بسم الله . السلام عليكم ، صباح الخير .. . بفضل الله ولدت امس الصباح عملية قيصرية . طبعا انا اولد قيصريات لداعي طبي سابق وهذي هي عمليتي الرابعة . . باختصار قبل احمل كانت تحربتي الاخيرة صادمة و سلبية ومخيفة وربي اللي عداها سبحانه ، اخذت اربع سنوات مافكر بالحمل بس كنت ادعي يارب اذا في الحمل خير لي انك تكتب لي احمل بالوقت اللي تعلم انه يناسبني المهم حملت بعد هالاربع سنوات ، وكنت من قبل الحمل واثناءه وانا ادعو بالتسهيل والتيسير و لا التفت للظروف المحيطة ولا اوجع راسي بتقولون زي ايش ظروف .. مثل انه تنقلين من بيت لبيت اثناء حملك ! 🙂😂 ومثل المدرسة اللي ماخلصت الا وحنا في غاية الانهاك والخ .. المهم بالعادة يا اخواتي يكون حملي ثقيل ثقيل ثقيل الا حملي هذا بفضل الله سبحانه وتعالى ماكان ثقيل و ربي رزقني بعاملة في بداية حملي كانت مثل البلسم . بعد كذا انتقلت من منطقتي وبيتي وجيت عند اهلي عند بداية الثامن .. عاد تعرفون هالشهور الاخيرة والنوم وصعوبته والاكل كيف يعور والخ لكن سبحان الله كيف ربي يسر وسهل ومرت ليييييين جيت بالاسابيع الاخيرة وقربت العملية بديت اوسوس يخواتي واطالع ببناتي و ابكي و اخاف على نفسي يصير فيني شي واتركهم وراي😢 كل شوي رايحة الطوارئ خايفة لحد ماحددوا عمليتي وحليت كلما اتذكرها اتوتر وبطني يوجعني واخاف ويجيني تقلصات الطلق الكاذب وارتاع والخ نحفت كثير و صار وجهي شاحب من قلة النوم وانسدت شهيتي غصب عني وقبل عمليتي بيومين تخيلوا جهزت غرفة نفاسي عند اهلي 😁 كان ودي نفاسي يكون ببيتي لانه افضل واريح لي بكثير بس قدر الله وماشاء فعل والحمد لله بعد اني جيت عند اهلي يوم التنويم لا احكي لكم الخوف اللي فيني لدرجة مانمت وبس ادعي ادعي ادعي دخلت العملية وعطوني نصفي بس للاسف اللي سواه لي متدرب فما ضبط وخفت تجيني نوبة هلع قلت لهم انا خايفة واحس بوخز يعني ماتبنجت صح وطلبت منهم يخلونه كامل قمت من عمليتي ياربي لك الحمد والشكر .. كانت الساعات الاولى بعد العملية رعب والم شديد و اطرافي باردة ومادري كيف اوصف الشعور فيها لكن سمعت الاذان وقمت ادعي يارب خفف وهون علي .. وعدت الحمد لله جابوا لي بنتي .. صغيروووونة مرة بس المهم بصحة وعافية ياربي لك الحمد والشكر كنت مسوية جدول الولد لكن زوجي ماحلل وقتها ولا شاف لو عنده لزوجة او شي .. وكان رافض الحقن المجهري للولد .. قلت له ترى ممكن اسوي كل شي وتجي بنتنا الخامسة قال عادي .. واضح كان مستبعد😂 بس جاتنا احلى بنوتة الله يبارك لنا فيها عمليتي هذي جعلها تعالى بردا وسلاما مثل مادعيت طول حملي كنت اردد يارب اجعل ما اخافه واخشاه بردا وسلاما علي كما جعلت النار بردا وسلاما على ابراهيم مريت بخوف ورعب وحزن لكن ربي رفعه كله بفضله وكرمه ، ومن هنا اقولكم ان تجارب الولادة والحمل تختلف عن بعضها بشكل جذري اذا الله تعالى اراد! يعني حملي هذا و ولادتي مرة مرة مختلفة عن اللي قبلها ماشاء الله تبارك الله لاقوة إلا بالله عليكن بالدعاء ياخواتي والتعلق بالله سبحانه وحده لاشريك له والصدقة وحسن الظن بربي اللطيف الرحيم اعتذر عن الاطالة ، واللهم صل وسلم على محمد وعلى آله وصحبه أجمعين❤️ استودعكم الله الذي لا تضيع ودائعه .. باعطيكم اهم الحاجات اللي استفدت منها بعد التجارب: ١- ايا كانت ولادتك حاولي ما تتوترين واشغلي نفسك ٢- بعد العملية القيصرية لازم بعده بساعات تمشين ، المشي افضل طريقة للتخلص ان شا الله من الغازات وايش بعد ؟ ٣- خذي معك كمون مطحون المخصص للشرب ، ضروووري يابنات .. سواء والدة قيصري او طبيعي .. خذي كمون مطحون وتصيرين باليوم كذا مرة تحطين ملعقة وماء مغلي وتغطينه ربع ساعة ثم تشربينه .. يوخر الغازات ويسهل الهضم ويمنع الامساك ان شاء الله . ٤- البنج النصفي افضل من الكلي لو خيروك ، وبالنسبة لالم الابرة في الظهر شخصيا جربت الحجامة بعده بأشهر والحمد لله راح .