السلام عليكم ورحمة الله يا احلى ماميز، أنا الحمد لله رب العالمين ولدت اليوم بفضل الله سبحانه وتعالى، اللي شجعني اتخذ القرار هو عضوة في البرنامج لما حكت قصتها انها ماسمعت كلام الدكتوره وتمت فتره ماتراجع وخلال يومين توفى الجنين… قصتي كالتالي، انا عندي سكر حمل وقالولي لازم اولد ع الاسبوع 38-39, لو تأخرتي الجنين معرض لمضاعفات من حميع النواحي ونحن عشان نكون في بر الامان، يانه الطلق يجي طبيعي يانحفزه… اليوم كملت الاسبوع 39، رحت عند دكتورتي وكشفت قالتلي الرحم فاتح 3.5 والتخطيط مبين عندك طلق خفيييف وبارد…. وانتي حضرتك عندك سكر حمل وللحين ماعندج لا طلق ولا انفجار كيس، لازم اليوم حالا نولدج صناعي، اسمعيها مني، انا تهمني مصلحة البيبي انا فورا قلت للدكتوره تمام، قالت ع الساعه ثنتين الظهر تحركي للطوارئ، فعلا هذا اللي سويته، طلعت من الموعد جهزت اغراضي وتحركت للمستشفى، تحاليلي في اواخر الشهور كانت مبينه ان عندي بكتيريا وبقوه، فعطوني مضاد حيوي على جرعتين قي مغذي وبين كل جرعة اربع ساعات، وعطوني تحميله لتليين الرحم وتحمية الطلق، على الساعه سته المغرب الدكتوره جات وكشفت علي ولقت ان الرحم فاتح خمسه، لاني خلال فترة الانتظار بعد ماسوولي التحميله، انا تحركت من مكاني وتميت اسوي تمارين القرفصاء، واكلت اناناس وشربت ماي وسويت وضعية الـ doggy, قالو انها تخلي الجنين ينزل… المهم راحت قالت ممتاز، ودخلت ابره داخل الرحم وفجرت الكيس، هني بدئت انقباضات خفيفه، راحو ركبولي طلق صناعي مغذي/وريد، المهم هني بدئت الانقباضات تشتغل بشكل قوي، يوم اشتدت على سبعه سانتي راحو عطوني ماسك اوكسجين عشان اتنفس داخله في كل طلقه يساعد في التخفيف وبعد القابله عطتني مسكن بنسبة خفيفه قي مغذي الطلق الصناعي قالت عشان يخفف الآلام وفي نفس الوقت الطفل ماينولد نايم خلت نسبته قليلة… المهم وصلت لعشرة سانتي بعد طلقات واهات وصراخ، غيرو وضعيني وخلوها ولاده والدكتوره قالت لي سوي دفع، قلتلها يادكتوره اترجاج خبريني كيف الطريقه الصحيحه… قالت خذي نفس عميييق واكتميه واعملي نفسك قاعده تتبرزين الله يعزكم واضغطي ايدينج الاثنين على افخاذج لبطنج… تميت اسوي دفع، تطلع الراس وترجع مره ثانيه لمدة خمس مرات او اكثر، نبض الجنين فجأه ضعف، عصبت علي الدكتوره وقالت حالا راح تحزقين وتكملين اخذ النفس، الجنين تعب وراح نضطر قيصري… كانت تصارخ علي والممرضه والقابله كلهم وقت واحد عشان يشجعوني وزوجي دخل معاهم…. تميت اصرخ بشكل هستيري من الألم، راحت قطعت مكان العجان في الطلقه وشدت الجنين عشان تساعدني مره وحده، كان ألم الموت تميت اصارخ نفس المجنونه من الألم… والحمد لله تم الموضوع على خير وتيسير من الله سبحانه وتعالى… ملاحظات: خلال الفتره اللي قالتلي فيها الدكتوره تعاليلي على الساعه ثنتين الظهر، انا يوم رجعت البيت من الموعد، شربت جاي كرك بس ضفت عليه ملعقة صغيره قرفه، و اكلت تمره وحده، عشان سكر الحمل…كلي العدد اللي تبينه اما في الايام اللي فاتت، اللي ساعد ان الرحم يلين ويفتح بالتدريج من دخلت التاسع، كنت امشي كل يوم ثلاثين دقيقه وفي ايام قليلة كنت امشي ساعه، على حسب الطاقه، المهم اقل شي نص ساعه وشكرا، الشي الثاني كنت كل يوم اكل تمر مره ثلاث تمرات ومره خمسه ومره سبعه على حسب سكري خلال هاليوم… وايضا كنت اتسبح بماي دافي اخر اليوم واركزه على الظهر، واركب سلم او اسوي قرفصاء خلال هذا اليوم… ولو قدرت احرص انه يحصل جماع، بس عشان اكون صادقه كانت مره بس او مرتين، لان للاسف في ظروف منعت…. فكنت معتمده ع الرياضه كبديل… وايضا في طريقة علمتني اياها عمتي سويتها مره فقط، قبل اربعة ايام، غليت حليب وداخله مسامير قرنفل و قرفه وملعقة صغيره زيت السمسم، هي قالت لازم يكون في اربعة ايام بين كل كوب وكوب…وقالت المفروض 15 مسمار و 15 قرنفه…. بس انا مالتزمت بالعدد وقللت، وهذا اختياري انا… ماحبيت اكثر من شي لا سمح الله يسبب مشكله للجنين بعد ماولدت صارو كل كم ساعه يجيكون على سكر الجنين 🥲 وناوين يسوون فحوصات ثانيه عشان البكتيريا… دعواتكم ربي يحفظها يارب ومايكون فيها غير كل خير…🥺 هاذي تحربتي بكل تفاصيلها، يارب تستفيدون، وشي مهم، كنت اقرى سورة مريم شبه يوميا واكثف الدعاء ، وفي المستشفى خلال الطلق كنت اذكر الله، والله العظيم هو هذا اللي هونها علي ❤️😞 الله يرزقكم جميعا بولادة مباركه يسيره على خير وبركه توفيق ❤️🥰 نستناكم تبشرونا واللي عندها سكر حمل، اسمعي كلام الدكتوره ولا تغامرين بصحة الجنين وتقولين ياريت… الله يشفيج ويحفظ الجنين من اي مضاعفات… مع العلم هاذي ثاني ولادة لي