بناااات انا ولدت الحمدلله رب العالمين ابغا اقولكم تجربتي.. نصيحتي لكل بكرية توكلي على الله وتذكري انه الولاده وتعبها هو الطريق عشان تحضني طفلك ودا سر انك تقدري تمري تجربتك سواء كانت صعبه او سهله.. كله يعدي 🧡 المهم انا جلست اطلق ٣ ايام. ألم زي الدوره.. واقنع نفسي انه ما حيكون طلق لانه يجي ويروح م كان ثابت.. مرات كل ربع ساعه الساعه اللي بعدها مافي شي واللي بعدها ألم أقوى وهكذا. المهم كنت اطلع سلم وامشي واقعد في البانيو موية سخخخنه واسوي قرفصاء واكل تمر واناناس يعني طبقت كل حاجة عل وعسى يزيد او تنفك المويه ماش 😂 الين جا اليوم الثالث العصر كان طفشت صراحة وقلت خل اروح اكشف رغم اني كنت خايفه ينقال لي لسا ما فتح ارجعي. . ولانه ما كان في اي اعراض ثانيه ابدا َ.. دخلت سوولي تخطيط وبعدها جا اسوأ وقت بحياتي لما سوولي الفحص الداخلي بكيييييييت بأعلى صوت وانهرت رفست الدكتوره وكان شي ما ينوصف 😭 جاتني هستيريا صرت اترجى زوجي يرجعني البيت اول مره ينعمل لي وحسيت قسوة العالم فيه 💔 المهم بعد معاناة قدرت تفحص وقالت انتي ٣ سانتي ومترقق ٧٥٪ بدخلك اليوم غالباََ تولدين الليله هنا بديت احس براحة انه خلاص قربت. . .. زوجي سوا الإجراءات حقت الدخول وفي الوقت ذاك بديت احس انه الطلق قاعد يزيد بس توقعت من ألم الفحص لانه هيج كل حواسي.. فعلاََ لما رحت غرفة التنويم جت دكتوره ثانيه تفحص ونفس الانهيار حصل وخلال ساعه من ٣ سم صرت ٥.. سوولي حقنة شرجية وتخطيط مستمر طبعاََ بعدها طلبت ابرة ظهر عشان ارتاح وللأسف ما ارتحت 😂 صار الرحم ما شاء الله يفتح مره سريع لدرجة تهنيت فيه ساعه بس وبعدها وقفوه لانه وصلت ٨ سم وصار لازم اتدرب ع الدفع. اخخ ي بنات هنا بدت المرحله الجد..َ دفعي كان كويس الحمدلله لني تدريت كثييييير أثناء حملي.. الين ما وصلت ١٠ سم كان خلاص حيلي انهد.. كنت ادفع ساعه مدري ساعه ونص الين ما وصل البيبي في الحوض وشايفينه بس ما عاد ينزل اكثر. َحطولي أكسجين وخلوني اشرب مويه عشان اقدر اواصل.. بعدين جا وقت الاستشاريه تتدخل وتسوي دعم للمنطقة اللي تحت وتساعد البيبي بس اخر شي اضطرت تجيب شفاط وتطلعه وكانت احلى لحظة بحياتي وبكيت وصرخت بأعلى صوت وزوجي جمبي يبكي محنا مصدقين انه خلصنا ولاده خلال ٥ ساعات 😭😭🧡🧡🧡🧡 ياربي لك الحمد كما ينبغي لجلال وجهك وعظيم سلطانك شعور ما ينوصف كنه حلم.. بعدين هنا بدت معاناة الخياطة لانه مع شفطه صار في تمزق ف خيطت جوا وبرا يعني ما قصت عجان بس ايش ما زال في ضرر.. اللهم الحمدلله الواحد خلص ع خير وجا اليوم اللي اكتب تجربتي فيه الحمدلله يارب ❤️.