلتي وقت بحب بعطي كتير لابعد الحدود و ما بنطر مقابل من الطرف التاني بس هالشي غلطالعضوة: 275918 , منذ 4 سنوات
زين : لا ما غلط , انت اعطيتي للشخص الغلط , في ناس ما بتستحق الاء: امممم ....امسك مني هالحجرة و اكتب على الرمل اول كلمة بتخطر على بالك اخدا مني و ابتسم و اطلع فيني هو و عم يكتب , اطلعت على الرمل الاء: كيو..... زين :كيوبيد , اله الحب , هو اسطورة عند الاغريق, بتقول انو كيوبيد هو طفل صغير عندو جناحين متل الملاك و حامل سهم بايدو و بيصيب فيه البشر و بيوقعو بالحب بشكل جنوني الاء: و هو ما حب وقت كبر؟ زين : بتقول الاسطورة انو كان رايح بمهمة ليصيب سايكى بسهمو بس جرح حالو و حب سايكى امرأة فائقة الجمال و تزوجا بس كان يزورا بالليل و منعا من انو تشوف وجهو بس فضول سايكى دفعا لتختلص النظر عليه و اول ما شافتو حبتو فورا و عرفت الام فينوس امو لكيوبيد بهالشي و غضبت على سايكى و حكمت عليا بالنوم الابدي الاء: ايه ؟ زين : بس قبلة كيوبيد انعشتا و رجعتا للحياة مرة تانية الاء: ايييه , و انت ؟ ما صابك سهم الحب زين : الحب ....انا بشوف الحب بمر بمراحل متلو متل العلقة يلي بتكبر جوا الرحم و و بتمر بمراحل لتصير بالاخير طفل , طفل حجمو اكبر من انو يسعو الرحم و بحين وقتو ليطلع من محلو و يشوف النور , هيك الحب بيتخبى بالقلب و بيبلش صغير و بيكبر ليصل لمرحلة القلب ما بقى يسعو و لازم يطلع على الضو الاء: و كيف بطلع الحب للضو؟ زين : بالزواج الاء: الزواج بيقتل الحب و بيحل الروتين و الملل بدالو زين :الزواج هي المرحلة الاخيرة يلي لازم يصلا الحب , بصير الشريك متل الهوا يلي لازم تتنفسيه كل يوم , بصير جزء منك ,كانو عيونك او ايديكي , يمكنالعضوة: 275918 , منذ 4 سنوات
بحياتك ما تطلعي على عيونك وتقدري قيمتن انت و مالكتين , حتى نخسر الشي منحس بقيمتو مسك ايدي زين : ليش بعدك لابسة المحبس الاء: لانو بعدني متزوجة زين : لا انت مطلقة و من زمان , باللحظة يلي فقدتي الاحساس بانو جنبك رجال صرتي مطلقة فعليا ,,شوية حبر على ورق ما بخلوكي ممتزوجة قلب ايدي و مرر اصبعو على خطوط ايدي الاء: بتقرأ بالكف ؟ زين : هيدا خط القلب و هيدا خط العقل , ما في توازن بين عقلك و قلبك ,اذا حبيتي بتحبي بجنون و اذا كرهتي بتكرهي بنفس الحدة , العقل عندك مقيد بعواطف او شبه مغيب و هيدا خط الح..... رفع عيونو و اطلع فيني الاء: شبك ؟ زين : هيدا خط الحياة و هيدا القدر الاء: ايه شو عم يخبروك هدول الخطوط الاربعة ؟ زين : ..... رجع ضم ايدي على بعضا زين : ما رح خبرك , رح احتفظ بهالشي الي الاء:على كل حال انا ما بامن بهالششي و حرام اصلا زين : ولا انا ....بفضل ما امن ...انا تعلمت قراءة الكف من باب التسلية و الفراغ خلال هالسنة الاء: اممم , شو منرجع ؟ زين : متل ما بدك الاء: طيب منقعد شوي وبعدين منرجع , انا ما خبرت امك انو رح نروح على البحر اليوم , بتدايق شي؟ زين :لا ابدا اطلعت على نور , كانت بعدا عم تجمع صدف , رجعت التفتت على زين شفتو عم يطلع علي نظرة غريبة , ما بحياتي حدا اطلع علي هيك نظرة الاء(مبتسمة ):شبك ليش هيك عم تطلع فيني زين : هيك ...وجوه بعض العالم بحسسونا بالراحة و السلام وملامح وجهك ناعمة و مريحة بطريقة غريبة , عندك تناغم بين عيونك و اانفك و شفايفك و لون بشرتك السمرا و كانو كلا الات موسيقية و عم تعزف مع بعضا على ايقاع واحد لتعطي احلى سمفونية بسمعاالعضوة: 275918 , منذ 4 سنوات
الاء :هههههههه شو هالتشبيه , من وين طلعت فيه زين: جد هيك حسيت اول ما شفتك اول مرة الاء: اه كرمال هيك كنت رح تكسر الكاسة على راسي زين : صدقيني ما كنت شايفك منيح الاء:طيب .... نووور.... يلا ماما بدنا نرجع ...يلا نقوم سندتو على كتفي و هو عم يطلع فيي و قعد على الكرسي و طلعنا من البحر و مشينا على الرصيف الاء: رح نتمشى شوي ,قبل ما نرجع على البيت ,اوك زين : طيب نحن و عم نتمشى شفنا محل فطاير الاء: ريحتن بتشهي بس ما معنا مصاري زين : ما مشكلة هدول جيرانا , خدي يلي بدك اياه و بعدين منحاسبن الاء:ةشو بدك تاكل انت؟ زين : على ذوقك الاء : رح جيب فليفلة و جبنة و زعتر اخدنا الفطاير و تابعنا مشي و انا عم اطلع بالمنطقة , كان كلها بساتين و شجر و سواقي الاء: حلوة منطقتكن كتير كانو قاعدين بالجنة زين :ايه و انا بحبا كتير , بتصفي الذهن و بتغذي الروح لفينا و رجعنا على البيت , اخدت مصاري و رجعت لحاسب بياع الفطاير و انا على الطريق خطر على بالي اتصل باختي ولاء لاعرف كيف الوضع عندن الاء: الو كيفك ولاء: مين ...الاء !!!! الاء: ايه ولاء: وينك انت ؟ الاء : جنبك حدا ؟ ولاء : لا انا بالجامعة الاء: انا باللادقية ولاء : شووو؟؟؟شو عم تعملي عندك , هربانة , ارجعي الاء: كيف الوضع عنكن ؟ ولاء: منيح احسن من قبل ,خف التوتر شوي بس زوجك متل المجنون , كل يوم و التاني بيتصل فينا, مفكر انو مخبينك عنا و من يومين اجا كمان الاء: الله ياخدو قط بسبع ارواح ,شو بدو؟ ولاء: بدو بنتو , و اخوكي سامر جانن منك من الشي يلي عملتيه و كملتيه باختفائك فجأة و الناس كترت حكيا , كل واحد عم يخمن سبب هروبك شكل , ارجعي فورا و سكتي هالعالم الاء: انشالله , ليهدا اياد شوي و لخلص الشغل يلي علي هون ولاء: شغل شو ؟ الاء: بعدين بخبرك , ولاء ما تقولي لحدا انو اتصلت فيكي , ما بدي حدا يعرف وين انا ولاء: طيب رح سيف رقمك و منبقى على تواصل بس حطي عقلك براسك و ارجعي فورا الاء: ماشي سلامالعضوة: 275918 , منذ 4 سنوات
#الجزء_التاسع رجعت على البيت و شفت ليث و معاذ واقفين على الباب ليث: صباح الخير الاء: صباح النور تفضلو ليث: المسا انشالله , هلا بدي روح على شغلي , هاي معاذ ...خود بابا شنتايتك معاذ: وينا نور ؟ الاء: تركتا بغرفة زين..الله معك ليث طلعت انا و معاذ لعند زين , شفتو عم يرسم و نور واقفة جنبو عم تتفرج الاء: واو ..انت متعدد المواهب معاذ: خالة نحن نازلين انا و نور نلعب بااجنينة تحت الاء: ماشي ما تبعدو , خليكن قبال الببيت زين : روحي قعدي على التخت الاء: ليش ..بدك ترسمني !!! زين : ايه ...ضمي رجليكي على بعضن ..ارفعي راسك شوي ...و اطلعي على ضو الشمس ..افردي شعرك الاء: منيح هيك زين : ايه .... شعرك اسود كتير ...ما تتحركي .... الاء: ما طول كرمال ما تتشنج رقبتي زين : ما تبلشي نق الاء: اوك دافنشي زين: ههههههه...قلتلك ما تتحركي الاء: كنت بدي شوفك انت و عم تضحك بس , لانو نادرا ما تضحك زين : اممم , خلص وعد مني كل ما تطلعي بوجهي رح ابتسم , اذا هالشي بيسعدك الاء: اكيد , زين شو عمرك ؟العضوة: 275918 , منذ 4 سنوات
زين : 24سنة الاء: عمرك صغير بس بحس شخصيتك و طريقة كلامك كانك بال 29 سنة شو سبب هالتناقض ؟ زين : الوجع والتعب و الفقد بيكبر الواحد بسرعة الاء: معناها انا عمري 40 سنة زين : انت عمرك 27 سنة بس باين عليكي عمرك 13 سنة , حسيتك طفلة الاء: اذا مفكر حالك بهالطريقة عم تغازلني , هيدا ما غزل , هيك انت عم تضحك على عقلي زين : وقت كنت اليوم عم تلعبي انت ونور على البحر , ما حسيتك اكبر منا بكتير , و بعدين بالشكل الطبيعي الانثى قد ما كبرت بضل جواتا طفلة صغيرة الاء: طيب انت بتشوفني انثى ؟ زين : ههههههههه , عنجد من كل عقلك عم تساليني هالسؤال الاء : جاوب زين : طيب رح جاوب بس خليكي هيك و ماتتحركي ,بدك تعرفي انا كيف بشوفك ؟ الاء : أي بس بدون مبالغة لانو من يومين شفتني زين : من يومين ولا من ساعتين ولا من سنتين , ما رح تتغير نظرتي الك ,رح ينبقى بذهني الانطباع الاول عنكالعضوة: 275918 , منذ 4 سنوات
الاء: لا بتتغير , عم قلك من تجربة حية , نظرة الرجال بتتغير للمرة و خاصة بس يملكا زين : يلي ببطل يشوفك انثى معناها هو ما بقى شايف حالو رجال جنبك الاء: ...... كانت كلمات زين متل التراتيل السحرية , عم تفوت لعقلي و تعمل ثورة عارمة و تقلب المفاهيم يلي كانت مرسخة من زمان و تغير نظرتي حتى لنفسي زين : العيب فيه ما فيكي , شبك سكتي , ما بدك تعرفي انا كيف بشوفك بعيوني ؟ الاء: ... تفضل وقف رسم و اطلع فيني زين : بسمعك متل الغنية الحلوة يلي بحب اسمعا كل يوم و ما بمل منا , بشوفك متل اللوحة المرسومة باتقان و انسجام و ما بمل من الفرجة عليا , بشوفك متل هالبحر حلو بكل احوالو ان كان هادي او هايج , بشوفك متل هالبستان الاخضر كلما اعتنيت فيه بيعطيك اكتر , بشوفك المدى و النظر و.... الاء: كل هدول كتار علي , بدي تشوفني الامل و بس زين : بس انا لسا ما خلصت الاء: حاجة لليوم , بكرا منكفي , رقبتي وجعتني زين : ماشي متل ما بدك الاء : انا رح انزل شوف معاذ و نور قمت وقفت و مشيت للباب زين:الاء ... الاء: ايه زين : انا بدي اتشكرك كتير على هاليوم الحلو الاء: زين انا يلي لازم اتشكرك , انا مبسوطة كتير بقعدتي هون , كتير مرتاحة و بكون سعيدة اكتر لو بتتجاوب معي اكتر من هيك زين : ...... الاء: يلا سلام