العضوة: 275918 , منذ 4 سنوات

منال: يعني اكلت هيك؟ عمر: ايه الحمدلله.. قام و غسل ايديه ونشف… و لبس برجلو و انا ساكته و عم هز برجلي… منال بصوت عالي: على فــــــــكــــــــرة انا ماعاد رح اصحى اعملك فطور لانك كل يوم على هالحالة بس بتخليني اصحى عالفاضي… قمت و شلت صحنين و مشيت و انا معصبه عمر: ليش عم تعلي صوتك!! منال: سلامتك… عمر بعصبية: هلأ طالع على شغلي بس ارجع منتفاهم… و طلع و طرق الباب وراه… وقفت بالمطبخ و انا عم ابكي بعد ما اتطمنت انو راح.. مديت راسي من شباك المطبخ وشفتو وهو طالع كان واضح انو متدايئ... انقهرت من حالي انو نزعتلو صباحو... انتفخت روحي من التوتر الي عم عيشو.. قعدت بأرض المطبخ و انا عم ابكي… مخنوقه من حالي ومن عمر و من الحياة كلها… ______________________________________________ انا اسمي منال،، عمري 25 سنة… دارسة محاسبة ومتخرجة من سنة و لهلأ ما لقيت شغل.. تزوجت من اربع شهور بالضبط… تقدملي زوجي عمر… مافي بيناتنا اي سابق معرفة بس بكون رفيق ابن عمي و مره كنا عندهن و امو لعمر كانت موجودة و عجبتها كتير… وقت اجو لعندنا كنت مو مرتاحة ابداً… بس اهلي كان طاير عقلهن فية.. مدرس رياضيات… عمرو 32 سنة… طويل… ملامحو مريحة .. ذكي… و سمعتو طيبة و عيلتو محترمة… بعد اصرار اهلي قعدت انا وعمر تلات مرات بوجود امي و امو و اخر شي انجذبتلو كتير وهو عبرلي عن اعجابو فيني بشكل صريح حبيت جرئتو و طريقة حديثو و ابتسامتو… وهيك صار النصيب… و بحكم انو بيتو جاهز و وضعو المادي مستقر نوعا ما… تزوجنا بسرعه… ______________________________________________

العضوة: 275918 , منذ 4 سنوات

قمت من ارض المطبخ و نشفت دموعي و طلعت قعدت بالصالة وانا عم فكر ليش عم يصير معي هيك، انا بشو غلطت،، حسيت راسي رح ينفجر وماعم اقدر فكر منيح، انا بحاجة حدا يوقف معي، بكفي اتحمل كل شي لحالي، … قمت اتصلت برفيقتي أريج…. و طلبت منها تجي لاحكي معا،، بعتبرها اختي و اعز لأن درسنا مدرسة و جامعة مع بعض و تخرجنا سوا بس شوي خف تواصلنا بحكم انو انا تزوجت وهي عندها وظيفتها… ما خطرلي غيرها احكيلو لان قلبي عم ينكوي ومافيني احكي لحدا من اهلي… و بالفعل كعادتها ما تركتني وحيدة بس حست صوتي تعبان و اجت لعندي فوراً… كنت منظفة بيتي و عم انطرها.. استقبلتها بابتسامة و ضيفتها عصير.. منال: عاش من شافك وين هالغيبة!! اريج: بس سمعت صوتك عالموبايل انشغل بالي اخدت اجازة من شغلي و اجيتك فوراً بس شكلك منيحه الحمدلله منال: ايه مابني شي… حكيت هالكلمتين و نزلت عيوني بالأرض و سكتت.. اريج: منال؟ منال: - - - اريج: شبك شو في؟؟؟ … هرو دموعي على خدي و ما كان يطلع معي حكي…. اريج: لك شو في احكي والله قلبي رح يوقف ليش هيك عم تبكي!!!! منال: رح اختنئ… قامت وقعدت جنبي وهي متوترة كتير… اريج: لك والله ركبي قصفو ما الك بالعادة هيك… احكي خلصيني منال: بس مشان الله هالحكي ما بيوصل لأهلي اريج: مارح يوصل لمخلوئ بس احكي منال: طيب.. طيب… رح احكي #يتبع

العضوة: 275918 , منذ 4 سنوات

#محاولات_قتل_امرأة الــجـــزء الـــثـــــــاني أريج : يلا قولي منال : استني بدي ورجيكي بالأول شغله .. قمت على غرفتي وفتحت خزانتي وجبت كيس اسود ورجعت لعند اريج .. منال : خدي شوفيه أريج : شو فيه هاد الكيس ؟ اخدتو من ايدي و فتحتو و طلعت الي فيه أريج : شو هدول ؟ علب أدوية فاضية ؟ منال : ايه .. هدول الأدوية لعمر قلبتهن أريج بين ايديها وما حكت شي منال : هدول أدوية قلب .. عمر طلع مريض .. معو ثقب بالقلب أريج : شووووووووووو ؟؟؟؟؟؟؟؟؟؟ منال : متل ما عم ئلك ، و خبى علينا هو واهلو وما حكولنا أريج : العمى لك هاد غش وما بجوز كيف بخبو هيك موضوع مهم !! كنت عم ارجف وانا عم احكي ، حاسة حالي عم قول شي ما لازم ينقال وبنفس الوقت بدي ريح البي لان حاسة انو استغلوني واستغبوني وبدي حدا ينصحني شو اعمل منال : ما بعرف كيف اهلو قدرو يخدعونا بهي الطريقة الله لا يسامحهن .. على أساس عيلة محترمة و الهن سمعتهن .. طلعت المظاهر خداعة ، المشكلة عندهن بنات .. لك ما بخافو الله يبتلي بناتهن بنفس الي صار فيني أريج : طيب اهدي واحكيلي ،ايمت عرفتي وكيف وليش ما خبرتي اهلك لك ليش ساكته لهلأ !! منال : لك شو بدي قلهن !! شو بدو يطلع بأيدهن !! بعدين انا ما الي شهر عرفانة .. كنت لاحظ تصرفات عمر الغريبة لك بنفس يوم عرسنا طلبت منو يحملني ويدور فيني وقلتلو كتير نفسي جرب هالشعور متل الأفلام رفض بشكل قطعي !! قولي مو هالقصة المهمة .. بس .. بس في كتير شغلات خاصة ما بتنحكى ، وازا كنت اطلب منو يحرك شي تقيل بالبيت يتعب بسرعه ويحاول يخبي حتى لما نتخانق بيصير يرجف ويتعرق كتير بحسو رح يغمى عليه !! كل مرة كنا نتخانق سكر انا الموضوع لان خاف عليه وكنت مفكرة انو هو عصبي زيادة أريج : طيب وكيف عرفتيي ؟ هو قلك ؟ منال : لااااا هو ما بيعرف انو عندي خبر ، كان حاطط هدول الأدوية بالزبالة من تحت بس انا لمحت طرف الكرتونه وطلعتهن وعرفت لشو هن بعدين صرت اعرف وين بيحط ادويتو .. بيحطهن بشناتيتو الي بياخدها عالمدرسة معو تخيلي !! لك انا بس ما عم افهم كيف قدر يكزب بهيك موضوع مهم !! أريج : طيب شو بدك تعملي .. عنجد ما عم يطلع معي شي احكيه

العضوة: 275918 , منذ 4 سنوات

تنهدت وسكتت لان انا كمان ما كنت بعرف شو بدي اعمل .. أريج : بدك تواجهيه ؟ منال : لأ أريج : ليش ؟ منال : لأن هاد مرض من رب العالمين ، مو ذنبو ولا قرارو .. أريج : طيب بس هاد الموضوع مو سهل يا منال .. يعني ما بصير تحكمي قلبك لازم تحكمي عقلك منال : اي و حكمت عقلي .. عقلي بقلي انضبي ببيت جوزك لأنك ازا تطلقتي ما حدا رح يتقدملك ولا يتطلع بوشك ، بالذات لما يعرفو سبب طلاقي قال شو .. تطلقت لان جوزي مريض قلب .. والله العالم لتاكل وشي ويقولو ما تحملت جوزها ومو مرباية أريج : لك بس يعني ... يعني .. انو قصدي هاد الشي بأثر على حياتكن .. قصدي .. مو عارفة كيف بدي قلك منال : بعرف فاهمة عليكي .. وبعرف انو يمكن ما صير أم .. بس ما رح اتروك جوزي .. انا بس حكيتلك مشان فش البي مو اكتر أريج : مجنونة .. كلي المقلب وخليكي ساكته .. على فكرة هاد حقك وربنا ما بيرضى بالي صار .. اي لو انو لما اجا خطبك كنتي حاطة عدسات لونهن بني .. وبعد العرس عرف انو لون عيونك اسود مو بني لكان طلئك وانتي بدك تسكتي على هيك كزبة وهيك خداع منال : يا أريج نحنا عايشين بمجتمع شرقي .. بيعيب البنت وبيبرئ الشب .. وما حدا رح ينصفني .. بعدين خلص عمر بعاملني منيح شو بدي اكتر من هيك أريج : يعني شو بدك تسكتي ؟ منال : ايه .. رح حط عالجرح ملح واسكوت أريج : غبية .. يلا ضيعي عمرك مشان يقولو عنك الناس يا الله شو انها بنت أصل .. منال : هلأ انا جبتك لاحكيلك مشان تزيديها علي !! صحيح الموضوع مو سهل بس ما تكبريه وتحسسيني انو مصيبة وقعت فوق راسي أريج : هو فعلاً للأسف هي مصيبة وقعت فوق راسك ، لو كان حاكيلك من الأول كنا قلنا الشب واضح وصريح وحط عندك علم أما انو يحطك تحت الأمر الواقع فهي قلة شرف وقلة أخلاق منو و من أهلو منال : أريج لو سمحتي والله اعصابي مو متحملة ، نصيبي وأكلتو ليل نهار عم ببكي على حظي .. مو بس لأنو مريض .. وكمان لان حاسستو استغلني وخبى علي .. أريج : حسبي الله ونعم الوكيل ..

العضوة: 275918 , منذ 4 سنوات

ضلينا نحكي بالموضوع وسرقنا الوقت ... وقامت أريج مستعجلة مشان ترجع على بيتها وانا مشان قوم جهز طبختي .. وصلتها للباب و ودعتها منال : ما تقطعيني ايه ؟ أريج : ايه يلا باي .. مشت شوي وبعدين رجعت لعندي أريج : منال منال .. منال : ايه شو في ..نسيتي شي ؟ أريج : لأ بس من عجئتي نسيت ئلك شي مهم . .. كان في عنا بالشركة موظفة و استقالت لانها تجوزت .. وانا قدمت اوراقك لمدير القسم لعل وعسى يوظفوكي منال : ههههههه ايه يسلمو ايديكي بس انا يئست من الوظيفه أريج : انتي قولي يا رب وما تنقي ، انا قدمت ملفك فوراً ما لحق حدا قب لي يقدم منال : ايه .. يارب

العضوة: 275918 , منذ 4 سنوات

مسكتلي ايدي وحاكتني بجدية : واجهي عمر وما تخبي أكتر من هيك .. عالأقل تفاهمو بخصوص الموضوع ورتبو حياتكن على هالأساس منال : لا .. رح استناه حتى هو يصارحني أريج : لك !! ... اوووف منك ... يلا سلام منال : هههه سلام .. سكرت الباب و حسيت بغصة .. ندمت لأنو حكيتلها .. احياناً ما كل شي بحياتنا لازم نحكيه .. حتى لو لأقرب الناس النا بس سبحان الله نحنا النسوان هالعادة فينا مستحيل نغيرها .. ازا ما حكينا كل شي منختنق .. لا حول ولا قوة إلا بالله !! فتت اول شي اخدت الكيس ورجعت خبيتو بين تيابي .. ورحت عالمطبخ لحضر لقمة أكل.. بس عقلي ما كان بالأكل بنوب لما رجع عمر كان رايق ونسيان مناقرتنا الصبح .. وحكينا عادي وما حسستو بشي وكنت على طول ناطرة منو يقلي الحقيقة ويصارحني بس شكلو ما كان مفكر ابداً يعترف بالموضوع !! كأنو شي ذنب أو عيب !! ... احتسبت أجري عند رب العالمين ... واخدت قراري انو كمل حياتي مع زوجي شو ما كان الوضع بس كانت حياتنا باردة ومملة .. وعايشين عم نضحك على بعض هو مفكر حالو زكي وعم يكزب كزبة ورا كزبة ... وانا عاملة حالي جدبة وعم سدئو مره ورا مره لوقت ما بيوم من الأيام دئتلي أريج وبشرتني انو قبلوني بالشغل !! ما سدئت الخبر .. اديش الي عم حاول دبر شغل وما تدبر معي .. مع اني كنت من اوائل دفعتي بالجامعة والأساتذة كلهن يتوقعولي مستقبل مهني ناجح .. بس خابت التوقعات لأن الي معو واسطة بهل بلد بياكول الي ما معو واسطة حتى لو كان معو علم .. اتصلت بأمي وبشرتها واتصلت بأختي لبنى الي متجوزة بالسعودية ..

العضوة: 275918 , منذ 4 سنوات

نحنا كنا بس تلات بنات .. لبنى الكبيرة .. وانا الوسطانية ... و عهد الصغيرة اخر العنقود عمرها 18 فرحلي عمر على الوظيفة لأن كان بلش يتراكم علينا ديون بسبب تكاليف العرس الي كلفتو كل شي كان موفرو ، غير امو الي كانت تحاسبو على الراتب و تاخد منو الي بتشتهيه بدون ما تحسب حساب ازا الي ضلو بكفونا لأخر الشهر او لأ !! .. وانا كنت فرحانة لانو رح انشغل عن التفكير بذات الموضوع باشرت شغلي و أول اسبوع كانت أريج تساعدني وتوجهني .. كانت بالنسبة الي متل الأم !! مع انها بعمري بس كنت شوفها شي كبير شخصية ناجحة ومستقلة .. الها تفكيرها الخاص .. وعندها لمسة قوة مو موجودة بأي أنثى .. عطول عينها على النجاح والسعادة والقمة كل عريس يتقدملها تطلع فيه علة ونكشة .. ومصره انها ما رح تتزوج الا واحد ( كامل مكمل ) يمكن هي كانت اشطر مني بهاد الموضوع

العضوة: 275918 , منذ 4 سنوات

بس انا كنت اشطر منها بالشغل ... تطورت بشكل سريع وفهمت مداخل الشغل ومخارجو قدرت اثبت حالي واثبت جدارتي لمسؤولين عني وكانو مبسوطين مني ومن شغلي وانضابطي وهاد الشي عكس على نفسيتي وخلاني اثق بحالي من جديد و وقف على رجلي .. ونظرتي للحياة تتوسع بأنو هالحياة اكبر من زوج واطفال .. وفيها شغلات تانيه أهم .. اهم بكتير !! يمكن وقت الإنسان يرضخ لحكمة الله عز وجل ويسلم فيها ربنا بيكرمو وبيعطيه من واسع رحمتو ليكافئو على صبرو وإيمانو .. لهيك الله رزقني ... وطلعت حامل !! كنت بدوامي لما رجعت الأعراض نفسها تبع الحمل تصير معي .. لعية نفس و قرف من أي روائح حوالي حتى ما كان الي نفس على الأكل ابداً ما خطرلي موضوع الحمل ابداً ... بس كان في موظفة بسن الأربعينات معنا .. كانت ودودة ولطيفة وحست علي تعبانه ومرهقة لما اجت وسألتني شبني وشرحتلها الوضع قالتلي مبرووووك رح تصيري أم منال : هههه لا ما بظن سألتني ليش عم اضحك .. تلبكت وما عرفت شو قلها و لفلفت السيرة .. بس بلشت الفكرة تسيطر علي ما قدرت امنع حالي اروح عند الدكتورة واتأكد وافحص .. وبالفعل بعد الدوام اخدت أريج ورحنا على عيادة نسائية قريبة من الشركة و تاني نهار رجعت لعندا واكدتلي الحمل . ما وسعتني الدنيا من الفرحة .. اخدت اجازة من الشغل و رجعت على البيت و فوراً حكيت لأهلي و خبرت اخواتي .. وحبيت اعملها مفاجئة لعمر .. بس هو كمان كان محضرلي مفاجئة مو حاسبيتلها حاسب !! عملتلو الأكل الي بيحبو و حضرت السفرة متل ما بيحب .. و استنيتو ليرجع من شغلو ... بس تأخر عن موعدو المعتاد .. دئيتلو كتير وما كان يرد ... وصار المغرب وما في لا حس و لا خبر #يتبع

العضوة: 444896 , منذ 4 سنوات

التكمله انتضر😄

العضوة: 444896 , منذ 4 سنوات

رفع

العضوة: 444896 , منذ 4 سنوات

ارجوكي ردي

العضوة: 275918 , منذ 4 سنوات

#محاولات_قتل_امرأة الـــجــــــزء الــثالــث كنت رح موت من التوتر وأفكار تاخدني وافكار تجيبني .. آخر شي قررت أحكي مع اهلو واسالهن عنو .. اتصلت وردت علي حماتي منال : مرحبا مرت عمي ام عمر : اهلين منال .. كيفك ؟ كيفو عمر ؟ منال : انا.. منيحة ..بس وقبل ما كفي حكيي سمعت صوت المفتاح بالباب .. نزلت الموبايل عن ادني واتطلعت عالباب .. وفات عمر رجعت حكيت مع حماتي منال : ايه مرت عمي بحكي معك بعدين .. تصبحي على خير وسكرت الخط وانفجرت بصوت عالي بعمر : وينك لهلأ وليش تأخررت وليش ما عم ترد علي جنيت انت يعني ضلو ساكت وفات قعد بالصالة وحط رجليه على الطاولة الي قدامو ورجع راسو لورا م نال : لك شو صاير معك احكي عمر : هسسسسسس .. خلص عاد صوتك عالي سكتت ورحت قعدت عندو وضليت عم استناه يحكي عمر : تقلعت من الشغل منال : نعم ؟ عمر : تسربت اسألة الامتحان تبعي .. وانتشرت مع الطلاب والمدير دري .. وتقلعت لان الي سرقهن قال انو انا بعتو ياهن منال : وهن هيك من الباب للطائة بيسدئوه ؟ عمر : هاد الي صار حسيت عليه تعبان كتير وعم يحكي بصعوبة .. تركتو وقمت على غرفتي طفيت الضو ونمت وانا عم ابكي .. براتبين وكنا يا دوب مزبطين أمورنا كيف هلأ براتب واحد وجاينا ولد !!

العضوة: 275918 , منذ 4 سنوات

ضليت شهر ونص عم اشتغل و طلبت ساعات دوام إضافي مشان يزيد راتبي لأن كنت بدي وفر كل شي لأبني .. رجعت عالبيت الساعه 7 و لقيت عمر قاعد عم يتفرج عالتلفيزون متل العاده والبيت متل المزبلة و جايب اكل جاهز الو طبعاً من اخر المصاري الي ضلت معو ومو تاركلي شي اكلو .. حسيت حالي قرفانه منو كأنو ما فيه جنس الرجولة .. عملت حالي مو شايفتو وبدي فوت على غرفتي لاتسطح عمر : ما بدك تحطيلنا عشا ؟ كأنو هالكلمة خلتني انفجر !! حسيتو متل الحيوان الي عم ياكول ويشرب و ينام .. انفجرت فيه وقلتلو استجي على حالك واطلع دور على شغل رجلي و ضهري وجعوني بطلع من وش الصبح وبرجعلك عالمغرب وانت ما عم تستحي على حالك .. عالأقل خلينا نوفر شي مشان عملية ابنك الي جاي التفت علي عمر و هو مصدوم منال : ايه ابنك .. انا حامل .. الكل بيعرف إلا انت لانك بلا احساس عمر : ليش ما خبرتيني ؟ منال : لان ما حسيتو بهمك !! عمر : لازم تنزلي الولد !! فكرت حالي سمعتو غلط .. كنت ناطره يقعد عن رجلي ويعتزر مني ويقلي خلص اقعدي بالبيت وارتاحي وانا بشتغل كل شي عنك بس ملامحو كانت باردة وبليدة ... عمر : بكرا .. بكرا بتروحي تنزليه منال : عم تحكي عنجد ؟ بدك تقتل ابنك ؟ليش !! عمر : متل ما عم ئلك .. ما بدنا ولاد منال : لك بدل ما تشكر ربك انو اعطاك ولد بالحالة الي انت فيها !! لك يمكن ما يصحلك مره تانيه تكون اب عم ترفض نعمة ربنا يا ظالم عمر : انتي شو عم تخبصي ؟ منال : انا ما عم خبص انت الي عم تخبص وربنا رح يحاسبك على كل شي .. انا بعرف بمرضك ولهلأ ساكته ومتحملة قرفك والولد ما رح نزلو لو بتموت كان هداك اليوم يوم اسود .. بعد ما واجهتو اني بعرف بمرضو وشافني راضخه وقاعده عندو بدون ما اشتكي .. صار يتمقطع فيني وحط ايديه ورجليه بمي باردة .. وما عاد نزل دور على شغل بنوب وصارت الأدوية مرمية بكل زاوية بالبيت .. لا وصارت تكاليف الدوا تتاخد من راتبي كنت عم انطفي عالبطيئ .. كل ما استلم الراتب ياخدو من ايدي متل ما هو ويقلي ( عندنا ديون .. وامي بدها مصروف .. ولازم اجيب الدوا .. ورح اشيل شوي مشان بس تخلفي ) لما كنت ارجع عالبيت ولاقيه مكركب كل شي كأنو صاير معركة ما عاد تحملت و قلتلو يصير يروح يتغدا عند اهلي وفعلاً اتفقت مع امي انو كل يوم عمر ياكول عندهن لارتاح شوي ..

العضوة: 275918 , منذ 4 سنوات

مع هاد كلو كنت اشتغل شغلي على احسن وجه وما قصر فيه لان عرفانه ازا انفصلت ما عاد نلاقي ناكول .. انخطبت أريج لشب بيشتغل حداد مو متعلم واطباعو غريبه وقت رحت حضرت خطبتها زعلت عليها كتير اخدت واحد عكس كل شي كانت تتمناه وتوصفلي ياه بلش شغلها يرجع لورا و كنت صححلها كتير شغلات.. مع انو وضعي كان اسوء منها بألأف مرة بس كنت متماسكة اكتر منها صرت كل يوم ارجع على البيت ما لاقي عمر .. يروح على بيت اهلي يتغدا عندهم ويسهر عندهم ويرجعلي الساعه 10 لكون نظفت البيت ورتبتو ...بلشت حس حالي رح انفجر من هاد الموضوع .. مرقو خمس شهور ... وبين الحمل علي لان صرت بالشهر التامن .. وزاد تعبي ..و الوضع متل ماهو ما في شي تغير رجعت على البيت وكنت هلكانة وحاسة بتعب كبير .. كالعاده ما لقيت عمر بالبيت قلت اكيد بكون ببيت اهلي ضليت بتيابي الي لابستهن ونزلت واخدت تكسي لروح على بيت اهلي وشوف اخرتها معو ولأيمت هالحالة ... خلينا نحط حد للموضوع قدام اهلي صارلو ست شهور وشكلو مو ناوي يدور على شغل .. وصلت وحاسبت الشوفير و فتت وانا حاطة ايدي ورا ضهري وعم اتنفس بصعوبة .. بيت اهلي كان الو ارض ديار بعدين باب رئيسي كبير بعدين مساحة صغيرة وبعدا باب البيت الخارجي ..

العضوة: 275918 , منذ 4 سنوات

فتت وكانت الشمس غايبه ومافي ضو واستغربت ليش اهلي مطفين ضو ارض الديار .. لقيت الباب الخارجي مردود رد حطيت ايدي عليه مشان افتحو وبعدين سمعت صوت غريب و وقفت كان صوت وحده عم تضحك وتحاول تخبي ضحكتها قربت ادني اكتر من الباب وقدرت ميز انو هاد صوت اختي عهد عهد : خلص روح هلأ اهلي بيحسو علي انو تاخرت معك على الباب عمر : ماشي رايح بس بكرة برجع بشوفك عهد : هههههه طيب ناطرتك بكرا كانو رجلي عم يرجفو وحسيت حالي بدي استفرغ .. رجعت لورا واستندت على الحيط .. وانفتح الباب الخارجي و طلع منو عمر وهو لسه عم يحكي مع عهد عمر : يلا فوتي لجوا ديري بالك على حالك كنت عم اتطلع فيه وهو لسه ملتفت عليها وعم يودعها .. بعدين لف وشو لقدام و شافني .. وكانت عهد لسه واقفه عم تودعو على الباب عمر : منال ؟ بس سمعت عهد اسمي صرخت وطرقت الباب بقوة تلبك عمر واجا ليقرب مني : ايمت اجيتي ؟ منال : ولك الله لا يوفئك ..