الجزء الأول: 28/4/2008-الساعة11:00مساءا اعطيت مفاتيح سيارتي لناطور ابو ايمن ليصفا بكراج الفيلا و طلعت على البيت ،كان نهاري متعب و طويل و ختمتو بسهرة انا و رفيقتي تالا ، طلعت بوجهي على غرفتي ،شلحت تيابي و فتت تحممت و بعدا لفيت المنشفة على جسمي و طلعت ، فتحت خزانتي و طلعت قميصي النوم الحرير الاسود ، ومسكت لوشن الجسم بريحة الخزامى و بلشت ادهن جسمي ،فجاة سمعت صوت حركة من برا ،رحت على شباك غرفتي ، القيت نظرة سريعة و ما شفت شي ، فتلت ضهري لارجع على تختي ،فجاة انفتح الباب و طلع قبالي واحد طويل و لابس اسود من فوق لتحت، بلوزة و بنطلون اسود و لابس طقية سودة براسو و ما مبين من وجهو الا عيونو ، وقع قلبي و خفت و رجعت خطوتين لورا و ما عرفت شو بدي اعمل ولا شو بدي احكي .. مين انت … كيف طلعت لهون.. انا جارتكن ام فادي جاي اشرب عنكن فنجان قهوة….يعني مين انا، ما مبين من شكلي مين انا … بلشت صرخ و قول حرامي …..حرامي …..و برمت ضهري لافتح الشباك و نادي لناطور بس كان اسرع مني و بلمح البصر مسكلي ايدي و حطن ورا ضهري و حط ايدو التانية على تمي و قرب تمو على داني و قلي ولا نفس بدي اسمع ، خليكي هادية و ساعدينا لنخلص شغلنا بسرعة و منطلع من هون و ما منأذيكي ،بس اذا بدك تعذبينا و تتذاكي عيارك طلقة براسك و خلي ابوكي و امك يترحمو على شبابك … بلشت ابكي وحسيت حالي رح يغمى علي بس ما قدرت اتحرك ابدا حتى ما توقع المنشفة عن جسمي ، و قبل ما يكمل حكيه ، اجا شب تاني على الغرفة لابس نفس اللبس … جعفر مين هاي يلي بين ايديك ؟ جعفر: يمكن هاي بنتو التانية ؟؟؟ ….على اساس قلنا وفيق انو ما في حدا بالفيلا الا الخدامة و الناطور و كلن بايطاليا …