منذ سنتين
  • ما قبل الحمل
تزوجت في عمري 27 سنة بعد قصة حب كبيييييرة مع زوجي لي هو ولد خالتي وأكيد كنت حابة نجيب اطفال ونحمل كيما كامل النسا رحنا شهر العسل جوزت أجمل أيام حياتي ضحكنا لعبنا حوسنا عشنا لحظات ماتتنساش وكنت فرحانة و راضية رجعنا للبلاد ليام الشهرين اللولين عادي عايشين حياتنا فرحانين ومباعد تقلقت من فكرة علاش محملتش علاش مصراش حمل وليت نهار كامل وأنا نعس فالدورة الشهرية كي تديرلي روطار نهار نفرح ونقول بالاك حمل ومباعد كي تجي نبكي و نقنط ونحزن دخلت في حالة نفسية وليت نحس بوجعة في قلبي حاكمتني طول الوقت..نحب نقعد وحدي نهار كامل وأنا نبكي بالتخبية على راجلي وعلى عايلتو بصح أكيد كامل كانو حاسين بيا على خاطر أنا من الناس لي ميقدروش يخبيو حزنهم راجلي كان ديما يقولي خليها على ربي..راو مازال الحال...رانا صغار..كان يصبرني وكي نبكي قدامو يحضني ويواسيني ويقولي إذا كتب ربي نعيشو بلا ولاد ماعندنا مانديرو نتقبلو وخلاص والحمد لله على قضائه وقدره كنت ديما حاكمة تيليفوني ونحوس في لي قروب تاع الحمل وتاع العقم وتاع الأطفال هبلت بكل معنى الكلمة كي فات عام ونص ومحملتش رحنا للطبيب أنا و زوجي مع بعضانا بعد التحاليل والراديوات وكلش قالولو هو عندو 0 حيوانات منوية وأنا عندي قنوات فالوب مغلوقين قالونا مستحيل نحملو فقدت الأمل وبكيت وجهلت و غاضتني عمري كنت ديما نحلم نكون أم و غاضني راجلي وكحالت الدنيا في عيني وبديت نخمم في حياتي كيفاش رايحة تكون تعيسة وساكتة وحزينة بلا ولاد خممت في راجلي كي يشوف لولاد ويحزن وفكرت في المواقف لي رايحة نتحط فيها كي نتلاقا أمهات مع ولادهم وكي يسقسيوني الناس علاه مجبتيش وواش راكي تستناي المهم لمدة أكثر من شهر دمرت حياتي بيدي وليت كئيبة وخلقت جو يخنق بيني و بين راجلي حتى ولينا قريب منحكيوش مع بعض.. مش مبقابضين بصح بعاد على بعضانا و في يوم من الايام كنت نتفرج في اليوتوب خرجلي فيديو على امام يحكي على عضمة سورة البقرة و قدرتها على تغيير حياتك و على القرب من ربي و على تغير الاقضار بالدعاء والصدقة وعلى القناعة كان هاداك الفيديو بمثابة كف فطني من الغيبوبة لي كنت فيها وكنا بقالنا يومين على رمضان قررت هاداك النهار نرضى بواش كتبلي ربي ونتقرب منو وندعيه ونبكيلو ليه و نشكيلو ليه وأمنت في داخلي بلي ربي رحيم وحنين ومستحيل يرد عبد جايو بكل انكسارو و يأسو وهو صاحب القوة و العضمة جوزتت رمضان في وحد الراحة و واحد الصبر ونزل عليا ربي رحمة من عندو كنت نوض نصلي الفجر و نبكييييي بالشحقة في السجود و نهضر مع ربي كأني نشوف فيه ندعيه بأبصط لغة ونشكيلو كنت نخدم خدمتي ونصلي صلاتي في وقتها ونقرا القرآن فالنهار كل يوم نقرا سورة مريم و سورة الواقعة و سورة يوسف و الجزء اليومي من القرآن باه نختمو و بعد العشاء ندير قيام الليل بسورة البقرة كاملة كل يوم طول رمضان و سبحان الله حسيت بوحد الراحة نفسية و قنعت بواش كتبلي ربي وليلة 29 من رمضان حلمت وحد الحلم كان تفسيرو أنو حمل ب بنت فات رمضان ورجعت لروتيني اليومي وحافضت على صلاتي في وقتها و كنت كل يوم نقرا سورة البقرة مستحيل ننساها نديرلها وقت حتى ولو على 12 تاع الليل نقراها و نرقد بعد رمضان بشهر قدقد دارتلي ليراقل روطار 4 ايام بصح هاد المرة مادرت لا تاست لا قلقت مجاش في بالي أصلا انو ممكن نحمل وزادو يامات الروطار ولاو 7 أيام وكان عندي تاست مخبي من ايامات الهبال جبدتو و درتو الصباح على 10 مع درتو خرجو 2 خطوط حمر حمر حمر من الفرحة وليت نبكي بالصوت و رحت عند خالتي لي هي عجوزتي و انا نترعد ونبكي ووريتهولها عنقتني وولينا نبكيو في زوج حلمي تحقق رايحة نولي أم أخيرا رحت نجري صليت ركعتين وبكيت فيهم بكية عمري و حمدت ربي درت مفاجأة لراجلي كنا شرينا انا وهو تريكو وصباطة تاع بيبي قبل منتزوجو جبدتهم وحطيتهم فوق السرير وكي جا شافهم تصدم وحمد ربي وحضني وتغرغرو عينيه وقالي شفتي قلتلك لي يصبر يعطيه ربي وأنا موحال كنت راح نفرط فيك علاجال الدراري وحملت وجبت بنوتة سميتها ميرال هي ممو العين وروح الروح إذا زاد رزقني ربي الحمد لله وإذا مرزقنيش الحمد والشكر وراني قانعة وراضية. دمعت عيني من رؤيتها أول مرة لعلها تكون بداية أمل لبعض لبشر 😊😍 ربي لا تذرني فردا وأنت خير الوارثين 🙏

6 تعليقات

العضوة: 271841 , منذ سنتين

الحمد لله حمدا طيبا مباركا فيه ، الله كريم ربي يحفظلك ياها

العضوة: 1179885 , منذ سنتين

سبحان الله الي ماحرمك من الضنا وعطاكي على قد ايمانك باالله ربي يحفظلك بنتك وتفرحي فيها

العضوة: 1200566 , منذ سنتين

سبحان الله العظيم الرحيم والله قصتك جميلة ورائعة ومن اروع القصص اللي سمعتهم في حياتي الله يحفظلك ياها ويهديها ويصلحها وان شاء الله يرزقك الله الذرية الصالحة من بعدها

العضوة: 1086373 , منذ سنتين

قصة جميلة مآشاءالله ربي يبارك لك في بنتك وزوجك الطيب ويبارك فيك

العضوة: 1029549 , منذ سنتين

قصة فيها بزاف عبر رب يحفظهالك ويرزق كل محروم بالذرية الصالحة

العضوة: 1194899 , منذ سنتين

يالله سبحان الله مااعضمه ومااكرمه يارب الحمدلله دائمن وابدا 🤲