من فضلك حافظى على مناعة طفلك 🙏 أمهات كتير بتشتكى ان العيال ماعندهاش مناعة ...و الحقيقة إن عاداتنا احنا كأمهات هى السبب!!! و صدقونى الهدف من البوست مش انى الومك....انا متأكده انك بتحبى اولادك و طالع عينك علشانهم ♥️ ✅ بس لما يبقى ربنا باعتلك كنز مناعى اسمه لبن الأم...بيشكل مناعة الإنسان طول عمره... و بيحميه من مئات الميكروبات و الفيروسات......و انتى من اول يوم بتبدليه بأعشاب و مياه....يبقى حرام علينا المولود مش محتاج مياه....اللبن مليان مياه...حضرتك اللى محتاجه تشربى مياه ✅ لما أكبر الهيئات الطبية تقول لك أجلى الأكل للسادس، علشان الفترة دى محتاجه اجسام مضادة من اللبن.....مش بطاطس و كوسه و تفاح..... و انتى متحمسه جدا تبداى بدرى...و مركزة تأكلى عدد وجبات كبير من بدرى....لدرجة ان فيه اطفال بتفطم نفسها بدرى من كتر ما الرضاعة بقت هامشية فى حياتها من بدرى اوى يبقى خساره بجد! خطوة خطوة يا جماعة فى الأكل....الهدف من ادخال الأكل اننا نعوض الفيتامينات و الحديد اللى بينقصوا فى لبن الام بعد ااسادس....قبل السادس، كل لتر لبن حيدخل لطفلك افيد.... ✅ما تستعجليش ع الفطام....اه ممكن الطفل يشرب لبن بقرى بعد سنة.....بس ده مش معناه ان اللبن البقرى افيد له من لبن الأم...لبن الأم بيزود ذكاء الطفل... بيحمى من سرطانات الدم اللى بعد الشر بتيجى للاطفال.....بيقلل نسب الإصابة بحساسية الصدر و الربو منظمة الصحة العالميه قالت الدول النامية اللى زينا تفطم بعد سنتين علشان تكمل الفايدة....ربنا قال و فصاله فى عامين...... طبعا اللى عندها ظروف ربنا يعينها.....انا بتكلم عن اللى ماعندهاش سبب يخليها تقطع الخير ده عن البيبى بدرى اوى ✅ دكتور الاطفال حيكتب لاغلب الأطفال حديد من الشهر السادس....و حيطلب تحليل انيميا من التاسع او بعد السنة.....ما تطنشيش.....نص الأطفال المصريين عندهم انيميا.... الانيميا هى اللى مخليا العيال مابتاكلش...و سوء التغذية بيفتح حلثة مفرغة بتؤثر على المناعة و الله! ✅ فيتامين د مهم للبيبى....و ليكى....انتى كمان عندك ناقص....ما تطنشيش.....صحة الأم فى الحمل و الرضاعة هى اللى بتشكل صحة البيبى....و ححط لك فيديو تحت بالفيتامينات اللى محتاجاها مع الرضاعة ✅ قللوا الحلويات علشان العيال ترضى تاكل ✅ عالجوا الديدان، علشان يستفيدوا بالأكل ✅ المضاد الحيوى لو الدكتور كتبه....بنكمله للآخر....مش بنوقفه اول ما الطفل يتحسن....علشان نقضى صح على الميكروب....و ما يرجعش تانى بعد اسبوعين ✅ الطفل اللى سخن و زوره واجعه، لازم دكتور يشوفه و يتطمن ان اللوز مش ملتهبه......دى مفيهاش هزار....إهما اللوز مره فى مره بيوصلنا لحمى روماتزمية لا قدر الله ✅ نيموا الطفل بدرى علشان صحته ✅ اغسلوا الانف على طول...علشان المخاط اللى فى صدره ده يخرج و الولد يتنفس...... دواء الكحة مش حل....دواء الحساسية لوحده مش كفاية....طول ما المخاط جوه، الامور حتسوء مش حتتحسن ✅ لو الام ظروفها تسمح، الوقت اللى احنا فيه ده مش احسن وقت نبدأ ننزل فيه حضانه....فيه موجة كورونا بتنتشر بين الاطفال بسرعة...فيه كل امراض الشتا....لو ظروف تسمح اصبرى شوية و الله العظيم انا عارفه قد ايه بتتعبوا مع الاولاد....بس معلش علشان خاطرى ركزوا فى النقط دى....