#أين_جوهرة_أورانوس_بقلم_نسمات_الليل
الجزء الأول:
أنفاس عدة متسارعة ... نتيجة الركض المتواصل ... قلب عم يخفق خوف ... لحد ما أعلن استسلامو ..... وقف شب بأواخر العشرينات بعد ركض متعب .... حط ايديه على ركبو وهوي عم يلهث .... ولمح الشباب الخمسة انن قربو وهني عم يلهثو الضعفين ..... ومجرد ما خففو سرعتن مأمنين انو خلص استسلم ..... خبط البراميل اللي جنبو بإجرو ... وركض بأقصى سرعتو بعد الاستراحة القصيرة كتير اللي اخدا .... صار يركض ويلتفت وراه ..... لحد ما خبط بصدر شخص ...... وتمتم بتلعثم ......
-إ ... إ .... إياد بيك .......
-إياد: حملو هالزبالة عالقبو وجهزولي ياه ... بدي ياه ع اخر نفس وجاهز للاعتراف ....
-والله ما خصني يا بيك ... والله ما بعرف شي ......
كان عم يحكي وهني عم يجروه عالسيارة .... وإياد الرجل الثلاثيني بعقدتو المعتادة واقف وايديه بجيابو .... ناطر لوصلو الشباب الخمسة لعندو .... اللي كانو عم يلحقو الشب ....
-إياد: بتمرقو بتاخدو حسابكن وما بقى بدي شوف صورة وجكن ....
-بس يا بيك هوي متمرس كتير ....
-إياد: شقفة زبالة ما عرفتو تمسكوه ...... انقلعو من خلقتي ......
تركن وطلع بسيارتو المفيمة ..... ولع سيجارتو .... ومشي السائق ......
______________________________________
بفيلا صغيرة ... سيارات عم تنصف ... وينزل منها ناس لابسين اسود .... ونظاراتن الشمسية مغطية عيونن ...... عم يدخلو ورا بعض .... ويقربو من بنت بنص العشرينات .... ويسلمو عليها .....
-العمر الك حبيبتي يارا ....
-البقية بحياتك بنتي يارا ....
-الله يصبرك انتي واخوكي ويكون معكن .....
تعازي كتيرة ما عم تخلص .... وصورة كبيرة بشريطة سودا ع طرفا لرجل بالخمسينات محتلة حيط كامل ....... ويارا قاعدة عالكنباية ووجها اصفر ... عيونا منفخة .... ومبين عليها التعب الشديد .... ماسكة بإيدا الطوق اللي لابستو برقبتا .... اللي بيحمل اسم امها وابوها ... ع كل طرف اسم ..... برمتو ع الطرف اللي بيحمل اسم ابوها (هلال) .... وباستو .... ورجعت خبتو بقلبا وكفتو دموعا ... وهيي عم تتذكر المشهد اللي اهداها ياه ابوها فيه هالطوق ....
////ذكريات .....
-هلال: بنتي هاد الطوق صممتو خصيصا لامك الله يرحما .... كانت دايما تحلم انها تلبس برقبتها اسمي واسما .... هلأ صار الك ....
-يارا: ليه هلأ بابا ... بعد ما مر على وفاتا ٥ سنين ....
-هلال: هلأ لقدرت طالعو من مكان ما كانت حاططتو امك ... انتي احق فيه .... اوعى تشلحيه بحياتك كلها ....
-يارا: اشتقتلا كتير بابا ... كتير ....
-هلال: وانا كمان يا قلبي ...
-يارا: في شي ؟ ليه صفنت ؟ .....
-هلال: في رسالة مهمة ... بدي اعطيكي ياها بكرا ... ذكريني فيها ...
العضوة: 275918 , منذ 4 سنوات
-يارا: رسالة شو ....؟ -هلال: بشرحلك بس اعطيكي ياها ... يلا انا لازم روح عالشركة ... انتبهي لحالك بابا ....//// طلعت من صفنتها على همس ناح اذنها .... كانت الخادمة .... -الخادمة: ست يارا الكل عم يسأل عن تيم بيك ..... وقفت يارا ... واتوجهت ناح غرفتها ... مسكت تلفونا وصارت تدق لتيم وتتأفف .... -يارا: لك وينك ... وينككك .... فتحت باب غرفتها صديقتها المقربة حياة ..... -حياة: مين اللي وينك .... -يارا: اخي تيم ... مانو معقول من شوي اندفن ابي والناس عم تعزي وهوي مختفي ... بعرفو لامبالي بس مش هالقد .... -حياة: الغايب عذرو معو ... روقي .... ____________________________________ بقبو معتم ..... الشب متربط على كرسي وكلو دم .... والضربات مبينة كتير ع وجو وجسمو ... والمي عم تنقط من شعراتو ...... انفتح الباب ... وفات إياد .... وحكا واحد من الشباب ... -صار جاهز يحكي يا بيك .... قرب اياد من الشب ... حط اجرو ع الكرسي اللي قاعد عليه ... وقرب وجو منو .... -اياد: شو تيم بيك ... رح تحكي وين جوهرة اورانوس او لا .... -تيم: بشو بحلفلك اني ما بعرف وينا ... بحياتي كلهااا ما شفتا ... وما بعرف عنها ولا شي ... اعتقني بترجااك ... والله ما بعرف ... اليوم عزا ابي ... لازم كون هونيك ..... -اياد: احكي وينا ... وبتفل .... -تيم: والله العظيم ما بعرف .... رفع راسو اياد وشرارة الغضب عم تطلع من عيونو .... واطلع بالشباب .... -اياد: على اساس جاهز يحكي ....العضوة: 275918 , منذ 4 سنوات
-متل ما شايف يا ريس ما بيعرف شي .... -اياد: لكن جيبولي اختو بلكي بصير يعرف ..... -تيم: لا لا يا بيك بترجاااك ... الا اختي ... والله لو بعرف لقللك ... شو بدي بهالجوهرة .... -اياد: حقها ملايين الدولارات .... وبتقللي شو بدك فيها .... -تيم: ما بدي هالملايين لما عم تإذيني ورح تإذي اختي .... برحمة ابي ما بعرف ..... -اياد: ابوك غدر فينا .... واكيد سلمك ياها قبل ما يموت ..... -تيم: ابي شو الو علاقة ... اساسا بحياتو ما قربنا من حياتو العملية ..... -اياد: رح اطلق سراحك هلأ ... معك بس ٣ ايام لتلاقيها ... بدك تدور عليها بكل الاماكن اللي ممكن يكون ابوك مخبيها فيها .... واذا ما لقيتها ...... رح بكون حسابك كبيير ... حساب ما رح فيك تسدو بسهولة ... واوعى تجرب تلعب بديلك ... شبابي وراك عالدعسة .... ________________________________________العضوة: 275918 , منذ 4 سنوات
الساعة ٨ المسا ..... واقفة يارا ع شباك غرفتها ... وذكرياتا مع ابوها محتلة ذاكرتها .... لمحت اخوها جاية وعم يتنحنح ... ركضت لتحت ... وفتحت الباب .... -يارا: لك اخي شووو صاااير معككك ... مين عمل فيك هييك ...... -تيم: فوتيني بسرعة وافتحي التلفزيون .... -يارا: شو بدك بالتلفزيون هلأ خبرني شو في ....العضوة: 275918 , منذ 4 سنوات
-تيم: التلفزيون بخبرك ..... فاتو عالصالون ... وشغلت يارا التلفزيون ... وقعد تيم مقابيلو .... كانت المذيعة هلأ ابتدت تحكي .... وفي صورة مصغرة ع طرف الشاشة بتحمل جوهرة باللون الازرق .... -المذيعة: بعد وفاة رجل الاعمال هلال بدران ... اختفت معه الجوهرة الثمينة التي أُلقيَ عليها اسم اورانوس لشدة شبهها بالكوكب اورانوس من حيث اللون والشكل ... مما ادى الى تحركات سرية من قبل عدة رؤوس كبيرة في البلد بالبحث عنها .... مما تأكد انها تعود ملكيتها الى رجل الاعمال الشهير إياد حرب ... التي اشتراها مؤخرا من متحف كبير في بريطانيا ..... والتي تبلغ قيمتها حوالي ١١ مليون دولار ...... طفت التلفزيون يارا واطلعت بأخوها .... -يارا: شو الو علاقة بابا ... ؟ ومين هاد اياد حرب .... ؟ -تيم: هوي اللي عمل فيي هيك ... بدو الجوهرة .... -يارا: نعممم ؟؟ ... -تيم: قال ابوكي اخدا منو ابصر شو الاسباب .... -يارا: ابي من وين بدو يكون معو هيك مبلغ ... نحن صح وضعنا المادي منيح ... بس ابي رجل اعمال بسيط ... مانو ملياردير ...... شو بدو يكون الو علاقة بجوهرة بتسوى ١١ مليون دولار .... -تيم: ما بعرف رح جن .... يا خوفي تكون اسرارو كتيرة .....العضوة: 275918 , منذ 4 سنوات
-يارا: قايمة جيب شنتة الاسعافات الاولية ... خليك مكانك ...... راحت ثواني ورجعت ... وهيي وعم تساويلو جروحو كان هوي عم يحكي ..... -تيم: الجوهرة كتير فريدة من نوعا ... مع انها صغيرة كتير ... بس قيمتها المادية كبيرة ... وخصوصي شكلا الدائري معطيها جمالية خاصة متل اللؤلؤ .... وسمعت انو هيي الوحيدة بالعالم ... وانباعت كذا مرة بالمزاد العلني ... لحد ما وصل سعرها لل١١ مليون ... بعد ما كانو مبلشين المزاد بس ب ٤ مليون دولار ... وفي ناس من برا مستعدين يدفعو دوبل ال١١ مليون لياخدوها .... -يارا: كيف هيك شي بدو يكون وصل لأبي .... مستحيل ... انا متأكدة في غلط ..... -تيم: معي بس ٣ ايام للاقيها ... او ح يكون التمن غالي كتير .... -يارا: شو عم تحكي ... ؟ من وين منا نلاقيها .... وليش مأكدين انها مع ابي ... ومتحططين عليك .... -تيم: قال انا وحيدو ... ورح يأمني على كل شي .... ولا مرة جايبلك سيرة قبل عن هيك شي ؟؟ كنتي مدللتو .... -يارا: في شي براسك ؟!! .. بعرف ولهلأ ساكتة !! ... -تيم: انو قصدي تحصري عقلك منيح .... -يارا: هيك شي ما بدو تذكر ... ما بينتسى !!! ... -تيم: من بكرا انا وانتي لازم نقلب الفيلا والشركة زاوية زاوية .... والبيت الجبلي .... -يارا: تمام ... بس هلأ يلا قوم نام ... لنوعى بكير مرتاحين .... كانت عم تحكي هيي ورايحة ناح الشباك ..... -تيم: في حراسة ما هيك ؟ ... -يارا: مبلا ... الله يستر ..... اندق التلفون جوات غرفة نوم فخمة .... طالع اياد حالو بالزور من تحت الحرام ... وبرم ناح تلفونو ... مسكو وهوي عم يتأفف ... ومجرد ما لمح الاسم ... جلس قعدتو ... ورد .... سمع مطولا حديث الطرف التاني لحد ما رد ... باللغة الانكليزية .....العضوة: 275918 , منذ 4 سنوات
-اياد(بالانكليزي): انا سبق وقلتلك طمن حالك استاذ نيلسون ... الجوهرة رح تتلاقى ... بأسرع وقت ممكن ......... تمام ..... سكر الخط واتنهد .... -اياد: وين خفيتا يا هلال وييين .... قلتلك مليون مرة هاي مانا الي ومشروعا ضخم ... بتدمرني وبتدمر كل سلالتي اذا اختفت .... اذا ما بتتلاقا رح عذبك وانت بالقبر ..... عم تعلقني بناس كبيرة برات البلد .... _________________________________________ في صباح اليوم التالي ...... -يارا: يلا قووم تيم ... ما منا نضيع وقت .... -تيم(عم يتثاوب): حلمت انو لقيناها معو بالقبر ..... كتمت ضحكتها ..... وضربتو ع كتفو بخفة .... -يارا: قوم قوم مبارح كان دفن ابونا وبدنا نضحك اليوم ..... -تيم: ليش نحن معنا وقت نحزن عليه ... يلا جهزيلي تيابي عالسريع لكنت اخدت دوش ... -يارا: يلا ما تتأخر .... بعد نص ساعة كانو بسيارتن وفي سيارة وراهن عم تلحقن ... حمل واحد من الشباب تلفونو ..... -اياد بيك ... تحرك هوي واختو هلأ ... شكلن متوجهين عالشركة ... امرك يا ريس ....... وصلو عالشركة ونزلو .... طلعو ع مكتب ابوهن .... وصارو يدورو بكل مكان ... بالادراج ... بين الكتب ... بالخزنة ... ورا اللوحات .... بكل مكان .... رفعت راسا يارا من تحت الطاولة وهيي عم تتأفف ... حطت ايديها على خصرا ..... -يارا: والله متل ما شايفتك قدامي مستحيل يكون ابي الو علاقة .... -تيم: تعي ندور بباقي المكاتب ... بالارشيف ... او بحيلا محل ...العضوة: 275918 , منذ 4 سنوات
هيي وعم تعبر من قدام المكتب اطلعت عالسجاد بالارض ... -يارا: نحن ما دورنا تحت السجاد ... ارفع السجادة اللي عندك .... -تيم: يعني معقول يخبيها تحت السجاد .... كان عم يستهزأ هوي وعم يرفع السجادة اللي تحتو ... وهيي بدورا عم ترفع السجادة اللي تحت المكتب ... عقدت حواجبها لما لقت باب خشبي .... وصرخت .... -يارا: تعا شوف شو في هوون تيم .... ركض لعندا وفتحو الباب .... وبين قدامن خزنة .... رفعوها ... وطلعو مكانا ما كان في شي تاني ابدا غير الخزنة ....... حطو الخزنة مقابيلن ... وصارو يجربو ارقام ..... اعياد ميلادن ... تاريخ وفاة امهن ... كتير ارقام .. بس ما كان يمشي الحال ..... -تيم: اوووف ... ما رح يمشي الحال .... لازم جيب شي حدا يفتحا .... -يارا: استنى ... خلينا نجرب تاريخ افتتاح الشركة ... بتتذكر ايمتا ..... -تيم: متل اسمي .... حط التاريخ ... وكمان ما مشي الحال ..... اندق تلفون تيم ... كان رقم مجهول ... رد ... -تيم: الو .... -شو عم تدور او تضيع وقتك ..... -تيم: اياد بيك ما تخاف ... اذا كانت مع ابي رح لاقيها بالمهلة اللي عطيتني ياها ..... -اياد: مش اذا ... هيي بالفعل مع ابوك .... سكر الخط ... وتأفف تيم ... اطلع بالخزنة ... ودق لواحد صاحبو ..... -تيم: الو ...... حازم بدي ياك ضروري بالشركة .... جيب معك العدة لتفتح خزنة ... يعني خزنة مين ... خزنة ابي ... تمام تمام ... ناطرك .... دق تلفون يارا ... كان المتصل حياة .... -يارا: اي حبيبتي .... الحمدلله احسن ... ما تعتلي همي ..... بشوفك ..... وصل حازم .... وفات لعندن ... ومجرد ما لمح الخزنة ... واطلع على هيكيلتها واسما وتفاصيلا ... اتنهد ..... -حازم: مستحيل ... هاي خزنة فريدة من نوعا ... اذا تم فتحها بطريقة تانية غير الباسوورد الخاص فيها ... بتنفجر فورا وبتفجر اللي فيها معا ...... -تيم: انت شو عم تحكي ..... !!! -يارا: هلأ صرت متأكدة انو الج .... بقصد اللي منا ياه فيها ...... -حازم: ع شو عم تدورو .... -تيم: ورقة مهمة .....العضوة: 275918 , منذ 4 سنوات
حازم: حاسسني قلبي الجوهرة اللي حكو عنا بالتلفزيون .... -تيم: الجواسيس كتار ... والحيطان الها ادان .... -حازم: تمام انا عندي شغل لازم فل ..... فل حازم ... واطلع تيم بيارا .... -تيم: ما لازم حدا يعرف باياد حرب ... والا بينهيني عن وج هالكوكب ..... -يارا: بينفيك على اورانوس ... ههه .... -تيم: ههه بلكي بلاقيها لهالجوهرة النحس ... هونيك .... طلعو من المكتب ونبشو الشركة نبش ... وما لقو شي ... حملو الخزنة وراحو عالفيلا ... حطوها مقابيلن .... وما تركو رقم ما جربوه .... حل الليل ... بعد ما دورو بكل زوايا الفيلا .... ورجعو قعدو مقابيل الخزنة ..... -تيم: بكرا رح روح عالبيت الجبلي ... هاد اخر حل بعد الخزنة .... -يارا: لازم تتلاقى ... انا ما بدي اخسرك تيم ..... غمرها ... وباسا ع جبينا .... ورجعو يصفنو بالخزنة ... بعد ساعة كان تيم صاير بسابع نومة عالكنباية ... ويارا عم تفتح وتغمض عيونا وتتاوب ... لحد ما فجرت عيونا لما اتذكرت شي ..... -يارا: ارقام الحظ تعول ابي ..... كتبتن وايديها عم يرجفو .... للمرة الالف كمان خطأ .... -يارا: اوووف باباا اوووف ....... تيم ... قوم اخي قوم نام بغرفتك ..... قامو تنيناتن وتوجهو ع غرفن لينامو .... ___________________________________________العضوة: 275918 , منذ 4 سنوات
وعيت يارا تاني يوم الصبح ... غسلت وجها ... ونزلت تاكل شي لانو معدتها عم تفرك بشكل مش طبيعي من الجوع ... هيي ونازلة عن الدرج وعم تفرك عيونا ... اطلعت ناح الطاولة وصرخت ..... -يارا: تيييييييم .... تيييييمممم .... نزل تيم مفزووع ... -تيم: شو فييي ... ؟؟ -يارا: وييين الخزنة ... ؟؟؟ ... -تيم: نعممم ... ركض ناح الطاولة وحط ايديه ع راسو ... وصار يدور بمحلو .... -تيم: نحن انتهينا ...... -يارا: انت شو عم تحكي ... وين بدا تكون اختفت .... !! ما في غيرنا بالبيت ... والخدم صرفناهن مبارح ... _____________بعد مرور يومين____________ المسا عالساعة ٨ ....... بمكان شبه خالي .... طاولة في عليها ٥ كراسي .... قاعدة يارا على كرسي مطأطأة وجها .... واخوها جنبها بالطرف التاني ... كان وجو ما بيتفسر .... وحدو شب غريب ...... اما الكرسي اللي جنب يارا كان محتلو شخص ... اياد ما غيرو ...... وصل الشيخ ومعو شبين حوليه ... قعد عالكرسي مقابيلن ومعو اوراق ....... -الشيخ: لنبدا فورا لانو عندي بعد نص ساعة كتب كتاب تاني .......... يارا هلال بدران هل تقبلين الزواج من المدعو اياد حرب بدون اي ضعوطات وبكامل ارادتك ؟ ..... بلعت بريقا .... واطلعت بأخوها .... ورجعت نزلت نظرها ناح خصرو .... كان الشاهد التاني مصوب عليه السلاح .... كإنها فقدت حاسة النطق ... لا عارفة تقول اي او حتى لا ما عم تطلع منها .... قاعدة ع طاولة اعدامها .... ع طاولة انتهاء حياتها ... بسبب شي هيي ما الها دخل فيه .... تصفية حسابات وهيي وقعت ضحية .... ضحية جوهرة أورانوس ...... يتبع .......العضوة: 445910 , منذ 4 سنوات
كمليالعضوة: 275918 , منذ 4 سنوات
#أين_جوهرة_أورانوس_بقلم_نسمات_الليل الجزء الثاني: ___________________في اليوم السابق_________________ كانو طالعين يارا وتيم من البيت الجبلي .... جارين خيبة املهن وراهن .......... بعد ما دورو فيه وبأنحاءو يومين ..... -يارا: معقول هاد اياد يكون ورا اختفاء الخزنة !! ..... -تيم: ما بعرف ... رح جن ... وين اختفت ....... -يارا: بقللك شي بس ما تعصب ....؟ -تيم: شاكة بحازم ما ؟ .... -يارا: اي ..... ثواني وشباب كانت مقتحمة المكان ... اخدو يارا وتيم ..... بعد ما خدروهن بسبب حركتن الزايدة .... ما وعيو الا ع حالن بمكان مهجور ... ومربطين ........ رفع واحد من الشباب تلفونو .... -وعيو يا بيك .... -اياد: انا عالباب ...... فات اياد ... ووقف مقابيلن ... كان عم يدخن ... ويطالع كل الدخنة بدون اي همسة ... هوي وعم يراقبن .... اطلعت فيه يارا بكل غل .... جمعت كل غلها وبزقت عليه ...... اطلع فيها بابتسامة صفرا ... وقرب من اخوها وطفا السيجارة بكتفو ... وصرخ تيم .... -تيم: اخخخخخخخخ ..... -يارا: تيييييم ...... -اياد: اذا بتحبي بزقي كمان مرة ..... -يارا: نحن شو دخلنا بجوهرتك ... اتركنا بحالنا ... للمرة الالف منقول انو ما منعرف عنا شي .... -اياد: لكن ليه خفيتو الخزنة ...... بس شفتو المصاري غيرتو رأيكن .... -تيم: نحن ما خفينا شي ... انت امرتن ياخدوها ... وعينا ما لقيناها ..... -اياد: كذاب .... ورح تتدفعو التمن ...... فكوه ..... قربو وفكو تيم .... -اياد: اختك رح تضل عنا لبكرا متل هاد الوقت ... بتجي معك الجوهرة بتاخدا ... واذا ما كانت معك رح اضطر جيب شيخ ... وتضل على ذمتي لحد ما تجيب الجوهرة اللي ابوك سرقها ..... يارا: فشررررت ... انا واخي رح نضهر من هون شإت ام ابيت .... -اياد: تمام .. فيكي تفللي ... بس بتترحمي على اخوكي قبل .... وانت يا اختك يا الجوهرة ... اختار .....العضوة: 275918 , منذ 4 سنوات
__________________في اليوم الحالي_________________ -الشيخ: رح ارجع عيد .... يارا ه .... -يارا(قاطعتو): موافقة ..... -الشيخ: وأنت اياد حرب هل تقبل بالانسة يارا هلال بدران زوجة لك بدون اي ضغوطات وبكامل ارادتك .... -اياد: اقبل ..... الشيخ: وانتم تشهدون على ذلك ؟ .... بلع بريقو تيم ... عم يشهد ع زواج اختو ... اللي ابدا ما كان بيحلم يكون بهالطريقة .... جاوبو الشهود وانتهت المراسم ... وفل الشيخ وباقي الشباب ... وما بقي غير تيم ويارا واياد ... وقف تيم وشرارة الغضب طالعة من بين عيونو .... -تيم: شو كان بدك فيناااا ... شو دخل اختي ... ترجيتك تبعدها عن قذاراتك ..... نحن شو دخلنا ... ولتخليني موت الف موتة عملتني شاااهد ... الله ينتقم منك .... -اياد: ذنبكن انكن ولاد هلال بدران ...... -تيم: ما عدت عارف .... هل نحن ضحية جوهرة اورانوس ... او ضحية ابونا .... -اياد: هلأ بتفل وما بقا بدي شوف صورة وجك ... واختك ممنوع تشوفا ... بتجيب الجوهرة بتاخد اختك مع ورقة طلاقا ... عدا عن هيك ما عندي شي قولو ..... قرب تيم والدمعة بعينو ليغمر اختو اللي ما تنفست بحرف .... عم يهددوهن ببعض .... بس اياد وقف بيناتن ومنعو يغمرا ....العضوة: 275918 , منذ 4 سنوات
-اياد: ما فيك تقرب على مرتي ..... رفعت راسا يارا بقوة .... ودقات قلبا تخربطت .... هالكلمة فاتت متل السكين ع قلبا ... كلمة "مرتي" ... اللي بتعني بالنسبة الها ... سجينتي ... اسيرتي ... واشيا كتير ... برم ضهرو تيم ... مشي خطوة ... وحكا اياد ... -اياد: صحيح ... ما تفكر انو اختك رح تعيش معززة مكرمة بقصري .... رح تنهان بالثانية ١٠٠ مرة ... يعني اد ما فيك تستعجل ... بكون منيح ...... فل تيم واخد قلب اختو معو ... ما لحقو يحزنو ع ابوهن والمصايب كفتت عليهن متل المطر ... هل ابوهن بهالسوء او في مين عم يشوهلو صورتو .... مسكا اياد من معصمها وجرها وراه وهيي من غير اي صوت ...... وراحو عالقصر ...... فوتها على الغرفة ...... -اياد: بما انو جيتي بلا غراضك ... انا رح ابعت الخادمة تجبلك غراض .. كتبيلا كل شي بيلزمك .... وتعبيهن بنص الخزانة التانية ...... الخدم هون كتار ... وعينن عليكي ... وبوابة القصر مليانة حراس اذا فكرتي تتزحزحي من مكانك .....العضوة: 275918 , منذ 4 سنوات
ضهر من الغرفة وخبط الباب وراه بقوة .... وهيي غرقت بدموعا ... واهاتا ...... بنص الليل ... اجا اياد ... والتقى بالخادمة عالدرج نازلة ... -اياد: كيفا ؟ .. -الخادمة: من لما اجت ولا حكت كلمة ...... طلع ... وفات عالغرفة ..... اطلع فيها قاعدة عالكرسي وعم تتأمل الطبيعة من الشباك ..... حست عليه بس ما اتحركت .... كانو دموعا خلص نشفانين بعد ما قررت انو ما عاد تبكي ... وانها تكون قوية وبس .... قرب منها ... بعد ما فكر كتيير بخطوتو .... مسكها من قميصا ... وشدا لعندو .... برمت وجها وشدت ع عيونا بقوة .... زتها عالتخت مع صرختها المكتومة ..... وهوي وعم يقرب ... غمض عيونو .... وبعد فجأة ... وطلع من الغرفة بسرعة ..... بعّد قميصو عن رقبتو ليقدر ياخد نفس .... -اياد: شو صرلي ... انا ماني هيك ... ماني مجرم .. ولا مغتصب .... انا عم بنجبر اعمل شي ضد مبادءي ... ضد قناعاتي .... روق اياد ... روق ...... هيي لازم تتعذب وتنهان ... بس مش بهالطريقة ....... انت عم تغلط اياد ....... انت بهالطريقة عم تدمر حالك قبل ما تدمرها الها ..... اندق تلفونو .... كان سامعو بس عقلو بمحل تاني ..... رن تلات رنات لطلع من صفنتو ورد ..... -اياد: اهلين اخي ...... الو علاء .... الووو .... -علاء: اي اخي .... كنت عم بحكي الخدم ... عم يفضو البيت ..... -اياد: بهالساعة ؟ وليه ؟ .... -علاء: وين عقلك اخي ... في فرق ساعات بيناتنا ... -اياد: اه صحيح .... بس شو صاير .... -علاء: عم نسكر كل شي .... راجعين انا ومراد عالبلد ..... بكرا طيارتنا الصبح ..... -اياد: طيب .... -علاء: شو طيب .... اخي شو صايرلك ... وين عقلك ..... الك بالعادة تبهدل وتقلنا شو صاير لترجعو ما بتعرفو تشتغلو شغلة بلا اخوكن الكبير اياد .... دايما نحن الفاشلين .... وين لما كنت تستلمنا .... -اياد: اياد خلص تغير .... -علاء: بسنتين ؟؟!! شو صاير ..... -اياد: انا اتزوجت ...... -علاء: نعممممممممم ؟؟؟؟؟؟؟ .......العضوة: 275918 , منذ 4 سنوات
-مراد(من جوا): شو في علاء ....... (حكا مع الخدم) انتبهو لهدول منيح ... (ضهر لعند علاء) ... شو في اخي .... -علاء: خيك اتزوج .... -مراد: شووووو .... عطيني هالتلفون .... شو عم تخبص اياد ..... هااا ... قللي .... -اياد: ماني طايق ناقش حدا ... اتزوجت وبس ...... -مراد: وبدون اخواتك التوأم ... نحن مين النا غير بعض نحن التلاتة ... او لانك اكبر مننا بأربع سنين خلص لازم نسكت .... -اياد: صارت شوية ظروف .... بعدين بحكيلكن ..... -علاء: عطيني هالتلفون لقللك .... طيب وشو قصة هالاخبار ... شو قصة الجوهرة ..... -اياد: رح تودينا بالوادي .... رح نصير بخبر كان اذا ما بتتلاقا ...... -علاء: انت شو عم تحكي .... وليش بهالتشاؤم .... وين اياد اللي ما بيكسرو شي ... اللي بخلص حالو دائما بأصعب الزوايا .... -اياد: هالمرة مش متل أي مرة ...... خلص منحكي بس تجو ..... سكر الخط بدون ما ينطر رد .... كان مبين ع وجو انو كبران ميت سنة .... كان مبين شااحب .... بس كل هالمعالم ما قدرت تخبي جاذبيتو وهيبتو ....... رجع فات عالغرفة لعند يارا ... لقاها تحت الحرام ... وحتى وجها ما مبين .... حسها عم تبكي ....... غير تيابو .... وبرم للناح التاني من التخت ..... رفع الحرام ونام ..... ___