حماتي وسلفتي ما طايقيني ، ح يصرلي شهر عندن وبعاملوني كالغريبة ، بيجتمعوا على شرب القهوة الصبح وما بنادولي💔 وما بيحكوني ، مع أنّي أنا حدا لطيف جدا"😔 مرّة من المرات فتت على غرفتي احكي بنت خالتي وفضفضلا كيف حماتي وسلفتي متفقين عليي😢 ف قالتلي : من أيمت الصرماية بتتفق مع الئبئاب وصاروا بالعتبة أصحاب😂😂 قلتلا : لك هس يبلاه بشخطوا هاللسان😂 😂 قالتلي : وك ليش ساكتيلون اردحي عليهن بالعالي😀 قلتلا : فظنوا ودّنا ضعفا"، والله ما وددناهم إلا كما تربينا❤ صحيح وليه أيمت بدك تجي لعندي😂 مالقيت غير شي ركض من حد الباب وراح حطيت عيني من عند المفتاح ولزقت أدني لقيت ابن سلفتي ركض لعند ستو وقلا : مرت عمو عما تحكي مع وحدة عالموبايل وقالتلا حكي بلا طعمة ما فهمتو وبعدا أيمت بدك تجي لعندي ؟! قامت حماتي طلعت من عِبّا 100 ليرة وقالتلو بتراقبا بس تحكي وكلشي بتسمعوا بتنقلي ياه وكل مرة بعطيك 100 ليرة 💵 أنا صدمني هالتصرف هاد ؟! خطرت ببالي خطة جهنمية ، عيّرت جوالي منبه ليرن بعد ربع ساعة وبعدا طلعت عالصالون لقيت سلفتي لافة رجل ع رجل وشاكلة تمها وحماتي بتابع عروس بيروت وبتزورني وابن سلفي بلحوس أصابيعه الملغمطين بالجبنة من كيس الشيبس أبو 100 ليرة😐 قعدت معون وبعدا بشوي رن تلفوني ، فورا" ركضت على غرفتي وسكرت الباب وعملت حالي رديت ، بس شفت رجلين ابن سلفي صاروا عند الباب قلت : أهلين ماما ، كيفك ياقلبي ، أنا بخير ، وحماتي الله يسعدها بخير والله يا ماما مافي منهم ناس طيبين ❤ لا تخافي عليي يا ماما أنا طلعت من عند أهلي لعند أهلي ❤ بس سكرت الجوال لقيت ابن سلفي راكض بكرشه وبوشوش سته وأمه وحماتي متل العادة دكتو 100 ليرة ☺ رديت بعد يومين عملت نفس الحركة وركضت على الغرفة اعمل حالي عما أحكي مع بنت خالتي قلت : يا أهلا رهوفتي ، اشتقتلك ، لك تعي لعندي والله سلفتي كتير لذلوذة وبتفوت عالقلب❤ رح تحبيها من أول قعدة ❤ ونفس الشي ابن سلفي كان موصل التقرير متل ما هوي لعند سلفتي وحماتي وشفط ال 100ليرة حلال زلال😆 مبارح الصبح فقت اغسل وجهي واعمل نسكافيه متل العادة لقيت حماتي مبتسمة ابتسامة عريضة وسلفتي معها كمان ابتسامة لطيفة غير مقنعة قالولي تعي شربي قهوة معنا حسبنا حسابك❤ وكمان بعد ما خلصنا غدا قالتلي حماتي عملي شاي يا بنتي وتعي تابعي هالمسلسل معنا كتير حلو أنا أكيد فرحت كتير عملت شاي وقعدت من أول شفة صرت اقرأ وجوهون قلت ياالله الإنسان فيه بذرة خير وبذرة هالشر وبذرة الخير بتنبت وقت الناس تسقيه بالخير سبحان الله لما نتعامل بالإحسان ، حتى الشرير تلقائيا" بتتروض أخلاقه وبصير يستحي من نفسه أمامك ولما نتعامل بالكلمة الطيبة والمعاملة الطيبة والإنسانية عن جد بتختلف معاملته معك ، مارح يكون في مكان للعدوانية أبدا" #أحسِن حتى يُحسَن إليك ❤ ..... هلق شيلونا من هالفلسفة ومن نظريات هالحياة العميقة وساعدوني 😭 فقت اليوم الصبح فتحت باب غرفتي لقيت ورقة مكتوب عليها #قطع_الأعناق_ولا_قطع_الأرزاق شلشتني الورقة ؟! طلعت لقيت الوضع رايق مع حماتي وسلفتي ومحلانا ، بس نظرات ابن سلفي تتأبط شرا" لبعدين لفهمت أنو هوي صاحب الورقة يلي لقيتا😂😂😂