طِفلك الرضيع أقل من ٦شهور ؟؟!!🙋🏻 شايلاه طول النهار و مش عارفه تعملي منه حاجه ؟؟؟!!🙋🏻 حتى لو نام وجيتي تسيبيه على سريره بيصحى ويصرخ في ثواني و مش بيحب ينام غير في حُضنك ؟؟!!!🙋🏻 مشكلة كبيرة و يمكن كابوس للأمهات اللي بيحصل معاهم الموضوع دا بس تعالوا نِعرف ليه بيحصل للأطفال دول كدا عشان نعرف نحل المشكلة دي ..... يلا بينا 🙋🏻🙋🏻🙋🏻🙋🏻🙋🏻🙋🏻 تعالو نفكر من وجهة نظر الطفل اللي لسه مولود .... واحد بقاله ٩شهور عايش في بيئة مغلقة دافئة وهادية و مكانش بيعاني فيها من الغازات ولا التقلصات و لا بيحس بالبرد ولا الحر ألا و هي رحم الأُم .... و فجأة بينتقل إلى بيئة تحتوي على عكس تماماً اللي كان موجود في الداخل ...... عشان كده نسبة من الأطفال حديثي الولادة -نسبة مش قليلة -بيكون دايماً عندهم إحساس بالخطر بالذات لو حسِّوا إن الأُم بعيد عنهم ... و بمجرد ما بيفقدوا إحساس التلامس معاها دا بيترجم في مخهم إنها إختفت حتى لو هي جنبهم في الوقت دا لإن مخهم مش متطور زي الكبار إنه يدركوا وجود شخص في المحيط بدون التواصل معاه جسديا .... و الأُم في الوقت دا بتبقى الملاذ و المنقذ و الملجأ الوحيد من كل أحاسيس الرعب والخطر من المجهول اللي بيشعر بيها الطفل من النوع دا ....يعني تعلُّق الطفل بيكي في هذا الوقت إحتياج و مسالة حياة او موت بالنسبة ليه مش دلع أو عادة إتعود عليها ...😌😌 فهمنا هو بيعمل كده ليه ......طيب نحلها إزاي المشكلة العويصة دي بأه ؟؟؟!! 🤦🏻‍♀️🤦🏻‍♀️ 👈🏻 مطلوب منك في الفترة دي بالذات أول ٣شهور تكوني جنبه وفعلاً تحسيسه بالأمان و دا مش هايعلمه الدلع و لا حاجه بالعكس هايديه ثقة في نفسه و ثقة في البيئة اللي حواليه .... و بالتدريج حواسه هتبدأ تشتغل و يكتشف حاجات يعرف يلهي نفسه بيها عنك.. زي حاسة البصر عند الشهر الثالث بتبدأ الرؤية تتضح شوية. و هتلاقيه بدأ يعلق عينه على الحاجات اللي بتنور زي اللمبات أو المتحركة زي المراوح..و هايبدأ يشوف إيده و يحطها في بقة ودي حاجه كمان بتحسسه بالأمان...هاتيله اللعب اللي بتتعلق في السرير وبتنور و بتطلع أصوات كًوسيلة من وسائل الإلهاء في المرحلة دي. 👈🏻 أتعلمي علامات البكاء عند طِفلك و دي بتختلف من طفل للتاني وشيليه قبل ما يبدأ في البكاء عشان ما يربطش البكاء بالشيل و كده مش هتخلصي. 👈🏻 الأول لحد ٣شهور مطلوب منك تشيليه قبل ما يدخل في نوبة بكاء وفِي الغالب المرحله دي بتخلص في سِن ال ٣شهور لكن لو طولت عن كده ...مطلوب منك تهديه و هو في مكانه و تشغليه بحاجات تانيه و ما تشيليش علطول و طولي فترة التهدئة دي بالتدريج و ممكن تستخدمي الكرسي الهزاز أو السرير الهزاز للتهدئة بدل الشيل( طبعاً ممكن نستخدمهم قبل كده بس ذكرتهم هنا ك حل للتهدئة من غير ما نلجأ للشيل) المهم تكوني لامسه جسمه وسامع صوتك جنبه لحد ما يتعود يهدي نفسه. 🤔🤔طيب ما نسيبه يعيط و شوية شوية هايتعلم يسكت لوحده؟؟!! 👈🏻 مسموحلك تسيبيه يعيط من ٥ دقائق ل ١٠ دقائق فقط تقدري تنجزي فيهم حاجه مهمّة... لكن لو فترة أطول من كده في طفل أقل من ٦شهور بتعرضه لمشاكل خطيره زي الإختناق أو القيئ أو ممكن الشرقة ...كمان ممكن يحصل لا قدر الله نزيف أو موت لخلايا المخ . ف أظن تهديه و تلعبي معاه أسهل 🙂 لو حسيتي إنك مضغوطة أطلبي المساعدة من حد قُريب ليكي....لحد ما الفترة القصيرة دي تعدي و حطي في دماغك إن مفيش حاجه بتدوم للأبد ..و دي مرحلة وهتعدي المهم تبقي فاهمة إنتِ بتعملي إيه و ليه 🙂🙂 #اعادة_نشر #د_محمد_الملا 👶🍼🧑