العضوة: 275918 , منذ 4 سنوات

#العيلة_الفقيرة_والمعترة:$ #الجزء_الثاني -2- امي كانت تتحملني كتير وتصبر على غضبي وصوتي العالي وعدم احترامي الها .. كنت اسمعها عم تدعيلي بالصلاة انه الله يهديني ويصلح حالي 😢 معقول لهالدرجة انا سيئة .. لا انا مو هيك .. هنن يلي فرضو علي هالواقع .. امي وابي هنن السبب مو حاكمين على اولادهن .. انا بكره الكل وما بحب حد 😡😦 نفسي عيش احسن من هيك .. كتير تعبت من هالحياة.. . الايام بتمر وانا معاملتي لامي وابي بتزداد سوء -بابا بدي رسوم الجامعة هاليومين - ماشي ابي ان شا الله اقدر -شو يعني ان شا الله تقدر .. يعني انا بتعب وبحصل درجة الامتياز مشان ينقصولي نص الرسوم وخفف عنكن وانتم حتى النص التاني مو قادرين عليه 😡 -دنيا شو بدك يعني ؟ اطلع اشحت بالشوارع -لا والله بدي تحكم على اولادك وتخليهم يخصصولنا جزء من مصرياتهن -ما انا حكيت معهم مية مرة .. ما بيسمعوا شو اعمل يارب خدني لارتاح من وجهكم كلكم انت واخواتك 😯 -ان شا الله انا اللي بموت وبرتاح من هالعيشة 😡 ما كنت حاسه اديشني وقحة مع امي وابي وكان عندي مبررات كتير قويه اني ما عاملهن منيح 😢 بيوم كانت محاضرتنا بالجامعة عن بر الوالدين .. وطبعا انا كنت اضحك من جوا وقول لحالي لما يكونوا والدين متل العالم بعدين ببرهم .. وقفت وقلت للدكتور: دكتور لو سمحت .. هلء لو كان الاب والام ظالمين ومفرقين بين اولادهم .. وغير هيك ما عم يصرفوا على اولادهم منيح وما عم يعملولهم شي منيح بالحياة .. يا تري واجب علينا برن ؟ -طبعا واجب .. مو هنن اللي جابوك للدنيا .. مو كبروك وخلوك صبية .. ما بتلاقي طبخة تاكليها لما تروحي مهما كان نوعها .. ما بجيبولك شي تلبسيه حتى لو كانت لبسة وحدة .. كلام الدكتور ما اقنعني هلء هدول اباء ويلي عم يوفرو لاولادن كل شي اباء 😦 استمريت على هالمعامله القاسية والحقد اللي بقلبي لحتى اجا هداك اليوم 😟

العضوة: 269302 , منذ 4 سنوات

كملي يا نوررررررر🌹🌹🌹

العضوة: 275918 , منذ 4 سنوات

#العيلة_الفقيرة_والمعترة:$ #الجزء_الثالث.. طلبت من امي مصاري مشان اصبغ شعراتي لاني مليت من هاللون .. اعطتني وقالتلي هدول اخر شي بالبيت بس ان شا الله تكوني مبسوطة .. - كل مرة بتقليلي اخر شي بالبيت .. يعني لازم تحمليني جميله 😡 والله مليت منكن نظرة الحزن بعيون امي كانت ما بتنوصف ودمعتها على خدها .. انا كنت فاقدة الاحساس هداك الوقت وعايشة دور الضحية كتير منيح -شو لوين ابي -رايحة مشوار بدك شي ؟ -ابي وانت جاية هاتيلي معك صحن بقلاوة صغير طالبتها نفسي كتير 😳 - ماشي اذا ضل معي مصاري بجيب .. شو عاطييني كم ليرة وبدك جيب بقلاوة كمان نفس الحزن يلي بعيون امي شفته بعيون ابي .. كانت دموعن ناطرتني اطلع لتاخد راحتها ... اخ يا ابي . طلعت عالصالون .. قعدت تقريبا ساعتين وصبغت شعراتي وكانو كتير حلوين .. يالله شو كنت مبسوطة بهالتغيير .. قلبي مل من الروتين ..😃 رجعت عالبيت مبسوطة بحالي و نسيت بقلاوة ابي ..بس ما كنت بعرف شو عم يستناني .. شو هاااد .. دخيلك يارب .. شو هاد .. بيتنا .. بيتنا عم يحترق .. ابي وينو .. امي طالعتوها .. -العوض بسلامتك يا بنتي -شو يعني ؟ شو يعني اه 😯 وينها اممي وينو ابي ؟ -الله يكون بعونك -اخي محمد شو صار بامي وابي -خلص دنيا خلللص جثثهن متفحمة 😯😯 ياااااااارب دخيلك .. ابي انا راجعة جيب البقلاوة استنى شوي😯😢 امي خلص باكل مجدرة عادي والله منيحة .. انتو مناح صح ؟ كنت ببكي بدل الدموع دم .. الجيران صبروني شوي وحاولو يهدوني .. عرفت انه جرة الغاز انفجرت ببيتنا وامي وابي خلص راحوا وما عاد في بيت ولا عيلة .. طلعوا الجثث و دفنوهم .. اخواتي محمد و مازن اخدوني لعندن بعد الدفن .. رفقاتي وقرايبيني كانوا يزورونا ووقفوا جنبنا مروا علي اسبوعين ما باكل ولا بشرب ولا بوصل الجامعة .. كان الندم عم ياكل قلبي وعقلي وكل شي فيني .. معقول ماتوا غضبانين علي ؟ طيب انا ليش ما حسبت حساب اني ممكن اخسرن .. مرت علي ايام ما بنساها طول عمري 😢😯😢 بعد شهرين من الهم بلشت تجاوز الازمة و حاول ارجع لحياتي .. وهون بلشت حياتي الجديدة وهمي الكبير

العضوة: 275918 , منذ 4 سنوات

#العيلة_الفقيرة_والمعترة #الجزء_الرابع بلشت حياتي تتغير .. انا صرت ببيت جديد .. قاعدة عند اخي محمد الكبير .. بالاول كان الوضع منيح .. كنت ما اطلع من غرفتي ولا اكل ولا اشرب ولا تقل على حدا 😯 بس بعد شهرين .. حياتي انقلبت .. مرة اخي بلشت تدايق من وجودي .. كنت اسمعها شو عم تحكي لاخي -شو يعني انا مجبورة اتحملها عندي بالبيت ..يعني لا عارفة البس براحتي ولا اطبخ شو بدي .. محمد لاقيلك حل -شو اعمل صفاء هاي اختي وين بدا تروح ما الها حد غيرنا -ياخدها اخوك مازن ولا هي اختك لحالك - انا اخوها الكبير ولازم تضل عنا -والله ما عاد اتحمل انا .. مليييت مليييت منا ما كنت بعرف هالبنت الحرام من شو ملت .. انا ما عم دايقها ولا عم اعطي رايي بشي .. يا دوب هاللقمة باكلها😢 غير انه كمان راح علي هالفصل بالجامعة وقرب يبلش الفصل الجديد وانا مو عرفانه كيف بدي اطلب من اخي رسوم الجامعة -محمد انا لازمني مصاري مشان سجل بالجامعة -وانا من وين بدي جيبلك ولا مفكرة ابوك مات وترك وراه بيوت وعمارات .. حتى بيته اللي كان ماويه احترق يعني ما الك عندي شي 😡 ما رديت بولا كلمة لاني كنت خايفة احكي .. ما بعرف وين راحت هالبنت المتمردة يلي كانت تصرخ بوجه ابوها وامها كل ما حكو معها شي .. وقتها عرفت الفرق بين كلمة " ابي" وكلمة " اخي " .. ابي يعني ابي واخي يعني جوز مرته.. قررت اتصل باخي مازن واطلب منه رسوم الجامعة .. وطبعا متل ما توقعت كان رده اسوأ من اخوه .. تسكرت الدنيا بوجهي وحسيت حالي خسرت كل شي .. حتى جامعتي ما عاد في كملها واحصل على شهادتي واشتغل وانفع حالي وما احتاح لحد 😯😢 ايامي كانت مرة متل العلقم و مقضيتها خدمة ببيت اخي .. وكلام وبهادل عالطالعة والنازلة .. ويييينك يا امي ؟ وين المجدرة من تحت ايدك ؟ وين لما كنت ارجع لاقي الاكل بيستناني واتكبر عليه 😮 ياريتك معي يا امي ياريت 😢 صرت خدامة ببيت اخي والحمد لله 😢 بعد فترة تقدملي شاب عن طريق رفيق اخي مازن .. هالشاب كان مبين ادمي .. وطبعا انا كنت بس بدي اطلع من هالبيت .. قالولي انو اسمه معن ووضعه المادي ممتاز ..فكرت لو تجوزته رح يكملي جامعتي ورح عيش مرتاحة واقبر الفقر 😃 ...

العضوة: 275918 , منذ 4 سنوات

#العيلة_الفقيرة_والمعترة #الجزء_الخامس_ماقبل_الاخير معن كان مبين انه شاب منيح وجنتل عمره 35 سنة 😕 قلت يلا منيح .. كان بده نسافر على مصر لانه الوضع بالبلد مو مريح والازمة بتخوف ولانه شغله هنيك واله بيت ملك .. انبسطت كتير بفكرة السفر بس بنفس الوقت خفت لاني ما بعرفه منيح و زعلت لانه رح بعد عن قبور امي وابي يلي كنت زورن وفشلن قلبي كل فترة 😯😢 اخواتي وافقوا عالخطبه وكانه ما صدقوا يرتاحو مني .. وبسرعة كتبنا الكتاب وعملنا العرس .. بعد بيومين سافرنا على مصر محل شغل جوزي وحياته .. اول يومين كنت مبسوطة وكان معي منيح بس كنت حاسيته كتير بيدقق على لبسي وحركاتي وكلامي .. حكيت منيح الحمد لله يلي بيغار علي .. وقلت ان شا الله ربنا يعوضني عن الايام السودة اللي عشتها .. بس بعد فترة عرفت اني غلطانه واني ورطت حالي بهالجوازة .. طلع بيعرف نسوان كتير 😯 وكل يوم مع وحدة وهالشي عرفتو من موبايله ومن طلعاته ورجعاته اخر الليل 😢 قلبي رجع انكوى بالنار وحسيت انه لسه ربنا عم يعاقبني على معاملتي لامي وابي .. كنت قضيها صلاة وبكا واستغفار انه ربنا يسامحني 😢 هلء انا بمصيبه جديدة جوزي هلكني وصرت خاف منه .. بيرجعلي شكله بيخوف وريحته كلها نسوان 😦 ولما كنت خانقه كان يضربني وهاتي وين يجعك .. تعبت منه كتير وصرت اكرهه .. كان يصبحني بقتله ويمسيني بقتله .. نسيت كل شي درسته بالجامعة وصرت فكر بس كيف بدي اخلص من هللانسان يلي ما عنده من الانسانية الا اسمها .. طلبت منه الطلاق بس ما كان يوافق وكان يضربني اكتر كل ما فتحت سيرة الطلاق .. وبيوم ضربني ضرب شوهلي وجهي .. وما كان مني الا اني قويت قلبي واشتكيت عليه للشرطة .. وقتها جابوه وكتب تعهدد انه ما عاد يضربني و بيومها -انا ما بيلزمني وحدة متلك انت طالق يا كلبه واطلعي من بيتي .. انت ما بتعرفي حد بهالبلد ورح خليك هيك وما رح رجعك لاهلك .. ضيعي بهالبلد لانك بتستاهلي

العضوة: 275918 , منذ 4 سنوات

#العيلة_الفقيرة_والمعترة :$ #الجزء_السادس_والاخير طلعت من البيت ما بملك شي .. ايد ورا وايد قدام ما كنت بعرف وين بدي روح .. مصر كبيرة وما لي حد هون .. فكرت اتصل باخواتي بس انا ما صدقت ارتحت من حياتي معهم وهنن كمان ما بدهم اياني وما صدقوا اطلع من عندهم .. اول يوم قضيته بالشوارع ما في مكان يؤويني .. فكرت دور عمحلات الالبسه اللي بلاقيها بطريقي او المطاعم او ... ودور على شغل ولو حتى خدامة بس للاسف ما كنت لاقي شي .. عرفت بعدين انه خريجين الجامعات هون ما عم يلاقو شغل .. بلشت موت من جوعي .. حاولت اتصل بمعن انه يساعدني ما كان يرد علي ..وبيوم بعد ما بلشت افقد الامل .. فتت على محل البسه وطلبت شغل من صاحب المحل يلي كان رجال كبير .. كان مبين علي التعب والتعتير ووجهي اصفر من قلة الاكل ..قرب لعندي وقعدني وجابلي عصير 😯 وسالني ليش هيك شكلي .. فهم من لهجتي اني سوريه وفهم قصتي 😦 الرجال طلع كتير منيح والله بعتلي اياه من السما .. جابلي اكل وسمحلي اشتغل معهم واعطاني مقدم اسبوع مشان استاجر غرفة ..حمدت ربي مليون مرة اني لقيت عمي ابو محمود يلي ساعدني كتير اني وقف على رجلي .. يبدو استغفاري وندمي ولجوءي لرب العالمين هو السبب انه الله بعتلي هالانسان الطيب 😊 بلشت اشتغل ببيع الالبسة النسائية .. كنت ذكية واجلب الزبونات وحببهن بالقطعة وهالشي ساعدني فيه انه كان تخصصي السابق بالجامعة فندقة وعلوم سياحية ..استمريت بالشغل وابو محمود كان كتير منيح معي .. صرت خبي شوي من مصاري وادخر .. الحمد لله الله وفقني و رجعت سجلت بجامعة هون وليكني عم كمل دراستي .. ان شا الله ربنا يكون سامحني 😊☺️ تعلمت شغلة من الحياة : الحياة بلا ام يعني ما في حد يحن عليك والحياة بلا اب يعني ما الك سند 😢 انا صرت قوية كتير من داخلي وواجهت صعوبات كبيرة بس عم كمل وربنا معي .. مو بحاجة حد يبنيني انا رح كمل وكون قد حالي رضاك يا امي انتهت #بقلم_مجهوله

العضوة: 275918 , منذ 4 سنوات

*الموقع اللي نقلت منه القصه مو كاتبين اسم الكاتبه فسجلته باسم مجهوله * ان شاء الله تعجبكم

العضوة: 451446 , منذ 4 سنوات

حلوة شكرا لك

العضوة: 444850 , منذ 4 سنوات

بجنننن وحلوة انا صارلي بعيدة عن اهلي سنه 😭😭😢ادعولي الله يجمعنا عن قريب 😭💔

العضوة: 304218 , منذ 4 سنوات

اه والله الله يخلينا أهلنا والحمد الله على كل شيء

العضوة: 304218 , منذ 4 سنوات

تسلم أيدك يا قلبي 👍

العضوة: 275918 , منذ 4 سنوات

الله يجمعك فيهم عن قريب يارب

العضوة: 275918 , منذ 4 سنوات

العفوو

العضوة: 275918 , منذ 4 سنوات

الله يسلمك

العضوة: 275918 , منذ 4 سنوات

رفع