اشتريت خط نت سريع 🙂 اليوم عالسهرة وبالصدفة بسم الله ماشاء الله ، تبارك الرحمن ولا حول ولا قوة الا بالله كانت جاية الكهربا لهيك كان ملتهي جوزي بمسلسل .. قلت قومي يا مرة جربي الخط ، شلت السيم القديم وركبت الجديد وفعلت الواتس كان بعيد عني متسطح عالكنبة .. فقلت يله خليني اعمل فيه مقلب 😆 بعتلو مسالخير حبيبي ❤️ رن جواله رنة الواتس مسكو من دون نفس ، شاف الاشعار تلبك وزبط اعدته وقال مسالنور مين معي ؟؟؟؟؟ قلتلو : اسمي لالا 😊 اتطلع عليي وقلي قومي الله يرضى عليكي عمليلي كاسة شاي (( علماً قبل شوي ، قلتلو جاية ع بالي اعمل كاسة شاي حكالي عن اضرار الشاي وعن كمية الغاز المستهلكة لإعداد ابريق الشاي وعن صعوبة الحصول على جرة الغاز ودوره يلي باقيله عالبطاقة الذكية ٣٧٦٦ اسم .. حكالي عن تاريخ الشاي ومصدره الصيني يلي بجيب الكوغونا )) المهم ماعلينا من كل هالحكي. رحت عالمطبخ قلي : مين لالا ؟! قلتلو : يلي شاغل عقلا وبالا🙈 قلي : بس أنا متزوج قلتلو : مرتك وين ؟ فيني احكيك حبيبي ؟؟ وطجيتلو سبع بوسات 😂😂 قلي : لا تخافي ثعلبتي بالمطبخ بتعمل شاي 🦊 وللللييي وللللي انا بس قرأت (( ثعلبتي بالمطبخ )) عليي الحلال كنت بدي حطلو سم جرادين بدل الشاي 🥺🥺 المهم كملتلو وقلتلو : ليش مسميها ثعلبتي حرام عليك 💔 قلي : اينو ثعلبة لك هاااي من سلالة الضباع البشرية المفترسة وك هاااي غوريلا / فقمة / ثعباااان 😂😂 كتبتلو : هاهاهاهاهاها وانا روحي بتطلع مني ونفسي اهجم عليه عضو عضة خلي ناشيونال جيوغرافيك تعمل فيلم وثائقي عن كمية الافتراس يلي رح يوثقوها ، يعرض بعنوان شاهد قبل الحذف😡 قلتلو : حياتي شو السبب لشو كمية هالنقم منها حبيبي ؟؟؟ قلي : تركينا من هالثعلبة هلق وقليلي ليش و منين جبتي رقمي يا قطقوطة 😉 قلتلو : اي رح قلك حبيبي ..................... خلص الشاي وطلعت عالصالون وجهي متل الساعة عقرب فوق وعقرب تحت بس صبرت حالي يا دوب قعدت ، تلبك وقلي مرتي جاي ع بالي بوشار حد الشاي قومي عمليلي ☺️ قلتلو : تكرم حبيبي + ابتسامة بنت 60 كلب 🙂 كتبتلو : وينك ؟!! قلي : كانت ام بريص حدي ف سكتت 😂 قلتلو : له له يا عمري بتخاف من مرتك 😆 قلي : لا اصلا فيني اطلع شوفك هلق و البس واتعطر وعادي وما بتسترجي تقلي وين رايح 😌💪 قلتلو : معناتا تعا نلتئي برا حبيبي 😍 قلي : وحياتك بعزمك على احسن مطعم فايف ستارز واحلى وجبة شاورما اكسترا دبل لعيونك ، وخلي ثعلبتي تاكل البوشارات وحدا 😂😂 ............. اقل من نص ساعة لبس وتحجج وقال رفيقو دقيقتين ورح ينشل اذا ما اجا 😒 ولحقته فورا عالموعد وعالمطعم قعد وتفرفد ومسك الجوال يستنا مسج مني . اجيت أنا وزحت الكرسي وقعدت مقابيله ولابسة وجه 60 كلب وعطيتو نظرة #فاجئتك_مو🙂 اتطلع عليي وابتسم وقلي تؤبري قلبي اي يسعدلي هالطلة شو حليانة يا ضرسانة مع انو قبل شوي شفتك 😍 قلتلو : لا تغير السيرة قلي : اينو سيرة لك انتي السيرة كلها من سيرة الحب لسيرة الف ليلة وليلة 😍 اصلا بعرف انتي يلي عما تحكي معي قلت بعزمك عالمطعم نغير جو 😍 واصلا انا بحبك اي بحبك 😍 أنا متل الحوبة صدقت وحمروا خدودي 😆 قلتلو : يله لكن وين الشاورما اكسترا دبل قلي بربك يلي بشوف هالعيون الو نفس ياكل بقى ؟ ؟ لك عيونك هبلوني هبل ماعاد الي نفس بالشاورما الدبل ❤️ وانا متل الجدبة صدقتو وضحكت ضحكة البومة يلي على جنب 😂 شدني من انفي وقرب وجهي لعندو وقلي حبيبي قومي نروح عالبيت ناكل البوشارات ونلحق ما تبقى من الكهربا😂😂 وانا متل الخوتة شلت شنتايتني وقلتلو اي يله قوم😂 و خرجا الزوجان من المطعم بسلام ، وكانت الزوجة فرحة مفرفشة و الزوج سعيد بتبريئ نفسه وبجيبته التي بقت منعنشة #