اللهم لك الحمد دائما وابدًا .. انا بكرية اخر دورة١٢ يناير يوم الخميس اللي فات كنت ٣٩+٥ يعني باقي لي يومين واخلص التاسع ورحت للدكتورة لأنها قالت بتسوي لي تحريض رحت عندها وسوت لي وقالت راح ينزل منك دم لاتخافين .. رحت البيت وفعلا بدأ ينزل مني دم اللي هي السدادة وكان عندي الم خفييف اسفل البطن يجي ويروح واستبعدت انه طلق مشيت شوي وكليت تمر .. صليت الفجر ونمت نومتي ماجت ساعتين نمت ساعة ممكن وصحيت ٧ ونص الصبح على الم محتمل والالم بدأ يشتد ويقوى جلست احسب وكانت الطلقات غير منتظمة قعدت على هالحال الى الساعة١٠ بعدها بدأ يزيد الالم ويصير كل ١٠ دقايق تجهزت وخليت زوجي يوديني لا أهلي وأمي صارت تحسب لي كم بين طلقه وثانية وكل ماجاني الم خلتني امشي واخذ شهيق وزفير وكان يخف الالم مع هالحركة الله يجزاء امي كل خير ويحفظها لي كانت تأكلني تمر وبطاطس وتشربني شاهي تقول عشان تتقوين للولادة وقعدت الى ماصار بين الطلقات ٥ دقايق ورحت المستشفى لأنها بعيدة وكان اصعب طريق يمر علي كنت اتلوى في السيارة دخلوني غرفة الفحص وجهاز تخطيط وعلى السرير كل نص ساعة تجيني وحده تفحصني الفحص الاول كان فاتح٢ ونص طبعا لا احكي لكم ان هذا اصعب وقت كل ماجاني الم مشيت شوي وتنفست وكنت اتأوه من الالم وادعي واحوقل بعدها فتح ٣ ونص الين صار ٤ ونص قعدت من الساعة١٢ الى ٥ العصر تقريبا ودخلوني غرفة الولادة عطوني ابرة الظهر والحمد لله على هذه النعمة ما اقولكم وش كثر ارتحت لما خذيتها وحسيت الحياة صارت وردية وقعدت اسولف واضحك مع زوجي وأهلي .. طبعا صرت ما احس بالطلق بس يشوفونه بالجهاز واذا جاني احس بتحجر خفييف اسفل البطن اذا جاني شهيق وزفير وسبحان الله يزيد قعدت كذا والرحم كل شوي يزيد سانتي والدكتورة فتحت لي موية الطفل وحسيت فيها وهي تنزل الى ماوصل ٩ جت الدكتورة قالت خلص ١٠ دقايق ونبدأ ولادة وفعلا قالت بسم الله اذا قلت لك ادفعي سويها وكأنك جالسه تسوي براز الله يكرمكم سبحان الله مع اني مخدره وما احس بس كنت احاول ادفع وكل مادفعت تشجعني زيادة وتقول ايه انا شايفه شعر البيبي🥹 يمكن دفعت ٤ مرات وطلعت بنتي شفتها قدامي سبحان الله وبعدها طلعت المشيمه مني وحسيت فيها وهي تطلع شعور غرييب والحمد لله هذي قصة ولادتي الله يكتب اجرنا جميعا ويرزقنا ولادات سهلة ميسرة وذرية صالحة