السلام عليكم بتكلم عن تجربتي مع مستشفى الدكتور محمد الفقيه بالرياض كان فيه مجموعة بنات يسألون هنا وحبيت انقل تجربتي الحمدلله انا من حوامل ابريل اخر دورة 5 ابريل وولدت قبل عشر ايام في 27 ديسمبر من بداية حملي كنت اراجع مع الدكتورة فايزة الدكتوره فضيييييعه ماشاءالله عليها رايقه طول الوقت على كثر الزحمة اللي عندها بس تسمع لك وتجاوب على كل اسألتك واذا بغيت اسأل عن شي وانا بالبيت ادق عليها واذا كانت مشغوله ماردت هي ترجع تتصل علي يعني ماشاءالله اهتمامها بالمرضى مره جميل ولادتي كانت اول يوم من الاسبوع 38 والدكتوره كانت تبيها قبل بس انا رفضت عطيت نفسي فرصه لان ماعندي طلق والرحم كان فاتح واحد سانتي فقط ومعي سكر حمل مايصلح اطول كثير لازم اولد قبل الاسبوع 38 وبرضو قالوا لي البيبي حجمه 3 ونص لو طولتي اكثر بيزيد استخرت وسمعت كلامها وكانت بتعطيني طلق صناعي بس الحمدلله قبل يحطونه سووا لي تخطيط وصار معي طلق طبيعي ولكن مع الاسف اخذت وقت طويل وانا اطلق قعدت 24 ساعه طلقي حار بس مو راضي يفتح الرحم اكثر وباخر لحظة بنتي غيرت وضعيتها وصارت مقعدي وتبرزت ونقلوني قيصري على طول والحمدلله يارب كل شي من ربي خيره اول يومين كنت حيل تعبانه بس اليوم الثالث صحصحت وامشي واتحرك واقوم بنفسي ولا كأن فيني شي طاقم التمريض كلهم خدومين وبشوشين سواء اللي بكشك الولاده او التنويم او الطوارئ مره خدومين ويطبطبون عليك شؤون المرضى والدكاتره الطاقم كلهم الحمدلله مره كويسين اللي كانت متردده استخيري وشوفي الدكتوره اللي تناسبك انا دخلت على ثلاث دكتورات عندهم ومره حبيت فايزه خصوصاً انها عربيه اقدر اخذ واعطي معها بكل سهوله